Mbimbiliya itunda kuli “Njambi muka-kuzembeleka baje banombwa.” (2 Kolinte 7:6) Mbimbiliya kuyapwile libulu lya kukwasa banu balikangule mu bwongo, oloni inakwasa babangi becele kukala na bisinganyeka bya kulitsiya. Biyendeka neni bimikwasa.

•  Bika biinendeka Mbimbiliya bije byasa kumikwasa?

•  Kuma Mbimbiliya inendeka ha banu bashakele ngwabo batse ndi?

•  Bisoneka muka bya mu Mbimbiliya byasa kumikwasa kuhyana bisinganyeka bya kulitsiya?

•  Bati nga kabusamba keni endeka ngwendi, “Cibwaha lika kutsa?”

•  Kuma mwashakeleho kulitsiya kunima ndi?

• ● Endekeni mumuli na kulizibila.

   Biyendeka Mbimbiliya: ‘Kabusamba wa busanga akamwesa cizemo simbu yoshe, wapwa kabushoko nasemukila ngeci bamwene hamo tuyando.’—Visimo 17:17.

   Bicilumbununa Eci Cisoneka: Tunapande kulomba bukwasi ku bakwetu nga tuli mu bishoti.

   Nga kumulekeko bakweni mumuli na kulizibila, co mubwezelela ku bishoti byeni. Oloni nga mulekako bakweni mumuli na kulizibila, co mutepulula ku bishoti byeni na kumona byuma mu ngila yaibwa.

   Esekeni kulingako ebi: Simutwiyeniko na umo lelo ipwe wa mu naanga yeni nambe kabusamba keni imwakulahela. a Co lalo, mwasa kusoneka mumuli na kulizibila.

• ● Eteniko ku cipatela.

   Biyendeka Mbimbiliya: ‘Bakangule kubesi kutonda muka-kusaka, oloni baje babinja bakebo bakamutondo.’—Mateu 9:12.

   Bicilumbununa Eci Cisoneka: Tunapande kulomba bukwasi ku cipatela nga kutwesi na kulizibako bwino.

   Munu ali na bisinganyeka bya kulitsiya nasa kukala na bukalu bwa mu bwongo nambe mu bisinganyeka. Ngwe lika mutukalizibila nga kutwesi na kulizibako bwino mu mubila, kutwapandele kuziba shwamwa kulomba bukwasi. Munu abinja mu bwongo nambe mu bisinganyeka, nasa kuwana bukwasi.

   Esekeni kulingako ebi: Lombeni bukwasi kuli ndotolo bwasi-bwasi.

• ● Anukeni ngweni Njambi wamyaka mbunge.

   Biyendeka Mbimbiliya: ‘Kuma tunzilili batanu kubesi kubalanda na makoini abali a ndando ya kwisi ndi? Oloni naumo wahi ibebala kuli Njambi. . . . Keti muzibe lyoba, yeni mu ba seho kutubakana tunzilili babangi.’—Luka 12:6, 7.

   Bicilumbununa Eci Cisoneka: Muba seho manene kuli Njambi.

   Munasa kuliziba ngweni naumo wahi wamyaka mbunge, oloni Njambi ali na kumona bukalu bumuli na kuliwana nabwo. Wamyaka mbunge nameme muliziba ngweni cibwaha lika kutsa. Mukanda wa Myaso 51:17 ngwawo: ‘Yobe Njambi, kuwesi kubyana mbunge ya kupokoka na mbunge ya kutenguluka.’ Njambi wamizema mukemwo ashaka ngwendi mutwaleleleho kuyoye.

   Esekeni kulingako ebi: Limweneni bukaleho mu Mbimbiliya buje bumwesa ngwabwo Njambi wamizema. Cakumwenako, taleni capita 24 ya libulu lya kulilongesa lya Ingilishi lya Draw Close to Jehovah.

• ● Lombeleni kuli Njambi.

   Biyendeka Mbimbiliya: ‘Umbileni bishoti byeni hali [Njambi] mwafwa wamyaka mbunge.’—1 Petulu 5:7.

   Bicilumbununa Eci Cisoneka: Njambi ashaka ngwendi mumuleke mwoshe mumuli na kulizibila na bishoti byeni byoshe.

   Njambi amyana kwoloka na kumikwasa mukolese mu bukalu bweni. (Filipu 4:6, 7, 13) Akakwasa boshe baje bamulomba mangana abakwase.—Myaso 55:22.

   Esekeni kulingako ebi: Lombeleni kuli Njambi lelo. Omwo mulombela, pangeseni lizina lyendi lya Yehova na kumuleka mwoshe mumuli na kulizibila. (Myaso 83:18) Mulombeni amikwase kukolesa.

• ● Singanyekeseseni ha byuma biinatukulahesa Mbimbiliya kulutwe.

   Biyendeka Mbimbiliya: ‘Tuli neli lilabelelo lije linapu ngwe cimikiso ca bwato ca myonyo yetu lije linapu lya busunga, co lalo lya kukanyama.’—Vahebelu 6:19.

   Bicilumbununa Eci Cisoneka: Simbu imo mutukalizibila kunapu lika ngwe bwato mubukendela nga kuli mankimba, oloni lilabelelo lituwana mu Mbimbiliya litukwasa tukolese.

   Eli lilabelelo keti bilota lika, linemana ha byuma byanatukulahesa Njambi lya kutundisako byuma byoshe bikatunenela busiwa.—Kujombolola 21:4.

   Esekeni kulingako ebi: Tandeni broshuwa ya Muzimbu Waubwa wa Kutunda Kuli Njambi! mangana mulilongese byabingi ha lilabelelo lya mu Mbimbiliya.

• ● Lingeniko bimwazema.

   Biyendeka Mbimbiliya: ‘Mbunge ya kubwahelela ikangwisa mubila.’—Visimo 17:22.

   Bicilumbununa Eci Cisoneka: Nga tulinga-lingako byuma bikatuzibisa kubwaha, co tushubuluka.

   Esekeni kulingako ebi: Lingeniko byuma bikamizibisa kubwaha. Cakumwenako, kutolilila ku myaso imitakamesa, kutanda byuma bimitakamesa nambe kulilongesako bweho bumo. Mubwahelela manene nga mulingako bimo mu kukwasa bakweni nameme mu bingila byabindondo.—Vilinga 20:35.

• ● Linyungeni mwamubwa ku mubila.

   Biyendeka Mbimbiliya: ‘Bweho bwa kukanyamesa mubila bukwasa.’—1 Timateo 4:8.

   Bicilumbununa Eci Cisoneka: Tulikangula nga twehako bweho bwa kukanyamesa mubila, kulala ha simbu yailaha na kulya byakulya byabibwa.

   Esekeni kulingako ebi: Yeni na kupashalako nameme ha minutu 15 lika.

• ● Anukeni ngweni mutukalizibila na byuma byeka bikwabo bikatenguluka mu kuyoya.

   Biyendeka Mbimbiliya: ‘Kuuzibuka mubukafwa buyoye bwobe imene.’—Yakomba 4:14.

   Bicilumbununa Eci Cisoneka: Bukalu bwetu nameme bumoneke ngwe bwakama bati bwasa kuhwa.

   Bukalu bweni bunasa kumoneka ngwe kubwasa kuhwa, oloni byuma bikala mwamubwa. Ngeci, tondeni bingila bya kubumaneselamo. (2 Kolinte 4:8) Bukalu bweni bunasa kuhwa, oloni nga mulitsiya, co nabimo byahi bimutengulula.

   Esekeni kulingako ebi: Tandeni mizimbu ya mu Mbimbiliya ya banu baje bashakele ngwe batse lika na kumona byuma byabakwasele hamo mu bingila kubasinganyekele. Tucisimutwiyeniko ha banu bamo.

 Eyo. Mbimbiliya yatuleke bya banu bamo baje bashakele ngwabo batse. Njambi kabatenukilile, oloni wabakwasele. Neni amikwasa.

Elinja

•  ● Wapwile iya? Elinja wapwile kapolofweto wa kusimpa. Oloni bisimbu bimo wazeyele. Mukanda wa Yakomba 5:17 ngwawo, ‘Elinja wapwile munu uje wakele na kuliziba ngwe mutukalizibila.’

•  ● Bika byamulingisile alizibe ngwendi kwakubwa lika kutsa? Simbu imo, Elinja wazibile manene lyoba na kuliziba ngwendi keti wa seho. Mukemwo walombele Yehova ngwendi: “Tundisa mwonyo wange.”—1 Vimyene 19:4.

•  ● Bika byamukwasele? Elinja walekele Njambi mwakele na kulizibila. Njambi wamutakamesele bati? Wamumwesele ngwendi wamwaka mbunge na kumumwesa nzili yendi. Co lalo wakwasele Elinja azibuke ngwendi wapwile wa seho na kumwana cipangi cacibwa.

•  ▸ Tandeni bya muzimbu wa Elinja: 1 Vimyene 19:2-18.

Yombi

•  ● Wapwile iya? Yombi wapwile munalume wa kufuka, wakele na naanga yakama, co walemesele Njambi wa busunga mu kulongwa.

•  ● Bika byamulingisile alizibe ngwendi kwakubwa lika kutsa? Byuma byatengulukile mu buyoye bwa Yombi. Bufuko bwendi bwoshe bwanyongele. Bana bendi boshe batsile. Wabinjile mushongo wakama manene uje wamuzibisile kubabala. Co bamubangeyeyeye ngwabo ikeye babenya walikokelele bukalu bwendi. Yombi wendekele ngwendi: ‘Njajuka kuyoya, kunjishaka kutwalelelaho kuyoya.’—Yombi 7:16.

•  ● Bika byamukwasele? Yombi walombelele kuli Njambi na kulekako bakwobo bukalu bwendi. (Yombi 10:1-3) Kabusamba kendi wamubwa Elihu wamukwasele amone byuma mu ngila yaibwa. Kutundaho, Yombi watabele kumunangula na kumukwasa kuli Njambi.

•  ▸ Tandeni bya muzimbu wa Yombi: Yombi 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mosesa

•  ● Wapwile iya? Mosesa ikeye watwamenenene Isalele ya kusañulu, co wapwile kapolofweto wa kulongwa.

•  ● Bika byamulingisile alizibe ngwendi kwakubwa lika kutsa? Mosesa wakele na bipangi byabingi byakulinga, bamubangeyeye biñanda byabingi, co walizibile kuzeya. Mukemwo walekele Njambi ngwendi, ‘Njitsiye hano bene.’—Kulava 11:11, 15.

•  ● Bika byamukwasele? Mosesa walekele Njambi mwakele na kulizibila. Njambi wehwile ku bipangi bya Mosesa mangana amutepulwileko ku bishoti.

•  ▸ Tandeni bya muzimbu wa Mosesa: Kulava 11:4-6, 10-17.