1-2. Bika bitunapande kulinga omwo tubandamena kaye kakaha?

 TWAMONA cikulaheso ca Yehova ca kunena kaye kakaha kupwa ca seho. (2 Pita 3:13) Nameme kutuzibuka simbu mpundu ikakaija kaye kakaha, kuli bukaleho bumwesa ngwabo eci cikulaheso ololo cilishulisilila.—Mate 24:32-34, 36; Bili 1:7.

² Nameme hamo tuneshwala mu busunga, tubaboshe tunapande kulinga mwoshe mutwasela kukanyamesa likulahelo lyetu mangana tutwaleleleho kukulahela eci cikulaheso. Mwafwa bika? Mwafwa nameme likulahelo lya kukanyama lyasa kuzeya. Mukemwo kapositolo Paulu wendekele bya kujeneka likulahelo ngwendi, bunapu “bubi buje bukatushetula bwasi.” (Hebe 12:1) Ngeci, tunapande kutwalelelaho kwaka mbunge ku bukaleho buje bumwesa ngwabwo kaye kakaha kali muyehi, mangana tutwaleleleho kukanyamesa likulahelo lyetu.—Hebe 11:1.

3. Bika bitusimutwiya muno mu cilongesa?

³ Muno mu cilongesa, tusimutwiya ha bingila bitatu mutwasa kukanyameselamo likulahelo lyetu mu cikulaheso ca kaye kakaha kanatukulahesa Yehova: (1) kusinganyekesesa ha ndando ya kupatula, (2) kusinganyekesesa ha nzili yakala nayo Yehova na (3) kulinga byuma bije bitushwenyesa kuyehi na Yehova. Co tusimutwiya omwo muzimbu walekele Yehova Hambakuke wasa kukanyameselamo likulahelyo lyetu. Tucisimutwiyeni tahi ha byuma bituli na kuliwana nabyo ano matangwa, bije bitondeka  kukala na likulahelo lya kukanyama mu cikulaheso ca kaye kakaha.

BYUMA BITUNASA KULIWANA NABYO BIJE BITONDEKA KUKALA NA LIKULAHELO

4. Byuma muka bitukangula kulinga bije bitondeka likulahelo lya kukanyama?

⁴ Ha litangwa na litangwa, tukangula byuma bije bitondeka kukala na likulahelo lya kukanyama. Cakumwenako, tukangula banu ba kulikwatasana nabo, byuma bya kulizima nabyo buli, indi tuya ku sikola, munu wa kulyambata nendi, kukala na bana na bipangi bitushaka kulinga. Tunapande kulihula ngwetu: ‘Kuma byuma binjikangula kulinga bimwesa ngwabyo njakulahela ngwange kano kaye ololo kahwa, co kaye kakaha kali muyehi ndi? Indi hamo njikangula byakulinga ngwe banu baje bali muno mu kaye baje kubakulahelele ngwabo twasa kukayoya myaka yoshe?’ (Mate 6:19, 20; Luka 12:16-21) Nga tukanyamesa likulahelo lyetu na kukulahela ngwetu kaye kakaha kali muyehi, co twangula mwamubwa byakulinga.

5-6. Mwafwa bika tunapande kukanyamesa likulahelo lyetu nga tuli na kuliwana na byeseko? Endekeni cakumwenako.

⁵ Simbu imo tukaliwana na bukalu buje butondeka kukala na likulahelo lya kukanyama. Tunasa kuliwana na mapakeso, kubinja mushongo wakama nambe kuliwana na bukalu buje bunasa kutuzeyesa. Hakulibanga tunasa kuliziba ngwe twasa kukanyama nameme twaliwana na byeseko. Oloni kakangi byeseko bya cifweci kubyesi kuhwa bwasi. Ngeci, tunapande kutwalelelaho kukala na likulahelo lya kukanyama mangana tutwaleleleho kupangela Yehova mu kubwahelela nameme twaliwana na byeseko bya cifweci.—Loma 12:12; 1 Pita 1:6, 7.

⁶ Nga tuli mu ceseko tunasa kuliziba ngwe kaye kakaha kukaija. Kuma oku kulumbununa ngwabo likulahelo lyetu linazeye ndi? Embwe. Twendekeniko cakumwenako eci. Nga kwatonola manene ha simbu ya cisika, munu nasa kuliziba ngwe ntondwe kuikalako. Oloni ntondwe ija. Mu ngila imolika, nga tunazeye tunasa kuliziba ngwetu kaye kakaha kukakakalako. Oloni nga tuli na likulahelo lya kukanyama tukulahela ngwetu Yehova ashulisilila byuma byoshe byanakulahesa. (Myaso 94:3, 14, 15; Hebe 6:17-19) Kukulahela ngoco kutulingisa twake bya Yehova mu mutamba wakulibanga.

7. Bisinganyeka muka kutwapandele kukala nabyo?

⁷ Tunapande kukala na likulahelo lya kukanyama omwo tulinga cipangi ca kwambulula. Banu babangi batukambwilila “muzimbu waubwa” wa kaye kakaha kaje kali na kwija bakamono ngwe ou muzimbu keti wa busunga. (Mate 24:14; Ezeki 33:32) Kutwapandele kutabesa bisinganyeka byabo bitungumune. Twasa kulinga ngoco nga tutwalelelaho kukanyamesa likulahelo lyetu. Tusimutwiyeni ha bingila bitatu byasa kutukwasa kulinga ngoco.

SINGANYEKESESENI HA NDANDO YA KUPATULA

8-9. Kusinganyekesesa ha ndando ya kupatula kukanyamesa bati likulahelo lyetu?

⁸ Ngila imo itwasa kukanyameselamo likulahelo lyetu, inapu kusinganyekesesa ha ndando ya kupatula. Ndando ya kupatula itulingisa tukulahele ngwetu byuma byanatukulahesa Njambi bilishulisilila. Nga tusinganyekesesa ha byuma byalingisile Njambi ane Munendi kupwa ndando ya kutupatula, co tukanyamesa manene likulahelo lyetu na kukulahela ngwetu byuma byoshe byanatukulahesa Njambi, kwambateselela na kaye kakaha, bilishulisilila. Bika bitulingisa twendeke ngoco?

⁹ Bika byalibungilile mu ndando ya kupatula? Yehova watumine Munendi yazema wa ntwatwa, uje yakele nendi muyehi manene mangana akusemukile hano hasi na kupwa munu wa kulumbunuka. Yesu mwakele hano hasi  wakolesele mu tuyando twa kuliseza-seza. Bamuyandesele manene, co bamutsiile mu ngila yaibi. Yehova wafwetele ndando yakama manene. Njambi yetu wa cizemo watumine Munendi kwakututsila mangana twase kuyoya myaka yoshe, keti ha simbu yaindondo lika. (Iwano 3:16; 1 Pita 1:18, 19) Yehova akashulisilila cikulaheso cendi ca kunena kaye kakaha, mwafwa wanene Munendi yazema mangana akututsile.

SINGANYEKESESENI HA NZILI YAKALA NAYO YEHOVA

10. Kweseka na mukanda wa Efeso 3:20, Yehova asa kulinga bika?

¹⁰ Ngila yamucibali itwasa kukanyameselamo likulahelo lyetu inapu kusinganyekesesa ha nzili yakala nayo Yehova. Yehova ali na nzili ya kushulisilila byuma byoshe byanakulahesa. Banu babangi bakasinganyeka ngwabo cikulaheso ca kukayoya myaka yoshe kucikalishulisilila. Oloni Yehova akakulahesa kulinga byuma bije kubasa kulinga banu. Akasa kulinga ngoco mwafwa wapwa Njambi Muka-nzili Yoshe. (Yombi 42:2; Maki 10:27) Ngeci, kutwapandele kukasama mwanakulahesa kulinga byuma bije kubasa kulinga banu.—Tandeni Efeso 3:20.

11. Endekeniko bikulaheso bimo bya kulitila byakulahesele Yehova. (Taleni cipalo ca “ Bikulaheso bya Kulitila Binalishulisilila.”)

¹¹ Tucisimutwiyeni ha byuma byakulahesele kulingila Yehova bangamba bendi, bije byamonekele ngwe kubyasa kulingiwa. Wakulahesele Abrahamu na Sala ngwendi bakakita mwana nameme banakulubala. (Kusha 17:15-17) Wakulahesele lalo Abrahamu ngwendi akana batekulwila bendi lifuti lya Kanana. Ha myaka yaingi ibakele batekulwila ba Abrahamu mu bundungo mu Ijipiti, kwamonekele ngwe eci cikulaheso kucilishulisilila. Oloni cije cikulaheso calishulisilile. Mu kwita kwa simbu, Yehova wendekele ngwendi Elizabethi akakala na mwana. Walekele lalo Maliya mumbanda uje te kanda alilaleho laja na munalume ngwendi akakita Yesu. Co eci mucalingiwile cashulisilile bupolofweto bwapolofwetele Yehova myaka yaingi kunima mu lihya lya Edeni.—Kusha 3:15.

12. Mukanda wa Yoshwa 23:14; na wa Isaya 55:10, 11, wendeka bika ha nzili yakala nayo Yehova?

¹² Kusinganyekesesa ha bikulaheso byakulahesele Yehova kunima nomu mwabishulisililile, kutukwasa tukulahele ngwetu akashulisilila cikulaheso cendi ca kunena kaye kakaha. (Tandeni Yoshua 23:14; Isaya 55:10, 11.) Oku kutulingisa tulibwahesele kulumbwinina bakwetu ngwetu byuma byoshe byanatukulahesa Yehova bya kufwa ngwe kaye kakaha, bikalishulisilila. Yehova ikeye babenya wendekele bya melu amaha na kaye kakaha ngwendi: “Awa majwi anapu a kulongwa, co lalo a busunga.”—Kujo 21:1, 5.

LINGENI BYUMA BIJE BIMILINGISA MUSHWENYE KULI YEHOVA

13. Biwano bya cikungulukilo byasa kukanyamesa bati likulahelo lyetu? Lumbununeni.

¹³ Ngila yamucitatu itwasa kukanyameselamo likulahelo lyetu inapu kuzezama na bipangi bya ku sipilitu. Cakumwenako, tumoneni mubikatukwasela biwano bya cikungulukilo. Anna, uje neshwala manene mu bipangi bya kuliseza-seza bije byalibungila mu cipangi ca simbu yoshe ngwendi: “Biwano bikakanyamesa manene likulahelo lyange. Nameme nga muka-kwendeka kesi na cashu ca kulongesa nambe nga kukwesi byabiha byendeka, njikawanako bimo bije bikanjikwasa njizibisise mwamubwa busunga bwa mu Mbimbiliya na kukanyamesa likulahelo lyange.” b Bikumbululo byabibwa bibakakumbulula bandolome na bandokazi betu nabyo bikakanyamesa likulahelo lyetu.—Loma 1:11, 12; 10:17.

14. Kwambulula kukakanyamesa bati likulahelo lyetu?

 ¹⁴ Tukakanyamesa lalo likulahelo lyetu nga twambulula. (Hebe 10:23) Barbara uje napangela Yehova ha myaka ya kutubakana 70 ngwendi: “Cipangi ca kwambulula cikakanyamesa manene likulahelo lyange. Simbu yoshe munjikaleke bakwetu byuma byanatukulahesa Yehova, likulahelo lyange likakanyama manene.

15. Cilongesa ca munu endilika cikakanyamesa bati likulahelo? (Taleni na bikupulo.)

¹⁵ Cuma cikwabo lalo cikakanyamesa likulahelo lyetu cinapu cilongesa ca munu endilika. Ndokazi wa lizina lya Susan nananguka ngwendi kunoneka mwamubwa cilongesa ca munu endilika kukamukwasa manene. Ngwendi: “Lyacalumingo njikalibwahesela cilongesa ca Kaposhi ca calumingo cijaho. Lyamande na Lyamucibali njikalibwahesela biwano bya mukati ka calumingo. Awa matangwa akwaboco njikalingi cilongesa ca munu endilika.” Kukabangeya mwamubwa cilongesa ca munu endilika kunakwasa ndokazi Susan akanyamese likulahelo lyendi. Ndokazi Irene, uje napangela ku cikota cetu ha myaka yaingi nananguka omwo kutanda biñanda bya bupolofweto kunakanyameselamo likulahelo lyendi. Ngwendi: “Njikabwahelela manene munjikamono nameme byuma bimo byabindondo bije binakundama ku bupolofweto bwa Yehova bilishulisilila.” c

‘BIKALINGIWA HA SIMBU INJINEMIKA’

16. Bika bitulingisa twendeke ngwetu byuma byalekele Yehova Hambakuke bitukwasa netu ano matangwa? (Bahebelu 10:36, 37)

¹⁶ Bangamba ba Yehova bamo, banabandamena kukotoka kwa kano kaye ha simbu yailaha manene. Banu bamo bakasinganyeka ngwabo kukotoka kwa kano kaye kuli na kwishwala. Yehova azibuka mubakalizibila banu bendi. Mukemwo walekele kapolofweto Hambakuke ngwendi: ‘Oloni simbu ili na kwija bwasi omwo  byuma ebi njili na kukumwesa bikalingiwa. Nameme binambata simbu ngeci bilingiwe, bandamena lika, bikalingiwa ha simbu injinemika, kubikeshwala embwe.’ (Hamba 2:3) Kuma awa majwi endekele Yehova akwasele lika Hambakuke ndi? Awa majwi netu atukwasa ano matangwa ndi? Njambi wahwiminine kapositolo Paulu apangese awa majwi kuli baka-Kristu omwo babandamena kaye kakaha. (Tandeni Bahebelu 10:36, 37.) Twakulahela ngwetu nameme byuma byanakulahesa Yehova bimoneka ngwe bishwala, ‘bikalingiwa ha simbu yanemika, kubikeshwala embwe.’

17. Cinangulo canene Yehova kuli Hambakuke cinakwasa bati ndokazi umo?

¹⁷ Bangamba ba Yehova babangi banatwalelelaho kukabangeya cinangulo ca Yehova ca kutwalelelaho ‘kubandamena.’ Co bamo banalingi ngoco ha myaka yaingi. Cakumwenako, ndokazi Louise uje washangumukile kupangela Yehova mu 1939 ngwendi: “Ha simbu ije njasinganyekele ngwange Alamagidoni ija simbu kanda njimanese sikola. Oloni keti bikebyo byalingiwile. Ha myaka ineti, kutanda mizimbu ya mu Mbimbiliya ya bangamba ba Yehova baje babandamenene ha simbu yailaha kunanjikwasa manene. Cakumwenako, muzimbu wa Nowa, Abrahamu, Jozefu na bakwabo baje babandamenene ha simbu yailaha simbu kanda batambule cikandalela cabo cabakulahesele Yehova. Kukala na mbunge ya kubandamena kunakwasa yange hamolika na bakwetu tukulahele ngwetu kaye kakaha kali muyehi.” Bangamba ba Yehova bakwabo baje banamupangela ha simbu yailaha nabo banalimwena ngoco.

18. Kusinganyekesesa ha byuma bya kutanga kukanyamesa bati likulahelo lyetu omwo tubandamena kaye kakaha?

¹⁸ Ha simbu ino tucibandamena kaye kakaha. Oloni singanyekeni ha byuma biliko ha simbu ino. Cakumwenako, bingongonosi, miti, tusitu na bakwetu banu. Tubaboshe twakulahela ngwetu ebi byuma kubili nameme simbu imo kunima kubyakeleko. Ebi byuma kubili mwafwa Yehova ikeye wabitangele. (Kusha 1:1, 26, 27) Yehova nakulahesa lalo kutubwahesela kaye kakaha. Akashulisilila eci cikulaheso. Mu kaye kakaha, banu bakalikuwa kuyoya myaka yoshe oku banalikangula. Ha simbu yanabwahesa Njambi, kaye kakaha kakaija.—Isaya 65:17; Kujo 21:3, 4.

19. Mwasa kukanyamesa bati likulahelo lyeni?

¹⁹ Ha simbu ino, tulingeni mwoshe mutwasela kukanyamesa likulahelo lyetu. Simbu yoshe kandeleleni ku ndando ya kupatula. Singanyekeseseni ha nzili yakala nayo Yehova. Zezameni mu bipangi bya ku sipilitu. Nga mulinga ngoco, co mukala ha mbunga ya banu, “baje baswana bikulaheso kwitila mu kukala na likulahelo na mbunge ya kubandamena.”—Hebe 6:11, 12; Loma 5:5.