Embwe. Mbimbiliya ngwayo Njambi watangele banu na tusitu na bimena kwesekesa na “miyati” yabyo. (Kushangumuka 1:12, 21, 25, 27; Kujombolola 4:11) Co ngwayo banu boshe batunda ku bisemi betu ba kulibanga, Adama na Eva. (Kushangumuka 3:20; 4:1) Mbimbiliya kuimwesa ngwayo Njambi watangele cuma cimo ca kuyoya mangana ciye na kulitengulula, embwe. Oloni Mbimbiliya kuililwisi nebi bibanawana baka-sayansi bije bimwesa ngwabyo byuma bya kuyoya bya muyati umo binasa kuliseza kamandondo.

•  Kuma Njambi Watangele Cuma Cimo ca Kuyoya Mangana Ciye na Kulitengulula Ndi?

•  Kuma Cilongesa Cimwesa Ngwaco Njambi Watangele Cuma Cimo ca Kuyoya Mangana Ciye na Kulitengulula Calitombola Nebi Biyendeka Mbimbiliya Ndi?

•  Kuma Cashu ca Tusitu na Bimena ca Kuyoya Kwesekesa na Mitambela Kubili Cimwesa Ngwaco Bikatenguluka na Kupwa bya Muyati Weka Ndi?

 Baje bakulahela ngwabo Njambi watangele cuma cimo ca kuyoya mangana ciye na kulitengulula bali na biyongola bya kuliseza-seza. Bamo bakulahela ngwabo ngila imo yakalingilamo ngoco inapu kulingisa byuma bikale ku myela kuje kubyasa kuyoya mwamubwa na kusemunwina.

 Bamo bakulahela lalo ngwabo:

•   Byuma byoshe bya kuyoya byatundile ku byuma bimo bya kulifwa bije byakeleko kusañulu.

•   Cuma ca muyati umo cinasa kutenguluka na kupwa cuma ca muyati weka.

•   Cisholoka ngwe Njambi ikeye akalingisa byuma bitenguluke na kupwa bya muyati weka.

 Cilongesa cije cimwesa ngwaco Njambi watangele cuma cimo ca kuyoya mangana ciye na kulitengulula cimwesa ngwe biinendeka Mbimbiliya ku mukanda wa Kushangumuka ngwayo byuma byoshe babitangele bya makuli. Oloni Yesu wamwesele ngwendi biunendeka mukanda wa Kushangumuka byapwa bya busunga. (Kushangumuka 1:26, 27; 2:18-24; Mateo 19:4-6) Mbimbiliya ngwayo simbu kanda Yesu aije hano hasi, wayoyele na Njambi mwilu, co wakwasele Njambi mu kutanga “byuma byoshe.” (Yowano 1:3) Ngeci, cilongesa cije cimwesa ngwaco Njambi watangele cuma cimo ca kuyoya mangana ciye na kulitengulula kucilitombola nebi biyendeka Mbimbiliya.

 Mbimbiliya kuimwesa ngwayo byuma bya muyati umo binasa kutenguluka kweta hali. Co lalo kuimwesa ngwayo tusitu na bimena byanatanga Njambi kubyasa kuliseza kamandondo omwo biya na kusemunwina na kwizilila mitambela yaiha kubinasa kukala. Nameme bamo bakasinganyeka ngwabo bikatenguluka na kupwa byuma bya muyati weka, oloni awa anapu makuli. Tusitu na bimena bya muyati umo kubyesi kutenguluka na kupwa bya muyati weka.