1. Bika byamikomokesele omwo mwalekeleko bakweni muzimbu wa mu Mbimbiliya?

MWALIZIBILE bati mumwanangukile ngweni munawana busunga? Mwalizibile mwamubwa mwafwa mwazibisisile bimwakele na kulilongesa mu Mbimbiliya. Co mwasinganyekele ngweni banu boshe batolilila nga mubalekako byuma bimunalilongesa. Mwakulahelele ngweni binangulo bya mu Mbimbiliya bibakwasa bapwe ba kubwahelela na kukala na lilabelelo. (Myaso 119:105) Ngeci, mwalekeleko babusamba beni na babushoko bweni byuma bimwalilongesele. Oloni hamo mwakomokele omwo babangi babyanene muzimbu umwabalekele.

2-3. Kuma banu babangi bakulahelele ngwabo Yesu ikeye Mesiya ndi? Lumbununeni.

² Kutwapandele kukomoka nga banu babyana muzimbu utubambulwila. Banu babangi kubakulahelele Yesu nameme balimwenenene bikomokeso byalingile bije byamwesele ngwabyo Njambi wakele na kumukwasa. Cakumwenako, Yesu mwasangwile Lazalu bitozi bendi balimwenenene. Nameme ngoco, bantwama ba Bayunda kubakulahelele ngwabo Yesu ikeye Mesiya. Oloni bashakele kutsiya Yesu na Lazalu.—Yowa 11:47, 48, 53; 12:9-11.

³ Yesu wazibukile ngwendi banu babangi kubakulahela ngwabo ikeye Mesiya. (Yowa 5:39-44) Walekele bandongesi ba Yowano Muka-kumbwitika ngwendi: “Nabwahelela munu uje kawana cuma cimo muli yange cije cimutanwisa.” (Mateo 11:2, 3, 6, NWT) Mwafwa bika banu babangi kubakulahelele Yesu?

4. Bika bitusimutwiya muno mu cilongesa?

⁴ Muno mu cilongesa na mu cilongesa cinatako, tusimutwiya byuma byalingisile banu babangi bajeneke kukulahela Yesu. Co  lalo, tusimutwiya byuma bili na kulingisa banu babangi bajeneke kutolilila ku muzimbu waubwa utuli na kubambulwila. Kutundaho, tusimutwiya bitunapande kulinga mangana tutwaleleleho kukulahela Yesu na kumukabangeya.

5. Bika byalingisile banu bamo bajeneke kukulahela ngwabo Yesu ikeye Mesiya ibapolofwetele?

⁵ Banu babangi kubakulahelele Yesu mwafwa ya byuma bibazibukile hali ikeye. Bazibukile ngwabo Yesu wapwile mulongesi wamubwa, co lalo balimwenenene bikomokeso byalingile. Oloni bakebo bamumwene lika ngwabo muna-kahutu, muka-kushonga. Co lalo, wakolelele mu Nazaleta, nganda ije ibakele na kumona banu ngwabo kuyapwile ya seho. Natanele uje wakupwile ndongesi ya Yesu wendekele ngwendi: “Kuma ku Nazaleta kwasa kutunda cuma cacibwa ndi?” (Yowa 1:46) Hamo Natanele wazindile nganda ya Nazaleta muje mwakolelele Yesu. Nambe hamo wanukile bupolofweto buli ku mukanda wa Mika 5:2 buje bwamwesele ngwabwo Mesiya akasemukila mu Mbetelehema keti mu Nazaleta.

6. Bika bibapandele kulinga banu ba mu simbu ya Yesu mangana bazibuke ngwabo ikeye Mesiya?

⁶ Bisoneka byendeka bika? Kapolofweto Isaya wapolofwetele ngwendi bitozi ba Yesu kubakaka mbunge ku “biñanda bya cikota” ca Mesiya. (Isaya 53:8, NWT) Biñanda byabingi bya kutalesa kuli Mesiya babipolofwetele. Ngwe banu bawanene simbu ya kutondesesa ebi biñanda, ngwe bazibukile ngwabo Yesu wasemukilile mu Mbetelehema, co lalo wapwile muna Mwene Ndabiti. (Luka 2:4-7) Yesu wasemukilile bene ku mutambela ubapolofwetele ku Mika 5:2. Co bukalu bwakele hali? Aba banu kubatondesesele mwamubwa mangana bawane bukaleho bwoshe mu kushula. Ngeci, kubakulahelele ngwabo Yesu ikeye Mesiya.

7. Mwafwa bika banu babangi ano matangwa kubashakele kupwa Bakaleho ba Yehova?

⁷ Obu bukalu kubucili na matangwa ano indi? Eyo. Banu ba Yehova babangi kubapwile ba kufuka, co kubalilongesele manene. Ngeci, banu babangi babamona ngwabo bapwa “bangoco, ba kujeneka kulilongesa.” (Vili 4:13) Bamo bakasinganyeka ngwabo Bakaleho ba Yehova kubapandele kulongesa Mbimbiliya mwafwa kubakobelele masikola a bulombelo. Bamoco bakendeka ngwabo bulombelo bwa Bakaleho ba Yehova bwapwa bwa ku America. Oloni awa anapu makuli mwafwa Bakaleho babangi kubakele mu America. Bekaco bakabaleke ngwabo Bakaleho kubakulahelele Yesu. Ha myaka yaingi, banu ba Yehova banababangeya ngwabo bapwa baka-bimata, co lalo kubakele na cizemo. Ngeci, banu babangi kubashakele kupwa Bakaleho mwafwa bakakulahela ebi biñanda bya makuli.

8. Kwesekesa na mukanda wa Vilinga 17:11, bika bibanapande kulinga banu mangana bazibuke baka-Kilistu ba busunga?

⁸ Byuma muka byanapande kulinga munu mangana atwaleleleho kukala na likulahelo? Napande kutondesesa busunga. Ebi bikebyo byalingile Luka uje wasonekele mukanda umo wa Biñanda Byabibwa. Watondesesele byuma “byoshe tunde habyashangumukilile.” Washakele ngwendi banu basonekela bazibuke “busunga bwa kushula bwa byuma” bibazibile hali Yesu. (Luka 1:1-4) Bayunda ba mu Mbeleya nabo batembwininine Luka. Mubazibile muzimbu waubwa wa kukundama kuli Yesu, batondesesele mu Bisoneka bya Cihebelu mangana bazibuke indi muzimbu ubazibile wapwile wa busunga. (Tandeni Vilinga 17:11.) Mu ngila imo lika, banu ano matangwa banapande kutondesesa busunga. Banapande kutonda mu Bisoneka mangana bazibuke indi byuma bibali na kubalongesa Bakaleho ba Yehova binapu bya busunga. Banapande lalo kuzibuka byuma  bibanalingi Bakaleho ba Yehova. Nga batondesesa bukaleho bwoshe mu kushula, co biñanda bya makuli kubibongumuna.

9. Banu bamo balingile bika Yesu mwabyanene kubamwesa cizibukiso ca kutunda mwilu?

⁹ Banu bamo kubakulahelele ngwabo Yesu ikeye Mesiya nameme wakele na kubalongesa mu ngila ya kukomokesa. Bashakele ngwabo alingeko byuma bikwabo. Bashakele ngwabo abamwese “cizibukiso ca kutunda mwilu” asina bakulahela ngwabo ikeye Mesiya. (Mateo 16:1, NWT) Hamo balingile ngoco mwafwa ya kujeneka kuzibisisa mwamubwa majwi ali ku mukanda wa Ndanyele 7:13, 14. Oloni simbu yayongwele Yehova ngwendi obu bupolofweto bulishulisilile te kanda yete. Byuma byalongesele Yesu byapandele kubalingisa bakulahele ngwabo ikeye Mesiya. Oloni mwabyanene kubamwesa cizibukiso cibatondele, kubamukulahelele.—Mateo 16:4.

10. Yesu washulisilile bati byapolofwetele Isaya hali Mesiya?

¹⁰ Bisoneka byendeka bika? Kapolofweto Isaya wendekele hali Mesiya ngwendi: “Kakatambeka nambe kutendeka lijwi lyendi, nambe kwendeka majwi amangi mu bitapalo embwe.” (Isaya 42:1, 2) Yesu mwakele hano hasi kakele na kulinga byuma mangana alimwese. Katungile bitembele nambe kuzala bizalo bya bulombelo bya kulitila. Co lalo kashakele ngwendi banu bamusanese mazina a bitwamo bya mu bulombelo. Yesu mubakele na kumusompesa, Mwene Helonde wamulekele ngwendi alinge cikomokeso. Oloni wabyanene nameme wazibukile ngwendi aka buyoye bwendi mu bushonde. (Luka 23:8-11) Yesu wakele na kulinga bikomokeso, oloni wakele manene mbunge ku cipangi ca kwambulula. Walekele bandongesi bendi ngwendi: “Ebi bikebyo binjezilile.”—Mako 1:38.

11. Bisinganyeka muka bya kuhenga bibali nabyo banu ano matangwa?

¹¹ Obu bukalu kubucili na matangwa ano indi? Eyo. Banu babangi ano matangwa bashaka kukobela mu maceci mubanakwalaleka byuma  byabibwa bya ndando ya helu na kutolilila ku bantwama ba bulombelo baje bali na bitwamo bya kulitila. Co lalo, bakalingi bilika bije bibakele na kulinga baka-kujeneka kukulahela. Nameme ngoco, aba banu bakai oku ku maceci kubesi kubakwasa kuzibuka Njambi na biyongola byendi. Oloni baje bakaija ku biwano byetu bakalilongesa byatonda Yehova ngwendi tulinge nomwo mwakubilingila. Binjubo byetu bya Bumwene byapwa byabibwa, co lalo bya kujela. Oloni kubabitungile mu ngila ya kukomokesa. Baje bali na kutwamenena kubesi kuzala bizalo bya kulitila. Co lalo, kubesi kubasanesa mazina a kulitila. Byuma bitwakulahela nebi bitukalongesa byatunda mu Mbimbiliya. Nameme ngoco, banu babangi kubesi kutolilila ku muzimbu utukabambulwila mwafwa kutwesi kulinga byuma bibakalingi ku bulombelo bwabo. Co lalo, byuma bitukalongesa keti bikebyo bibakashaka kuziba.

12. Kwesekesa na mukanda wa Vahevelu 11:1, 6, bika bitukwasa tukanyamese likulahelo lyetu?

¹² Tunapande kulinga bika mangana tutwaleleleho kukala na likulahelo? Kapositolo Paulu walekele baka-Kilistu ba mu Loma ngwendi: “Kukulahela kutunda ha kuziba, co kuziba kutunda ha kwambulula Kilistu.” (Loma 10:17) Ngeci, twasa lika kukanyamesa likulahelo lyetu nga tulilongesa busunga bwa mu Mbimbiliya keti kulinga bilika bije kubilitombola na binangulo bya mu Mbimbiliya nameme bisholoka ngwe byabibwa. Tunapande kulilongesa busunga mangana tukanyamese likulahelo lyetu mwafwa “nga likulahelo lyahi kutwasa kuzibisa Njambi kubwaha.” (Tandeni Vahevelu 11:1, 6, NWT.) Kutwapandele kubandamena ngwetu kubanga tumone cizibukiso ca kutunda mwilu asina tukulahela ngwetu tunawana busunga. Oloni kulilongesa Mbimbiliya na kusinganyekesesa kutukwasa tukulahele ngwetu tunawana busunga.

13. Mwafwa bika banu babangi kubakulahelele Yesu?

¹³ Bandongesi ba Yowano Muka-kumbwitika bakomokele omwo Yesu na bandongesi bendi kubakele na kulyumina byakulya. Yesu wabalekele ngwendi bandongesi bendi kubapandele kulyumina byakulya oku acili nabo. (Mateo 9: 14-17) Bafaliseo na banu beka baje bakele na kulwisa Yesu bamupayele mwafwa kakele na kukabangeya cisemwa cabo. Balubalele omwo Yesu wakangwisile banu ha litangwa lya Sabata. (Mako 3:1-6; Yowano 9:16) Balikwisile ngwe bakele na kusingimika Sabata okuni bali na kutabesa banu balinge mingoso mu tembele ha litangwa lya Sabata. Balubalele omwo Yesu wabapayele mwafwa ya kulinga ngoco. (Mateo 21:12, 13, 15) Banu bakele na kwambulwila Yesu mu sinangonge ya mu Nazaleta balubalele omwo Yesu wendekele byakumwenako bimo bije byamwesele ngwabyo bapwile baka-kulishaka manene, co kubakele na likulahelo. (Luka 4:16, 25-30) Banu babangi kubakulahelele Yesu mwafwa kalingile byuma bibashakele ngwabo alinge.—Mateo 11:16-19.

14. Mwafwa bika Yesu wabyanene bilika bya cisemwa bije kubyalitombwele na Bisoneka?

¹⁴ Bisoneka byendeka bika? Yehova wahwiminine kapolofweto Isaya asoneke ngwendi: “Banu aba baija kuyehi nange banjilemesa lika na tunwa twabo, oloni bimbunge byabo bili kulyala nange. Kulemesa kwabo kunapu kwa mashiko a bunu.” (Isaya 29:13) Yesu kabiisile omwo wabyanene bilinga bya cisemwa bije kubyalitombwele na Bisoneka. Baje bamwene ngwabo kukabangeya cisemwa kwapwile kwa seho kutubakana kukabangeya Bisoneka, babyanene Yehova na Mesiya.

15. Mwafwa bika banu babangi bazinda Bakaleho ba Yehova?

¹⁵ Obu bukalu kubucili na matangwa ano indi? Eyo. Banu babangi bakalubalela Bakaleho ba Yehova mubakabyana kulikwatasana nabo mu kulinga bilika bije kubilitombola na binangulo bya mu Mbimbiliya bya kufwa ngwe cilika ca Kilisimasi na bilika bya matangwa a kusemuka. Bamoco bakalubalela Bakaleho ba Yehova mubakabyana kulikwatasana nabo mu kulinga bilika bije kubilitombola na binangulo bya mu Mbimbiliya ha simbu ya bya kutsa nambe bilika bya lifuti. Aba banu bali na kulinga byuma bya cifwa eci bakasinganyeka ngwabo bali na kulemesa Njambi mu ngila inapande. Oloni kubesi na kuzibisa Njambi kubwaha mwafwa bamona cisemwa kupwa ca seho kutubakana binangulo bya mu Mbimbiliya.—Mako 7:7-9.

16. Byuma muka bitunapande kulinga nebi kutwapandele kulinga? (Myaso 119:97, 113, 163-165)

¹⁶ Tunapande kulinga bika mangana tutwaleleleho kukala na likulahelo? Tunapande kuzema manene binangulo na mashiko a Yehova. (Tandeni Myaso 119:97, 113, 163-165.) Nga twazema Yehova, co kutulingi bilika bije kubimuzibisa kubwaha. Co lalo, kututabesa cuma coshe-coshe citsiye busamba bwetu nendi.

17. Banu babangi basinganyekele ngwabo Mesiya a kulinga bika?

¹⁷ Banu bamo bashakele ngwabo Yesu atengulule fulumende. Basinganyekele ngwabo Mesiya akubapatula ku ciyulo ca Baloma baje bakele na kubayandesa. Oloni mubashakele kumupwisa mwene, Yesu wabyanene. (Yowa 6:14, 15) Banu bamo kwambateselela na tupilistu basinganyekele ngwabo Yesu atengulula fulumende. Co balishoshomwenene ngwabo nga alinga ngoco, Baloma balubala na kunyeka aba bantwama ba bulombelo moko ya kuyula ibabanene. Bayunda babangi babyanene Yesu mwafwa bakele manene mbunge ku biñanda bya bupolitiki.

18. Bupolofweto muka bwa kukundama kuli Mesiya bubombwanesele banu babangi?

¹⁸ Bisoneka byendeka bika? Mbimbiliya yapolofwetele ngwayo Mesiya akapwa Liswalale wa nzili. Oloni yapolofwetele lalo ngwayo wapandele tahi kutsila bubi bwetu. (Isaya 53:9, 12) Co mwafwa bika Bayunda bakele na bisinganyeka bya kuhenga hali Mesiya? Mwafwa kubakele mana ku bupolofweto buje bwamwesele  ngwabo bukalu bwabo bukahwa kulutwe.—Yowa 6:26, 27.

19. Bika bili na kulingisa banu babangi bombwanese muzimbu utuli na kwambulula?

¹⁹ Obu bukalu kubucili na matangwa ano indi? Eyo. Banu babangi ano matangwa batuzinda mwafwa kutwesi kulikobelesa mu bupolitiki. Bakatondo ngwabo netu tubote. Oloni yetu tuzibuka ngwetu nga twangula munu ngwetu atuyule, co tunabyana Ciyulo ca Yehova. (1 Samwe 8:4-7) Co lalo, banu bakasinganyeka ngwabo tunapande kutunga masikola na bipatela na kulingako bipangi bimo bije bikwasa banu ba mu citingitingi mutwakala. Kubatushakele mwafwa tunaka lika mbunge ku kwambulula muzimbu waubwa keti ku kumanesa bukalu bubali na kuliwana nabwo banu muno mu kaye.

20. Majwi a Yesu ali ku mukanda wa Mateo 7:21-23 amwesa ngwawo tunapande kwaka manene mbunge ku kulinga bika?

²⁰ Tunapande kulinga bika mangana tutwaleleleho kukala na likulahelo? (Tandeni Mateo 7:21-23.) Tunapande kwaka mbunge ku cipangi catushikile Yesu ngwendi tulinge. (Mateo 28:19, 20) Kutwapandele kulikobelesa mu bupolitiki nambe kuzezama mu kulinga bipangi bya kushaka tumanese bukalu bubali na kuliwana nabwo banu muno mu kaye. Twazema banu, co kutwesi kuliziba mwamubwa mubakaliwana na bukalu. Oloni tuzibuka ngwetu ngila yaibwa yakukwaselamo bakwetu inapu kubalongesa bya Bumwene bwa Njambi na kubakwasa balikute busamba na Yehova.

21. Tunapande kulyangwila kulinga bika?

²¹ Muno mu cilongesa, twasimutwiya byuma biwana byonowesele banu bakabangeye Yesu mu simbu ya baka-Kilistu ba kulibanga. Co ebi byuma byasa kwonowesa banu kulikwatasana na baka-Kilistu ba busunga ano matangwa. Kuma ebi bikebyo lika byuma byasa kutwonowesa kukabangeya Yesu ndi? Embwe. Mu cilongesa cinatako, tusimutwiya byuma bikwabo byasa kutwonowesa kumukabangeya. Tutwaleleleniho kukanyamesa likulahelo lyetu. Co keti twecelele cuma coshe-coshe citwonowese kukabangeya Yesu.