Ndotolo Vivek Murthy wa ku U.S. ngwendi: “Banike bali na kubinja manene mishongo ya ku bwongo, co tunananguka ngwetu intaneti ikeyo ili na kunena manene obu bukalu.” Muzimbu wa baka-New York Times wa lya June 17, 2024.

 Bisemi basa kunyungilila bati bana babo ku bukalu bwaha intaneti? Mbimbiliya ikana binangulo byabibwa.

 Singanyekeseseni hali ebi binangulo bya mu Mbimbiliya.

 “Munu wa kunyanyama akatalesesa hoshe halyata.”—Provebia 14:15.

 Kumwapandele kuliziba ngweni kuli byabibwa bili na kwita muneni mwafwa kesi na kupangesa intaneti, oloni anukeni ngweni yasa kumubihisa. Simbu kanda mutabese muneni kupangesa intaneti, munapande kumona ngweni nakolo, co asa kupangesa mwamubwa simbu yendi na kwangula mwamubwa babusamba na kujeneka kulinga byuma bije kubyapandele.

•   Nga mushaka kuziba byabingi, tandeni biñanda bya Ingilishi bya “Should My Child Use Social Media?” na ya “Teaching Your Teenager Social Media Safety.”

 “Pangeseni mwamubwa simbu yeni.”—Efeso 5:16.

 Nga mutabesa muneni kupangesa intaneti, co munapande kumwana mashiko a mwakuipangesela, co lalo mulumbunwineni muasa kumukwaselamo. Munapande kunanguka bifwa bya muneni nomwo mwalingilamo byuma oku kumikwasa mumone ngweni asa kutwalelelaho kupangesa intaneti nambe napande kwimanako.

•   Pangeseni vidio ya tudoli ya Pangeseni intaneti Mwamubwa mangana mukwase muneni azibuke seho ya kupangesa mwamubwa intaneti.

 Mbimbiliya ngwayo tuli na kuyoya mu bisimbu bya ‘bikalu na kutewesa.’ (2 Timothi 3:1-5) Co ili na kutwana lalo binangulo bije byasa kutukwasa. Mukana wa biñanda bya kutubakana 20 bije binemana ha Mbimbiliya bikwasa bisemi na bana babo biwaniwa muno mucilongesa ha bukangule bwa banike bwa ku bwongo.