1-2. Mwafwa bika twendeka ngwetu twasa kukabangeya mwanja wa Yesu? Endekeni cakumwenako.

ACISINGANYEKENI ngweni muli na kwenda hamo na cibunga cije cili na kwenda mu shwata ya kutewesa muje muli mushekesheke. Co munu umo uje azibuka mwamubwa oyo shwata ali na kumitwamenena. Mu kwita kwa simbu, amiseza, co kumumumono. Oloni kumulishoshomwena. Mwafwa bika? Mwafwa muli na kumona myanja yendi, co muya na kukaba lika muje mwaneti.

² Ha kupwa baka-Kilistu, tunapu ngwe banu baje bali na kwenda mu shwata ya kutewesa mwafwa tuli na kuyoya mu kaye kakabi. Oloni twabezika mwafwa Yehova natwana Munendi, Yesu Kilistu uje natumwesa mwanja waubwa utunapande kukabangeya. (1 Petu 2:21) Libulu limo lije lyendeka ha Mbimbiliya lyendekele ngwalyo, Petulu wesekesele Yesu kuli munu uje ali na kutwamenena bakwabo. Ngwe mwa munu itunasimutwiya uje ali na kutwamenena bakwabo, Yesu natusezela mwanja waubwa utunapande kukabangeya. Tusimutwiyeni ha bihula binatako: Kukabangeya mwanja wa Yesu kulumbununa bika? Mwafwa bika tunapande kukabangeya mwanja wendi, co twasa kulinga bati ngoco?

3. Kukabangeya mwanja wa munu kulumbununa bika?

³ Kukabangeya mwanja wa munu kulumbununa bika? Mbimbiliya muikapangesa lijwi lya ‘kwenda’ ikalumbununa futisi ya munu. (Kusha 6:9) Ngeci, kukabangeya mwanja wa munu kulumbununa kumutembwinina.

4. Kukabangeya mwanja wa Yesu kulumbununa bika?

 ⁴ Kukabangeya mwanja wa Yesu kulumbununa bika? Kulumbununa kumutembwinina. Mu cisoneka hacinemana cino cilongesa, kapositolo Petulu wamwesele ngwendi tunapande kutembwinina Yesu uje wakolesele mubamuyandesele. Oloni kuli byuma bikwabo byalingile Yesu bitunapande kutembwinina. (1 Petu 2:18-25) Tunapande kutembwinina byuma byoshe byendekele nebi byalingile.

5. Kuma banu ba kujeneka kulumbunuka basa kukabangeya mwanja wa Yesu ndi? Lumbununeni.

⁵ Kuma yetu banu ba kujeneka kulumbunuka twasa kukabangeya mwanja wa Yesu ndi? Eyo twasa. Anukeni ngweni Petulu natushongangeya ngwendi ‘tukabangeye mwanja wa Yesu mwamubwa’ keti mu kulumbunuka. Nga tweseka mutwasela mwoshe kukabangeya mwanja wa Yesu nameme kutwalumbunukile, co twononoka cinangulo ca kapositolo Yowano. Wendekele ngwendi: “Tunapande kuyoya ngwe mwalingile Yesu Kilistu.”—1 Yowa 2:6.

6-7. Bika twendekela ngwetu kukabangeya mwanja wa Yesu kukanyamesa busamba bwetu na Yehova?

⁶ Kukabangeya mwanja wa Yesu kukanyamesa busamba bwetu na Yehova. Bika twendekela ngoco? Ca kulibanga, Yesu watumwesele mwakuyoyela mu ngila ije izibisa Njambi kubwaha. (Yowa 8:29) Ngeci, nga tukabangeya mwanja wa Yesu, co tuzibisa Yehova kubwaha. Tunapande kwanuka ngwetu Tate yetu wa mwilu akashwenye kuyehi na banu baje beseka mubasela mwoshe kulikuta busamba nendi.—Yako 4:8.

⁷ Ca mu cibali, Yesu watembwininine Ishe mu kulumbunuka. Mukemwo Yesu wendekele ngwendi: “Woshe uje nanjimono namono Tate.” (Yowa 14:9) Tunapande kutembwinina bifwa bya Yesu. Cakumwenako, Yesu wazibilile ngozi munalume umo uje wakele na kubinja mbumba na munakazi umo uje wabinjile mushongo wakama. Co lalo, wazibilile mema ku mbunge baje batsisile. Nga tutembwinina Yesu,  co tutembwinina Yehova. (Mako 1:40, 41; 5:25-34; Yowa 11:33-35) Omwo tutembwinina Yehova, busamba bwetu nendi bukanyama.

8. Kukabangeya mwanja wa Yesu kutukwasa bati tuhyane kaye? Lumbununeni.

⁸ Nga tukabangeya mwanja wa Yesu, co byuma bya mu kaye kubitwonowesa kupangela Yehova. Ha butsiki bwa kwinduka litangwa libamutsiile, Yesu wendekele ngwendi: ‘Njinahyana baka-kaye.’ (Yowa 16:33) Walumbunwine ngwendi baka-kaye kubasele kumushongangeya alyakele bilengo bibakele na kulyakela na kumona byuma mubakele na kubimwena. Co lalo, kalingile byuma bibakele na kulinga. Yesu wakele menene mbunge ku cipangi cezilile hano hasi ca kujelesa lizina lya Yehova. Twasa kumutembwinina bati? Muno mu kaye muli byuma byabingi byasa kutututanganesa. Oloni nga twaka mbunge ku kulinga cizango ca Yehova ngwe mwalingile Yesu, co netu tuhyana kaye.—1 Yowa 5:5.

9. Tunapande kulinga bika mangana tukayoye myaka yoshe?

⁹ Nga tukabangeya mwanja wa Yesu, co tukayoya myaka yoshe. Omwo mukwenje umo wa kufuka wehwile Yesu byanapande kulinga mangana akayoye myaka yoshe, Yesu wamukumbulwile ngwendi: “Wije unjikabe.” (Mateo 19:16-21) Yesu walekele Bayunda bamo baje kubakulahelele ngwabo ikeye Kilistu ngwendi: ‘Bimanga bange banjikaba, co njibana mwonyo wa myaka yoshe.’ (Yowa 10:24-29) Co lalo, Yesu mwalongesele Nikondemo uje wapwile lyako mu nkuta ya Sunandeline wamulekele ngwendi: “Woshe akulahela kuli ikeye akawana mwonyo wa myaka yoshe.” (Yowa 3:16) Tumwesa ngwetu twakulahela Yesu nga tupangesa byuma byalongesele na kumutembwinina. Nga tulinga ngoco, co tukawana mwonyo wa myaka yoshe.—Mateo 7:14.

10. Tunapande kulinga bika mangana ‘tuzibuke’ mwamubwa Yesu? (Yowano 17:3)

¹⁰ Tunapande tahi kuzibuka mwamubwa Yesu asina tumutembwinine. (Tandeni Yowano 17:3.) Nga tushaka ‘kuzibuka’ mwamubwa Yesu, tunapande kutwalelelaho kulilongesa byendi. Tunapande kuzibuka mwamubwa bifwa byendi, mwakamwenamwo byuma na mashiko akakabangeya. Nameme tunapangela Yehova ha simbu yailaha, tunapande kutwalelelaho kulilongesa mangana tuzibuke mwamubwa Yehova na Munendi.

11. Byuma muka bili mu mikanda iwana ya Biñanda Byabibwa?

¹¹ Yehova walingisile baka-kusoneka Mbimbiliya basoneke mikanda iwana ije yendeka bya buyoye na cipangi ca Munendi mangana itukwase kumuzibuka mwamubwa. Eyi mikanda ya Biñanda Byabibwa inamwesa byuma byendekele Yesu, nebi byalingile nomwo mwakele na kulizibila. Co itukwasa tusinganyekesese  mwamubwa ha mwanja wa Yesu. (Heve 12:3) Omwo tutanda eyi mikanda, kunapu lika ngwe tuli na kumona mwalyatele Yesu. Ngeci, kulilongesa eyi mikanda kutukwasa tumuzibuke mwamubwa. Co kuzibuka mwamubwa Yesu kutukwasa tukabangeye mwanja wendi mwamubwa.

12. Bika bitunapande kulinga mangana mikanda ya Biñanda Byabibwa itukwase?

¹² Nga tushaka ngwetu biñanda bitutanda omu mu mikanda bitukwase, kutwapandele kubitanda lika. Tunapande kulilongesabyo mwamubwa na kubisinganyekesesa. (Esekeseni Yoshwa 1:8.) Tusimutwiyeniko byuma bibali bitunapande kulinga bije bitukwasa tusinganyesese na kupangesa byuma bitutanda omu mu mikanda ya Biñanda Byabibwa.

13. Bika bimikwasa mulikuwe biñanda bimutanda mu mikanda ya Biñanda Byabibwa?

¹³ Ca kulibanga, lingeni ngwe kumwakele ha simbu ibyalingiwile byuma bimuli na kutanda. Lingeni ngwe muli na kumona na kuziba byuma byakele na kulingiwa. Tondeseseni mu mabulu ainabwahesa munga ya Yehova mangana muzibisise mwamubwa byuma byalingiwile. Zibukeni byuma byalingiwile simbu kanda byuma bimuli na kutanda bilingiwe na bije byalingiwile munima yabyo. Tondeseseni biñanda bya banu babanendeka na mitambela ibanatumbula mu ñanda imuli na kutanda. Esekeseni ñanda imuli na kutanda ku ñanda yalitombola nayo ije ili mu mukanda ukwabo wa Biñanda Byabibwa. Ñanda imo banasa kuyendeka mu mikanda ibali ya Biñanda Byabibwa. Oloni mu mukanda umo banasa kwendekako cuma cimo cije cimikwasa muizibisise mwamubwa.

14-15. Bika bitunapande kulinga mangana tupangese byuma bitutanda mu mikanda ya Biñanda Byabibwa?

¹⁴ Ca mu cibali, pangeseni bimutanda omu mu mikanda. (Yowa 13:17) Munima ya kutanda ñanda imo mu mikanda ya Biñanda Byabibwa, lihuleni ngweni: “Bika binjinalilongesa mu ñanda injinatanda binjinapande kupangesa mu kuyoya kwange? Byuma muka binjinalilongesa omu mu ñanda byasa kukwasa bakwetu? Singanyekeni munu umo imushaka kukwasa, co  waneniko simbu yaibwa ya kumulekako mu kasingimiko bimunalilongesa.

¹⁵ Tusimutwiyeniko ha cakumwenako cije citukwasa kumona mutwasa kupangesela ebi bingila bibali. Tusimutwiya bya fwile wa kahutu yamwene Yesu mu tembele.

16. Lumbununeni byuma byalingiwile mu tembele bibanendeka ku Mako 12:41?

¹⁶ Lingeni ngwe kumwakele. (Tandeni Mako 12:41.) Lingeni ngwe muli na kumona byuma byakele na kulingiwa. Ha litangwa lya Nisane 11, 33 C.E, Yesu walongesele banu mu tembele ha simbu yailaha. Oloni bakulunu ba bulombelo bakele na kumulwisa. Bamo bashakele kuzibuka kwawanene nzili ya kulinga bikomokeso. Bakwabo bamwihwile bihula bya kushaka lika kumweseka. Ha simbu eyi, te kunasala lika matangwa amandondo mangana bamutsiye. (Mako 11:27-33; 12:13-34) Yesu wanungulukilile ku mutambela weka wa tembele. Hamo wanungulukilile mu mutamba ubatumbwile ngwabo Cipango ca Banakazi, co wakele na kumona bikasha bya kulambwila kuyehi na cibumbe. Wakele na kumona banu mubakele na kulambula. Wamweme baka-kufuka oku bali na kulambula bimbongo bya muwayawaya byabingi. Hamo wakele kuyehi na bije bikasha, co wakele na kuziba bimbongo mubyakele na kuwilamo.

17. Fwile ibanendeka ku Mako 12:42 walingile bika?

¹⁷ Tandeni Mako 12:42. Mu kwita kwa simbu, munakazi umo walingileko byuma bimo bije byazibisile Yesu kubwaha. Ou munakazi wapwile “fwile,” co lalo wapwile “kahutu.” (Luka 21:2) Buyoye bwamukaluwilile manene, co kwakele na kumukaluwila kuwana byuma bya kulikwasesa. Ou munakazi, waile ku cikasha ca kulambwila, co wakalambwile tumbongo tubali twa muwayawaya. Hamo otu tumbongo kutwazibikile mutwawililile mu cikasha. Oloni Yesu wazibukile ngwendi uje munakazi walambwie tu ma lepta tubali. Tuje tumbongo twapwile twatundondo manene mwafwa kutwasele kulanda nambe kanzilili umo. Tunzilili bapwile tuzila ba ndando ya kwisi manene.

18. Kwesekesa na mukanda wa Mako 12:43, 44, Yesu wendekele bika ha bwana bwa fwile?

¹⁸ Tandeni Mako 12:43, 44. Byalingile uje fwile byazibisile Yesu kubwaha. Ngeci, wasanene bandongesi bendi, co wenikile uje fwile na kubaleka ngwendi: “Mwa busunga njimileka ngwange ou fwile wa kahutu nalambula byabingi kutubakana boshe.” Watwaleleleho kubaleka ngwendi: “Omwo beka [maneneni baka-kufuka] banakala na kulambula bya kusala ku bufuko bwabo, oloni ikeye nalambula byoshe byanakele nabyo . . . bya kulikwasa nabyo.” Uje fwile wa kulongwa mwalambwile tumbongo twendi twa mamaneselelo wamwesele ngwendi wakulahelele Yehova.—Myaso 26:3.

19. Byendekele Yesu hali uje fwile wa kahutu bitulongesa bika?

¹⁹ Pangeseni bimunalilongesa. Lihuleni ngweni: “Byendekele Yesu hali uje fwile wa kahutu binjilongesa bika?” Hamo uje fwile wa kahutu, washakele kwana byabingi kuli Yehova. Nameme, ngoco, wanene Yehova byoshe byakele nabyo kutundilila kwisi ya mbunge. Co Yesu wazibukile ngwendi bwana bwa uje fwile bwapwile bwa seho manene kuli Ishe. Eyi ñanda itulongesako cuma cimo ca seho. Yehova abwahelela nga tumupangela na bimbunge byetu byoshe mu kuyoya kwetu kwoshe. (Mateo 22:37; Kolo 3:23) Yehova akabwahelela mwakatumono oku tweseka mwoshe mutwasela kumupangela. Akabwahelela mwakatumono tupangesa nzili na simbu yetu mu bipangi bya ku sipilitu bya kufwa ngwe kwambulula na kukunguluka.

20. Mwasa kupangesa bati bimunalilongesa mu ñanda ya fwile wa kahutu? Endekeni cakumwenako.

 ²⁰ Mwasa kupangesa bati bimunalilongesa mu ñanda ya fwile wa kahutu? Singanyekeniko banu bamo baje bakalizibi ngwabo byuma bibali na kulingila Yehova keti bya seho. Cakumwenako, hamo kuli ndokazi umo wa kakulukazi uje ali na kwonowa kwambulula ngwe mwakele na kulingila kunima mwafwa ya kubinja, co ali na kuliziba ngwe wapwa wangoco. Nambe hamo kuli ndolome umo uje ali na kubinja mushongo wa kweneka kwola, co nazeye mwafwa ali na kwonowa kuya na kukunguluka calumingo na calumingo. Mukwasa manene aba bandolome na bandokazi nga mupangesa “majwi amabwa” omwo musimutwiya nabo. (Efeso 4:29) Balekeniko bimunalilongesa mu ñanda ya fwile wa kahutu bije byasa kubatakamesa. Nga musimutwiya nabo mu ngila eyi, mubalingisa bakulahele ngwabo byuma bibali na kulinga bili na kuzibisa Yehova kubwaha. (Visi 15:23; 1 Tesa 5:11) Mutembwinina Yesu nga mushangala bakweni baje bali na kweseka mubasela mwoshe kutwalelelaho kupangela Yehova nameme kubesi na kulinga byabingi.

21. Mwalyangwila kulinga bika?

²¹ Twakandelelako manene ku mikanda ya Biñanda Byabibwa ije ili na kutumwesa byuma byalingile Yesu bitunapande kutembwinina. Lyakeleni cilengo ca kutanda eyi mikanda na kusinganyekesesaho ha simbu ya Kulemesa kwa Naanga nambe ha simbu ya cilongesa ca likalyeni. Anukeni ngweni muwana bukwasi nga mulinga ngwe kumwakele ha simbu ibyalingiwile byuma bimuli na kutanda na kubipangesa mu kuyoya kweni. Tunapande kutolilila ku byuma byendekele Yesu keti kutembwinina lika byalingile embwe. Mu cilongesa cinatako, tukasimutwiya bitulilongesa ku majwi a mamaneselelo endekele Yesu simbu kanda atse.