Lyacalumingo, November 20, 2022, ciwano ca United Nations Climate Change Conference cinahwile. (Ciwano ca mafuti ca kusimutwiya ha bukalu buli na kwija mwafwa ya kushaluka manene) Nameme banalizibasanene ngwabo bana bimbongo ku mafuti aje ali manene mu bukalu mwafwa ya kushaluka ciliko mangana bibakwaseko mu bingila bimo, oloni babangi banamwene ngwabo kulinga ngoco kukumanesa bukalu.

•   Ha November 19, 2022, António Guterres uje wapwa muka-kusoneka wa baka-United Nations wendekele ngwendi, “Njabwahelela manene mutunalizibasana ngwetu tukungululako bimbongo bimo bikwase baje banaliwana na bukalu buje bukaija mwafwa ya kushaluka manene. Oloni ebi keti bikebyo lika bitunapande kulinga . . . Lifuti-libu lili mu bukalu bwakama manene.”

•   Ha November 20, 2022, Mary Robinson wendekele ngwendi, “Lino lifuti ololo likobela mu bukalu bwakama mwafwa ya kushaluka manene.” Mary wapwile pulezidenti wa Ireland co lalo wapwile High Commissioner for Human Rights wa UN.

 Bakwenje na bambanda banalishoshomwena manene ha byuma bikalingiwa ha kaye kulutwe. Kuma mafuti asa kupangela hamo na kumanesa bukalu buli na kwija mwafwa ya kushaluka manene ndi? Bika biyendeka Mbimbiliya?

 Mbimbiliya imwesa ngwayo nameme banu balifwite bati kumanesa bukalu buli na kwija mwafwa ya kushaluka manene, kubasa kubumanesa. Tusimutwiyeni ha byuma bibali bitwendekesa ngoco:

•   “Kuwasa kusungamesa cuma cije ca kupenga-penga.”—Muka-kwambulula 1:15.

   Awa majwi alumbununa bika? Baka-kuyula kubasa kulinga byuma byoshe bibatonda kulinga mwafwa Njambi katangele banu ngwendi baliyule babenya. (Njelemiya 10:23) Nameme banu balikwatasane na kweseka mubasela mwoshe, kubasa kumanesa bukalu bwoshe.

•   “Mwafwa banu bakapwa baka-kulizema bakebo babenya, baka-kuzema bimbongo, . . . baka-kubyana kulitabasana na bakwabo.”—2 Timothi 3:2, 3.

   Awa majwi alumbununa bika? Mbimbiliya yendekelele cimweja ngwayo banu ba mu simbu ino bapwa baka-kulizema bakebo babenya, co kubashaka kupangela hamo na bakwabo mu kubwahesa byuma.

 Bifulumende bya banu keti keti bikebyo bikabwahesa byuma byoshe. Njambi natwangwila Mwene wamubwa manene, Yesu Kristu. Mbimbiliya inendeka hali ou Mwene ngwayo:

•   ‘Akapwa muka-kutuswana. Bakamutumbula ngwabo, Muka-kunangula Wakukomokesa. Njambi wa Nzili, Tate wa ku Myaka Yoshe. Mwene wa Kwoloka.’—Isaya 9:6.

 Yesu ikeye Mwene wa Bumwene bwa Njambi nambe ngwetu fulumende ya mwilu. (Mateu 6:10) Ali na nzili na mana, co lalo ali na lishungu lya kunyungilila banu bakakala hano hasi. (Myaso 72:12, 16) Yesu ha kupwa Mwene wa Bumwene bwa bwa Njambi akanyongesa baje bali na “kubiisa kaye” co akabwahesa mwamubwa byuma.—Kujombolola 11:18; Isaya 35:1, 7.

 Nga mushaka kuzibuka byuma bikwabo bije bikamanesa bukalu buli na kwija mwafwa ya kushaluka manene, co taleni ñanda ya “Climate Change and Our Future—What the Bible Says.”