Mbimbiliya kuyapangesele lijwi lya kundisa limo kutalesa kukutsiya mbututu ali mwimo. Nameme ngoco, kuli bisoneka byabingi bya mu Mbimbiliya bije byendeka mwakamwena Njambi kuyoya kwambateselela na mbututu uje acili mwimo.

 Kuyoya kwapwa bwana bwa kutunda kuli Njambi. (Kushangumuka 9:6; Myaso 36:9) Wamona kuyoya kwa banu boshe kupwa kwa seho, hamolika na mbututu uje acili mwimo. Ngeci unapu mulonga wakama nga munu alingila shakelo kutsiya mbututu uje acili mwimo.

 Lishiko lyanene Njambi kuli ba Isalele lyamwesele ngwalyo: ‘Nga banalume bamo bali na kulwa, co babulumuna munakazi ali na limo, co ajombwesa limbo, oloni kabulumukile mu ngila yoshe-yoshe, co uje munalume nabulumuna bamufwetese mwoshe mwashakela munalume wa uje munakazi, ngwe mubaakwila ñanda maako. Oloni nga uje munakazi nabulumuka, co cihiso cipwe mwonyo na mwonyo.’—Kutuuka 21:22, 23. a

•  Kuyoya bwa banu kukashangumuka bati?

•  Kuma Njambi asa kukonekela munu uje natundisa limo ndi?

•  Kuma kutundisa limo kwapwa mulonga nga buyoye bwa cisemi nambe mbututu uje ali mwimo buli mu bushonde ndi?

 Kuli Njambi, kuyoya kukashangumuka ha litangwa lije bene lyakemita munakazi. Mbimbiliya ije yapwa lijwi lya Njambi ngwayo, Njambi wamona mbututu uje kanda asemuke kupwa munu. Tucisimutwiyeni ha byakumwenako bije bimwesa mwakamwena Njambi mbututu uje nasemuka na uje kanda asemuke.

•   Sipilitu ya kujela ya twamenenene mwene Ndabiti endeke hali Njambi ngwendi: “Yobe wanjimwene simbu kanda njisemuke.” (Myaso 139:16) Mwene Ndabiti mwapwile kakeke mwimo lya baina, Njambi wamumwene kupwa munu.

•  Kutundaho, Njambi wazibukile ngwendi simbu kanda Njelemiya asemuke akalinga cipangi ca seho. Mukemwo wendekele kuli ikeye ngwendi: ‘Njakuzibukile simbu kanda ukale mwimo lya banoko, njakwangwile simbu kanda usemuke ngeci upwe Kapolofweto kange ku miyati ya banu.’—Njelemiya 1:5.

•   Luka umo wa banu basonekele Mbimbiliya uje wapwile muka-kusaka wapangesele lijwi lya Cingiliki lyakulifwa kutalesa ku mbututu uje acili mwimo na mbututu uje nasemuka laja.—Luka 1:41; 2:12, 16.

 Njambi asa kukonekela munu uje natundisa limo. Nga munu atenguluka mu busunga na kumona kuyoya ngwe mwakacimwena Njambi , co kapandele kulishoshomwena ha mulonga wanalingi. ‘Yehova wakala na ngozi na mema ku mbunge . . Ngwe mubyalyangunuka mwija tangwa na muya tangwa, mukemwo lalo mwakatundisila bubi bwetu.’ b (Myaso 103:8-12) Yehova akakonekela boshe bakatenguluka mu busanga nameme baje batundisile limo.—Myaso 86:5.

 Kwesekesa nebi biyendeka Mbimbiliya ha buyoye bwa mbututu uje kanda asemuke, munu kapandele kutundisa limo mwafwa ya bukalu bwa kubinja bwa mbututu nambe baina.

 Batico nga ha simbu yasemuka mbututu kusholoka bukalu buje bunasa kutsiya umo hakati ka mbututu na baina? Nga kusholoka bukalu bwa cifwa eci, baje bapapesa banapande kwangula ibanapande kwobola hakati kabo babali.