Lya February 24, 2022, mutondo, lifuti lya Russia lyashangumukile kulwisa lifuti lya Ukraine, nameme bantwama ba mafuti baneseka kushaka kumanesa binzita. Ei nzita inakundama bati kaye? Matangwa amandondo kunima, ntwama wa munga ya United Nations, António Guterres nendekele ngwendi: “Kutwasa kuzibuka mwamubwa bukalu buinena ei nzita na byuma bibihya, na bushonde buinena mu mafuti a mu Europe na mu kaye koshe.”

•   Yesu Kilistu wapolofwetele ngwendi kulutwe, “lifuti limo likalwa nzita na lifuti likwabo, co bumwene bukalwisa bumwene bukwabo.” (Mateo 24:7) Tandeni ñanda ya “Bika Bimwesa Ngwabyo Tuli mu ‘Matangwa a Kukotoka’?” mangana mumone muimwesela Mbimbiliya ngwayo binzita biliko ano matangwa bili na kushulisilila bupolofweto bwa Yesu.

•   Mukanda wa Kujombolola umwesa ngwawo muka-kulonda ‘kabalu wa kubenga’ emanena binzita, co banamwana “nzili ya kunena nzita hano hasi.” (Kujombolola 6:4) Tandeni ñanda ya “Baka-kulonda Tubalu Bawana Bemanena Bika?” mangana mumone obu bupolofweto mubunatalesela ku binzita biliko ano matangwa.

•   Mukanda wa Ndanyele wamwesele ngwawo ‘mwene wa ku kunto’ na ‘mwene wa ku mbwela’ bakalilwisa. (Ndanyele 11:25-45) Kengeni vidio ya Bupolofweto bwa ku Ndanyele 11 Buje Bunalishulisilila mangana mumone bitulingisa tukulahele ngwetu lifuti lya Russia na mafuti analikwatasana nalyo akewo mwene wa ku kunto. a

•   Mukanda wa Kujombolola unendeka lalo bya “nzita ya Litangwa lyakama lya Njambi Muka-nzili Yoshe.” (Kujombolola 16:14, 16) Oloni ei keti nzita ya mukati ka mafuti ngwe ei iliko. Tandeni ñanda ya “Nzita ya Alamagidoni Yapwa Ika?” mangana muzibe byabingi ha nzita ei ikakalako kulutwe.

•   Mbimbiliya ngwayo Njambi ‘akamanesa binzita hano hasi hoshe.’ (Myaso 46:9) Tandeni ñanda ya “Bika Bitulingisa Tukale na Lilabelelo lya Byuma Byabibwa Kulutwe?” mangana muzibe byuma byanakulahesa kukalinga Njambi kulutwe.

•   Yesu walongesele baka-kumukabangeya ngwendi balombele ngwabo Bumwene bwa Njambi bwije. (Mateo 6:9, 10) Obu Bumwene bwapwa fulumende ya mwilu ije ikalingisa biyongola bya Njambi bilishulisilile hano hasi. Co cuma cimo canayongola Njambi cinapu kunena kwoloka mu kaye koshe. Nga mushaka kuzibuka mubwasa kumikwasela Bumwene bwa Njambi, kengeni vidio ya Bumwene bwa Njambi Bwapwa Buka?

 Mu Ukraine mwakala Bakaleho ba Yehova ba kutubakana 129,000. Co ngwe mwa Bakaleho bakwabo bali mu mafuti eka, nabo bakatembwinina Yesu. Kubesi kulikobelesa mu biñanda bya bupolitiki nambe kulwa mu nzita. (Yowano 18:36) Bakaleho ba Yehova mu kaye koshe bali na kutwalelelaho kwambulula ‘muzimbu waubwa wa Bumwene’ uje umwesa ngwawo Bumwene bwa Njambi bukebwo lika bukamanesa bukalu bwoshe bubali na kuliwana nabwo banu, kwambateselela na binzita. (Mateo 24:14) Simutwiyeni netu mangana muzibe byabingi kutalesa ku bikulaheso bili mu Mbimbiliya.