Baka-kuyula, baka-sayansi na baka-kutala bya makina banendeka ha cashu ca mwakupangeselamo makina cije cinalibwezelela. Ngwabo kupangesa awa makina kwasa kukwasa banu. Oloni banalishoshomwena ha bukalu bwasa kutundamo nga banu kubawapangesa mu ngila inapande.

•   Ha May 4, 2023, vice president wa America Kamala Harris wendekele ngwendi: “Kulibwezelela kwa cashu ca mwakupangeselamo makina kwasa kunena bushonde ku banu, kubalingisa balizibe ngwe kubesi na kusingimika lisesa lyabo, kubonowesa kuliziba kuyoya mu kwoloka na kubonowesa kukulahela ngila iili na kuyulilamo fulumende.”

•   Mu muzimbu ubasonekele mu lipapelo lya mizimbu lya BMJ Global Health a ha May 9, 2023, Frederik Federspiel uje ali na kutwamenena cibunga ca bandotolo na baka-kusaka bakwabo bendekele ngwabo: “Nameme cashu ca kupangesa makina cije cinalibwezelela casa kukwasa banu balikanguleko mwamubwa, casa lalo kunena bukalu ku bukangule bwa banu mu bingila bimo.”

•   Muzimbu wa mu lipapelo lya mizimbu lya New York Times ubasonekele ha May 1, 2023 ngwawo: “Banu banashangumuka kupangesa cashu ca mwakupangeselamo makina cije cinalibwezelela mu kushandola mizimbu ya makuli. Mu kwita kwa simbu eci cashu ca mwakupangesela makina casa kulingisa banu batunde bipangi. Baje batala bya kupangesa makina banalishoshomwena ngwabo, kulutwe eci cashu casa kukaka buyoye bwa banu mu bushonde.”

 Mu kwita kwa simbu, banu balimwena indi eci cashu ca mwakupangeselamo makina cije cili na kulibwezelela cibakwasa indi caka buyoye bwabo mu bushonde. Bika biyendeka Mbimbiliya?

 Mbimbiliya imwesa byuma bitulingisa tukulahele ngwetu mana a banu a mwakupangeselamo makina kuwasa kunena lika bubwa ku banu.

1.  1. Nameme banu banasa kukala na biyongola byabibwa, kubasa kumona bukalu butunda mu byuma bibangula kulinga.

   •   ‘Kuli ngila ije amona munu ngeci inapu ngila ya busunga, oloni mamaneselelo ayo inapu kutsa.’—Visimo 14:12.

2.  2. Munu kasa kuzibuka mubamwenamo bakwabo bipangi byendi.

   •   ‘Omwo njazibukile ngeci njikaseza bipangi byange kuli uje akanjiswana. Iyajo azibuka ngeci uje akanjiswana akapwa muka-mana nambe cilema? Oloni ikeye akakala na byuma byoshe bije binjapangelele, byuma byoshe bije binjawanene mu mana ange hano hasi.’—Muka-kwambulula 2:18, 19.

 Byuma bya cifweci bimwesa seho ya kukabangeya byanatuleke Ishamatanga.

 Ishamatanga nakulahesa ngwendi kakatabesa banu nambe cashu ca mwakupangesela makina kubiisa lifuti-libu nambe kunyongesa banu.

•   ‘Lifuti-libu anga bene likalako myaka yoshe.’—Muka-kwambulula 1:4.

•   ‘Baka-busunga bakakala mu lifuti, co bakayoyamo myaka yoshe.’—Myaso 37:29.

 Kwitila mu Mbimbiliya, Ishamatanga ali na kutukwasa kumona mutwasa kukayoyela mu kwoloka kulutwe. Nga mushaka kuzibuka byabingi ha byuma biinendeka Mbimbiliya, taleni ñanda ya “Kuli Kumwasa Kuwana Binangulo Bimikwasa Mukayoye Mwamubwa?” na ya “A Real Hope for a Better Tomorrow.”