Eyo. Njambi waka mbunge bangamba bendi baje babinja. Mbimbiliya inendeka hali ngamba ya Njambi ngwayo: “Shukulu Kalunga akamukwasa omwo abinja.” (Myaso 41:3) Byuma bitatu binatako byasa kumikwasa nga muli na kubinja mushongo uje kuwesi kwola:

1.   Lombeni Njambi amyane nzili mangana mukolese. Co muwana “kwoloka kwa Njambi kuje munu naumo wahi asa kuzibisisa.” Oku kumikwasa mukolese na kutepulula ku bishoti byeni.—Filipu 4:6, 7.

2.   Akeni mbunge ku byuma byabibwa. Mbimbiliya ngwayo: “Mbunge ya kubwahelela ikangwisa mubila, oloni mbunge ya kulinyenga simbu yoshe iyondwesa mubila.” (Visimo 17:22) Nga mulinga byuma bimilingisa mupwe ba kubwahelela, co mwasa kupwa ba kubwahelela na kupwa ba kulikangula ku mubila.

3.   Singanyekeseseni ha byuma byanatukulahesa Njambi. Kukala na lilabelelo kumikwasa mupwe ba kubwahelela nameme muli na kubinja mushongo uje kuwesi kwola. (Loma 12:12) Mbimbiliya inendeka cimweja bya simbu ya kulinga ‘naumo wahi lalo akalinyenga ha kubinja.’ (Isaya 33:24) Njambi akamanesa mishongo yoshe ibanonowa kumanesa banu. Mbimbiliya inendeka bikalingiwa kuli munu uje nakulubala ngwayo: ‘Mubila wendi ukabwaha kutubanana uje wa bwanike, akeluka ku matangwa a bukwenje bwendi.’—Yombi 33:25.

 Nameme Bakaleho ba Yehova bakulahela ngwabo Njambi abakwasa, oloni bakatondo bukwasi kuli baka-kusaka. (Mako 2:17) Kutwesi kusindiya banu kupangesa sakesi imo. Munu na munu nazituka kulyangwila sakesi yashaka.