1-2. Bika byalingisile Yesu alishoshomwene?

HA LITANGWA lya mamaneselelo a kuyoya kwendi kwa hano hasi, Yesu walishoshomwenene. Wazibukile ngwendi bamuyandesa na kumutsiya kuli baka-bubi. Yesu kalishoshomwenene lika mwafwa ya kuzibuka ngwendi bamutsiya. Oloni wazemene manene Ishe, co washakele kumuzibisa kubwaha. Yesu wazibukile ngwendi nga apwa wa kulongwa mu byeseko, co akundwiya Bumwene bwa Njambi. Yesu wazemene lalo banu, co wazibukile ngwendi twasa lika kukala na lilabelelo lya kukayoya myaka yoshe nga atwalelelaho kupwa wa kulongwa kweta na ha kutsa kwendi.

² Nameme Yesu wakele mu bishoti, oloni wakele mu kwoloka. Ngeci, walekele tupositolo bendi ngwendi ‘njimyana kwoloka kwange.’ (Yowa 14:27) Yesu wakele mu “kwoloka kwa Njambi” kuje kukaija mwafwa ya kukala na busamba bwabubwa na Yehova. Oku kwoloka kwashubulwisile mbunge na biyongola bya Yesu.—Fili 4:6, 7.

3. Bika bitusimutwiya muno mu cilongesa?

³ Naumo wahi aliwana na byeseko ngwe byaliwanene nabyo Yesu, oloni boshe baje bamukabangeya baliwana na byeseko. (Mateo 16:24, 25; Yowa 15:20) Yesu walishoshomwenene, co netu tukalishoshomwena. Twasa kuhyana bati bishoti bije byasa kutwonowesa kupwa ba kushubuluka? Tusimutwiyeni byuma bitatu byalingile Yesu mu cipangi cendi ca kwambulula ca hano hasi mangana tumone mutwasa kumutembwinina omwo tuliwana na byeseko.

4. Kwesekesa na mukanda wa 1 Tesalonika 5:17 endekeni byuma bije bimwesa ngwabyo Yesu walombelele kushwa kumo ha litangwa lyendi lya mamaneselelo?

⁴ Tandeni 1 Tesalonika 5:17. Ha litangwa lya mamaneselelo a kuyoya kwendi hano hasi, Yesu walombelele kushwa kumo. Cakumwenako, mwamwesele bandongesi bendi mwakulingila canukiso ca kutsa kwendi walombelele ha kubana likende na ha kubana binyu. (1 Koli 11:23-25) Kutundaho lalo, walombelele na bandongesi bendi simbu kanda batunde kuje kubalingilile Paseka. (Yowa 17:1-26) Co lalo walombelele kushwa kumo mwetele ha Munkinda wa Olibeta na bandongesi bendi. (Mateo 26:36-39, 42, 44) Majwi amamaneselelo endekele Yesu simbu kanda atse apwile lilombelo. (Luka 23:46) Yesu walombelele kuli Yehova ha cuma na cuma calingiwile ha litangwa lyatsile.

5. Bika byalingisile tupositolo bazeye?

⁵ Yesu wakolesele mu byeseko mwafwa wakulahelele Ishe na kulomba kuli ikeye kushwa kumo. Oloni buje butsiki tupositolo bonowele kutwalelelelaho kulombela. Ngeci bazeyele mubaliwanene na byeseko. (Mateo 26:40, 41, 43, 45, 56) Nga tutembwinina Yesu na kutwalelelaho kulombela, co tukolesa mu byeseko. Bika bitunapande kulomba nga tulombela?

6. Kukala na likulahelo kutukwasa bati tupwe ba kushubuluka?

⁶ Twasa kulomba Yehova “abwezelele ku likulahelo lyetu.” (Luka 17:5; Yowa 14:1) Tunapande kukala na likulahelo mwafwa Satana akeseka boshe baje bakabangeya Yesu. (Luka 22:31) Likulahelo litukwasa bati tupwe ba kushubuluka nga tuliwana na bukalu kushwa kumo? Nga tunalingi  byoshe bitwasa mangana tuhyane byeseko, co likulahelo litukwasa tuseze byuma byoshe mu maboko a Yehova. Twakulahela ngwetu abwahesa byuma byoshe mu ngila yaibwa kutubakana bingila byetu babenya, oku kutukwasa tuwe bimbunge na kupwa ba kushubuluka.—1 Petu 5:6, 7.

7. Bika bimunalilongesa kuli Robert?

⁷ Lilombelo litukwasa tupwe ba kushubuluka nameme tuliwana na byeseko byakama. Tusimutwiyeni hali Robert, mukulunu wa cikungulukilo wa kulongwa uje ali na myaka ya mu ma 80. Wendekele ngwendi: “Majwi ali ku Filipu 4:6, 7 ananjikwasa manene njikolese mu byeseko binjinaliwana nabyo mu buyoye bwange. Njakele na bukalu bwa kujeneka bimbongo. Co njatundile ha bukulunu mu simbu yaindondo.” Bika byakwasele Robert apwe wa kushubuluka? Wendekele ngwendi: “Njikalombela nga njishangumuka kulishoshomwenena. Njalimwena ngwange kulombela kushwa kumo kutundilila kwisi ya mbunge kukanjikwasa njipwe wa kushubuluka.”

8. Kwesekesa na Yowano 8:29, byuma muka bikwabo byalingisile Yesu apwe wa kushubuluka?

⁸ Tandeni Yowano 8:29. Yesu washubulukile nameme bamuyandesele mwafwa wazibukile ngwendi wazibisile Ishe kubwaha. Walongwele nameme kulinga ngoco kwakaluwile. Yesu wazemene Yehova, co wamwene kumupangela kupwa cuma ca seho. Simbu kanda aije hano hasi, Yesu wapwile ñulungu  uje wapangele hamo na Njambi. (Visi 8:30) Co lalo mwakele hano hasi wapangele na nzili mu kulongesa banu bya Ishe. (Mateo 6:9; Yowa 5:17) Eci cipangi calingisile Yesu apwe wa kubwahelela manene.—Yowa 4:34-36.

9. Kupanga cipangi ca kwambulula kutukwasa bati tupwe ba kushubuluka?

⁹ Kwononoka kuli Yehova na ‘kupanga na nzili mu bipangi bya Mwene,’ kutukwasa tutembwinine Yesu. (1 Kolinte 15:58) Nga tupanga manene cipangi ca kwambulula, co kutwaka manene mbunge ku bishoti byetu. (Vili 18:5) Bisimbu bimo, baje batukambulwila bakaliwana na bukalu bwabwingi kutubakana bwetu. Oloni mubakalilongesa bya Yehova na kubipangesa, bukalu bwabo bukatepuluka, co bakapu ba kubwahelela. Obu bunapu bukaleho bumwesa ngwabwo Yehova atukwasa. Co obu bukaleho butukwasa lalo tulizibe kushubuluka. Ndokazi umo uje wombwele na kuliziba ngwendi kesi na seho, wamwene ngwendi nga tupanga manene cipangi ca kwambulula co tupwa ba kushubuluka. Ou ndokazi wendekele ngwendi: “Munjikazezama mu cipangi ca kwambulula, kunjesi kukala na bishoti, oloni njikapu wa kubwahelela. Njikabwahelela mwafwa munjikakala mu lihya njikalizibi kukala muyehi na Yehova.”

10. Bika bimunalilongesa kuli Brenda?

¹⁰ Tusimutwiyeni lalo hali ndokazi wa lizina lya Brenda. Ou ndokazi na munendi babinja mushongo wakama manene. Brenda akendela mu citwamo ca kusindumuna. Ha bisimbu bimo akambulwila ha njubo na njubo, oloni kakangi akapangesa mikanda. Brenda wendekele ngwendi: “Munjanangukile ngwange mushongo wange kuwolo, njalyangwilile kuzezama manene mu cipangi ca kwambulula. Munjikambulula kunjesi kukala na bishoti. Oloni njikaka manene mbunge munjasa kukwasela baje banjikambulwila. Kwambulula kukanjikwasa lalo njake manene mbunge ku buyoye bwa kulutwe.”

11-13. (a) Tupositolo na beka bamwesele bati ngwabo bapwile babusamba ba busunga kuli Yesu? (b) Babusamba ba Yesu bamukwasele alizibe bati?

¹¹ Ha myaka yoshe yambulwile Yesu hano hasi, tupositolo ba kulongwa bapwile babusamba bendi ba busunga. Baje tupositolo bapwile babusamba bainendeka Mbimbiliya ngwayo: ‘Kabusamba wa busunga waha mbunge natubakana ka bushoko.’ (Visi 18:24) Baje babusamba bapwile ba seho kuli Yesu. Oloni ha simbu yapangele cipangi cendi hano hasi, bandolome bendi kubamukulahelele. (Yowa 7:3-5) Simbu imo babushoko bwendi bamwendekele ngwabo na zaluka. (Mako 3:21) Buje butsiki bwakwinduka litangwa libamutsiile, Yesu walekele tupositolo bendi ngwendi: “Yeni munakala nange mutuyando twange twoshe.”—Luka 22:28.

¹² Nameme tupositolo bendi basebukile ha bisimbu bimo, Yesu kakele mana kukusebuka kwabo, oloni wamwene ngwendi bamukulahelele. (Mateo 26:40; Mako 10:13, 14; Yowa 6:66-69) Buje butsiki bwakele na baje banalume ba kulongwa simbu kanda bamutsiye, Yesu wabalekele ngwendi: “Njimitumbula basamba, omwo njamileka byuma byoshe bije binjazibile kuli Tate.” (Yowa 15:15) Yesu bamutakamesele manene kuli babusamba bendi. Kuje kumutakamesa kwamulingisile apwe wa kubwahelela mu cipangi cendi hano hasi.—Luka 10:17, 21.

¹³ Yesu wakele lalo na babusamba beka banalume na banakazi baje bamukwasele mu cipangi cendi ca kwambulula na mu byuma byeka. Bamo bamulanyele ku binjubo byabo  mangana bakalye nendi byakulya. (Luka 10:38-42; Yowa 12:1, 2) Bakwabo bendele nendi na kupangesa byuma byabo mu kumukwasa. (Luka 8:3) Yesu wakele na babusamba bababwa mwafwa nendi wapwile kabusamba wamubwa. Wabalingilile byuma byabibwa, co katondele ngwendi balinge byuma bije kubasa. Nameme Yesu walumbunukile, oloni wakandelelele ku bukwasi bwa babusamba bendi baje kubalumbunukile. Cili bene bamukwasele alizibe kushubuluka.

14-15. Twasa kukala bati na babusamba bababwa, co basa kutukwasa bati?

¹⁴ Babusamba bababwa batukwasa tupwe ba kulongwa kuli Yehova. Nga tushaka ngwetu tukale na babusamba bababwa, co tunapande tahi kupwa kabusamba wamubwa. (Mateo 7:12) Mbimbiliya yatuleka ngwayo tupangese nzili na simbu yetu mu kukwasa bakwetu, maneneni baje bali mu bujene. (Efeso 4:28) Beya bamwasa kukwasa mu cikungulukilo ceni? Kuma mwasa kulandelako baje kubasa kwenda nga batonda kukabalandelako bimo ndi? Mwasa kwanako byakulya kuli baje kubesi na bimbongo ndi? Nga muzibuka kupangesa wembusaiti ya jw.org^® na JW Library^® app, mwasa kukwasa bakweni mu cikungulukilo ceni mangana nabo bazibuke mwakuipangesela ndi? Nga tukwasa bakwetu, co tupwa ba kubwahelela.—Vili 20:35.

¹⁵ Babusamba betu batukwasa nga tuli mu bukalu, co batukwasa lalo tupwe ba kushubuluka. Yombi mwakele na kwendeka bya bukalu bwendi, Elihu wakele na kumutolilila. Mu ngila imo lika, babusamba betu batutolilila  nga tubaleka mutuli na kulizibila. (Yombi 32:4) Bakwetu kubapandele kutwangwila bya kulinga, oloni tubatolilileni omwo bapangesa Mbimbiliya mu kutukwasa. (Visi 15:22) Mwene Ndabiti watambwile bukwasi kuli babusamba bendi, ngeci netu kutwapandele kubyana omwo babusamba betu batukwasa nga tuli mu bukalu. (2 Samwe 17:27-29) Babusamba ba cifwa eci banapu bwana bwa kutunda kuli Yehova.—Yako 1:17.

16. Kwesekesa na Filipu 4:6, 7, twasa kukala bati mu kwoloka? Lumbununeni.

¹⁶ Tandeni Filipu 4:6, 7. Bika byanatulekela Yehova ngwendi twasa kukala mu kwoloka kuje kwakana kwitila “muli Kilisitu Yesu”? Mwafwa twasa kuwa mbunge na kushubuluka nga tukala na likulahelo kuli Yesu na kuzibuka cipangi cali naco mu kushulisilila biyongola bya Njambi. Cakumwenako, bubi bwetu basa kubusambesa kwitila lika mu ñombelo ya Yesu Kilisitu. (1 Yowa 2:12) Awa majwi atuzembeleka. Ha kupwa Mwene wa Bumwene bwa Njambi, Yesu akamanesa tuyando twoshe twanatujukwila Satana na kaye kendi. (Isaya 65:17; 1 Yowa 3:8; Kujo 21:3, 4) Oku kutukwasa tukale na lilabelelo. Yesu natwana cipangi cakama, co katwecelele lika lyetu, oloni natwalelelaho kutukwasa muno mu matangwa a kukotoka. (Mateo 28:19, 20) Awa majwi atukwasa tusimpe. Kushubuluka, kukala na lilabelelo na kupwa ba kusimpa kutukwasa tukale mu kwoloka.

17. (a) Bika bikwasa muka-Kilisitu akale mu kwoloka? (b) Mukanda wa Yowano 16:33 utuleka ngwawo twasa kulinga bika?

¹⁷ Mwasa kukala bati mu kwoloka nga muli na bukalu bwakama? Mwasa kukala mu kwoloka nga mulinga byuma byalingile Yesu. Ca kulibanga, twaleleleniho kulombela nameme byuma bikaluwe bati. Ca mu cibali, ononokeni Yehova na kwambulula na ntwima nameme kwakukalu kulinga ngoco. Ca mu citatu, nga muli mu bukalu lekeniko babusamba beni mangana bamikwase. Nga mulinga ngoco, co kwoloka kwa Njambi kunyungilila bimbunge byeni na biyongola byeni. Co neni muhyana byeseko ngwe mwabihyanenene Yesu.—Tandeni Yowano 16:33.