CILONGESA 34
Munapu ba Seho Manene mu Cikungulukilo ca Yehova
‘Kilistu wapwa ngwe mubila umo, uje uli na bilyo byabingi, nameme banaupanga mu bilyo byabingi, oloni anga bene mubila umo.’—1 KOLI 12:12.
MWASO 101 Kusebeza Hamoho Mwa Buñwi
BILI MUNO MU CILONGESA *
1. Mwafwa bika tunapu ba kubezika?
TUNABEZIKA manene kukala mu cikungulukilo ca Yehova. Tuli mu paladaisi ya ku sipilitu muje mutuli na kuyoya mu kwoloka, oku tunabwahelela omwo tupangela hamo na bandolome na bandokazi betu. Cipangi muka cimuli naco mu cikungulukilo?
2. Cakumwenako muka capangesele kapositolo Paulu mu mikanda yendi imo ije ili mu Mbimbiliya?
2 Tulilongesa byabingi ha cipangi cituli naco mu cikungulukilo ku cakumwenako capangesele kapositolo Paulu mu mikanda yendi imo yasonekele. Omu mu mikanda yoshe, Paulu wesekesele cikungulukilo ku mubila wa munu. Co wesekesele banu bali mu cikungulukilo ku bilyo bya mubila.—Loma 12:4-8; 1 Koli 12:12-27; Efeso 4:16.
3. Byuma muka bitatu bitusimutwiya muno mu cilongesa?
3 Tubaboshe twapwa tubaseho mu cikungulukilo ca Yehova mwafwa twasa kukanyamesa cikungulukilo. Twatunda ku bisemwa na miyati ya kuliseza-seza, tukendeka bindaka bya kuliseza-seza, bamo bakufuka, bamo tuhutu, bamo banalilongesa, co bamo kubalilongesele. Nameme ngoco, tubaboshe twapwa tubaseho mu cikungulukilo. Muno mu cilongesa, tusimutwiya byuma bitatu bitulilongesa ku cakumwenako capangesele Paulu. Ca kulibanga, tuzibuka bitwapwila ba seho mu cikungulukilo ca Yehova. Ca mu cibali, tumona bitunapande kulinga nga tuliziba ngwetu kutwesi na seho mu cikungulukilo. Co ca mu citatu, tumona bitunapande kwakela mbunge ku kupanga cipangi cibanatwana mu cikungulukilo.
UMO NA UMO WETU ALI NA CIPANGI MU CIKUNGULUKILO CA YEHOVA
4. Bika bitulilongesa ku mukanda wa Loma 12:4, 5?
4 Ca kulibanga, cakumwenako capangesele Paulu cimwesa ngwaco umo na umo wetu wapwa wa seho mu naanga ya Yehova. Paulu wendekele ngwendi: “Omwo tuli na bilyo byabingi mu mubila umolika, co cimo na cimo cili na bipangi byaco. Mu ngila eyi bene, nambe tunapu tubabangi, tunapu mubila umolika muli Kilistu, co yetu boshe banatunungila kuli umo na mukwabo ngwe kulyangunuka kwa bilyo bya mubila umolika.” (Loma 12:4, 5) Bika byalumbunwine Paulu? Walumbunwine ngwendi umo na umo wetu ali na cipangi ca kuliseza neci ca mukwabo mu cikungulukilo, oloni tubaboshe twapwa tubaseho.
Tukapanga bipangi byakuliseza-seza mu cikungulukilo, oloni tubaboshe twapwa tubaseho (Taleni palagilafu 5-12) *
5. “Bwana” muka bwanana Yehova ku cikungulukilo?
5 Kakangi tukasinganyeka ngwetu baje bali na kutwamenena bakebo lika bali na bipangi mu cikungulukilo. (1 Tesa 5:12; Heve 13:17) Yehova, kwitila muli Kilistu nana cikungulukilo banu baje banapu “bwana”. (Efeso 4:8) Aba banu banapu ba mu Cibunga ca Kutwamenena, ba mu Komiti ya Munango, tunyungi ba kuzenguluka, baka-kulongesa ku masikola a bumwene, bakulunu mu cikungulukilo na baka-kupangela. Sipilitu ya kujela ikeyo inangula aba bandolome boshe mangana banyunge na kukanyamesa bimanga baYehova baje bazema.—1 Petu 5:2, 3.
6. Kwesekesa na 1 Tesalonika 2:6-8, bika bibakalingi bandolome baikangula sipilitu ya kujela?
6 Sipilitu ya kujela ikeyo ikangula bandolome mangana bapange bipangi bya kuliseza-seza. Aba bandolome bakakwasa cikungulukilo ngwe bilyo bya mubila byakufwa ngwe mendi na maboko mubikakwasela mubila. Kubesi kupanga mangana bakwabo babashangale. Oloni bakalingi ngoco mangana bakanyamese na kutakamesa bandolome na bandokazi babo. (Tandeni 1 Tesalonika 2:6-8.) Tukandelela manene kuli Yehova ha kutwana aba bandolome bakuhya ku sipilitu baje bashaka kupangela bakwabo.
7. Bibezikiso muka bibali na kulikuwa baje bali mu cipangi ca simbu yoshe?
7 Bandolome na bandokazi bamo mu cikungulukilo banasa kubangula kupwa bamishinali, bapainiya ba kulitila nambe bapainiya ba simbu yoshe. Bandolome na bandokazi babangi mu kaye koshe banalyangwila kupanga cipangi ca kwambulula na kupwisa banu bandongesi mu kuyoya kwabo kwoshe. Co banakwasa banu babangi bapwe bandongesi ba Kilistu Yesu. Nameme bwingi bwabo kubesi na byuma byabingi bya ku mubila, oloni Yehova nababezikisa manene. (Mako 10:29, 30) Twazema manene aba bandolome na bandokazi betu, co twabezika manene kukala nabo mu cikungulukilo.
8. Bika twendekela ngwetu muka-kwambulula woshe wapwa wa seho kuli Yehova?
8 Kuma bandolome babanangula na baje bali mu cipangi ca simbu yoshe bakebo lika bapwa ba seho mu cikungulukilo ndi? Embwe. Muka-kwambulula woshe wapwa wa seho kuli Njambi na ku cikungulukilo. (Loma 10:15; 1 Koli 3:6-9) Bika twendekela ngoco? Twendeka ngoco mwafwa cipangi ca kupwisa banu bandongesi ba Mwene yetu Yesu Kilistu naco capwa cipangi ca seho manene mu cikungulukilo. (Mateo 28:19, 20; 1 Tima 2:4) Co boshe baje bali na kulikwatasana na cikungulukilo, baka-kwambulula ba kumbwitika na baje ba kujeneka kumbwitika, bamona eci cipangi kupwa ca seho manene mu kuyoya kwabo.—Mateo 24:14.
9. Mwafwa bika bandokazi bapwa ba seho?
9 Yehova akasingimika bandokazi mu cikungulukilo. Wamona banakazi boshe, baje banashomboka, bisemi, bifwile na bazike kupwa ba seho kuli ikeye mwafwa bali na kumupangela mu kulongwa. Mbimbiliya inatumbula banakazi babangi baje bazibisile Njambi kubwaha. Banabashangala mwafwa bakele na bifwa byabibwa byakufwa ngwe mana, likulahelo, ntwima, kusimpa na kwana, co lalo bakele na kupanga bipangi byabibwa. (Luka 8:2, 3; Vili 16:14, 15; Loma 16:3, 6; Fili 4:3; Heve 11:11, 31, 35) Twakandelela manene kuli Yehova ha kutwana bandokazi baje bali nebi bifwa byabibwa mu bikungulukilo byetu.
10. Mwafwa bika tukulukazi bapwa ba seho?
10 Twabezika lalo kukala na tukulukazi babangi mu cikungulukilo. Mu bikungulukilo byabingi, muli bandolome na bandokazi ba tukulukazi baje banapangela Yehova mu kuyoya kwabo kwoshe. Tukulukazi bamo banalilongesa busunga hano bene. Oloni boshe banasa kulifwita na mishongo ya kuliseza-seza ije ikaija mwafwa ya kukulubala. Eyi mishongo, inasa kubonowesa kulinga byabingi mu cikungulukilo na mu cipangi ca kwambulula. Oloni bali na kulinga mwoshe mubasela kwambulula na kupangesa nzili ibali nayo mu kushongeya bakwabo na kubalongesa bipangi. Co tukalilongesa byabingi ku byuma bibanaliwana nabyo mu kuyoya kwabo. Ngeci, banapu ba seho kuli Yehova na kuli yetu.—Visi 16:31.
11-12. Banike ba mu cikungulukilo ceni banamikanyamesa bati?
11 Banike nabo bapwa ba seho. Banike bali na kuliwana na byeseko byabingi omwo bali na kukolela muno mu kaye ka Satana Liyabolo, muje muli bilongesa byabibi. (1 Yowa 5:19) Oloni tukakanyama mutukamono banike oku bakumbulula ku biwano, kuya mu lihya na kwimanena likulahelo lyabo mu kusimpa. Cili bene, yeni banike, mwapwa mu ba seho mu cikungulukilo ca Yehova.—Myaso 8:2.
12 Bandolome na bandokazi betu bamo kubesi na kuliziba ngwabo bapwa ba seho mu cikungulukilo. Bika byasa kukwasa umo na umo wetu alizibe ngwendi wapwa wa seho mu cikungulukilo? Tusimutwiyeni ha byuma bije byasa kutukwasa.
ZIBUKENI NGWENI MU BA SEHO MU CIKUNGULUKILO
13-14. Bika byasa kulingisa bamo balizibe ngwabo kubesi na seho mu cikungulukilo?
13 Tumoneni cuma ca mu cibali citulilongesa ku cakumwenako ca Paulu. Paulu wendekele ha bukalu bubali na kuliwana nabwo banu babangi ano matangwa. Bandolome na bandokazi babangi, kuli na kubakaluwila kukulahela ngwabo bapwa ba seho mu cikungulukilo. Paulu wendekele ngwendi: “Nga lindi lyendeka ngwalyo ‘Yange keti nji liboko, kunjakundamene ku mubila,’ eci keti cikeco cikalibindika ngeci keti lipwe cilyo ca mubila. Co nga litwi lyendeka ngwalyo ‘Yange keti nji lisho, kunjakundamene ku mubila,’ eci keti cikeco cikalibindika ngeci keti lipwe cilyo ca mubila.” (1 Koli 12:15, 16) Paulu walumbunwine bika?
14 Nga tulyesekesa ku bakwetu mu cikungulukilo, co kutwasa kulimona kupwa ba seho. Bandolome na bandokazi bamo mu cikungulukilo banasa kukala na cashu ca kulongesa, kubwahesa mwamubwa byuma na kuzembeleka bakwabo na kubatakamesa. Hamo mukalizibi ngweni kumwasa kupanga ebi bipangi ngwe mubakabilingila bakebo. Nga mukalizibi ngoco, co mubakulikehesa. (Fili 2:3) Oloni munapande kunyanyama. Nga simbu yoshe mulyesekesa-esekesa na baje bali na cashu, co mwasa kuzeya. Mwasa kuliziba ngweni keti mu ba seho mu cikungulukilo ngwe mwendekelele Paulu. Bika byasa kumikwasa muhyane bisinganyeka bya cifwa eci?
15. Kwesekesa na 1 Kolinte 12:4-11, bika bitunapande kuzibuka ha mabwana atuli nawo?
15 Yehova wanene baka-Kilistu ba mu simbu ya tupositolo mabwana a sipilitu ya kujela, oloni kubatambwile bwana bwakulifwa. (Tandeni 1 Kolinte 12:4-11.) Yehova wabanene mabwana a kuliseza-seza na cashu ca kuliseza-seza, oloni boshe bapwile ba seho. Yetu kutwesi na mabwana a sipilitu. Oloni cinangulo cinatako casa kutukwasa. Tunapande kwanuka ngwetu, nameme kutwesi na cashu ca kulifwa, tubaboshe twapwa tubaseho kuli Yehova.
16. Cinangulo muka catwanene kapositolo Paulu citunapande kukabangeya?
16 Kutwapandele kulyesekesa ku bakwetu baka-Kilistu, oloni tunapande kukabangeya cinangulo catwanene kapositolo Paulu. Wasonekele ngwendi: ‘Umo na umo elule bilinga byendi babenya. Nga bikeyo binapu byabibwa, asinoni abwahelele ha bije byanalingi kujeneka kubisetekesa na bije byanalingi mukwabo.’—Ngala 6:4.
17. Bubwa muka butundamo nga tukabangeya cinangulo ca Paulu?
17 Nga tukabangeya cinangulo ca Paulu na kwilula bilinga byetu, tuwana ngwetu bakwetu kubesi na bwana butuli nabwo na cashu cituli naco. Cakumwenako, hamo mukulunu kesi na cashu ca kulongesa mwamubwa ha butenda, oloni hamo akalingi mwamubwa cipangi ca kupwisa banu bandongesi. Indi hamo kesi na cashu ca kubwahesa mwamubwa byuma, oloni hamo wakala manene na ngozi na cizemo, co bandolome na bandokazi bakazituka kumulomba ngwabo abanangule. Nambe hamo akatambula bangenzi mwamubwa. (Heve 13:2, 16) Nga tunanguka bwana bwetu nambe cashu cetu, co tubwahelela mwafwa tuliziba ngwetu tuli na kulingako bimo mu cikungulukilo. Co lalo, kutuzibila bandolome betu cipululu mwafwa ya kukala na bwana bweka.
18. Twasa kubwezelela bati ku butongwe bwetu?
18 Tubaboshe tunapande kubwezelela ku butongwe bwetu mu cipangi coshe-coshe cituli naco mu cikungulukilo. Yehova ali na kupangesa munga yendi mu kutulongesa kubwezelela ku butongwe bwetu. Cakumwenako, ku biwano byetu bya mukati ka calumingo, tukalilongesa mutwasa kwetela ku bimbunge bya banu omwo twambulula. Kuma mukapangesa bitukalilongesa oku ku biwano ndi?
19. Mwasa bati kushulisilila cilengo ca kukakobela Sikola ya Baka-kwambulula bya Bumwene?
19 Ngila ikwabo yakatulongeselamo inapu Sikola ya Baka-kwambulula bya Bumwene. Baje bali mu cipangi ca simbu yoshe, co lalo bali na myaka 23 kutwala 65 bakebo banapande kukakobela eyi sikola. Hamo munasa kuliziba ngweni kumwasa kukakobela eyi sikola. Co hamo munasa kusoneka byuma bimusinganyeka ngweni bikebyo bimyonowesa. Oloni sonekeni byuma bimilingisa mushake kukakobela eyi sikola. Co nonekeni byuma bimunapande kulinga mangana mupwisemo byuma bitondeka. Nga mupanga na nzili, co Yehova amikwasa kulinga byuma bimwasinganyekele ngweni kumwasa kubilinga.
PANGESENI BWANA BWENI MU KUTAKAMESA CIKUNGULUKILO
20. Bika bitulilongesa ku mukanda wa Loma 12:6-8?
20 Cuma ca mu citatu citulilongesa ku cakumwenako ca Paulu, tuciwana ku mukanda wa Loma 12:6-8 (Tandeni.) Oku ku mukanda, Paulu namwesa lalo ngwendi baje bali mu cikungulukilo bali na bwana bwa kuliseza-seza. Oloni nendekako ngwendi tunapande kupangesa bwana bwetu mu kutakamesa na kukanyamesa cikungulukilo.
21-22. Bika bitulilongesa kuli Robert na Felice?
21 Tusimutwiyeni hali ndolome wa lizina lya Robert. * Ou ndolome wakapangelele mu lifuti lyeka. Kutundoho bamutumine kukapangela ha Mbetele ya mu lifuti lyabo. Nameme bamulekele ngwabo na cimo cahi cabiisile, wendekele ngwendi: “Njazeyele ha bingonde byabingi, mwafwa njalizibile ngwange njonwene cipangi cibanjanene. Bisimbu bimo njashakele kulikela kupangela ha Mbetele.” Bika byamukwasele lalo akolese? Mukulunu umo wamulekele ngwendi Yehova watwanene bipangi bimo kunima mangana atulongese mutunapande kupangela bipangi byanatwana ha simbu ino. Robert wanangukile ngwendi kapandele kwaka mana ku byuma byalingile kunima, oloni napande kwaka mana ku byuma byanapande kulinga ha simbu ino.
22 Ndolome Felice Episcopo nendi waliwanene na bukalu bwakulifwa. Ikeye na munakazi wendi bakobelele sikola ya Ngilyande mu 1956, co bakapangele cipangi ca kuzenguluka mu Bolivia. Mu 1964, bakele na mwana wa munalume. Felice ngwendi: “Kwatukaluwilile kuseza cipangi citwazemene manene. Njamanesele mwaka oku njiciliziba kuzeya. Oloni Yehova wanjikwasele, co njatengulwile biyongola byange na kutwalelelaho kupanga cipangi cange caciha ca kupwa cisemi.” Neni mukalizibi ngwe Robert na Felice ndi? Mukalizibi kuzeya mwafwa kumwesi na kupanga bipangi bimwakele na kupanga kunima ndi? Nga mukemwo, co mupwa ba kubwahelela nga mwaka mbunge ku byuma bimwasa kulinga ha simbu ino mangana mupangele Yehova na kupangela bandolome beni. Pangeseni bwana bweni na cashu ceni mu mukwasa bakweni. Nga mulinga ngoco, co mupwa ba kubwahelela, co lalo mukanyamesa cikungulukilo.
23. Bika bitunapande kulinga, co bika bitusimutwiya mu cilongesa cinatako?
23 Tubaboshe twapwa tubaseho kuli Yehova. Ashaka ngwendi tukale mu naanga yendi. Tunapande kuwana bingila mutwasa kutakameselamo bandolome na bandokazi betu. Nga tulinga ngoco, co kutulizibi ngwetu tubangoco. Oloni tukamono bati bakwetu mu cikungulukilo? Twasa kumwesa bati ngwetu twabazema na kubasingimika? Eyi ñanda tuisimutwiya mu cilongesa cinatako.
MWASO 24 Hamutahe Kwa Lilundu la Jehova
^ par. 5 Tubaboshe, tushaka kupwa ba seho kuli Yehova. Oloni bisimbu bimo, tukalizibi ngwetu tubangoco. Cino cilongesa, citukwasa tuzibuke ngwetu tubaboshe twapwa tubaseho mu cikungulukilo.
^ par. 21 Mazina amo banawatengulula.
^ par. 62 KULUMBUNUNA BIKUPULO: Ebi bikupulo bitatu, bimwesa byuma bikalingiwa simbu kanda biwano bishangumuke, ha simbu ya biwano na munima yabyo. Cikupulo 1: Mukulunu ali na kukandelela mungenzi na nzanzu. Ndolome wa mwanike ali na kubwahesa cilumo, co ndokazi wa mumbanda ali na kusimutwiya na ndokazi wa kakulukazi. Cikupulo 2: Bakulunu na banike bashaka kukumbulula mu cilongesa ca Kaposhi ka Kukengela. Cikupulo 3: Ndolome na munakazi wendi bali na kujelesa mu Njubo ya Bumwene. Ndokazi ali na kukwasa munendi kwaka mulambu mu cikasha ca milambu. Ndolome wa mwanike ali na kutala bya mabulu, co ndolome mukwabo ali na kutakamesa ndokazi wa kakulukazi.
