Calubinda, munjakele na myaka ya kweta ku 13, busamba bwange na Yehova bwashangumukile kuzeya. Bakwetu banjakele na kukobela nabo sikola basholokele ngwe bakele na kulikuwa kuyoya, co nange njashakele kubatembwinina. Njamwene ngwe kukabangeya mashiko a bisemi bange na mashiko a mu Mbimbiliya kunjonowesa kupwa wa kuzituka. Co njalizibile ngwe kupangela Yehova kwakukalu manene. Njakulahelele ngwange Yehova kwakala, oloni njashangumukile kuliziba ngwe kasa kupwa kabusamba kange.

Kunjalikelele kwambulula, oloni kunjakele na kupanga manene mu lihya. Kunjakele na kulibwahesela simbu kanda njiye na kwambulula. Co kwanjikaluwilile kushangumuka kusimutwiya na banu nambe kutwalelelaho kusimutwiya nabo. Mu kwita kwa simbu, kunjakele na mangenzi a kwilukila nambe bilongesa bya Mbimbiliya, co kunjakele na kulikuwa kwambulula. Ngeci, njalihwile ngwange: ‘Muje bene mukemwo munjambulwila-ambulwila ndi?’

Munjakele na myaka 17, njayongwele kutunda mu lilapa lya bisemi bange na kukaliyoyela. Co  njalongekeyele bitenga byange na kujalukila ku Australia. Bisemi bange mubanjimwene njitunda ha njibo bazibile manene busiwa. Balishoshomwenene ngwabo hamo kunjikatwalelelaho kupangela Yehova, oloni bakulahelele ngwabo njikalinga ngoco.

Munjakakele ku Australia, busamba bwange na Yehova bwazeyele manene. Kunjakele na kukunguluka simbu yoshe. Njakalikwatasanene na bakwetu bambanda baje bakele na kulinga tangwa eli baija ku biwano, co lya mukwabo butsiki baya na kukina na kunwa bwala. Ha simbu ije njalingile ku busunga kunjili na ku kaye lalo kunjili, oloni noku kunjakundamene mwamubwa bene kwahi.

Munima ya myaka ibali, njaliwanene na ndokazi uje wanjikwasele njitengulule futisi yange. Njakele na bakwetu bandokazi babazike bawana mu njibo, co twalanyele kanyungi wa kuzenguluka na munakazi wendi Tamara ngwetu bakukale ku njibo yetu calumingo coshe. Munalume wendi mwakele na kuzezama na bipangi bya cikungulukilo, ikeyeco wakele na kusikama netu. Njakele na kuliziba kubwaha mwakele na kusikama netu mwafwa wakele na nzanzu, co twazitukile kusimutwiya nendi. Njakomokele mwafwa uje ndokazi wazezamene na bipangi bya ku sipilitu, oloni wakele na kuwana simbu ya kusikama netu.

Tamara wakele na kupanga na nzili bipangi bya ku sipilitu. Wazemene manene busunga na cipangi ca kwambulula, co walingisile bakwabo bamutembwinine. Wazezamene na bipangi bya ku sipilitu, oloni wapwile wa kubwahelela. Yange kunjazezamene na bipangi bya ku sipilitu, oloni kunjapwile wa kubwahelela. Munjanangukile ngwange kupangela Yehova kunamulingisa apwe wa kubwahelela, njatengulwile bisinganyeka byange. Mwanja wendi wanjilingisile njanukeko majwi amo a seho a mu Mbimbiliya aje amwesa ngwawo Yehova washaka ngwendi banu boshe bamupangele mu “kubwahelela.”—Myaso 100:2.

Njashakele kupwa wa kubwahelela ngwe Tamara, oloni njapandele kutengululako byuma bimo mu kuyoya. Kukwapwile kwakwasi kulinga  ngoco. Nameme ngoco, njashangumukile kulingako byuma bimo mangana njitengulule buyoye bwange. Njashangumukile kulibwahesela-bwahesela simbu kanda njiye na kwambulula. Co njalingileko bupainiya bwa kukwasa ha bingonde bimo. Kulinga ngoco kwanjikwasele njipwe wa kusimpa. Njalikuwile cipangi ca kwambulula mwafwa njakele na kupangesa manene Mbimbiliya mu lihya. Mu kwita kwa simbu, njashangumukile kulinga bupainiya bwa kukwasa ngonde na ngonde.

Njashangumukile kulikuta busamba na bandokazi ba kuliseza-seza baje bazemene busunga, co bakele na kupangela Yehova na bimbunge byabo byoshe. Myanja yabo yaibwa yanjikwasele njinanguke byuma bya seho manene mu kuyoya, co njashangumukile kutanda Mbimbiliya ha litangwa na litangwa. Njakele oni na kulikuwa cipangi ca kwambulula, co njapwile painiya wa simbu yoshe. Njapwile oni wa kubwahelela, co njakele na kuliziba kuzituka kulikwatasana na bandolome na bandokazi mu cikungulukilo.

Munima ya mwaka umo, njaliwanene na Alex uje wakala na ngozi, co wazema Yehova na cipangi ca kwambulula. Ha simbu oyo, wapwile muka-kupangela, co te napanga laja cipangi ca bupainiya ha myaka 6. Alex wakapangelele ku Malawi ha simbu ikwakele baka-kwambulula babandondo. Wakapangele na bamishinali baje bamushongangeyeye kutwalelelaho kwaka bya Bumwene mu mutamba wa kulibanga.

Mu 2003, twalyambatele na Alex, co tunatwalelelaho kupanga cipangi ca simbu yoshe. Twalilongesa byuma byabingi byabibwa, co Yehova natubezikisa mu bingila byabingi.

Mu 2009, batwangwile kupwa bamishinali, co batutumine kukapangela ku lifuti lya Timor-Leste. Twalikomokelele na kulishoshomwena, oloni twabwahelelele. Munima ya bingonde 5, twaile ku Timor-Leste, co twakatulilile mu nganda ya Dili.

 Mutwajalukile, byuma byabingi byatengulukile mu kuyoya kwetu. Twakalilongesele cisemwa ceka na ndaka yeka. Co twapandele kwizilila byakulya byeka na yoyesi yeka. Mutwakele na kwambulula, twakele na kuliwana na banu baje bakele na bukalu bwa kuliseza-seza. Bamo bapwile tuhutu, bakwabo kubalilongesele, co beka bakele na kubayandesa. Banu babangi bakele na kuyanda mwafwa ya binzita na bukenya. *

Njalikuwile manene cipangi ca kwambulula. Cakumwenako, njaliwanene na mwanike wa myaka 13 wa lizina lya Maria, * uje washolokele kwombwa. Kwetile lika myaka yaindondo kutunda habatokelele baina. Co lalo, kakele na kulimona na baishe kushwa kumo. Maria kazibukile mwamubwa bya kulinga ngwe mwa bakwabo banike. Litangwa limo, Maria wakele na kunjileka bukalu bwendi oku ali na kulila. Oloni te kunjazibisisile mwamubwa byakele na kwendeka mwafwa te kanda njizibuke mwamubwa ndaka yabo. Njalombele Yehova anjikwase mangana njimutakamese, co njamutandeleleko bisoneka bimo bije byamutakamesele. Munima ya myaka yaindondo, njalimwenenene busunga mu bwatengulwile buyoye bwa Maria. Wapwile oni wa kubwahelela, co sholwesi yendi nayo yatengulukile. Bamumbwitikile, co ha simbu ino nendi ali na kutwamenena bilongesa bya Mbimbiliya. Maria ali na kuliziba ngwendi nawana naanga ya ku sipilitu ya bandolome na bandokazi baje bamuzema.

Yehova ali na kubezikisa cipangi ca kwambulula mu Timor-Leste. Baka-kwambulula babangi banabambwitika mu myaka 10 inahu, oloni bwingi bwabo banapu bapainiya, baka-kupangela nambe bakulunu. Bamo bali na kupangela ha maofisi a kunungulwila mabulu. Njabwahelelele manene munjakele na kubamona oku banabwahelela, balikuwa kwimba ku biwano na kukola ku sipilitu.

Mutwakayoyelele mu Timor-Leste kwalisezele manene nomwo mutwakele na kuyoyela ku Australia, oloni twabwahelelele. Simbu imo twakele na kulonda mu bimota muje mwakele banu babangi, co lalo bakelemo bisi ba kuma na mikuta ya miloho. Binjibo bya banu bamo batwakele na kulilongesa nabo Mbimbiliya byapwile byabindondo, mwashulile mazilo, co bisimbu bimo mwakele na kushaluka. Simbu imo twakele na kulilongeselamo oku munajulu na tusumbi oku bali na kushatozokamo. Nameme twakele na kuliwana nobu bukalu, njabwahelelele.

Njakandelela manene kuli batate na banana baje banjilongesele busunga na kunjikwasa njitwaleleleho kupangela Yehova ha simbu injazeyele ku sipilitu. Njalimwena busunga bwa majwi ali ku mukanda wa Visimo 22:6. Banana na batate banabwahelela kumona yange na Alex oku tupangela Yehova. Kushwa mu 2016 tunapanga cipangi ca kuzenguluka mu Australasia.

Nameme simbu imo kunima kunjashakele manene cipangi ca kwambulula, oloni ha simbu ino njazema manene kwambulula. Njalilongesa ngwange nameme tuliwana na bukalu mu kuyoya, twasa kupwa ba kubwahelela nga tupangela Njambi na bimbunge byetu byoshe. Njinapu wa kubwahelela manene ha myaka 18 injinapangela Yehova hamo lika na munalume wange Alex. Njazibisisa oni mwamubwa majwi a Ndabiti uje walekele Yehova ngwendi: ‘Boshe baje batewela kuli yobe bakajolela simbu yoshe, bakaimba na kujolela, co baje bazema lizina lyobe bakabwahelela.’—Myaso 5:11.