Embwe, lifuti-libu kubakalinyongesa, kulyenyeka, nambe kulingisa na lyeka. Mbimbiliya ngwayo Njambi watangele lifuti-libu mangana banu bayoyeho myaka yoshe.

•   ‘Baka-busunga bakakala mu lifuti, co bakayoyamo myaka yoshe.’—Myaso 37:29.

•   “[Njambi] wajalele lubula lwa kaye ngeci kaye kesi kashengenye.”—Myaso 104:5.

•   ‘Lifuti-libu anga bene likalako myaka yoshe.’—Muka-kwambulula 1:4.

•   ‘Uje wamungile na kutanga kaye, wakolesele kaye mbe. . . . Katangele kaye ngeci kapwe ngwe mambo embwe, oloni hapwe ha kuyoya banu.’—Isaya 45:18.

 Njambi katabesa banu babiise manene lifuti-libu ha kutwalelelaho kulijwalesa, kutwalelelaho kulwilaho binzita nambe ngila yoshe-yoshe. ‘Akanyongesa baje bali na kubiisa kaye.’ (Kujombolola 11:18) Akalinga bati ngoco?

 Njambi akalingisa Bumwene bwendi bwa mwilu bwa kulumbunuka bwinge bifulumende bya banu bije binonowa kunyungilila lifuti-libu. (Ndanyele 2:44; Mateo 6:9, 10) Munendi Yesu Kristu ikeye akayula omu mu Bumwene. (Isaya 9:6, 7) Mwakele hano hasi, Yesu wamwesele ngwendi ali na nzili ha byuma bya kutanga. (Mako 4:35-41) Co ha kupwa Mwene wa Bumwene bwa Njambi, Yesu ali na nzili ya kwendesa lifuti-libu na byuma byoshe bya kutanga biliho. Akalingisa byuma hano hasi bipwe ngwe mubyafwile mu citungu ca Edeni.—Mateo 19:28; Luka 23:43.

 Embwe, kuimwesa ngoco. Kakangi banu bakasinganyeka ngoco mwafwa ya kujeneka kuzibisisa mwamubwa mukanda wa 2 Petulu 3:7 uje umwesa ngwawo: ‘Melu na lifuti-libu biliko hano banabitulikila tuhya.’ Tusimutwiyeniko bisimpi bibali bije bitukwasa kuzibisisa mwamubwa awa majwi:

1.   Mbimbiliya inapangesa lijwi lya ‘melu,’ lifuti-libu, na “tuhya” kulumbununa byuma byabingi. Cakumwenako, mukanda wa Myaso 97:1 ngwawo: “Shukulu Kalunga ikeye mwene! Kaye kabwahelele!” Aha ha mukanda, “kaye” kemanena banu.

2.   Mavesi analyata na mukanda wa 2 Petulu 3:7 amwesa mwamubwa bililumbununa lilu, lifuti-libu na tuhya bibanatumbula aha ha vesi. Vesi 5 na 6 inesekesa biinendeka vesi 7 ku byuma byalingiwile ha Libazi lya mu simbu ya Nowa. Kaye ka simbu ije bakanyongesele, oloni lifuti-libu kulyanyongele. Libazi lyanyongesele banu ba lwozi, nambe ngwetu kaye. (Kushangumuka 6:11) Lyabiisile lalo “lilu” lije limanena baje bakele na kuyula banu ha simbu ije. Ngeci, banu bababi bakebo banyongele keti lifuti-libu, embwe. Nowa na naanga yendi bobokele na kukala lalo ha lifuti-libu munima ya Libazi.—Kushangumuka 8:15-18.

 Ngwe mwa lije Libazi, “tuhya” nambe kunyonga kubanendeka ku mukanda wa 2 Petulu 3:7 kukanyongesa banu bababi keti lifuti-libu. Njambi nakulahesa ngwendi kukakala ‘melu amaha na lifuti-libu lyaliha muje mukakala busunga.’ (2 Petulu 3:13) ‘Melu amaha’ aje emanena fulumende yaiha nambe ngwetu Bumwene bwa Njambi akuyula ‘lifuti-libu’ lyaliha nambe ngwetu banu bababwa. Obu Bumwene mubukashangumuka kuyula hano hasi, lifuti-libu likapwa paradaisi.—Kujombolola 21:1-4.