Mu Mbimbiliya, lijwi libananungulula ngwabo “kusanguka” litunda ha lijwi lya Cigriki lya a·naʹsta·sis, lije lilumbununa “kwinduka” nambe “kwimana lalo.” Munu ibanasangula napu munu uje ibanendula ku batsi, co ashangumuka kuyoya lalo ngwe ha kulibanga.—1 Kolinte 15:12, 13.

 Nameme lijwi lya “kusanguka” kulyesi mu Bisoneka bya Cihebelu nambe ngwetu Testamenti ya Laja, oloni eci cilongesa mucili. Cakumwenako kwitila muli kapolofweto Hoziya, Njambi wakulahesele ngwendi: ‘Njikabamena ku bukalo bwa batsi, na kubobola ku nzili ya kutsa.’—Hoziya 13:14; Yombi 14:13-15; Isaya 26:19; Ndanyele 12:2, 13.

 Batsi bakasangukila kuli? Banu bamo basangukila kuya mwilu, kukayula hamolika na Kristu. (2 Kolinte 5:1; Kujombolola 5:9, 10) Co Mbimbiliya inatumbula oku kusanguka ngwayo ‘kusanguka cakulibanga.’ Ei endekesi imwesa ngwayo kucili kusanguka kukwabo lalo kunatako. (Kujombolola 20:6; Filipu 3:11) Kusanguka camucibali cikapwa ca baje bakasangukila kuyoya hano hasi, co banu babangi bakasanguka ha simbu ei.—Myaso 37:29.

 Banu bakasanguka bati? Njambi nana Yesu nzili ya kusangula batsi. (Yowano 11:25) Yesu akasangula ‘boshe bali mu bimbumbo bya canukiso,’ munu na munu mwafwililile. Co lalo bakasa kwanuka byuma byalingiwile kunima. (Yowano 5:28, 29) Baje basangukila kuya kwilu babana mibila ya sipilitu, co baje bakasangukila kuyoya hano hasi bakabana mibila ya situ ya kulumbunuka.—Isaya 33:24; 35:5, 6; 1 Kolinte 15:42-44, 50.

 Beya bakasanguka? Mbimbiliya inendeka ngwayo “banu boshe bababwa na aba bababi bakasanguka ku batsi.” (Vilinga 24:15) Banu bababwa banambateselela banu ba kufwa ngwe Nowa, Sala na Abilahama. (Kushangumuka 6:9; Vahevelu 11:11; Yakomba 2:21) Bababico banambateselela baje kubakele na kulinga byashaka Njambi, mwafwa kubalilongesele binangulo byendi na kubikabangeya.

 Nameme ngoco, baje bali na kulinga byuma byabibi oloni kubashaka kutenguluka, kubakasanguka. Nga batsa, co bananyongelela, kubesi na lilabelelo lya kusanguka na kushangumuka kuyoya lalo.—Mateo 23:33; Vahevelu 10:26, 27.

 Batsi bakasanguka simbu muka? Mbimbiliya yapolofwetele ngwayo kusanguka ca baje baya mwilu cikakalako ha kukalako kwa Kristu, kuje kwashangumukile mu 1914. (1 Kolinte 15:21-23) Kusanguka ca baje bakayoya hano hasi cikeco cikakalako mu myaka 1000 yakayula Yesu Kristu, mubakatengulula kaye koshe kukapwisa paradaisi.—Luka 23:43; Kujombolola 20:6, 12, 13.

 Mwafwa bika kukulahela ngwetu batsi bakasanguka kunapande? Mbimbiliya inendeka mu kushula bya banu ba kupwa 9 baje basangukile ku batsi, co kwakele banu balimwenenebo mubasangukile. (1 Vimyene 17:17-24; 2 Vimyene 4:32-37; 13:20, 21; Luka 7:11-17; 8:40-56; Yowano 11:38-44; Vilinga 9:36-42; Vilinga 20:7-12; 1 Kolinte 15:3-6) Cikomokeso ca kusangula Lazalu calingile Yesu cinapu ca seho manene, mwafwa Lazalu watsile ha matangwa awana, co lalo Yesu walingile eci cikomokeso hakati ka mbunga ya banu babangi. (Yowano 11:39, 42) Nameme baje balwisile Yesu kubasele kubyana byuma bibalimwenene, co mukemwo bashakele ngwabo batsiye Yesu na Lazalu.—Yowano 11:47, 53; 12:9-11.

 Mbimbiliya imwesa ngwayo Njambi ali na nzili na lishungu lya kusangula batsi. Akatwalelelaho kwanuka byuma byoshe hali munu na munu yakasangula. (Yombi 37:23; Mateo 10:30; Luka 20:37, 38) Njambi asa kwilwisila ku mwonyo boshe baje banatsi, co ashaka bene kulinga ngoco! Mbimbiliya inendeka hali Njambi kutalesa ku kusanguka kwa batsi kutunabandemena ngwayo: “Ukashaka kutumama nange, munu uje iwatangele.”—Yombi 14:15.

Biyongola bya kuhenga ha kusanguka kwa batsi

 Biyongola bya kuhenga: Kusanguka kwa batsi inapu kwilwisila mwonyo mu mubila.

 Busunga: Mbimbiliya imwesa ngwayo mwonyo wapwa munu bene, keti cuma cikatwalelelaho kuyoya nga munu natsi. (Kushangumuka 2:7, NWT, majwi a kwinikila; Ezekiyele 18:4) Munu ibasangula kubamwilwisila mwonyo; oloni bamutanga ceka lalo, co apwa mwonyo wa kuyoya.

 Biyongola bya kuhenga: Banu bamo bakabasangula na kubanyongesa lalo oho bene.

 Busunga: Mbimbiliya inendeka ngwayo ‘baje balingile byuma byabibi, bakasangukila kubasompa.’ (Yowano 5:29) Nameme ngoco, bakabasompa kwesekesa na byuma bibakalinga munima ya kusanguka kwabo, keti bibalingile simbu kanda batse. Yesu wendekele ngwendi: ‘Batsi bakaziba lijwi lya Muna Njambi, co baje banatolilila bakayoya.’ (Yowano 5:25) Boshe baje ‘bakatolilila’ nambe kwononoka byuma bibakalilongesa munima ya kusanguka kwabo, bakabasoneka mazina abo mu “libulu lya mwonyo.”—Kujombolola 20:12, 13.

 Biyongola bya kuhenga: Banu bakasanguka na mibila ije bene ibakele nayo simbu kanda batse.

 Busunga: Munima ya kutsa mubila wa munu ukabolo na kutenguluka likungu.—Muka-kwambulula 3:19, 20.