Njambi apatula nambe kwobola banu ku bubi kwitila mu mulambu wa Yesu. Mbimbiliya inendeka maninga a Yesu aje etikile ngwayo anapu ndando ya kupatula. (Efeso 1:7; 1 Petulu 1:18, 19) Mukemwo Yesu wendekele ngwendi wezile na “kwana mwonyo wendi ngeci apatule banu babangi.”—Mateo 20:28.

Mwafwa bika kwatondekele ‘ndando ya kupatula banu babangi’?

 Munu wakulibanga Adama mubamutangele wapwile wa kulumbunuka, co kakele na bubi. Wasele kuyoya myaka yoshe. Oloni kononokele Njambi, co kasele lalo kuyoya myaka yoshe. (Kushangumuka 3:17-19) Watambwisile obu bubi bana bakitile. (Loma 5:12) Mukemwo Mbimbiliya ngwayo Adama walilandesele na ‘kulandesa’ bana bendi mu bundungo bwa bubi na kutsa. (Loma 7:14) Kukwesi munu wa kujeneka kulumbunuka asa kwilwisa byazimbalesele Adama.—Myaso 49:7, 8.

 Njambi wazibilile mema ku mbunge bana na batekulwila ba Adama mwafwa kubakele na lilabelelo. (Yowano 3:16) Nameme ngoco, kasele kukonekela banu bubi bwabo kwa kujeneka cimo cimulingisa ngoco (Myaso 89:14; Loma 3:23-26). Co kuzema banu kwalingisile Njambi abwaheseko byuma bimo bije bilingisa abakonekele bubi bwabo na kubumanesa. (Loma 5:6-8) Wabwahesele ngwendi kukale ndando ya kupatula.

Ndando ya kupatula ikapanga bati?

 Mu Mbimbiliya, lijwi lya ndando ya kupatula linambateselela byuma bitatu binatako:

1.   Yapwa fweto.—Kulava 3:46, 47.

2.   Inena kupatuka.—Kutuuka 21:30.

3.   Inapwisa hamo na seho ya byuma bibafweta nambe kufwika. a

 Tumoneni ndando ya kupatula ya Yesu Kristu muinambateselela ebi byuma bitatu.

1.   Fweto. Mbimbiliya ngwayo baka-Kristu ‘banabalanda.’ (1 Kolinte 6:20; 7:23) Ei ndando inapu maninga a Yesu aje ‘alandelele Njambi banu ba kutunda ku miyati yoshe na ku bindaka byoshe na ku mafuti oshe na ku banu boshe.’ —Kujombolola 5:8, 9.

2.   Kupatula. Mulambu wa Yesu unapu ‘ndando ya kupatula’ banu ku bubi.—1 Kolinte 1:30; Kolose 1:14; Vahevelu 9:15.

3.   Kupwisa hamo. Mulambu wa Yesu unapwisa hamo na buyoye bwa kulumbunuka bwazimbalesele Adama. (1 Kolinte 15:21, 22, 45, 46) Mbimbiliya ngwayo: “Ngwe omwo banu boshe babapwisile baka-bubi ha kujeneka kwononoka kwa munu umolika [Adama], mu ngila ei bene boshe bakabapwisa baka-busunga ku mesho a Njambi ha kwononoka kwa munu umolika [Yesu Kristu].” (Loma 5:19) Ou mukanda unalumbununa kutsa kwa munu umo mukunapwila ndando ya kupatula banu babangi baje banapu baka-bubi. Kutsa kwa Yesu kunapu ndando ya kupatula ije inapwisa hamo kuli baje boshe balinga byuma bibalingisa bawane bukwasi bwayo.—1 Timateo 2:5, 6.