Ano matangwa, mu kaye muli tubebebe ba kweta ku 70 million, co bakendeka imo ya bindaka bya tubebebe bya kutubakana 200. Calubinda, tubebebe bali na kubalinga mwamubi mu bingila binatako:

•   “Banu babangi bali na kuyengula lisesa lya kulinga byuma lya tubebebe na tusinda matwi.”—National Association of the Deaf (U.S.).

•   “Mu mafuti a kufuka, tubebebe bakebo tuhutu manene, co kubesi na kulilongesa mwamubwa ku masikola, kuwana bipangi byabibwa nambe mizimbu ibakwasa.”—World Federation of the Deaf.

 Njambi akalizibi bati hali tubebebe? Mbimbiliya yendeka bika hali tubebebe? Co Bakaleho ba Yehova bali na kubakwasa bati?

Njambi Wamona Bati Tubebebe?

 Mbimbiliya inamwesa ngwayo Yehova a Njambi waka mbunge tubebebe. Ashaka ngwendi babalinge mwamubwa na kuwana bukwasi ku bilongesa byali na kubwahesa.

 Cisoneka: ‘Keti mukasinge kabebebe.’—Balebi 19:14.

 Cisoneka: “Njambi kesi na kangu.”—Bilinga 10:34.

 Cisoneka: “Yesu waile na kwitangana . . . , na kwambulula muzimbu waubwa wa Bumwene.”—Mateu 9:35.

 Cisoneka: Yesu walingisile “tusinda-matwi bazibe na tubebebe bendeke.”—Maki 7:37.

 Cisoneka: ‘Tubebebe bakaziba.’—Isaya 35:5.

 Bicilumbununa: Yehova wapolofwetele ngwendi tubebebe bakaziba.—Isaya 29:18.

Bakaleho ba Yehova Bali na Kukwasa Bati Tubebebe?

 Bakaleho ba Yehova bali na kwambulwila tubebebe muzimbu wa lilabelelo utunda kuli Njambi. Bika bituli na kulinga mangana twase kupanga eci cipangi? Tuli na kutuhula Mbimbiliya na mavidio a kupangesa mu kulilongesa Mbimbiliya mu bindaka bya kutubakana 100. Tukalongesa Mbimbiliya na kubwahesa biwano bya baka-Kristu mu ndaka ya tubebebe. Kutwesi kufwetesa munu ashaka kulilongesa bya Njambi. Mwafwa bika? Mwafwa Yesu washikile ngwendi: “Bamyanene bya bwana, co neni aneni bya bwana.”—Mateu 10:8.

 Mwasa kuwana byuma bimutonda ha webusaiti nambe kubilinga daunilodi ha likina lyeni nga mulinga ebi binatako:

 Ha JW.ORG. Nyatekeni ha mutamba wa ndaka helu ya liputa lyoshe-lyoshe lya ha webusaiti mangana mwase kuwana biñanda bimutonda mu ndaka ya tubebebe imushaka.

 Apu ya JW Library Sign Language. Mwasa kwaka ei apu ha likina lyeni kwa kujeneka kufweta mangana mwase kulinga daunilodi nambe kukenga mavidio mu ndaka ya tubebebe kupangesa intaneti.

Bikwata Muka bya Kupangesa mu Kulongesa Bitukatuhwisa?

 Mbimbiliya mu ndaka ya tubebebe. Mbimbiliya ya Bisoneka bya Kaye Kakaha mu Ndaka ya Tubebebe ya ku America ikeyo yakulibanga kutuhula mu kaye koshe. Mbimbiliya ya Kaye Kakaha ya mutunu nambe mutamba wayo ili na kuwaniwa mu bindaka bya tubebebe byabingi, co bindaka bikwabo bili na kulibwezelela mwaka na mwaka. (Nga mushaka kumona mukana nambe kukenga vidio ya Mbimbiliya, taleni cipalo ca “ Mbimbiliya ya Kaye Kakaha mu Ndaka ya Tubebebe.”)

•   Kengeni vidio ya Ingilishi ya The Complete New World Translation Is Available in ASL mangana mumone kulifwita cikakala mu kutuhula Mbimbiliya mu ndaka ya tubebebe.

•   Nga mushaka kulikuwa kutanda Mbimbiliya, lingeni daunilodi apu ya JW Library Sign Language. Ei apu imikwasa mwangule mavesi a mu Mbimbiliya ya mu ndaka ya tubebebe.

•   Dmytro na Vita bapwa tubebebe, oloni bana babo bali na kuziba. Taleni omwo kukenga mavidio a Mbimbiliya mu ndaka ya tubebebe kukakwasela naanga yabo.

 Mavidio anemana ha Mbimbiliya. Bakaleho ba Yehova banatuhula mavidio mu ndaka ya tubebebe aje anakwasa banu bazibisise na kupangesa binangulo bya mu Mbimbiliya. . .

•   Baje bali mu bulo na binaanga

•   Bakwenje na bambanda na bakulunu

•   Banike

 Kulilongesa Mbimbiliya. Lilongeseni Mbimbiliya mu ndaka ya tubebebe na bukwasi bwa munu imulilongesa nendi. Co mwasa kwendelela kwesekesa nomu mumwasela. Lombeni mangana bamimwese mutukalilongesela Mbimbiliya kwa kujeneka kufweta.

 Jeson Senajonon wakala ku Philippines. Nangukeni omwo kulilongesa Mbimbiliya netu kwamukwasele alikute busamba bwa kukanyama na Njambi.

 Mario Antúnez wapwile pasita mu ceci ya Honduras. Zibukeni mwawanenene bikumbululo ku bihula byendi bya mu Mbimbiliya ngwe mwanalumbunwina mu muzimbu wendi wa mu kuyoya ngwendi: “Njakele na Bihula Byabingi Kutubakana Bikumbululo.”

 Biwano bya cikungulukilo na biwano byeka. Tuli na bikungulukilo na bibunga bya mu ndaka ya tubebebe kuje kubakalikungulwila tubebebe na kulemesa calumingo na calumingo. Tukabwahesa na biwano byakama bya kulilongesa Mbimbiliya mu ndaka ya tubebebe. Oku ku biwano bya cikungulukilo na biwano byeka, tukabwahesa na ndaka ya tubebebe baje bapwa lalo tupuputwa. Tukabwahesa lalo na mabulu mu bisona bya tupuputwa kwa kujeneka kufwetesa.

•   Waneni cikungulukilo cili hayehi neni.

•   Zibukeni biwano bya mutambela na bya citingitingi bitukakala nabyo mwaka na mwaka.

•   Tumilanya ku Canukiso ca kutsa kwa Yesu, ciwano ca seho manene citukakala naco mu mwaka.

 José Luis Ayala wakala ku Mexico. Wasemukile oku kabebe, co mu kwita kwa simbu wapwile kapuputwa. Zibukeni mubamukwaselele mangana apwe mulongesi wa Mbimbiliya wa kuhya.