Nzita ya Alamagidoni yapwa nzita yakama yakalwa Njambi na bifulumende bya banu. Ebi bifulumende na baje bali na kubikundwiya bali na kulwisa Njambi ha kubyana kulyaka kwisi ya ciyulo cendi. (Myaso 2:2) Nzita ya Alamagidoni ikatundisako biyulo bya banu byoshe.—Ndanyele 2:44.

 Lijwi lya ‘Alamagidoni’ liwaniwa lumolika mu Mbimbiliya, ku mukanda wa Kujombolola 16:16. Mukanda wa Kujombolola wapolofwetele ngwawo “bimyene ba hano ha kaye hoshe” bakabakungulwila “hamo ku nzita ya litangwa lyakama lya Njambi Muka-nzili Yoshe” ‘ku mutambela ubatumbula mu Cihebelu ngwabo Alamagidoni.’—Kujombolola 16:14.

 Beya bakalwa nzita ya Alamagidoni? Yesu Kristu akatwamenena mbunga ya maswalale ba mwilu mu kuhyana bitozi ba Njambi. (Kujombolola 19:11-16, 19-21) Aba bitozi banambateselela banu baje bali na kulwisa ciyulo ca Njambi na baje kubesi na kumusingimika.—Ezekiyele 39:7.

 Kuma nzita ya Alamagidoni bakailwila ku Middle East ndi? Embwe. Nzita ya Alamagidoni kubakailwila ha mutambela umolika, ikambateselela kaye koshe.—Njelemiya 25:32-34; Ezekiyele 39:17-20.

 Lijwi lya Alamagidoni libakatumbula lalo ngwabo “Halamagidoni” (mu Cihebelu ngwabo Har Meghiddohnʹ), lilumbununa “Munkinda wa Megido.” Megido yapwile nganda imo mu Isalele kusañulu. Biñanda bya kunima bimwesa ngwabyo oku ku mwela balwililileko binzita byakama, kwambateselela na binzita bimo bibanasoneka mu Mbimbiliya. (Maako 5:19, 20; 2 Vimyene 9:27; 23:29) Nameme ngoco, Alamagidoni kuimanena mwela wakala kuyehi na Megido ya kusañulu. Ou mwela kuwakele na munkinda wakama manene, co lalo nameme cana ca Njezelele cije cakala kuyehi nawo kuhasa kufwa bitozi ba Njambi boshe. Oloni Alamagidoni inapu kulikungulula kwa mafuti mu kulwisa Njambi lwamamaneselelo.

 Byuma bikafwa bati ha simbu ya nzita ya Alamagidoni? Nameme kutuzibuka mwakapangesela Njambi nzili yakala nayo mu kulwisa bitozi bendi, tuzibuka ngwetu kuli byuma bimo byapangesele kunima bya kufwa ngwe nyonzi ya mamanya, mandunduma, libazi, tuhya na saufa, mihyato, na mishongo. (Yombi 38:22, 23; Ezekiyele 38:19, 22; Hambakuke 3:10, 11; Zakaliya 14:12) Bitozi ba Njambi bamo bakalitengulukila bakebo babenya na kushangumuka kulitsiyanga, oloni bakananguka ngwabo Njambi ikeye ali na kubalwisa.—Ezekiyele 38:21, 23; Zakaliya 14:13.

 Kuma Alamagidoni ikapwa kukotoka kwa kaye ndi? Alamagidoni kuikanyongesa lifuti-libu, mwafwa lyapwa limbo lya banu ku myaka yoshe. (Myaso 37:29; 96:10; Muka-kwambulula 1:4) Nzita ya Alamagidoni kuikanyongesa banu boshe, oloni ikabobola mwafwa “mbunga yakama” ya bangamba ba Njambi bakoboka.—Kujombolola 7:9, 14; Myaso 37:34.

 Lijwi lya “kaye” kulilumbununa lika lifuti-libu, oloni bisimbu bimo eli lijwi mu Mbimbiliya likalumbununa banu baje kubashaka kwononoka Njambi. (1 Yowano 2:15-17) Ngeci, Alamagidoni muikanyongesa aba banu kukapwa ngwe “kukotoka kwa kaye.”—Mateo 24:3.

 Alamagidoni ikakalako tangwa lika? Yesu mwakele na kwendeka ha ‘kayando kakama’ kaje kakatwala ku nzita ya Alamagidoni wendekele ngwendi: ‘Oloni litangwa lije, nambe simbu ije, naumo wahi abizibuka, nambe tungelo ba mwilu, nambe Mwana, oloni Tate lika ikeye azibuka.’ (Mateo 24:21, 36) Nameme ngoco, Mbimbiliya inamwesa ngwayo Alamagidoni ikakalako ha simbu ya kukalako kwa Yesu kuje kubakamono na mesho banu, co ei simbu yashangumukile mu 1914.—Mateo 24:37-39.