1. Bangamba ba Njambi boshe banapande kulinga bika, co mwafwa bika? (Taleni liputa lya kulibanga.)

YESU KILISITU washikile baka-kumukabangeya ngwendi “yeni oni ku miyati yoshe ya banu na kubapwisa bandongesi bange.” (Mateo 28:19) Bangamba ba Njambi boshe bashaka kulilongesa mwakupangela mwamubwa bipangi byanabana Njambi. (2 Tima 4:5) Ebi bipangi byoshe binapu byabibwa, bya seho mu buyoye bwetu, co tunapande kubipanga mu bwasi bwasi. Nameme ngoco, kuli byuma byasa kutwonowesa kupanga bipangi byanatwana Njambi ngwe mutushakela.

2. Bika byasa kutwonowesa kupanga mwamubwa cipangi canatwana Njambi?

² Kuli bipangi bikwabo bya seho bije bitonda tupangese simbu na nzili yetu. Twasa kupanga maola amangi mangana tuwane bitulikwasesa na naanga yetu. Co lalo tunasa kulifwita na mishongo, kwombwa na mishongo ije ikaija mwafwa ya kukulubala. Twasa kupanga bati mwamubwa cipangi cetu ca kwambulula oku tuli na kulifwita na bukalu bwa cifwa eci?

3. Bika bitulilongesa ku majwi a Yesu ali ku Mateo 13:23?

³ Nga cifwa cituli naco citwonowesa kupangela mwamubwa Yehova, co kutwapandele kuzeya. Yesu wazibukile ngwendi kutwasa kupwisa hamo omwo tupanga bipangi bya Bumwene. (Tandeni Mateo 13:23.) Yehova wamona byuma byoshe bitukamulingila kupwa bya seho, maneneni nga tubipanga na mbunge yetu yoshe. (Heve 6:10-12) Simbu imo, buyoye bwetu bwasa kututabesa kupanga byabingi mu cipangi ca Njambi. Muno mu cilongesa tusimutwiya mutwasa  kutwamekela cipangi ca Njambi mu kuyoya kwetu na kujeneka kutabesa byuma bitutanganese nomu mutwasa kubwezelela ku butongwe bwetu bwa kwambulula na kulongesa. Oloni kupanga mwamubwa cipangi ca Njambi kulumbununa bika?

4. Kupanga mwamubwa cipangi ca Njambi kulumbununa bika?

⁴ Kupanga mwamubwa cipangi ca Njambi kulumbununa kupanga na nzili cipangi ca kwambulula na kulongesa. Oloni mu kupanga cipangi ca Njambi mwalibungila byabingi. Byuma bije bikatushongangeya twambulule bikebyo byazema manene Yehova. Tukambulula mwafwa twazema Yehova na bakwetu. Ngeci, tukapanga bipangi bya Njambi * na mbunge yetu yoshe. (Mako 12:30, 31; Kolo 3:23) Kupangela Njambi na mbunge yetu yoshe kulumbununa kulyana yetu babenya na kupangesa nzili yetu mu cipangi ca Njambi. Nga tumona seho ya cipangi ca kwambulula, co kutushongangeya twambulwile banu babangi.

5-6. Endekeni cakumwenako cije cimwesa ngwaco baje kubasa kwambulula mubashakela basa kutwameka cipangi ca kwambulula.

⁵ Acisinganyekeni ha cakumwenako eci. Mukwenje umo wazema kulongesa. Akazibi kubwaha kulongesa bana ba sikola simbu yoshe. Mu kwita kwa simbu, awana cipangi ca kulongesa ha sikola ya munu. Akalongesa lika lya Sapalalo na lya Calumingo. Oloni kasa kuliyoyesa na bimbongo bibakamwolesa. Ngeci, akobela cipangi ca kulandesa mu shopu kushangumuka lya mande kutwala lya mu citanu. Nameme simbu yendi yaingi ili na kuhwila ku kulandesa mu shopu, oloni mbunge yendi ili ku kulongesa. Akashungwiya kupwa mulongesi wamubwa, co lalo wa simbu yoshe. Ngeci, nameme nazezama manene, oloni eseka mwasela mwoshe kuwanako simbu ya kulongesa.

⁶ Mu ngila imo lika, hamo kumwasa kwambulula simbu yaingi ngwe mumutondela.  Oloni mwazema kwambulula. Ngeci, mulinga mumwasela mwoshe kubwezelela ku butongwe bweni bwa kwambulula mangana muzimbu waubwa wete ku bimbunge bya banu. Nga mukazezama manene, co mwasa kulihula ngweni; ‘Njasa kutwameka bati cipangi ca kwambulula mu buyoye bwange?’

7-8. Twasa kutembwinina bati Yesu mu kutwameka bipangi bya Njambi?

⁷ Yesu watumwesele mwanja waubwa wa kutwameka bipangi bya Njambi. Kwambulula bya Bumwene bwa Njambi kukekwo kwapwile kwa seho mu buyoye bwendi. (Yowa 4:34, 35) Wendele mangenzi amalaha mangana ambulwile banu babangi. Wabambulwilile mu binjubo byabo na ku mitamba kwoshe kuje kwabawanene. Yesu watwamekele cipangi ca Njambi mu kuyoya kwendi kwoshe.

⁸ Twasa kutembwinina Yesu ha kwambulula muzimbu waubwa kwoshe kutuwana banu. Co tukalyana kuseza byuma bimo mangana twambulule muzimbu waubwa. (Mako 6:31-34; 1 Petu 2:21) Bamo banalyana kupwa bapainiya ba kulitila, bakwabo bapainiya ba simbu yoshe nambe bapainiya ba kukwasa. Beka banalilongesa ndaka yeka nambe kupangela kuje kuli bujene bwa baka-kwambulula. Nameme ngoco, bwingi bwa baka-kwambulula kubapwile bapainiya, oloni bakeseka mubakasela mwoshe kwambulula. Yehova kesi kutuleka ngwendi tulinge byuma bije kutwasa, mwafwa ashaka ngwendi tulikuwe kumupangela omwo twambulula “biñanda byabibwa bya bumpau bwa Njambi uje wapwa wa kubwahelela.”—1 Tima 1:11; Kwitu 30:11.

9. (a) Paulu watwamekele bati cipangi ca kwambulula nameme wakele na cipangi ca ku mubila? (b) Mukanda wa Vilinga 28:16, 30, 31 umwesa ngwawo Paulu wamwene bati cipangi ca kwambulula?

⁹ Kapositolo Paulu nendi natumwesa mwanja waubwa wa kutwameka cipangi ca kwambulula. Paulu mwaile ku Kolinte lwa mu cibali, kakele na bimbongo bya kupwamo bya kulikwasesa. Ngeci, bisimbu bimo wakele na kutunga bimbalaka. Oloni kutunga bimbalaka keti kukekwo kwapwile kwa seho mu kuyoya kwendi. Watungile bimbalaka mangana awane bimbongo bya kulikwasesa omwo wambulwilile baka-Kolinte, mwafwa kashakele kubana citele ca kumulela. (2 Koli 11:7) Nameme Paulu wakele na cipangi ca ku mubila, oloni watwamekele cipangi ca kwambulula, co wambulwile lya Sabata na lya Sabata. Oloni Paulu mwawanene bimbongo ‘walyanene manene mu cipangi ca kwambulula muzimbu na kwana bukaleho kuli Bayunda ngwendi Yesu ikeye Kilisitu.’ (Vili 18:3-5; 2 Koli 11:9) Kutundaho, Paulu mubamukutilile mu njubo yendi ha myaka ibali mu Loma, wambulwilile baje bezile na kumumenekela, co lalo wasonekele mikanda. (Tandeni Vilinga 28:16, 30, 31.) Paulu katabesele cuma coshe coshe cimwonowese kupanga cipangi ca Njambi. Wasonekele ngwendi: ‘Omwo tuli na bipangi ebi, kutwasa kujuka.’ (2 Koli 4:1) Ngeci mwa Paulu, netu twasa kutwameka bipangi bya Bumwene mu kuyoya kwetu nameme tuli na bipangi bya ku mubila.

10-11. Twasa kupanga bati cipangi ca Njambi nga tubinja?

¹⁰ Nga kutwasa kwambulula ha njubo na njubo mwafwa ya kubinja nambe kukulubala, co twasa kupangesa bingila byeka bya kwambulwilamo. Baka-Kilisitu ba kulibanga bambulwilile banu kwoshe kubabawanene.  Babambulwilile ha binjubo byabo, ha mbunga na mu kutulukwa. Co lalo baile kwoshe kuje kwakele banu. (Vili 17:17; 20:20) Nga kutwasa kwenda, co twasa kutumbama haje haketi manene banu mangana twambulwile baje bali na kwita. Tunasa lalo kwambulula mu kutulukwa, kusoneka mikanda nameme kupangesa foni. Baka-kwambulula baje kubasa kuya ha njubo na njubo, basa kupwa ba kubwahelela nga bapangesa ebi bingila.

¹¹ Nameme kumwalikangwile, mwasa kupanga mwamubwa cipangi ca Njambi. Tusimutwiyeni lalo hali kapositolo Paulu. Wendekele ngwendi ali na nzili mu byuma byoshe kwitila muli uje akamwana nzili. (Fili 4:13) Paulu mwakele mu cipangi ca bumishinali wabinjile, co watondele ije nzili imukwase. Wasonekelele baka-Ngalatiya ngwendi kubinja kwendi kukekwo kwalingisile abambulwile muzimbu waubwa lwa kulibanga. (Ngala 4:13) Mu ngila imo lika, nga mubinja mwasa kwambulwila bandotolo, manesi, na baka-kunyunga babezi, mwafwa bwingi bwabo kubesi kukala ha binjubo mubakabendela baka-kwambulula.

12. Kukala na lisho lyalibwa kulumbununa bika?

¹² Yesu wendekele ngwendi: “Mesho obe akewo anapu ngwe ndeya ya mubila wobe. Ngeci bene, nga mesho obe anapu amabwa, mubila wobe woshe ukala na ceke.” (Mateo 6:22) Yesu walumbunwine bika? Walumbunwine ngwendi tunapande kwaka mbunge ku cilengo cimo nambe ku  cipangi cimo na kujeneka kutabesa cuma ceka citutanganese. Yesu nendi wakele mbunge ku cipangi ca Njambi, co walongesele bandongesi bendi ngwendi nabo bake mbunge ku kupangela Yehova na kushakezeka tahi Bumwene bwendi. Tutembwinina Yesu nga tutwameka cipangi ca kwambulula muzimbu waubwa na ‘kushakezeka Bumwene bwa Njambi na busunga bwendi.’—Mateo 6:33.

13. Bika bitukwasa twake mbunge ku cipangi cetu ca kwambulula?

¹³ Ngila ikwabo itwasa kwakela mbunge ku cipangi ca Njambi inapu kwasiwisa buyoye bwetu mangana tukwase bakwetu bazibuke Yehova na kumuzema. * Cakumwenako, kuma twasa kutepulula ku simbu itukapanga mangana tuwaneko simbu ya kwambulula mukati ka calumingo ndi? Kuma twasa kutepulula ku simbu itukalizimi buli ndi?

14. Elias na munakazi wendi balingile bika mangana bawane simbu yaingi ya kwambulula?

¹⁴ Ebi bikebyo byalingile ndolome Elias na munakazi wendi. Elias wendekele ngwendi: “Ha simbu ije kutwasele kupwa bapainiya, oloni twatengulwileko byuma bimo mangana tuwane simbu yaingi ya kwambulula. Cakumwenako, twatepulwile ku byuma bitwakele na kulanda, twatepulwile lalo ku simbu itwakele na kulizima buli, co lalo twalombele mukulunu wa bipangi ngwetu atutepulwile ku simbu itukapanga mangana tuwane simbu yaingi ya kwambulula. Oku kwatukwasele tushangumuke kwambulula mangwezi, tutwamenene bilongesa bya Mbimbiliya na kwambulula mukati ka calumingo lubali mu ngonde. Co twalikuwile manene cipangi cetu.”

15-16. Kwesekesa na 1 Timateo 4:13, 15, twasa kubwezelela bati ku butongwe bwetu bwa kwambulula? (Taleni cipalo ca “ Bilengo Bimikwasa Mupange Mwamubwa Bipangi Byanamyana Njambi.”)

¹⁵ Ngila ikwabo lalo itwasa kupanga mwamubwa cipangi ca Njambi inapu kubwezelela ku butongwe bwetu bwa kwambulula. Baka-kupanga bamo bakatwalelelaho kubalongesa mangana bakale na cashu ca kupanga mwamubwa bipangi byabo. Netu baka-kwambulula tunapande kutwalelelaho kulilongesa mangana tukale na butongwe mu kwambulula.—Visi 1:5; tandeni 1 Timateo 4:13, 15.

¹⁶ Twasa kutwalelelaho bati kupanga mwamubwa cipangi cetu ca kwambulula? Nga tupangesa mwamubwa bingila bitukalilongesa mukati ka calumingo mu Mukanda Wetu wa Biwano. Ebi biwano bikatukwasa mangana tubwezelele ku butongwe bwetu bwa kwambulula. Tunapande kupangesa ebi bingila bitukalilongesa nga twambulula muzimbu waubwa. Tunasa kulomba bukwasi kuli ntwama wa cibunga cetu ca kuya na kwambulula nambe kupanga nendi mu lihya. Twasa kupanga lalo na muka-kwambulula wa butongwe, painiya nambe ntwama wa kuzenguluka mangana atukwase. Nga tukala na butongwe bwa kupangesa mabulu etu aje ali mu Cikasha Cetu, co tulikuwa cipangi cetu ca kwambulula na kulongesa.

17. Bika bitundamo nga mupanga mwamubwa cipangi ca Njambi?

¹⁷ Tunabezika manene kupangela hamo na Yehova. (1 Koli 3:9) Nga mulinga byuma bya seho na kutwameka bipangi bya Njambi, co mupangela Yehova na kujolela. (Fili 1:10; Myaso 100:2) Ha kupwa baka-kupangela Njambi tunakulahela ngwetu atwana nzili mangana tupange mwamubwa cipangi cendi nameme tuliwana na bukalu. (2 Koli 4:1, 7; 6:4) Mupwa ba kubwahelela nga mupangela Njambi na mbunge yeni yoshe nameme muli na kupanga simbu yaingi nambe yaindondo. (Ngala 6:4) Nga tupanga mwamubwa cipangi ca Njambi, co tumwesa ngwetu twazema Yehova na bakwetu. Nga tulinga ngoco, co tulyobola na kwobola baje batutolilila.—1 Tima 4:16.