Mwafwa bika Yesu wendekele majwi a Ndabiti aje ali ku mukanda wa Myaso 22:1 mwakele muyehi na kutsa?

Simbu kanda Yesu atse, wendekele majwi ali ku mukanda wa Mateo 27:46 ngwendi: “Njambi yange, Njambi yange, bikajo unanjisezela?” Yesu mwendekele awa majwi, washulisilile majwi a bupolofweto a Ndabiti aje ali ku mukanda wa Myaso 22:1. (Mako 15:34) Kutwapandele kusinganyeka ngwetu Yesu mwendekele awa majwi wazeyele nambe kusinganyeka ngwendi Yehova namuyengula. Yesu wazibukile mwamubwa byapandele kutsila, co walyanene kulinga ngoco. (Mateo 16:21; 20:28) Wazibukile lalo ngwendi ha simbu ibamutsiya, Yehova ecela ‘kumunyungilila.’ (Yombi 1:10) Yehova wecelele kunyungilila Yesu mangana Yesu amwese ngwendi asa kutwalelelaho kupwa wa kulongwa nameme byuma bikaluwe bati.—Mako 14:35, 36.

Co bika byalingisile Yesu endeke majwi ali ku mukanda wa Myaso 22:1? Kutuzibuka mwamubwa. Oloni twendekako lika byuma bimo bije byasele kumulingisa endeke awa majwi. *

Yesu mwendekele awa majwi hamo washakele kumwesa ngwendi Yehova kamunyungililile. Yehova kapandele kunyungilila Yesu ha simbu yafwetele ndando ya kupatula. Wakele na mubila wa bunu, co wazibile kubabala omwo ‘watsililile banu boshe.’—Heve 2:9.

Yesu mwendekele majwi ali ha vesi 1, hamo washakele ngwendi banu banuke mavesi oshe ali oku ku mukanda. Cisholoka ngwe Bayunda ba  mu simbu ya Yesu bakele na kukwata myaso yaingi mu mutwe. Ngeci, nga munu endekako majwi amo ali mu mwaso, basele kwanuka mwaso woshe. Nga ebi bikebyo byapwile biyongola bya Yesu, co wakwasele baka-kumukabangeya baje bapwile Bayunda banuke bupolofweto bwabwingi buli oku ku mukanda buje bwendekele ha kutsa kwendi. (Myaso 22:7, 8, 15, 16, 18, 24) Co lalo, mavesi a mamaneselelo ou mwaso ali na kushangazala Yehova na kumwesa ngwawo wapwa Mwene wa kaye koshe.—Myaso 22:27-31.

Yesu mwendekele awa majwi endekele Ndabiti, hamo washakele kumwesa ngwendi kakele na mulonga. Simbu kanda bamutsiye, bamutwalele ku nkuta ya Sunandeline, co bakamubangeyeye ngwabo nashaula Njambi. (Mateo 26:65, 66) Baka-nkuta ya Sunandeline balikungulwile bwasi-bwasi butsiki mangana basompese Yesu, co kubakabangeyeye mashiko aje amwesa mwakutalela biñanda. (Mateo 26:59; Mako 14:56-59) Ngeci, Yesu mwehwile ngwendi: “Njambi yange, Njambi yange, bikajo unanjisezela?” Hamo washakele kumwesa ngwendi nabimo byahi byabiisile bibapandele kumutsiila.

Hamo Yesu washakele kwanukisa banu ngwendi nameme Ndabiti uje wasonekele ou mwaso wayandele, Yehova kamuyengwile. Ndabiti mwehwile eci cihula, kamwesele ngwendi wecelele kukulahela Njambi. Ndabiti mwamanesele kwihula eci cihula, wendekele majwi aje amwesele ngwawo wakulahelele nzili ya Yehova ya kwobola, co Yehova watwaleleleho kumubezikisa. (Myaso 22:23, 24, 27) Mu ngila imo lika, nameme Yesu “Muna Ndabiti” wayandele omwo wakele ha citi ca kuyandesela, oloni Yehova kamuyengwile.—Mateo 21:9.

Hamo Yesu walinyengele mwafwa Yehova wecelele kumunyungilila mangana amwese cili bene ngwendi wapwa wa kulongwa. Ha kulibanga, Yehova kayongwele ngwendi Munendi ayande na kutsa. Oloni Yehova wayongwele kulinga ngoco omwo Adama na Eva bamutengulukilile. Yesu kalingile bubi, oloni wapandele kuyanda na kutsa mangana asholole makuli a Satana na kwana ndando ya kupatula banu ku bubi na kutsa. (Mako 8:31; 1 Petu 2:21-24) Yesu wasele lika kulinga ngoco omwo Yehova wecelele kumunyungilila ha simbu ya kutsa kwendi. Olu lukelwo lwa kulibanga Yehova kwecela kunyungilila Yesu.

Hamo Yesu washakele ngwendi bandongesi bendi basinganyekesese ha byuma byalingisile Yehova amwecelele bamushukike ha citi ca kuyandesela. * Yesu wazibukile ngwendi kumutsiya ngwe cikenya kunasa kutanwisa banu babangi. (1 Koli 1:23) Baka-kumukabangeya baje basinganyekesesele ha byuma byalingisile bamutsiye mu ngila eyi bamwene seho ya kutsa kwendi. (Ngala 3:13, 14) Bamumwene kupwa mwobole keti cikenya embwe.

Kutuzibuka mwamubwa byalingisile Yesu endeke awa majwi, oloni wazibukile ngwendi omwo atsila ha citi ca kuyandesela alinga cizango ca Yehova. Mwamanesele kwendeka majwi ali ku Myaso 22:1, Yesu wendekele ngwendi: “Byuma byoshe binalishulisilila.” (Yowa 19:30, NWT; Luka 22:37) Yehova mwecelele kunyungilila Yesu ha kasimbu kakandondo, wamulingisile ashulisilile byuma byoshe byamutumine kwa kulinga hano hasi. Co lalo, wamulingisile ashulisilile byuma byoshe bibasonekele hali ikeye ‘mu Lishiko lya Mosesa, na mu bisoneka bya tupolofweto na mu Myaso.’—Luka 24:44.