Banu babangi bali na kuliziba ngwabo mafuti amangi akele na kulikwatasana mwamubwa, ha myaka 30 ineti. Oloni byuma binalingiwa ololo kubimwesa ngwabyo byuma bili ngoco.

•   “Banu babangi banalishoshomwena ngwabo nzita ili ku Gaza yasa kwaka mafuti akwabo mu bukalu mwafwa lifuti lya Israel na Hezbollah linashangumuka kulwila ku nginga ya Lebanon.”—Mizimbu ya lya 6 January, 2024.

•   “Bibunga bibali na kutwamenena ku lifuti lya Iran bili na kulwisa banu bali mu mitambela ya kuliseza-seza, co lifuti lya Iran lyashangumuka lalo kupanga bitwa bya nuclear. Kutundaho, lifuti lya Iran linashangumuka kulikwatasana na lifuti lya Russia na lya China. Ngeci, oku kunalingisa mafuti ali ku muyatangwa alishoshomwene manene.”—Muzimbu wa The New York Times, wa lya 7 January, 2024.

•   “Nzita ili mukati ka Russian na Ukraine ili na kutwalelelaho kubiisa byuma byabingi.”—Muzimbu wa Baka-UN wa lya 11 January , 2024.

•   “Lifuti lya China lili na kutwalelelaho kukala na bimbongo byabingi na maswalale ba nzili, ngeci oku kuli na kulingisa lifuti lya Taiwan lilishashe. Co kulingila lifuti lya China na United States analikwatasana manene, oku kwasa kukatula nzita mukati ka mafuti akwabo.”—Muzimbu wa baka-Japan Times, wa lya 9 January, 2024.

 Bika biinendeka Mbimbiliya ha byuma byabibi bili na kulingiwa mu kaye? Kuma kwasa kukatuka nzita mu kaye koshe ndi?

 Mbimbiliya kuyendekele ha binzita mpundu biliko ano matangwa. Nameme ngoco, yendekele ha binzita bili na kulingiwa bije bili na kumwesa simbu ituli na kuyoyamo na “kutundisa kwoloka mu kaye.”—Kujombolola 6:4.

 Mukanda wa Daniele wapolofwetele cimweja ngwawo mu “simbu ya mamaneselelo,” mafuti a nzili akalilwisa mwafwa ya kushaka kulyatelela mafuti akwabo. Co lalo awa mafuti akalilwisa mwafwa ya kushaka kukala na bufuko bwabwingi na kuliziba kukala na nzili mwafwa ya kukala na maswalale babangi.—Daniele 11:40, 42, 43.

 Mbimbiliya imwesa ngwayo byuma bitwalelelaho kukaluwa manene mu kaye. Yesu wendekele cimweja ngwendi “kukakala kayando kakama kaje kanda kakaleko kutunda habatangelele kaye.” (Mateu 24:21) Aka “kayando kakama” kakeko kakalingisa kukakaleko nzita ya Amagidoni. Ije ibatumbula ngwabo “nzita yakama ya Njambi.”—Kujombolola 16:14, 16

 Oloni nzita ya Amagidoni kuikanyongesa banu bakulongwa. Njambi aka manesa biyulo bya banu bije bilinakulingisa kukale binzita byabingi. Nga mushaka kuzibuka omwo nzita ya Amagidoni ikanenela likwasano, tandeni biñanda binatako:

•   “Nzita ya Alamagidoni Yapwa Ika?”

•   “Nzita ya Alamagidoni inapu muzimbu waubwa!”