Ha mizimbu hanashulu na mizimbu ya banu baka-kwendeka bakwabo byuma byabibi nambe baka-kulinga bakwabo mwamubi mwafwa ya kaangu na baka-kulwisa bakwabo mwafwa batunda ku lifuti lyeka na binzita.

•   “Bizindo bili na kulibwezelela manene ha intaneti mwafwa ya nzita ili mukati ka lifuti lya Israel na Gaza, co lalo banu bali na kaangu.”​—Muzimbu wa The New York Times, wa lya November 15, 2023.

•   “Kushwa lya 7 October, mu kaye munashulu manene endekesi yaibi na lwozi kutubakana kunima.”​—Dennis Francis, pulezidenti wa United Nations General Assembly, November 3, 2023.

 Endekesi yaibi, bukenya na binzita binatwalelelaho kukalako kushwa lika kunima. Mbimbiliya inendeka ha banu ba kunima baje “[basungamesele] majwi abo amabi ngwe mikili” na kukundwiya binzita na bukenya. (Bisamu 64:3; 120:7; 140:1) Oloni inalumbununa lalo ngwayo bizindo biliko ano matangwa binemanenako byuma bimo.

 Mbimbiliya inendeka ha byuma bibali bije binalingisa kukale manene bizindo ano matangwa.

1.  1. Yendekele cimweja bya simbu omwo “cizemo ca banu babangi cikatonola.” (Mateu 24:12) Kutubakana kukala na cizemo, banu babangi bakamwesa bilinga bije bikanenesa bizindo.​—2 Timothi 3:1-5.

2.  2. Bizindo bili na kulibwezelela manene, mwafwa Satana Liyabolo uje wapwa wamubi manene ikeye ali na kubikundwiya. Mbimbiliya ngwayo, “kaye koshe kali mu nzili ya uje wamubi.”​—1 Iwano 5:19; Kujombolola 12:9, 12.

 Nameme ngoco, Mbimbiliya inamwesa ngwayo ololo Njambi atundisako byuma byoshe bili na kunenesa bizindo. Co lalo, akatundisako tuyando twoshe tunaija mwafwa ya bizindo. Mbimbiliya inakulahesa ngwayo:

•   Njambi “akasikumuna misozi yoshe ku mesho abo, co kutsa kucikakalako lalo nambe busiwa nambe kulila nambe kuziba kubabala. Byuma bya laja bineti.”​—Kujombolola 21:4.