Eyo, mwafwa Njambi atonda ngwendi banu balikungulule omwo bamulemesa. Mbimbiliya ngwayo: “Tuliyongoleni umo na mukwabo na kulikwasa umo na umo na kumwesa cizemo na kulinga mwamubwa. Kesi tulikele kulikungulula hamolika.”—Vahevelu 10:24, 25.

 Yesu wamwesele ngwendi baka-kumukabangeya bakalikwatasana na kupwa cibunga omwo wabalekele ngwendi: “Nga mulizema umo na mukwabo, asinoni boshe bakazibuka ngeci mu bandongesi bange.” (Yowano 13:35) Ngila yakama ibasa kumweselamo eci cizemo bandongesi ba Kilistu inapu kulikwatasana na bakwabo baka-kukulahela. Banapande kukala mu bikungulukilo na kuliwana-wana hamo mangana balemese Njambi. (1 Kolinte 16:19) Co boshe bapwa bandolome mu kaye koshe.—1 Petulu 2:17.

Tunapande kulingako bimo keti kulikwatasana lika na bulombelo bumo

 Nameme Mbimbiliya imwesa ngwayo banu banapande kulikungulula hamo na kulemesa Njambi, kuimwesa ngwayo munu asa kuzibisa Njambi kubwaha nga alikwatasana lika na bulombelo bumo. Oloni bulombelo bwalikwatasana nabwo bunapande kumukwasa kutengulula yoyesi yendi. Cakumwenako, Mbimbiliya ngwayo: “Kulemesa kwakubwa kuje kwanayongola Njambi Tate kukekwo oku, kulela bisiwa na bifwile mu tuyando twabo na kulinyunga ikeye babenya kutunda ku byuma bya mazilo bya mu kaye.”—Yakomba 1:27.