Cisholoka Mingeli ibakatumbula mu bulombelo bumo ngwabo “Mingeli wa Kujela” linapu lizina likwabo lya Yesu simbu kanda aije hano hasi na munima ya kwiluka mwilu. a Mingeli walikananganene na Satana munima ya butsi bwa Mosesa, co lalo wakwasele kangelo umo etese muzimbu wa Njambi kuli kapolofweto Ndanyele. (Ndanyele 10:13, 21; Yunda 9) Mingeli nemanena ciyulo ca Njambi na kulwisa bitozi ba Njambi, co ebi byuma byakalingi byalitombola nebi bililumbununa lizina lyendi lije lilumbununa ngwalyo ‘Iya Nalifu na Njambi?’—Ndanyele 12:1; Kujombolola 12:7.

 Tusimutwiyeni ha byuma bitulingisa twendeke ngwetu Yesu ikeye Mingeli kangelo wakama.

•   Mingeli ikeye “kangelo wakama” (Yunda 9) Endekesi ya “kangelo wakama” ije ilumbununa “mukulunu wa tungelo” iwaniwa ha mavesi abali mu Mbimbiliya. Ha mavesi oshe awa, ei endekesi inatalesa kuli munu umolika, kulumbununa ngwabo kwakala kangelo umolika wakama. Imo yawa mavesi imwesa ngwayo Yesu uje wasangukile “akashuluka kutunda mwilu,” co “kukakala mutambi wa lijwi lyakama lya kushika, lijwi lya kangelo wakama.” (1 Tesalonika 4:16) Eli “lijwi lya kangelo wakama” linapu lijwi lya Yesu mwafwa ikeye Mingeli, kangelo wakama.

•   Mingeli akatwamenena mbunga ya maswalale ba mwilu. ‘Mingeli na tungelo twendi balwile nzita na canza-ngombe,’ Satana Liyabolo. (Kujombolola 12:7) Mingeli ali manene na nzili mwilu mwafwa banamwendeka ngwabo “mukulunu wa tungelo,” co lalo ngwabo ‘mwata wakama.’ (Ndanyele 10:13, 21; 12:1) Muka-kulilongesa bya Testamenti Yaiha wa lizina lya David E. Aune wendekele ngwendi ei endekesi inatalesa kuli Mingeli kupwa “muka-kushika wakama wa mbunga ya maswalale ba mwilu.”

   Mbimbiliya inendeka lizina limolika likwabo lya munu uje ali na moko ya kutwamenena mbunga ya maswalale ba mwilu. Ngwayo: “Mwene Yesu akasholoka kutunda mwilu na tungelo twendi ba nzili, hamo na milangi ya tuhya, na kunyanyamesa baje babyana Njambi.” (2 Tesalonika 1:7, 8; Mateo 16:27) Yesu “nai mwilu, co ali ku liboko lya cilyo lya Njambi, ali na kuswana hakamwa ya tungelo boshe na baka-moko na baka-nzili.” (1 Petulu 3:21, 22) Njambi kasa kubwahesa ngwendi Yesu na Mingeli bapwe banu babali ba kuliseza baje bapwa baka-kushika tungelo. Ngeci, Yesu na Mingeli anapu mazina a munu umolika.

•   Mingeli ‘akasholoka ha simbu ya tuyando.’ (Ndanyele 12:1) Ha bisimbu byabingi mu mukanda wa Ndanyele, endekesi ya “akasholoka” banaipangesa kutalesa kuli mwene uje alingako byuma bimo bya kulitila ha simbu imo. (Ndanyele 11:2-4, 21) Yesu Kristu uje ibanendeka ngwabo ‘Lijwi lya Njambi’ akalingako bimo bya kulitila ha kupwa “Mwene ya bimyene” omwo akatundisako bitozi ba Njambi boshe na kunyungilila banu ba Njambi. (Kujombolola 19:11-16) Akalinga ngoco ha simbu ya ‘kayando kakama kaje kanda kakaleko kutunda habatangelele kaye.’—Mateo 24:21, 42.