CILONGESA 17
Yehova Wamizema Manene
‘Shukulu Kalunga akabwahelela hali banu bendi.’—MYASO 149:4.
MWASO 108 Cizemo ca Njambi Cije Kucesi Kutenguluka
BILI MUNO MU CILONGESA *
Tate yetu wa mwilu ‘akabwahelela’ hali umo na umo wetu (Taleni palagilafu 1)
1. Yehova akananguka bika ku banu bendi?
YEHOVA NJAMBI “akabwahelela hali banu bendi.” (Myaso 149:4) Awa majwi atuzibisa kubwaha. Yehova akananguka bifwa byetu byabibwa, co akamono ngwendi twasa kupwa banu bababwa mukemwo akatukwasa tupwe babusamba bendi. Nga tutwalelelaho kupwa ba kulongwa kuli ikeye, co tupwa babusamba bendi myaka yoshe.—Yowa 6:44.
2. Bika bikalingisa banu bamo basinganyeke ngwabo Yehova kasa kubazema?
2 Bamo banasa kwendeka ngwabo: ‘Njizibuka ngwange Yehova wazema banu bendi, oloni yange kunjikulahela ngwange wanjizema.’ Bika byasa kulingisa munu asinganyeke mu ngila eyi? Oksana * uje waliwanene na bukalu bwabwingi ku bwanike, wendekele ngwendi: “Njabwahelelele manene mubanjimbwitikile nomwo munjashangumukile bupainiya. Oloni munima ya myaka 15 njashangumukile kwanuka byuma byabibi byalingiwile ku bwanike bwange. Njasinganyekele ngwange Yehova nanjiyengula, co kasa kunjizema mwafwa nji munu wamubi.” Ndokazi Yua uje wapwa painiya, nendi waliwanene na bukalu bwabwingi ku bwanike. Wendekele ngwendi: “Njalikundikile kuli Yehova mwafwa njashakele kumuzibisa kubwaha. Oloni njasinganyekele ngwange Yehova kasa kunjizema.”
3. Bika bitusimutwiya muno mu cilongesa?
3 Neni mwazema Yehova ngwe mwa bandokazi babali batunasimutwiya ndi? Eyo mwamuzema manene. Oloni hamo mukasinganyeka ngweni Yehova kasa kumizema. Mwafwa bika munapande kukulahela ngweni Yehova wamizema manene? Co bika bimikwasa mwecele kusinganyeka ngweni Yehova kamizemene? Tukumbululeni ebi bihula.
KUTWAPANDELE KUSINGANYEKA NGWETU YEHOVA KATUZEMENE
4. Mwafwa bika kutwapandele kusinganyeka ngwetu Yehova katuzemene?
4 Cizemo cakala na nzili ya kushongangeya munu alinge byuma bimo. Kuzibuka ngwetu Yehova watuzema co atukwasa, kutushongangeya tutwaleleleho kumupangela na mbunge yetu yoshe nameme tuliwana na bukalu. Oloni nga kutukulahela ngwetu Yehova watuzema, co ‘nzili yetu ipwa yaindondo.’ (Visi 24:10) Nga tuzeya na kusinganyeka ngwetu Yehova katuzemene, co kutwasa kukolesa omwo Satana atweseka.—Efeso 6:16.
5. Byuma muka byasa kulingiwa nga munu asinganyeka ngwendi Yehova kamuzemene?
5 Bandolome na bandokazi betu babangi banazeye mwafwa ya kusinganyeka ngwabo Yehova kabazemene. James uje wapwa mukulunu mu cikungulukilo wendekele ngwendi: “Njili na kupangela ha Mbetele, co lalo njili na kulikuwa kwambulwila hamo na cikungulukilo cije cikapangesa ndaka yeka. Oloni simbu imo, kunjakulahelele ngwange bipangi binjakele na kulinga byakele na kuzibisa Yehova kubwaha ku mbunge. Co mu kwita kwa simbu, njashangumukile kusinganyeka ngwange Yehova kakele na kutolilila ku malombelo ange.” Eva uje ali na kupangela ha Mbetele nendi wendekele ngwendi: “Njalilongesa ngwange kutwapandele kusinganyeka ngwetu Yehova katuzemene mwafwa nga tulinga ngoco, co kutumupangela mwamubwa. Co lalo twasa kwonowa kuzema byuma bya ku sipilitu na kwonowa kupangela Yehova mu kubwahelela.” Michael uje wapwa painiya wa simbu yoshe, co lalo mukulunu mu cikungulukilo, wendekele ngwendi: “Nga munu kakulahela ngwendi Njambi wamuzema, co asa kulikela kumupangela.”
6. Tunapande kulinga bika nga tushangumuka kusinganyeka ngwetu Yehova katuzemene?
6 Byuma bibaliwanene nabyo aba bandolome na bandokazi bimwesa ngwabyo kusinganyeka ngwetu Yehova katuzemene kuzeyesa likulahelo lyetu. Co tunapande kulinga bika nga tushangumuka kuliziba ngwetu Njambi katuzemene? Tunapande kwecela kusinganyeka ngoco bwasi-bwasi. Lombeni Yehova amikwase kutundisa bisinganyeka bya cifwa eci mu bimbunge byeni na kubingisa na ‘kwoloka kwa Njambi kuje kukanyunga bimbunge byeni na biyongola byeni.’ (Myaso 139:23; Fili 4:6, 7) Anukeni ngweni keti yeni lika mukasinganyeka mu ngila eyi. Kuli bandolome na bandokazi bakwabo baje bakasinganyeka ngwabo Yehova kabazemene. Nameme bangamba ba Yehova ba kunima nabo bakele na kuliziba ngoco. Tusimutwiyeni hali kapositolo Paulu.
BIKA BITULILONGESA KULI PAULU?
7. Paulu waliwanene na bukalu muka?
7 Kuma simbu imo mukalizibi ngweni bipangi byamitumina ndi? Nga mukemwo, co munalifu na Paulu. Washotele mbunge bandolome na bandokazi ba mu “bikungulukilo byoshe.” (2 Koli 11:23-28) Kuma mwabinja mushongo uje kuwesi kwola uje uli na kumyonowesa kupwa ba kubwahelela ndi? Paulu walifwitile na ‘mungonga mu mubila.’ Hamo ou mungonga wapwile mushongo, co Paulu washakele ngwendi uhwe. (2 Koli 12:7-10) Kuma munazeye mwafwa ya tupenga tweni ndi? Bisimbu bimo, Paulu nendi wakele na kuliziba ngoco. Wendekele ngwendi wapwile “munu wa kubindama” mwafwa wakele na kusebuka.—Loma 7:21-24.
8. Bika byakwasele Paulu akolese mwaliwanene na bukalu?
8 Paulu waliwanene na bukalu bwa kuliseza-seza oloni watwaleleleho kupangela Yehova. Bika byamukwasele alinge ngoco? Nameme wakele na kusebuka, oloni wakulahelele ndando ya kupatula. Wazibukile lalo ngwendi Yesu wakulahesele ngwendi ‘woshe uje akulahela kuli ikeye akawana mwonyo wa myaka yoshe.’ (Yowa 3:16; Loma 6:23) Paulu nendi wakulahelele ndando ya kupatula. Wakulahelele ngwendi Yehova asa kukonekela nameme baje banalingi bubi bwakama nga batenguluka.—Myaso 86:5.
9. Bika bitulilongesa ku majwi a Paulu aje ali ku mukanda wa Ngalatiya 2:20?
9 Paulu wakulahelele lalo ngwendi Njambi wamuzema manene mwafwa watumine Munendi mangana akumutsile. (Tandeni Ngalatiya 2:20.) Nangukeni majwi a kutakamesa ali ku mamaneselelo a vesi 20. Paulu wendekele ngwendi; “Muna Njambi . . . Wanjizemene, co walyanene ikeye babenya omwo yange.” Paulu kalizibile ngwendi Njambi kasa kumuzema. Kasinganyekele ngwendi: ‘Yehova wazema bandolome na bandokazi bange oloni yange kasa kunjizema.’ Paulu walekele baka-Kilistu ba mu Loma ngwendi: “Ha simbu twapwile tu baka-bubi, Kilistu watutsililile.” (Loma 5:8) Na cimo cahi casa kwonowesa Njambi kutuzema.
10. Bika bitulilongesa ku mukanda wa Loma 8:38, 39?
10 Tandeni Loma 8:38, 39. Paulu wakulahelele ngwendi Njambi wamuzema manene. Wasonekele ngwendi na cimo cahi “casa kututundisa ku cizemo ca Njambi.” Paulu wazibukile ngwendi Yehova wamwesele mbunge ya kubandamena kuli Baisalele. Co lalo wazibukile ngwendi Yehova wamuzibilile ngozi. Ngeci, Paulu wakulahelele ngwendi Yehova wamuzema mwafwa watumine Yesu mangana akumutsile.—Loma 8:32.
Byuma byabibwa bitulinga ha simbu ino na kulutwe bikebyo bya seho kuli Yehova keti bubi butwalingile kunima (Taleni palagilafu 11) *
11. Nameme Paulu walingile byuma byabibi bya kufwa ngwe bije bibanendeka ku 1 Timateo 1:12-15, mwafwa bika wakulahelele ngwendi Njambi wamuzema?
11 Tandeni 1 Timateo 1:12-15. Hamo Paulu wakele na kuziba kubabala ku mbunge mwakele na kwanuka byuma byabibi byalingile simbu kanda apwe muka-Kilistu. Mukemwo wendekele ngwendi wapwile muka-bubi “manene.” Simbu kanda Paulu alilongese busunga wayandesele manene baka-Kilistu. Wakele na kushakezeka baka-Kilistu mu nganda na nganda, co wakele bamo mu kamenga na kutabesa ngwendi bamo babatsiye. (Vili 26:10, 11) Hamo Paulu mwakele na kuliwana na baka-Kilistu baje bapwile bisiwa wakele na kuziba kubabala ku mbunge maneneni nga ikeye watabesele ngwendi bisemi babo babatsiye. Paulu wazibile kubabala ku mbunge mwafwa ya byuma byabibi byalingile kunima oloni wazibukile ngwendi kasele kubitengulula. Wakulahelele ngwendi Kilistu wamutsililile, co wasonekele ngwendi: “Ha kutetela kwa Njambi njinapu muje munjinapu.” (1 Koli 15:3, 10) Bika bitulilongesako? Kulaheleni ngweni Kilistu watsililile yeni, co namilingisa mulikute busamba na Yehova. (Vili 3:19) Byuma byabibwa bitulinga ha simbu ino na kulutwe bikebyo bya seho kuli Yehova, keti bubi butwalingile kunima nameme twapwile Bakaleho ha simbu oyo indi embwe.—Isaya 1:18.
12. Majwi ali ku mukanda wa 1 Yowano 3:19, 20 atukwasa bati tukulahele ngwetu Njambi watuzema?
12 Hamo mukasinganyeka ngweni ndando ya kupatula kuyasa kumikwasa. Bika byasa kumilingisa musinganyeke ngoco? Mbunge yetu yasa kutukwisa na kutulingisa tulizibe ngwe keti tu ba seho, co Njambi kasa kutuzema. (Tandeni 1 Yowano 3:19, 20.) Nga tuliziba ngoco simbu imo, co tunapande kwanuka ngwetu ‘Njambi wapwa wakama manene kutubakana bimbunge byetu.’ Nameme tuliziba ngwe Yehova katuzemene, co kasa kutukonekela, oloni ikeye atwalelelaho kutuzema na kutukonekela. Tunapande kukulahela ngwetu Yehova watuzema. Kutanda Lijwi lyendi simbu yoshe na kulombela kushwa kumo na kulikwatasana na bandolome na bandokazi betu, kutukwasa tukulahele ngwetu Yehova watuzema. Mu ngila muka?
KUTANDA MBIMBILIYA NA KULOMBELA NA KULIKWATASANA NA BANDOLOME NA BANDOKAZI KUTUKWASA BATI?
13. Kutanda Lijwi lya Njambi kutukwasa bati? (Taleni lalo cipalo ca “Kutanda Lijwi lya Njambi Kukabakwasa Bati?”)
13 Nga mutanda lijwi lya Njambi ha litangwa na litangwa, co mumuzibuka mwamubwa. Mulimwena ngweni wamizema manene. Kusinganyekesesa ha biñanda bya mu Lijwi lya Njambi ha litangwa na litangwa kumikwasa mumone byuma mu ngila yaibwa ya ‘kusungama.’ (2 Tima 3:16) Kevin uje wapwa mukulunu mu cikungulukilo wakele na kuliziba ngwe kapwile wa seho. Wendekele ngwendi: “Kutanda na kusinganyekesesa ha mukanda wa Myaso 103 kunanjikwasa njikulahele ngwange Yehova wanjizema.” Eva itunabanga kusimutwiya wendekele ngwendi: “Mangwezi na mangwezi njikasinganyekesesa ha biñanda bya mu Mbimbiliya mangana njizibisise mwamubwa mwakamwena byuma Yehova. Kulinga ngoco kukakanyamesa likulahelo lyange, co kukanjikwasa njipwe wa kushubuluka.”
14. Kulombela kutukwasa bati?
14 Lombeleni kushwa kumo. (1 Tesa 5:17) Nga mushaka ngweni busamba bweni na mukweni bukanyame, co munapande kusimutwiya kushwa kumo na kulileka byuma bili ku bimbunge byeni. Mukemwo mutunapande kulinga na kabusamba ketu Yehova. Nga tulombela kuli ikeye na kumuleka mutuli na kulizibila na bisinganyeka byetu na bishoti byetu, tumwesa ngwetu twamukulahela, co watuzema. (Myaso 94:17-19; 1 Yowa 5:14, 15) Yua itunabanga kusimutwiya wendekele ngwendi: “Munjikalombela kunjesi kuleka lika Yehova byuma binalingiwa mukati ka litangwa embwe. Oloni njikaleke Yehova mwoshe munjili na kulizibila. Kulinga ngoco kunanjikwasa njimone ngwange Yehova kafwile ngwe mukulunu wa bipangi oloni wapwa Tate yetu uje watuzema manene.”—Taleni cipalo ca “ Mwalitandaho Laja Ndi?”
15. Yehova namwesa bati ngwendi watwaka mbunge?
15 Likwatasaneni na bandolome na bandokazi beni mwafwa bapwa bwana bwa kutunda kuli Yehova. (Yako 1:17) Tate yetu wa mwilu namwesa ngwendi watwaka mbunge omwo natwana bandolome na bandokazi betu baje bakamwesa “cizemo cabo simbu yoshe.” (Visi 17:17) Paulu mwasonekelele baka-Kolose mukanda, watumbwilemo baka-Kilistu bamo baje ‘bamukwasele.’ (Kolo 4:10, 11) Yesu nendi watondele bukwasi, co wakandelelele manene omwo tungelo na banu bamukwasele.—Luka 22:28, 43.
16. Bandolome na bandokazi betu basa kutukwasa bati tukanyamese busamba bwetu na Yehova?
16 Kuma mukatambula bukwasi bwa bandolome na bandokazi beni ndi? Kulekako mukwetu muka-Kilistu wa kuhya ku sipilitu bukalu bwetu kukulumbununa ngwabo likulahelo lyetu linazeye. Oloni kulinga ngoco kutunyungilila. James itunabanga kusimutwiya wendekele ngwendi: “Kulikuta busamba na baka-Kilistu ba kuhya ku sipilitu kunanjikwasa manene. Munjikabaleke bishoti byange, bakanjitolilila na kunjileka ngwabo banjizema. Co bakanjilingisa njilizibe ngwange Yehova wanjizema na kunjaka mbunge.” Ngeci, kunapu kwa seho manene kutwalelelaho kulikwatasana na bandolome na bandokazi betu mu cikungulukilo.
KALENI MU CIZEMO CA YEHOVA
17-18. Iya itunapande kukulahela, co mwafwa bika?
17 Satana ashaka ngwendi twecele kulinga byuma byabibwa. Ashaka tukulahele ngwetu Yehova katuzemene, co kakatwobola. Oloni ngwe mutunamwena awa anapu makuli.
18 Yehova wamizema. Mwapwa mu ba seho manene kuli ikeye. Nga mwononoka mashiko endi, co ‘mukala mu cizemo cendi’ myaka yoshe ngwe mwanalingi Yesu. (Yowa 15:10) Ngeci, keti mukulahele makuli a Satana nambe kuliziba ngweni kumwapwile ba seho. Oloni kulaheleni Yehova uje akamono bifwa byabibwa byakala nabyo umo na umo wetu. Kulaheleni ngweni Yehova ‘akabwahelela hali banu bendi’ kwambateselela neni.
MWASO 141 Kuyoya Kwapwa kwa Kukomokesa
^ par. 5 Bandolome na bandokazi betu bamo bakalizibi ngwabo Yehova kabazemene. Muno mu cilongesa, tusimutwiya byuma bitulingisa tukulahele ngwetu Yehova wazema umo na umo wetu. Tusimutwiya lalo bitunapande kulinga nga tuliziba ngwetu Yehova katuzemene.
^ par. 2 Mazina amo banawatengulula.
^ par. 67 KULUMBUNUNA CIKUPULO: Simbu kanda alilongese busunga Paulu wayandesele baka-Kilistu babangi na kubatwala mu kamenga. Oloni mwakulahelele ngwendi Yesu wamutsililile watengulwile futisi yendi, co watakamesele baka-Kilistu babangi kwambateselela na babushoko bwa baje bayandesele.
