Embwe. Bulombelo kubwalifwile. Mu Mbimbiliya muli bulombelo bwabwingi buje kubwesi kuzibisa Njambi kubwaha ku mbunge. Obu bulombelo twasa kubutepa mu miyati ibali.

Muyati Wakulibanga: Kulemesa binjambi ba makuli

 Mbimbiliya inendeka bya kulemesa binjambi ba makuli kupangesa majwi a kufwa ngwe “byangoco” na “kujeneka seho.” (Njelemiya 10:3-5; 16:19, 20) Yehova a Njambi washikile Baisalele ngwendi: “Kesi mulemese njambi weka kubanga yange lika.” (Kutuuka 20:3, 23; 23:24) Baisalele mubakele na kulemesa binjambi beka, Yehova “walubalele.”—Kulava 25:3; Valevi 20:2; Maako 2:13, 14.

 Njambi katengulwile mwamwena kulemesa “baje babakatumbula ngwabo binjambi.” (1 Kolinte 8:5, 6; Ngalatiya 4:8) Nashiki baje bashaka kumulemesa becele kulikwatasana na bulombelo bwa makuli ngwendi: ‘Tundeni mukati kabo, co lyangununeniko.’ (2 Kolinte 6:14-17) Nga bulombelo bwoshe bunalifu, co lalo bwoshe bwa busunga, mwafwa bika Njambi wanene eli lishiko?

Muyati Wamucibali: Kulemesa Njambi mu ngila ya kuhenga

 Bisimbu bimo, Baisalele bakele na kulemesa Njambi oku bakaba bilika na bisemwa bya baje bakele na kulemesa binjambi ba makuli. Oloni Yehova kabatabesele kukumbasana bulombelo bwa busunga na bulombelo bwa makuli. (Kutuuka 32:8; Kwituluka mu Mashiko 12:2-4) Yesu wapayele bantwama ba bulombelo mwafwa bakele na kulemesa Njambi mu ngila ya kuhenga. Bakele na kulimwesa ngwe baka-busunga okuni bali na kwombwanesa ‘byuma bya seho bya mu Lishiko bya kufwa ngwe kusompa mu busunga, kutetela na kulongwa.’—Mateo 23:23.

 Mu ngila imolika, ano matangwa bulombelo bwa busunga bukebwo lika bwasa kukwasa banu bashwenye kuli Njambi. Busunga twasa lika kubuwana mu Mbimbiliya. (Yowano 4:24; 17:17; 2 Timateo 3:16, 17) Bulombelo buje bukalongesa biñanda bije kubilitombola na Mbimbiliya buli na kutwala banu kulyala na Njambi. Bilongesa byabingi bibakamono banu ngwabo bitunda mu Mbimbiliya byatundile ku banu baje bakele na kulemesa binjambi ba makuli. Ebi bilongesa binambateselela Cilongesa ca Binjambi Batatu, cilongesa ca mwonyo kuwesi kutsa na litende lya tuhya. Bulombelo buje bukalongesa ebi bilongesa, ‘bwangoco’ nambe bwa kujeneka seho mwafwa buli na kwingisa binangulo bya Njambi na bisemwa bya banu.—Mako 7:7, 8.

 Njambi wazinda baka-cibembulu. (Tito 1:16) Ngeci, nga bulombelo bushaka kukwasa banu kushwenya kuyehi na Njambi, bunapande kubakwasa batengulule yoyesi yabo keti kubalongesa lika bisemwa nambe bilongesa bya banu. Cakumwenako, Mbimbiliya ngwayo: “Nga munu umo ayongola ngwendi ikeye muka-kulemesa, co kononwesa ndaka yendi, kulemesa kwendi kunapu kwangoco, co ali na kulikwisa ikeye babenya. Kulemesa kwakubwa kuje kwanayongola Njambi Tate kukekwo oku, kulela bisiwa na bifwile mu tuyando twabo na kulinyunga ikeye babenya kutunda ku byuma bya mazilo bya mu kaye.” (Yakomba 1:26, 27) Mbimbiliya ya King James Version inatumbula oku kulemesa kwakubwa, kwa kujeneka kulikwisa ngwayo “bulombelo bwa kujela.”