Winston tulekeko muwalilongeselele busunga.

Njakolelele mu Queensland ku Australia. Twakele ha famu, co naanga yetu kuyalombelele Njambi. Kunjalizibukile manene na banu mwafwa twatungile kwa lika lyetu. Munjakele na myaka 12, njashakele kuzibuka bya Njambi. Njalombele Njambi ngwange anjikwase mangana njimuzibuke mwamubwa. Mu kwita kwa simbu njajalukilile ku Adelaide, mu South Australia kuje kunjakawanene cipangi. Munjaile na kuhwima ku Sydney te njili na myaka 21, njakaliwanene na Pamela. Pamela wanjilekele bya cibunga ca bulombelo cibatumbula ngwabo British-Israel religious movement. cije cibunga cakele na kulongesa ngwaco banu ba ku Britain batunda ku muyati wa kuzimbala wa Baisalele. Eci cibunga cendekele lalo ngwaco, banu ba ku Britain batunda ku miyati 10 ya bumwene bwa ku kunto bwa Baisalele baje baile mu bundungo ku Mbambilone mu cita ca myaka ca bu 8 B.C.E. Munjelukile ku Adelaide njakasimutwiiye eyi ñanda na mukwetu injakele na kupanga nendi uje wakele na kulilongesa Mbimbiliya na Bakaleho ba Yehova. Munjasimutwiiye nendi ha maola a kutanda, maneneni ha byuma bibakulahela Bakaleho, njamwene ngwange lije lilombelo lyange lya ku bwanike banalikumbulula. Njakele na kulilongesa busunga hali Njambi na Bumwene bwendi. Njawanene ‘[limanya] lya seho yakama.’—Mateo 13:45, 46.

Pamela, nobe washakezekele lije limanya lya seho kushwa ku bwanike bwobe. Tulekeko, waliwanene bati?

Njasemukilile mu mbongi ya Coffs Harbour ku New South Wales, co naanga yetu yashakele bya Njambi. Bisemi bange na bakuku bakulahelele bilongesa bya baka-British-Israel movement. Yange, yayange, shongo yange na  bashoniange batulongesele ngwabo Njambi akabezikisa batekulwila ba baka-Britain. Oloni kunjakulahelele bibatulongesele, co njalizibile kukala kulako na Njambi. Munjakele na myaka 14, njaile ku maceci a kulisezaseza a kufwa ngwe Anglican, Baptist na Sabata. Oloni kuwanjikwasele kuzibuka Njambi.

Mu kwita kwa simbu, naanga yetu yajalukilile ku Sydney kuje kunjakaliwanene na Winston ha simbu yaile na kuhwima. Ngwe mwanendekela Winston, bitwasimutwiiye byalingisile Winston alilongese na Bakaleho. Co mu mikanda yakele na kunjisonekela wakele na kwakamo Bisoneka byabingi. Kwendeka lika busunga, ha kulibanga njalishoshomwenene, co njakele na kuziba ku mbunge futu. Oloni mu kwita kwa simbu, njamwene ngwange byakele na kusoneka byapwile bya busunga.

Mu 1962, njajalukilile ku Adelaide mangana njikakale kuyehi na Winston. Winston wabwahesele ngwendi njikatulile kuli Thomas na munakazi wendi Janice Sloman baje bapwile bamishinali mu Papua New Guinea. Ha simbu ije njakele lika na myaka 18, co banjikwasele njizibuke byabingi hali Yehova. Nange njashangumukile kulilongesa Mbimbiliya, co njamwene ngwange obu bukebwo busunga. Mutwalyambatele na Winston, twashangumukile kupanga cipangi ca simbu yoshe. Nameme tunaliwana na bukalu, oloni kupangela Yehova kunatukwasa tutwaleleleho kumona seho ya limanya litwawanene.

Winston, tulekeko mashangumukilo a cipangi cobe mu munga ya Yehova.

Kukwetile simbu yakama kutunda ha twalyambatelele na Pamela Yehova mwatwanene bipangi bya kulitila. (1 Koli 16:9) Ndolome Jack Porter ikeye wa kulibanga kutushongangeya tulinge cipangi ca simbu yoshe, ou ndolome wapwile ntwama wa kuzenguluka mu kacikungulukilo ketu. (Hano njili na kupangela hamo nendi mu Komiti ya Munango wa ku Australasia.) Jack na munakazi wendi Roslyn batushongangeyeye ngwabo tulinge bupainiya. Co twalikuwilebwo ha myaka itanu. Munjakele na myaka 29, banjilekele ngwabo njikapwe ntwama wa kuzenguluka ku makanda a ku South Pacific, aje akukele mwisi ya munango wa Fiji. Twendelele makanda a American Samoa, Samoa, Kiribati, Nauru, Niue, Tokelau, Tonga, Tuvalu, na Vanuatu.

Ha simbu ije, twapandele kupwa ba kunyanyama mwafwa banu ba mu makolokolo kubashakele Bakaleho ba Yehova. (Mateo 10:16) Mu bikungulukilo bimo mwakele banu babandondo, co kubasele kutwana binjubo bya kulala. Ngeci, twalombele banu ba mu membo ngwetu batukwaseko mwa kulala, co bakele na kutwana.

Winston wazema cipangi ca kunungulula. Bika byakulingisile uzeme eci cipangi?

Ha simbu ije ku likanda lya Tonga bandolome bakele lika na matilakiti na mabulu amandondo mu ndaka ya Tonga. Bapangesele libulu lya Ingilishi lya The Truth That Leads to Eternal Life mu kulilongesa na banu Mbimbiliya. Mukwakele sikola ya bakulunu ya byalumingo biwana, bakulunu batatu bayongwele ngwabo banungulule libulu lya The Truth That Leads to Eternal Life mu ndaka ya Tonga nameme kubazibukile mwamubwa ndaka ya Ingilishi. Pamela ikeye wakele na kutaipa, co twanungulwile lije libulu mu byalumingo 8. Mulyahwile, twalitumine ku munango wa ku America mangana bakalipulinte. Nameme kutwalinungulwile mwamubwa, oloni lyakwasele baka-kwendeka ndaka ya Tonga balilongese busunga. Yange na Pamela kutwapwile tu baka-kunungulula, oloni kunungulula lije libulu kwatulingisile tuzeme eci cipangi.

Pamela buyoye bwa ku makanda bwaliseza bati na bwa ku Australia?

Bwaliseza manene. Ku mitamba imo kwakele manene tungeningeni, kumo kwa kushaluka manene, kumo kwa lifwike, kumoco kwa bantumbi, co lalo kumo kwakele manene mishongo, kumoco byakulya byabindondo. Oloni mulyakele na kulauka litangwa, twakele na kuliziba kushubuluka mutwakele na kutala kalunga ndonga oku tuli mu binjubo bya kujeneka  kuputika. Bisimbu bimo butsiki nga kuli lyezi twakele na kumona miti ya mashakabale. Ebi bisimbu byabibwa byatulingisile tusinganyekesese na kulombela na kujeneka kwaka mbunge ku bukalu, oloni twake mbunge ku byuma byabibwa.

Twazemene manene banike batwakawaneneko. Bashakele manene kweha netu na kuzibuka byabingi hali yetu bindele ba kweka. Mutwakele ku Niue, mwanike umo wa munalume wakwatele ha liboko lya Winston haje hakele manene bwaka bwaka, co wendekele ngwendi: “Njashaka mangona obe.” Lwapwile lwa kulibanga kuli uje mwanike kumona maka a cifwa cije, ngeci kazibukile nomu mwakuwatumbwila.

Twalizibile manene kubabala ku mbunge mutwamwene mubakele na kuyandela banu boku ku mutambela. Mutambela wabo waubwa manene, oloni kukwakele bipatela byabibwa, co lalo kwakukalu kuwana mema a kunwa. Oloni bandolome betu kubasholokele kulishoshomwena. Bezililile buyoye bwabo. Babwahelelele mwafwa bakele na binaanga byabo, bakele na mwela wa kulemesela Yehova, co lalo babwahelelele mwafwa babezikile kulemesa Yehova. Yoyesi yabo yatukwasele twake mbunge ku byuma bya seho na kwasiwisa buyoye bwetu.

Pamela, ha bisimbu bimo wakele na kuya na kulitekwila mema yobe babenya na kulitelekela. Tulekeko, wakele na kwasa bati nameme ngwabo ebi byuma byapwile bya bungenzi kuli yobe?

Njikandelela manene kuli batate ha kunjilongesa mwamubwa. Batate banjilongesele mwakubwekela tuhya na kutelekela hanja, nomu mwakuliyoyesela na tubyuma twatundondo lika. Mutwaile ku Kiribati, twakatulilile mu kanjubo ka kujambela, co kwisi kwakele ma bamboo, co hasi basalimbileho. Njendile bwina mu njubo na kwakamo bishwashwa bya makokonati mangana njibweke tuhya, co asina njiteleka. Njakele na kwimana mu mukana na bakwetu banakazi mangana njitekule mema mu lisima. Citekwiso bacipangele ngwe kalobo. Bakutiiye mukole kushongo ya citi ca mamita abali mubulaha. Co kushongo ya mukole bakutiiyeko ca kutekwisa. Nga munakazi umo namanesa kutekula, co mukwabo lalo aingaho. Bakele na kwashela uje mukole mu lisima, co cije citekwiso coshe cishula na mema. Njamwene ngwe kwakwasi kutekula mema, kubanga simbu yange muyetele. Munjashelele mukole mu lisima, citekwiso kucatekwile mema. Co njelukilileho lwalwingi, oloni cakele na kufumuka lika helu ya mema. Boshe batsile kujola, co mubamanesele kujola munakazi umo wakunjikwasele. Banu bakele na kutukwasa manene.

Mubaboshe mwazemene cipangi ca kuzengulukila ha makanda. Tulekeniko byuma bimwaliwanene nabyo bije kumukebala?

Winston: Kwatwambatelele simbu kulilongesa bisemwa byeka. Cakumwenako, bandolome mubatujumbwile, bakele na kutwana byakulya byoshe bibapandele kulya ha litangwa olyo. Ha kulibanga, kutwanangukile ngwetu tunapande kubasezelaho. Ngeci, twalile byoshe bibatujumbwile. Oloni mutwanangukile cisemwa cabo, twashangumukile kubasezelaho. Nameme kutwalingile byuma mu ngila yaibwa, oloni bandolome batuzibisisile. Babwahelelele manene mutwakele na kubendela hanima ya bingonde 6 nambe kutubakana. Co lalo yange na Pamela yetu lika bakaleho ba kweka babalizibukile nabo.

Bwingi bwa banu ba muje mu membo basinganyekele ngwabo bandolome betu balimungilile ka cibunga ka Bakaleho. Co lalo basinganyekele ngwabo hamo kakele lika muje mwimbo, oloni mubamwene yange na Pamela bindele ba kweka banangukile ngwabo kumani bwapwa bulombelo bwakama. Co babwahelelele.

Pamela: Kunjikebala byuma byalingiwile ku Kiribati, kuje kwakele cikungulukilo cakele lika na bandolome na bandokazi ba kutanda. Itinikai Matera, ikeye lika wapwile mukulunu mu cikungulukilo, co watunyungile mwamubwa. Litangwa limo watunenelele mutonga, muje mu  mutonga mwakele lika liyaki limo. Co wendekele ngwendi: “Kwateni, njaminenela.” Ha simbu ije kulya liyaki kwapwile kubezika. Nameme bwana bwaco bwapwile bwabundondo, oloni twabwahelelele manene.

Pamela limo lyobe lyabihile, bika byakukwasele ukolese omu mu bukalu?

Mu 1973, njakele na limo. Ha simbu eyi yange na Winston twakele ku South Pacific. Ngeci twelukile ku Australia, co hanima ya bingonde biwana limo lyange lyakabihile. Winston nendi wazeyele manene. Mu kwita kwa simbu, busiwa bwetu bwakele na kutepuluka, oloni bwahwile mutwatambwile Kaposhi ka Kukengela ka April 15, 2009. Ha “Lipuzo ze Zwa Kwa Babali,” hakele cihula eci: “Kana ku na ni sepo ya kuli mbututu ye shwezi mwa mba ya maa yona i ka zuswa kwa bafu?” Cije cilongesa catuzembelekele, cendekele ngwaco Yehova ikeye azibuka byakalinga, co simbu yoshe akalingi byuma byabibwa. Yehova akatundisako busiwa bwoshe butukazibi mwafwa ya kuyoya muno mu kaye ka Satana. Akapangesa munendi mu ‘kunyongesa bipangi bya Satana.’ (1 Yowa 3:8) Ha kupwa banu ba Yehova, ije ñanda yatukwasele lalo tumone seho yakama ya “limanya.” Nameme tunaliwana na bukalu bwakama, oloni lilabelelo linatutakamesa manene.

Munjakele na limo, twalikelele cipangi ca simbu yoshe, oloni mulyabihile limo lyange twashangumukile lalo eci cipangi. Twapangelele ha Mbetele ya ku Australia ha bingonde bya kutanda, co hanima twashangumukile lalo cipangi ca kuzenguluka. Mu 1981, hanima ya kupangela ku New South Wales na ku Sydney ha myaka iwana, batulanyele ku munango wa Australia, co kukekwo kutucili na simbu ino.

Winston, kuma byuma biwaliwanene nabyo mumwakele na kwendela makanda a ku South Pacific binakukwasa mu cipangi cobe ha kukala mu komiti ya munango wa Australasia ndi?

Eyo, binanjikwasa mu bingila byabingi. Laja Australia ikeyo yakele na kutala likanda lya American Samoa na Samoa. Co munango wa New Zealand baupandakanene nou wa Australia. Ha simbu ino, munango wa Australasia ukatala bya ku Australia, American Samoa na Samoa, makanda a Cook, New Zealand, Niue, Timor-Leste, Tokelau, hamo lika na Tonga. Co bwingi bwei mitambela njayendelaho laja ha kupwa muka-kwimanena munango. Kulikwatasana naba bandolome na bandokazi ba kulongwa ba ku makanda kunanjikwasa manene munjili na kupangela ha munango.

Mu kumaneselela, njishaka kwendeka ngwange yange na Pamela tunalimwena ngwetu keti bakulunu lika bakashakezeka Njambi, oloni na banike. Banike nabo bakashakezeka ‘limanya lya seho yakama’ nameme baka-naanga yabo kubalishakezeka. (2 Vimye 5:2, 3; 2 Mizi 34:1-3) Yehova wapwa Njambi wa cizemo, co ashaka ngwendi bakulunu na banike bakawane mwonyo wa myaka yoshe.

Kuneti myaka 50 kutunda hatwashangumukilile kushakezeka busunga hali Njambi. Kutwazibukile byuma bitunda mu kulifwita kwetu. Busunga bunapu limanya lya seho yakama manene. Ngeci, tunalyangwila kukwata eli limanya lya seho na nzili yetu yoshe.