Yesu Wakele na Kumoneka Bati?
Biyendeka Mbimbiliya
Kukwesi azibuka mwamonekelele bene Yesu mwafwa Mbimbiliya kuyalumbunwine mwamonekelele. Oku kumwesa ngwabo kuzibuka mwamonekelele Yesu keti kwa seho manene. Oloni kuli biñanda bimo mu Mbimbiliya bitukwasa kuzibuka nameme kamandondo mwamonekelele Yesu.
Cihanga: Yesu wapwile Kayunda, co wafwile baina mu bingila bimo na kusholoka ngwe boshe ba muyati wa Shemi. (Vahevelu 7:14) Kasholokele mwendi-mwendi lika embwe. Simbu imo wasele kwenda mu bushweke kutunda mu Ngalileya kwija mu Yelusalema kwa kujeneka umo wa kumunanguka. (Yowano 7:10, 11) Co kalisezele na bandongesi bendi bakele na kukala nabo bisimbu byabingi. Tukulahela mwanuka ngweni Yundasa Isikalyote kubanga mwajombolwele Yesu ku mbunga ije yashakele kumukuta oku ili na bitwa asina yase kumuzibuka.—Mateo 26:47-49.
Bulaha bwa biñambu: Cisholoka biñambu bya Yesu kubyapwile byabilaha mwafwa Mbimbiliya ngwayo “biñambu byabilaha binapu cuma ca shwamwa kuli munalume.”—1 Kolinte 11:14.
Munjezi: Yesu wakele na munjezi. Wakabangeyeye lishiko lya Bayunda lije lyamwesele ngwalyo munalume nga nakolo kapandele kukamba munjezi wendi. (Valevi 19:27; Ngalatiya 4:4) Co lalo Mbimbiliya inendeka bya munjezi wendi mu bupolofweto bumo bwendeka bya kayando kamwene.—Isaya 50:6.
Mubila: Kuli bukaleho bwabwingi bumwesa ngwabwo Yesu wakele na mubila wa kukanyama. Wendele mangenzi amalaha mu cipangi cendi ca kwambulula. (Mateo 9:35) Wajelesele tembele ya Bayunda lubali omwo wambilumwine bimesa bya baka-kucinca bimbongo. Kutundaho, washekelemo bimuna na cibanzi. (Luka 19:45, 46; Yowano 2:14, 15) Libulu lya McClintock and Strong’s Cyclopedia ngwalyo: “Mikanda yoshe ya Biñanda Byabibwa imwesa ngwayo [Yesu] wakele na mubila wa kukanyama wa kulikangula.”—Volyumu IV, liputa 884.
Mwakele na kusholokela ku cihanga: Yesu wakele na ngozi na mema ku mbunge, co tukulahela ngwetu mwakele na kusholokela ku cihanga kwamwesele ngoco. (Mateo 11:28, 29) Banu ba kuliseza-seza bezile kuli ikeye mu kutonda ngwabo abazembeleke na kubakwasa. (Luka 5:12, 13; 7:37, 38) Nameme banike balizibile kuzituka kukala nendi.—Mateo 19:13-15; Mako 9:35-37.
Byuma bimo bya kuhenga bibakendeka bamo ngwabo mukemwo mwamonekelele Yesu
Biyongola bya kuhenga: Bamo ngwabo Yesu wapwile wa mu Africa mwafwa mukanda wa Kujombolola unesekesa biñambu byendi ku bwanda bwa kutunda ku kasitu na kwesekesa mendi endi ku “butale bwa bunengu bucitunda mu lutengo lwakama.”—Kujombolola 1:14, 15.
Busunga: Biñanda bili mu mukanda wa Kujombolola binapu bifwisa. (Kujombolola 1:1) Ou mukanda muunendeka bya biñambu na mendi a Yesu, unapangesa bifwisa bije bimanena bifwa byakele nabyo munima ya kusanguka, keti mwakele na kumonekela te acili hano hasi. Mukanda wa Kujombolola 1:14 muunendeka ngwawo ‘mutwe na biñambu byendi byatokele too ngwe bwanda nambe ngwe mema a kukonda,’ unendeka bya mubala keti kuseneta nambe kukolotela kwa biñambu byendi. Biñambu bya kutoka bimanena mana akala nawo mwafwa ya myaka yanakalako. (Kujombolola 3:14) Ngeci, ou mukanda unesekesa mubala wa biñambu bya Yesu ku mubala wa bwanda na mema a kukonda.
Mendi a Yesu amonekele ngwe “butale bwa bunengu” buli “mu lutengo” luje lwashwama tuhya. (Kujombolola 1:15) Cihanga cendi cabyazimine “ngwe misha ya litangwa lya hakati ka mutwe.” (Kujombolola 1:16) Kukwesi muyati wa banu uli na cikonde ca mubala wa cifweci. Ngeci, eci cimona capwile cifwisa cimwesa mwafwililile Yesu munima ya kusanguka, kumwesa ngwabo “wayoya mu ceke cije naumo wahi asa kushwenyako.”—1 Timateo 6:16.
Biyongola bya kuhenga: Yesu wapwile munu wa kuzeya.
Busunga: Yesu wapwile munu wa kukanyama. Cakumwenako, walisholwele mu kusimpa ku mbunga yambatele bitwa ije yezile mu kumukuta. (Yowano 18:4-8) Co lalo cipangi ca kushonga na bikwata bya kulema cakele na kulinga catondekele munu wa kukanyama.—Mako 6:3.
Oloni hamo munasa kulihula ngweni, ‘Mwafwa bika kwatondekele munu wa kumukwasa kwambata citi habakamupameyeye? Bika byamulingisile atse bwasi simbu kanda baje babapameyeye hamo nendi batse? (Luka 23:26; Yowano 19:31-33) Simbu kanda bakamupameye ha citi, baje bakele na kumuyandesa bazeyesele mubila wendi. Co lalo bishoti byakele nabyo byamulingisile azwame butsiki bwoshe. (Luka 22:42-44) Kutundaho, Bayunda bamuyandesele butsiki bwoshe. Mulyakile, Baloma nabo bamupupangele makote na kumuyandesa. (Mateo 26:67, 68; Yowano 19:1-3) Ebi byoshe byamulingisile atse bwasi.
Biyongola bya kuhenga: Yesu wapwile munu wa kulubala lika simbu yoshe.
Busunga: Yesu wamwesele mwamubwa bifwa byakala nabyo Ishe Yehova, uje uinendeka Mbimbiliya ngwayo wapwa ‘Njambi wa kubwahelela.’ (1 Timateo 1:11; Yowano 14:9) Co lalo, Yesu walekele bakwabo byuma bibakwasa bapwe ba kubwahelela. (Mateo 5:3-9; Luka 11:28) Ebi binapu byuma bimo bije bimwesa ngwabyo Yesu kakangi wamonekele kupwa wa kubwahelela.
Hamo Mushaka Lalo Ebi
BYETU BAKALEHO BA YEHOVA
Lombeni Chilongetha cha Mbimbiliya
Lilongetheni vilongetha vya mu Mbimbiliya ha thimbu na mwela umushaka yeni vavenya.