Ngonde na ngonde tukabandamena kuyongola mapulogilamu a ku sipilitu na mavidio a ha JW Broadcasting. Oloni bwingi bwa bandolome betu mu Africa kukabakaluwila kuwana awa mapulogilamu ha Intaneti. Mwafwa bika?

 Ku mitambela yaingi mu Africa kukwakele Intaneti. Kuje kuiwaniwa, kuyesi kupanga mwamubwa co lalo ikapu ya kutula manene. Cakumwenako, kanyungi wa kuzenguluka umo wa ku Madagascar mwanalingile daunilodi JW Broadcasting ya ngonde imo kupangesa Intaneti yakufwetela, bamufwetesele $16. Ebi binapu bimbongo byabingi manene kutubakana bibakakwata banu mu calumingo cimo. a

 Nameme ngoco, ha simbu ino bandolome babangi mu Africa basa kulikuwa kuyongola JW Broadcasting kwa kujeneka Intaneti. Basa kulinga bati ngoco?

 Kushwa mu 2017, bandolome ba mu Africa, ku mbwela ya mambo ya Sahara banasa kuyongola JW Broadcasting ha TV kupangesa caneu ya ha setilaiti. Ei caneu yapwa ya bwana, co mwasa kuiyongola simbu yoshe-yoshe mu bindaka byakupwa 16.

 Bakaleho ba Yehova bakafwete bimbongo mangana ei caneu ikale ha setilaiti. Mafuti a kupwa 35 a mu Africa ali na kupangesa ei caneu ya ha setilaiti. Ei caneu bakaifwetela bimbongo bya kutubakana $12,000 ngonde na ngonde. Co kakangi bakafwete bimbongo bikwabo lalo mangana bandolome na bandokazi bayongwele mapulogilamu amo ha macaneu eka. Oku kukalingisa bandolome bayongole biwano bya mutambela na mapulogilamu akulitila aje akakalako nga kunaija ndolome nendela munango.

 Banu babangi hamolika na baje kubapwile Bakaleho bakalikuwu kuyongola mapulogilamu aha setilaiti ya JW ha ma TV abo. Oloni kuli bandolome bamo baje kubasa kulanda bikwata bya kupangesa ku kuyongola awa mapulogilamu. Ngeci ha Binjibo bya Bumwene bya kutubakana 3,670 banakaho bikwata bikwasa bandolome na bandokazi base kuyongola JW Broadcasting. Ebi bikwata hamolika na tilansipoti bakabifwetela $70 nga ha Njibo ya Bumwene hali laja TV nambe pulojekita. Oloni nga kwambateselela na TV na pulojekita, co byasa kukokela ku $530.

 Bandolome na bandokazi betu bakakandelela manene ha kukala nei caneu. Mukulunu umo wa ku Cameroon ngwendi: “Ei caneu inapu ngwe maana ya kwana binaanga byetu mu mambo.” Ndolome Odebode wa ku Nigeria ngwendi: “Tukayongola ei caneu na naanga yetu lutatu mu calumingo. Bana betu bashaka manene ei caneu. Simbu imo nga tuyongola TV bakatuleke ngwabo tuye ku caneu ya Bakaleho ba Yehova. Rose wa ku Nigeria nendi ngwendi: “Ano matangwa njikayongola manene caneu ya Bakaleho ba Yehova ya ha setilaiti kutubakana kuyongola mizimbu yeka. Kakangi munjakele na kuyongola manene mizimbu, mushongo wange wa mbunge wakele na kukatuka mwafwa byuma binjakele na kuyongola byakele na kunjizibisa kubihya ku mbunge. Oloni biñanda byamu pulogilamu ya JW Broadcasting byapwa byabibwa manene. Ei ikeyo caneu injazema manene. Inapu bwana bwakama bwa kutunda kuli Yehova.”

 Kanyungi wa kuzenguluka wa ku Mozambique ngwendi Binjibo bya Bumwene bya mu citingitingi cendi bili na bikwata byei setilaiti. Bandolome na bandokazi bomu mu bikungulukilo bakete bwasi ha Binjibo bya Bumwene mangana bayongole pulogilamu ya JW Broadcasting ha setilaiti.

 Ha ciwano ca mafuti ca mu 2019 cije cakele ku Johannesburg, mu South Africa, banakele biñanda bimo ha setilaiti mangana baje bakele na kukungulukila mu mitambela ikwabo ya kupwa 9 nabo babiyongole. Cakumwenako, banakeleho biñanda bya ba mu Cibunga ca Kutwamenena. Sphumelele wa mu Dipatimenti ya Broadcasting ya ha munango wa South Africa ngwendi: “Hakulibanga twakele na kwaka biñanda ha Intaneti. Oloni kulinga ngoco kubanga haje haikwata mwamubwa intaneti, co lalo kwakele na kutumanesela manene bimbongo. Caneu ya Bakaleho ba Yehova ya ha setilaiti ikeyo ndando yapwako yaibwa, co lalo ikakwata ku mitambela yaingi.”

 Twakandelelako manene ku milambu yeni ya kukundwiya cipangi ca mu kaye koshe ije ili na kukwasa bandolome na bandokazi betu babangi mu Africa bayongole JW Broadcasting ya ha setilaiti. Tuli na kukandelela manene ku milambu imuli na kwana kupangesa bingila bya kuliseza-seza bili ha donate.pr418.com.