Yesu wobwele banu ba kulongwa omwo wanene mwonyo wendi kupwa ndando ya kupatula. (Mateo 20:28) Mukemwo Mbimbiliya inatumbula Yesu ngwayo ‘Muyoyesi wa kaye.’ (1 Yowano 4:14) Co lalo ngwayo: “Kutwasa kuwana kwoboka muli weka lalo embwe, omwo kukwesi lizina lyeka muno mu kaye lyanana Njambi ku banu litunapande kwobokelamo.”—Vilinga 4:12.

 Yesu ‘watsililile banu boshe’ baje bakulahela muli ikeye. (Vahevelu 2:9; Yowano 3:16) Kutundaho, Njambi wamusangwile ku batsi. Wapwile lalo kangelo, co welukilile mwilu. (Vilinga 3:15) ‘Co asa kwamena baje baija kuli Njambi kwitila muli ikeye, omwo ayoya ku myaka yoshe mu kubakwila.’—Vahevelu 7:25.

Bika bitutondela ngwetu Yesu atwimaneneko?

 Tubaboshe tunapu baka-bubi. (Loma 3:23) Bubi bunatwangununa kuli Njambi, co butwala ku kutsa. (Loma 6:23) Yesu napu muka-kwimanenako baje banakulahela ndando yendi ya kupatula. (1 Yowano 2:1) Akabemanenako omwo akalombo Njambi azibe malombelo abo na kumulomba abakonekele bubi bwabo kwitila mu ndando yendi ya kupatula yanene omwo watsile. (Mateo 1:21; Loma 8:34) Co Njambi akazibi byakamulombo Yesu mwafwa bikendelela na cizango Cendi. Njambi watumine Yesu hano hasi mangana obole kaye.—Yowano 3:17.

Kuma kukulahela lika muli Yesu kutulingisa twoboke ndi?

 Embwe. Nameme tunapande kukulahela muli Yesu asina twasa kwoboka, kuli bikwabo bitunapande kulinga. (Vilinga 16:30, 31) Mbimbiliya ngwayo: ‘Nga mubila kuwesi na sipilitu, co unatsi, na kukulahela lalo nga kukwesi na bilinga, co kunatsi.’ (Yakomba 2:26) Nga tushaka kwoboka, tunapande:

•   Kulilongesa bya Yesu na Ishe Yehova.—Yowano 17:3.

•   Kukulahela Yesu na Ishe.—Yowano 12:44; 14:1.

•   Kumwesa likulahela lyetu kwitila mu kwononoka mashiko a Njambi na Yesu. (Luka 6:46; 1 Yowano 2:17) Yesu wendekele ngwendi keti woshe amusana “Mwene” akoboka, kubanga baje ‘bakalingi cizango ca Ishe wa mwilu.’—Mateo 7:21.

•   Kutwalelelaho kumwesa likulahelo lyetu nameme tuliwana na byeseko. Yesu wamwesele seho ya kulinga ngoco omwo wendekele ngwendi: ‘Woshe uje akakateya kweta na ku shongo akoboka.’—Mateo 24:13.