CILONGESA 33
Kusanguka Kumwesa Mana na Cizemo ca Njambi na Mbunge ya Kubandamena
‘Banu bakasanguka ku batsi.’—VILI 24:15.
MWASO 151 Ukabiza
BILI MUNO MU CILONGESA *
1. Bika byalingisile Yehova atange byuma byakuyoya?
HA KULIBANGA, Yehova wakele likalyendi. Oloni wapwile wa kubwahelela, co lalo kakele na kuziba buli. Nameme ngoco, washakele ngwendi kukale byuma bya kuyoya, co bilikuwe kuyoya. Cizemo calingisile Yehova ashangumuke kutanga.—Myaso 36:9; 1 Yowa 4:19.
2. Yesu na tungelo balizibile bati omwo Yehova watangele byuma bikwabo?
2 Yehova wabangele kutanga Munendi Yesu. Co wapangesele ou Munendi wa ntwatwa mu ‘kutanga byuma byoshe,’ kwambatesela na tungelo babangi. (Kolo 1:16) Yesu wabwahelelele kupangela hamo na Ishe. (Visi 8:30) Tungelo nabo babwahelelele. Bakele na kumona Yehova na Yesu uje wapwa Ngangula mu Kupanga oku bali na kutanga melu na kaye. Tungelo balingile bika? “Batambekele na kujolela” omwo Njambi wamanesele kutanga kaye. Babwahelelele lalo Yehova mwatangele byuma bikwabo kwambateselela na banu. (Yombi 38:7; Visi 8:31) Cuma na cuma canatanga Yehova cimwesa ngwaco wakala na cizemo na mana.—Myaso 104:24; Loma 1:20.
3. Kwesekesa na mukanda wa 1 Kolinte 15:21, 22, ñombelo ya Yesu ikwasa bati banu?
3 Yehova wayongwele ngwendi banu balikuwe kuyoya myaka yoshe ha kaye kakabwa katangele. Oloni Adama na Eva batengulukilile Ishabo wa cizemo, co balingisile ha kaye hakale bubi na kutsa. (Loma 5:12) Yehova walingile bika? Oho bene, wendekele mwakobwela banu. (Kusha 3:15) Yehova wayongwele ngwendi Munendi ane mwonyo wendi kupwa ñombelo mangana bana ba Adama na Eva bapatuke ku bubi na ku kutsa. Co munu woshe uje angula kumupangela asa kukayoya myaka yoshe.—Yowa 3:16; Loma 6:23; tandeni 1 Kolinte 15:21, 22.
4. Tusimutwiya ha bihula muka muno mu cilongesa?
4 Tunasa kulihula bihula byabingi ha cikulaheso ca Njambi ca kusangula batsi. Tunasa kwihula ngwetu: Batsi bakasanguka bati? Tukazibuka babushoko bwetu na babusamba betu mubakasanguka ndi? Kusanguka kwa batsi, kukatulingisa bati tukapwe ba kubwahelela? Co kusinganyekesesa ha lilabelelo lya kusanguka kwa batsi, kutukwasa bati tunanguke ngwetu Yehova wakala na cizemo na mana, co lalo wakala na mbunge ya kubandamena? Tusimutwiyeni hali ebi bihula.
BATSI BAKASANGUKA BATI?
5. Mwafwa bika tunapande kukulahela ngwetu batsi kubakasanguka ha simbu imo lika?
5 Yehova mwakapangesa Munendi mu kusangula banu babangi ku batsi, hamo kubakasanguka boshe ha simbu imolika. Mwafwa bika? Mwafwa nga banu boshe bakasanguka ha simbu imolika, bakapwa babangi manene, co bakanena mbundunwina. Yehova washaka kulinga byuma mu ngila inapande. Azibuka ngwendi nga byuma byenda mu ngila inapande, co banu balikuwa kuyoya mu kwoloka simbu yoshe. (1 Koli 14:33) Yehova Njambi wapangele hamo na Yesu mu kubwahesa kaye kamandondo-kamandondo mangana banu bakaleho. Mwalingile ngoco, Yehova wamwesele ngwendi wakala na mana na mbunge ya kubandamena. Yesu nendi akamwesa ebi bifwa mu Ciyulo cendi ca Myaka 1000. Akapangela hamo na baje bakoboka ha Alamagidoni mu kubwahesa kaye mangana bakatambule baje bakasanguka ku batsi.
Baje bakoboka ha nzita ya Alamagidoni, bakalongesa baje bakasanguka bya Bumwene bwa Njambi na cizango cendi (Taleni palagilafu 6) *
6. Kwesekesa na mukanda wa Vilinga 24:15, banu ba cifwa muka bakasanguka ku batsi?
6 Cipangi cakama cibakalinga baje bakoboka nzita ya Alamagidoni cikapwa ca kulongesa baje bakasanguka ku batsi bya Bumwene bwa Njambi na kubakwasa bazibuke cizango cendi. Bika twendekela ngoco? Mwafwa banu babangi bakasanguka ku batsi bakapwa baje bainendeka Mbimbiliya ngwayo ‘banu bababi.’ (Tandeni Vilinga 24:15.) Banapande kukatengulula futisi yabo mangana bakalikuwe bibezikiso bije bikaija mwafwa ya ñombelo ya Kilistu. Acisinganyekeni cipangi ca kulongesa banu babangi-bangi baje kubazibuka bya Yehova. Munu na munu bakamulongesa ngwe mutukatwamenena cilongesa ca Mbimbiliya ndi? Kukakala bikungulukilo muje mubakabalongesela baje bakalibanga kusanguka mangana bakalongese baje bakasanguka munima yabo ndi? Kutuzibuka mwamubwa. Tuzibuka lika ngwetu muikahwa Myaka 1,000 ya Kayula Kilisitu, ‘lifuti likashula na mana a kuzibuka Yehova.’ (Isaya 11:9) Tukakala na bipangi byabingi byabibwa mu myaka 1,000.
7. Mwafwa bika banu ba Njambi bakazibila ngozi baje bakasanguka ku batsi?
7 Banu ba Yehova boshe bakatwalelelaho kutengulula futisi yabo mu Myaka 1,000 ya Kuyula kwa Kilisitu mangana bakazibise Njambi kubwaha. Banu ba Yehova bakazibila ngozi baje bakasanguka ku batsi mangana bakabakwase kutengulula futisi yabo na kwononoka mashiko a Yehova. (1 Petu 3:8) Co baje bakasanguka ku batsi, bakazema manene banu ba Yehova baje ‘bakakakateya mu bipangi bya kwoboka kwabo.’—Fili 2:12.
TUKAZIBUKA BANU BATWAZEMA MUBAKASANGUKA NDI?
8. Bika twendekela ngwetu baje bakatambula banu bakasanguka, bakazibuka babushoko bwabo na babusamba babo?
8 Kuli byuma byabingi bitulingisa twendeke ngwetu baje bakatambula banu bakasanguka ku batsi, bakazibuka babushoko bwabo na babusamba babo. Cakumwenako, Yehova mwasangwilile banu ba kusañulu kumwesa ngwabo banu mubakasanguka, bakasholoka, kwendeka na kusinyeka ngwe mubakele na kulingila simbu kanda batse. Anukeni ngweni Yesu wesekesele kutsa ku kulala, co kusanguka wacesekesele ku kwinduka. (Mateo 9:18, 24; Yowa 11:11-13) Nga munu enduka, akendeka na kusholoka muje mwakele na kulingila simbu kanda alale, co akanuka byanakele na kulinga. Tusimutwiyeni hali Lazalu. Kwetile matangwa awana kutunda hatsililile, co mubila wendi washangumukile kubihya. Oloni Yesu mwamusangwile, bandokazi bendi bamuzibukile, co nendi wabanukile.—Yowa 11:38-44; 12:1, 2.
9. Mwafwa bika banu kubakasanguka na mibila na bisinganyeka bya kulumbunuka?
9 Yehova nakulahesa ngwendi naumo wahi akakala mu Bumwene bwa Kilistu “akalinyenga ha kubinja.” (Isaya 33:24; Loma 6:7) Ngeci, boshe baje bakasanguka ku batsi bakakala na mibila ya kulikangula. Oloni kubakapu bakulumbunuka oho bene. Mwafwa nga bakapwa bakulumbunuka, co babushoko bwabo na babusamba babo kubasa kukabazibuka. Cisholoka ngwe banu bakapwa ba kulumbunuka kamandondo–kamandondo mu Myaka 1000 yakayula Kilistu. Muikahwa myaka 1000, Yesu akelwisa Bumwene kuli Ishe. Ha simbu oyo, Bumwene bukashulisilila biyongola bya Yehova, kwambateselela na kukwasa banu bapwe ba kulumbunuka.—1 Koli 15:24-28; Kujo 20:1-3.
KUSANGUKA KWA BATSI, KUKATULINGISA BATI TUKAPWE BA KUBWAHELELA?
10. Mukaliziba bati mumukamona babushoko bweni na babusamba beni basanguka?
10 Acisinganyekeni mumukalizibila mumukatambula babushoko bweni na babusamba beni baje banatsi. Hamo mukalila nambe kujolela mwafwa ya Kubwahelela. Nambe hamo mukembila Yehova myaso ya kumushangazala mwafwa ya kubwahelela. Mukazema manene Tate yetu wa cizemo na Munendi ha kusangula babushoko bweni na babusamba beni.
11. Kwesekesa na majwi a Yesu aje ali ku Yowano 5:28, 29, byuma muka bibakalikuwa baje bakononoka mashiko a Njambi?
11 Baje bakasanguka ku batsi nabo bakabwahelela mubakashulula bunu bwabo bwalaja na kuyoya mu kulitombola na mashiko a Njambi. Baje bakononoka mashiko a Njambi, bakayoya myaka yoshe mu Paladaisi. Oloni baje kubakononoka mashiko a Njambi, kubakayoyo mu Paladaisi mwafwa bakonowesa bakwabo kuyoya mu kwoloka.—Isaya 65:20; tandeni Yowano 5:28, 29.
12. Yehova akabezikisa bati banu boshe baje bakakala hano hasi?
12 Mu Bumwene bwa Njambi, banu bendi boshe bakalimwena busunga bwa majwi ali ku mukanda wa Visimo 10:22, NWT. Mukanda ngwawo: ‘Cibezikiso ca Yehova cikeco cifukisa, co kesi kubwezelelako tuyando.’ Sipilitu ya Yehova ikakwasa banu bendi bakafuke ku sipilitu nambe ngwetu bakatembwinine Kilistu mu kushula na kupwa ba kulumbunuka. (Yowa 13:15-17; Efeso 4:23, 24) Ha litangwa na litangwa, mibila yabo ikapwa ya kulikangula. Banu bakayoya mu kubwahelela. (Yombi 33:25) Kusinganyekesesa ha kusanguka kwa batsi kumikwasa bati ha simbu ino?
KUSANGUKA KWA BATSI KUMWESA BATI CIZEMO CA YEHOVA?
13. Kwesekesa na mukanda wa Myaso 139:1-4, kusanguka kwa batsi kukamwesa bati ngwabo Yehova atuzibuka mwamubwa?
13 Ngwe mutunendekela, Yehova akasangula banu na cashu ca kwanuka byuma bibakele na kulinga, co lalo bakasholoka ngwe mubakele na kusholokela. Oku kulumbununa bika? Kulumbununa ngwabo Yehova wamizema manene, co kasa kwibala bimukasinganyeka, mumukalizibila, bimukendeka na byuma bimukalingi. Ngeci, mwakamisangula akamyana cashu ca kwanuka byuma na kumona byuma mumwakele na kubimwena na kulinga byuma mumwakele na kubilingila. Mwene Ndabiti wazibukile ngwendi Yehova waka mbunge umo na umo wetu. (Tandeni Myaso 139:1-4.) Kuzibuka ngwetu Yehova atuzibuka mwamubwa kutulingisa tulizibe bati?
14. Kusinganyekesesa mwatuzibukila Yehova kutukwasa bati?
14 Kutwapandele kulishoshomwena mwafwa ya kuzibuka ngwetu Yehova atuzibuka mwamubwa. Mwafwa bika? Anukeni ngweni Yehova watwaka mbunge. Wamona umo na umo wetu kupwa wa seho. Azibuka byuma byoshe bitunaliwana nabyo mu kuyoya kwetu. Kuzibuka ngoco kutuzembeleka. Ngeci, kutwapandele kuliziba ngwetu tuli likalyetu. Yehova ali netu simbu yoshe, co ashaka kutukwasa.—2 Mizi 16:9.
KUSANGUKA KWA BATSI KUMWESA BATI MANA A YEHOVA?
15. Lilabelelo lya kusanguka limwesa bati ngwabo Yehova wakala na mana?
15 Kutewa kutsa kwasa kutulingisa byuma bya kuhenga. Satana akapangesa banu bamo bajujwise bakwabo ngwabo batsa mangana batengulukile babusamba babo nambe kulinga byuma bibazibuka ngwabo byabibi. Oloni yetu kututewe kutsa, co kubasa kutujujwisa. Tuzibuka ngwetu nga bitozi betu batutsiya, Yehova akatusangula. (Kujo 2:10) Twakulahela ngwetu byahi bibasa kulinga bije byasa kutwonowesa kupangela Yehova. (Loma 8:35-39) Yehova namwesa ngwendi wakala na mana ha kutwana lilabelelo lya kusanguka. Eli lilabelelo litukwasa tujeneke kutewa nga banu ba Satana batujujwisa ngwabo batutsiya nga kutulingi bibashaka. Co lalo litukwasa tusimpe na kutwalelelaho kupwa ba kulongwa kuli Yehova.
Kuma byuma bitwangula kulinga bimwesa ngwabyo twakulahela ngwetu Yehova atwana byuma bya ku mubila bitutonda ndi? (Taleni palagilafu 16) *
16. Bihula muka bimunapande kulihula, co bikumbulo byeni bimikwasa bati muzibuke mumwakulahelela Yehova?
16 Nga bitozi ba Yehova bamijujwisa ngwabo bamitsiya, kuma mukulahela ngweni Yehova akamisangula ndi? Mwasa kuzibuka bati ngweni mukakulahela Yehova ha simbu oyo? Lihuleni ngweni, ‘Kuma byuma byabindondo binjikangula kulinga ha litangwa na litangwa, bikamwesa ngwabyo njakulahela Yehova ndi?’ (Luka 16:10) Lihuleni lalo ngweni, ‘Kuma yoyesi yange imwesa ngwayo njakulahela ngwange nga njitwameka bya Bumwene, co Yehova asa kunjana byuma bya kumubila binjitonda ndi?’ (Mateo 6:31-33) Nga mwakumbulula ebi bihula bibali ngweni eyo, co zibukeni ngweni mwakulahela Yehova, co lalo mwalibwahesela kukolesa mu ceseko coshe-coshe cimuliwana naco.—Visi 3:5, 6.
KUSANGUKA KWA BATSI KUMWESA BATI NGWABO YEHOVA WAKALA NA MBUNGE YA KUBANDAMENA?
17. (a) Kusanguka kwa batsi kumwesa bati ngwabo Yehova wakala na mbunge ya kubandamena? (b) Twasa kumwesa bati kukandelela kuli Yehova ha kukala na mbunge ya kubandamena?
17 Yehova nangula laja litangwa na simbu ya kunyongesa kano kaye kakabi. (Mateo 24:36) Atwalelelaho kukala na mbunge ya kubandamena, co kanyongesa kano kaye simbu kanda litangwa lyanangula lyete. Nashungwiya manene kusangula batsi. (Yombi 14:14, 15) Oloni nabandamena simbu inapande. (Yowa 5:28) Kuli byuma byabingi bitulingisa tukandelele kuli Yehova uje wakala na mbunge ya kubandamena. Yehova natwana simbu yaingi ya ‘kutenguluka na kutunda ku bubi’ mwafwa ali na mbunge ya kubandamena. (2 Petu 3:9) Ashaka banu babangi bakayoye myaka yoshe. Tumwesa bati ngwetu tuli na kukandelela kuli Yehova ha kukala na mbunge ya kubandamena? Twasa kulinga ngoco nga tupanga na nzili cipangi ca kushakazeka banu “baje ba bimbunge byabibwa bya kushaka kuyoya myaka yoshe” na kubakwasa bazeme Yehova na kumupangela. (Vili 13:48, NWT) Nga tulinga ngoco, co tubakwasa batenguluke na kukoboka.
18. Mwafwa bika tunapande kukala na mbunge ya kubandamena omwo tupangela hamo na bakwetu?
18 Yehova kabandamena ngwendi tulinge byuma mu kulumbunuka oku kanda twete kumaneselelo a myaka 1000. Ali na kutukonekela mwafwa azibuka ngwendi kanda tulumbunuke. Ngeci, netu tunapande kwaka mbunge ku byuma byabibwa bibalinga bakwetu na kubakonekela. Tusimutwiyeniko hali ndokazi umo. Munalume wendi wakele na bishoti byabingi, co walikelele kukunguluka. Ou ndokazi wendekele ngwendi: “Obu bukalu bwanjizibisile manene kubabala ku mbunge. Buyoye bwetu bwatengulukile, co kutwasele kulinga byuma bitwatondele kulinga.” Oloni ou ndokazi wazemene manene munalume wendi, co watwaleleleho kukala na mbunge ya kubandamena. Wakulahelele Yehova, co wakolesele. Wakele mana ku bifwa byabibwa bya munalume wendi ngwe mwakalingila Yehova. Wendekele ngwendi: “Munalume wange wakala na bifwa byabibwa, co ali na kulinga mwoshe mwasela mangana ahyane bishoti byendi.” Netu tunapande kukala na mbunge ya kubandamena omwo baka-naanga yetu nambe bandolome na bandokazi betu mu cikungulukilo bali na kulinga mwoshe mubasela kuhyana byeseko bibali na kuliwana nabyo.
19. Byuma muka bitunapande kulyangwila kulinga?
19 Yesu na Tungelo babwahelelele omwo Yehova watangele kaye. Co bakabwahelela manene mubakamona kaye kanashulu banu ba kulumbunuka, baje bazema Yehova na kumupangela. Baje bakayula na Yesu mwilu nabo bakabwahelela mubakamona bipangi byabo mubikakwasela banu hano hasi. (Kujo 4:4, 9-11; 5:9, 10) Singanyekeni mukukazibikila kuyoya mu lifuti mwakujeneka kubinja, kuziba busiwa nambe kutsa. (Kujo 21:4) Ha simbu ino, lyangwileni kulinga mwoshe mumwasela kutembwinina Ishweni wa mwilu ha kukala na cizemo, mana na mbunge ya kubandamena. Nga mulinga ngoco, co mupwa ba kubwahelela nameme muliwana na byeseko. (Yako 1:2-4) Twakandelela manene kuli Yehova uje na tukulahesa ngwendi ‘banu bakasanguka ku batsi.’—Vili 24:15.
MWASO 141 Bupilo Bwamakaza
^ par. 5 Yehova wapwa Tate yetu wa cizemo na mana, co lalo wakala na mbunge ya kubandamena. Byuma byoshe byanatanga na lilabelelo lya kusanguka kwa batsi lituli nalyo, bimwesa ngwabyo Njambi wakala nebi bifwa. Cino cilongesa, cikumbulula bihula bimo bitunasa kulihula ha kusanguka kwa batsi. Citukwasa lalo tumone omwo kusanguka kwa batsi kumwesela ngwabo Yehova wakala na cizemo, mana na mbunge ya kubandamena.
^ par. 59 KULUMBUNUNA CIKUPULO: Munalume umo wa ku America uje nakala mu cihilo ha myaka yaingi nasanguka mu Myaka 1000 yakayula Yesu. Ndolome uje noboka ha nzita ya Alamagidoni ali na kulongesa uje munalume byanapande kulinga mangana awane bukwasi ku ñombelo ya Kilistu.
^ par. 61 KULUMBUNUNA CIKUPULO: Ndolome aleka mukulunu wa bipangi ngwendi matangwa amo mu calumingo napande kulembuka bene ha simbu ibakalembuka. Amuleka ngwendi awa matangwa mangwezi, akalingi bipangi bya ku sipilitu. Oloni nga bamulomba kupanga ha matangwa eka, co asa kulinga ngoco nameme munima ya simbu ya kulembuka.
