Twakulahela ngwetu mu 2024 kukala manene kuvota mu mafuti amangi. Nameme ngoco, banu kubesi na kukulahela manene baka-bupolitiki.

•   Banu babangi ba ku America babanehwile ngwabo, “bwingi bwa baka-bupolitiki bakala manene na nuna,” co kubesi kulinga byuma mu kukwasa banu. a—Pew Research Center, September 19, 2023.

 Bakwenje na bambanda nabo kubesi na kukulahela baka-bupolitiki.

•   “Kakangi bakwenje na bambanda bakashaka kuwana ngila ya kumaneselamo bukalu, oloni bamo babo babanehwile ngwabo, baka-bupolitiki kubesi na kubakwasa.”—The New York Times, January 29, 2024.

•   Baka-kwihula banu ngwabo: “Bakwenje na bambanda banakulahela banu baka-kutuma mavidio ha apu ya YouTube kutubakana kukulahela baka-bupolitiki.”—The Korea Times, January 22, 2024.

 Kuma twasa kukulahela ngwetu baka-bupolitiki babwahesa byuma kulutwe ndi? Iya itwasa kukulahela?

 Kunapande banu kusinganyeka lubali hali munu ibanapande kukulahela. Mbimbiliya ngwayo “munu wa kweba akataba byuma byoshe byaziba, Oloni munu wa kunyanyama akatalesesa hoshe halyata.”—Provebia 14:15.

•   Nga mushaka kuzibuka indi muzimbu umunazibi wa busunga nambe wa makuli, tandeni ñanda ya Ingilishi ya “Protect Yourself From Misinformation.”

 Kutundaho, nameme baka-bupolitiki baje bapwa baka-busunga, co lalo bali na biyongola byabibwa bya kushaka kukwasa banu kubasa kulinga byoshe bibashaka. Mukemwo Mbimbiliya yatunangula ngwayo:

•   “Keti mukulahele bimyata Nambe kukulahela muna munu uje kasa kunena kwoboka.”—Bisamu 146:3.

 Mbimbiliya ngwayo Njambi nangula Yesu Kristu ntwama uje asa kuyula mwamubwa, co twasa kumukulahela manene. (Luka 1:32, 33) Yesu ikeye Mwene wa Bumwene bwa Njambi, fulumende ije ili na kuyula mwilu.—Mateu 6:10.

•   Zibukeni bimilingisa mukulahele Yesu na byuma byakalinga mangana amanese bukalu butuli na kuliwana nabwo. Tandeni ñanda ya “Mwene wa Bumwene bwa Njambi iya?” nei ya “Bumwene bwa Njambi Bukalinga Bika?”