1-2. Bika bitusimutwiya muno mu cilongesa?

MWASA kuliziba bati nga cuma cimo cimunabandamena kucete ha simbu imucitonda? Kuma muzeya ndi? Mukanda wa Visimo 13:12, NWT ngwawo: “Cuma canabandamena munu nga cikotokela, co aziba kubabala ku mbunge.” Oloni mulinga bati nga muzibuka byuma binalingisa oco cuma cikotokele? Hamo mubandamena.

² Muno mu cilongesa, tusimutwiya ha binangulo bya mu Mbimbiliya bije bitukwasa tutwaleleleho kukala na mbunge ya ‘kubandamena.’ (Mika 7:7) Tusimutwiya lalo ha bingila bibali mutwasa kumwesela ngwetu tuli na mbunge ya kubandamena. Kutundaho, tusimutwiya ha bibezikiso bibakalikuwa baje batwalelelaho kubandamena kuli Yehova.

3. Bika bitulilongesa ku mukanda wa Visimo 13:11?

³ Cinangulo cili ku mukanda wa Visimo 13:11 citukwasa tukale na mbunge ya kubandamena. Ou mukanda ngwawo: ‘Bufuko bwa kuwana bwasi-bwasi bukahu, oloni uje abuwana kamandondo-kamandondo akala nabwo bwabungi.’ Ou mukanda utulongesa bika? Baka-mana bakalingi byuma kamandondo-kamandondo, co kuli bubwa bukatundu mu kulinga ngoco.

4. Bika bitulilongesa ku mukanda wa Visimo 4:18?

⁴ Mukanda wa Visimo 4:18 ngwawo: “Ngila ibakende baka-busunga inapu ngwe kutuhuka kwa litangwa lije litwa ceke noho linalondo njamba.” Eyi vesi itulongesa ngwayo Yehova akakwasa banu bendi bazibisise biyongola byendi kamandondo-kamandondo.  Oloni eyi vesi imwesa lalo mwakakolela muka-Kilistu ku sipilitu. Munu akakolo ku sipilitu kamandondo-kamandondo. Nga tupangesa binangulo bya mu munga ya Njambi na mu Lijwi lyendi, co tushangumuka kukala na bifwa byakala nabyo Kilistu kamandondo-kamandondo. Co lalo tuzibuka mwamubwa Njambi. Tusimutwiyeni ha cakumwenako capangesele Yesu cije citukwasa kuzibisisa mwamubwa eyi simpi.

5. Yesu wapangesele cakumwenako muka mangana amwese ngwendi munu akakolo ku sipilitu kamandondo-kamandondo?

⁵ Yesu wesekesele muzimbu wa Bumwene ku mbuto yaindondo ije ikola kamandondo-kamandondo mu bimbunge bya banu baje batambula muzimbu waubwa. Wendekele ngwendi: “Co bimbuto bije byakunine byamenene na kukola. Oloni uje munu kazibukile mubyakolelele. Libu likelyo lyakolesele bimbuto na kwima bushuka. Ha kulibanga kwamenene cishati, asinoni mutwe, co ha kukotoka mutwe wakele na binona.” (Mako 4:27, 28) Bika byalumbunwine Yesu? Walumbunwine ngwendi munu uje atambula muzimbu waubwa akola ku sipilitu kamandondo-kamandondo ngwe mubikakolela bimbuto. Cakumwenako, banu batukalilongesa nabo Mbimbiliya mubakashangumuka kukanyamesa busamba bwabo na Yehova, bakatengululako byuma bimo mu kuyoya. (Efeso 4:22-24) Oloni tunapande kwanuka ngwetu Yehova ikeye akakolesa bimbuto.—1 Koli 3:7.

6-7. Bika bitulilongesa ku ngila yatangelelemo Yehova kaye?

⁶ Yehova akapanga byuma byoshe kwesekesa na simbu itondeka mangana abimanese nambe byambate simbu yailaha nambe yaihi. Akalingi ngoco mangana anene bumpau ku lizina lyendi na kukwasa bakwabo. Cakumwenako, Yehova wabwahesele kaye kamandondo-kamandondo mangana banu bayoyeho.

⁷ Mbimbiliya inamwesa ngwayo Yehova “wayongwele seteko ya kaye,” wemikile “bimanda bije byakwata kaye” na kujala “limanya lya mu mbango ya kaye.” (Yombi 38:5, 6) Co lalo, wawaneneko simbu ya kusinganyekesesa  ha byuma byanatanga. (Kusha 1:10, 12) Tungelo balizibile bati omwo bamwene Yehova atanga kaye kamandondo-kamandondo? Babwahelelele manene. Ngeci, “batambekele na kujolela.” (Yombi 38:7) Bika bitulilongesako? Yehova watangele byuma ha myaka yaingi, oloni omwo wabilwile, wamwene ngwendi, “binabwaha manene.”—Kusha 1:31.

8. Bika bitusimutwiya?

⁸ Ngwe mutunamwena mu byakumwenako bitunasimutwiya, twasa kuwana binangulo byabingi bije bimwesa seho ya kukala na mbunge ya kubandamena. Tusimutwiyeni oni ha bingila bibali mutwasa kumwesela ngwetu tuli na mbunge ya kubandamena.

9. Simbu muka itunapande kumwesa ngwetu tuli na kubandamena kuli Yehova?

⁹ Tunapande kubandamena ngwetu Yehova akumbulule malombelo etu. Nga twalombo Yehova ngwetu atukwase kuhyana ceseko nambe kwecela kalingolingo kamo kakabi, oloni katukumbulula ha simbu itunasinganyekele, tunasa kuliziba ngwetu neshwala. Mwafwa bika Yehova kesi kukumbulula malombelo etu oshe bwasi-bwasi?

10. Mwafwa bika tunapande kukala na mbunge ya kubandamena omwo tulombela?

¹⁰ Yehova akatolilila mwamubwa ku malombelo etu. (Myaso 65:2) Mutukalombela kuli ikeye kutundilila kwisi ya mbunge akamono ngwendi twamukulahela. (Heve 11:6) Co lalo, Yehova washaka ngwendi nga tumulomba ngwetu atukwase kulinga byuma bije bimuzibisa kubwaha ku mbunge, tunapande kulifwita kulinga ngoco. (1 Yowa 3:22) Ngeci, nga tulomba Yehova ngwetu atukwase kwecela kalingolingo kamo kakabi, tunapande kulingako byuma bimo bitwasa bije bimwesa ngwabyo tushaka kukecela. Yesu wendekeleko byuma bimo bije bimwesa ngwabyo Yehova kesi kukumbulula malombelo etu oshe oho bene. Watunangwile ngwendi: “Lombeni, co mukatambula, seteleni, co mukawana, toteni, co bakamishokolwela. Omwo woshe alomba atambula, co woshe asetela awana, co woshe atota bakamushokolwela.” (Mateo 7:7, 8) Nga tutwalelelaho ‘kulombela’ ngwe mucimwesela eci cinangulo, co Tate yetu wa mwilu atolilila ku malombelo etu na kuwakumbulula.—Kolo 4:2.

11. Mukanda wa Vahevelu 4:16 ututakamesa bati nga tumona ngwetu Njambi neshwala kukumbulula lilombelo lyetu?

¹¹ Nameme kunasa kusholoka ngwe Yehova nakotokela kukumbulula lilombelo lyetu, oloni nakulahesa kukumbulula malombelo etu ha “simbu inapande.” (Tandeni Vahevelu 4:16, NWT.) Ngeci, kutwapandele kwana Yehova mulonga nga cuma cimo kucilingiwa ha simbu itunatondele ngwetu cilingiwe. Cakumwenako, banu babangi banatwalelelaho kulomba ngwabo Bumwene bwa Njambi bunyongese kano kaye kakabi ha myaka yaingi. Co Yesu nendi watulekele ngwendi tulombe Bumwene bwa Njambi. (Mateo 6:10) Oloni kutwapandele kuzeya nga kano kaye kukahu ha simbu itunasinganyekele. (Hamba 2:3; Mateo 24:44) Tunapande kutwalelelaho kubandamena kuli Yehova na kutwalelelaho kulombela kuli ikeye oku twakulahela ngwetu atukumbulula. Kano kaye kakahwa ha simbu inapande mwafwa Yehova nangula laja ‘litangwa na simbu’ yakakanyongesa. Co eyi ikapwa simbu yaibwa manene ku banu boshe.—Mateo 24:36; 2 Petu 3:15.

12. Simbu muka ikunasa kutukaluwila kukala na mbunge ya kubandamena?

¹² Tunapande kukala na mbunge ya kubandamena nga banatulingi mwamubi. Banu bamo bakalingi mwamubi banu ba bushwamwa bweka, baje bakendeka ndaka yeka, ba cisemwa  ceka nambe baje batunda ku lifuti lyeka. Bamo co bakabalingi mwamubi mwafwa ya buyanga nambe kujeneka kuswa. Banu ba Yehova babangi bali na kubalinga mwamubi mwafwa ya biñanda bya mu Mbimbiliya bibakulahela. Nga banu bamo batulinga mwamubi, tunapande kwanuka majwi a Yesu. Wendekele ngwendi: “Woshe uje akakateya [kweta] na kushongo akoboka.” (Mateo 24:13) Munapande kulinga bika nga muzibuka ngweni munu umo mu cikungulukilo nalingi bubi bwakama? Nga bakulunu banazibuka oyo ñanda, kuma mukwata mbunge na kukulahela ngweni baitala kwesekesa na binagulo bya Yehova ndi? Byuma muka bibakalingi bakulunu nga munu umo mu cikungulukilo nalingi bubi bwakama?

13. Yehova ashaka ngwendi bakulunu bakule bati biñanda?

¹³ Bakulunu mubakazibuka ngwabo munu umo mu cikungulukilo nalingi bubi bwakama, bakalombo Yehova abane “mana a kutunda mwilu” mangana bamone bubi bunalingiwa ngwe mwali na kubumwena ikeye. (Yako 3:17) Cilengo ca bakulunu cinapu kwolola “muka-bubi ku kupenga-penga kwendi.” (Yako 5:19, 20) Co lalo bakalingi mwoshe mubasela kunyungilila cikungulukilo na kuzembeleka baje babanazibisa kubabala ku bimbunge. (2 Koli 1:3, 4) Simbu kanda bakulunu batale ñanda ya munu uje nalingi bubi bwakama bakatondesesa bukaleho, co kulinga ngoco kunasa kwambata simbu yailaha. Kutundaho, bakalombela na kumunangula kupangesa Bisoneka na kumwolola mu ngila inapande. (Njele 30:11) Oloni bakulunu kubesi kukwata-kwata ku masinde, co lalo kubesi kuzambwila kwakula ñanda. Nga bakulunu bakabangeya binangulo bya mu Mbimbiliya omwo batala biñanda, co bakwasa manene bandolome na bandokazi mu cikungulukilo. Nameme bakulunu batale biñanda mu ngila eyi, baje bali na kuziba kubabala ku bimbunge mwafwa ya bubi bunalingiwa banasa kutwalelelaho kuliziba ngoco. Nga kuli bubi bumo bunalingiwa mu cikungulukilo buje buli na kumizibisa kubabala ku mbunge, byuma muka bimunapande kulinga bije byasa kumikwasa?

14. Cakumwenako muka ca mu Mbimbiliya casa kumikwasa mukolese nga mukweni muka-Kilistu namilingi mwamubi?

¹⁴ Kuma kuli ndolome nambe ndokazi nalingi cuma cije cinamizibisa manene kubabala ku mbunge ndi? Mu Lijwi lya Njambi muli byakumwenako byabibwa bije bimikwasa  muzibuke bimunapande kulinga omwo mubandamena ngweni Yehova amanese obu bukalu. Cakumwenako, nameme bandolome ba Yosefa bamulingile mwamubi, kabalubalelele. Oloni watwaleleleho kupangela Yehova, co Yehova wamubezikisile mwafwa ya kukala na mbunge ya kubandamena. (Kusha 39:21) Mu kwita kwa simbu, Yosefa wakonekelele bandolome bendi, co walimwenenene omwo Yehova wamubezikisililemo. (Kusha 45:5) Ngwe mwa Yosefa, nga tutwalelelaho kukanyamesa busamba bwetu na Yehova na kwaka bukalu bwetu mu maboko endi, co tutakama.—Myaso 7:17; 73:28.

15. Bika byakwasele ndokazi umo atwaleleleho kukwata mbunge omwo munu umo wamulingile mwamubi?

¹⁵ Kakangi banu kubesi kutulinga manene mwamubi ngwe mubalingile kuli Yosefa, oloni tubaboshe tukazibi manene kubabala ku mbunge nga munu umo natulingi mwamubi. Kupangesa binangulo bya mu Mbimbiliya omwo ndolome nambe ndokazi nambe munu uje kapwile Mukaleho atulinga mwamubi, kutukwasa manene. (Fili 2:3, 4) Tusimutwiyeniko ha cakumwenako cimo, ndokazi umo wazibile manene kubabala ku mbunge omwo wazibukile ngwendi munu umo yakapanga nendi ali na kuleka bakwabo biñanda bya makuli hali ikeye. Ou ndokazi kazambwilile kulubala oloni wasinganyekesesele ha mwanja wa Yesu. Yesu kashawile baje bamushawile. (1 Pe 2:21, 23) Mwanja wa Yesu wamukwasele ecelele ou munu wamulingile mwamubi. Mu kwita kwa simbu wanangukile ngwendi ou munu yakapanga nendi wakele na kubinja manene, co wakele na bishoti byabingi. Ngeci, ndokazi wanangukile ngwendi uje munu yakapanga nendi kalingilile shakelo. Ou ndokazi wabwahelelele manene, co lalo wakele mu kwoloka mwafwa wakwatele mbunge.

16. Bika byasa kumizembeleka nga banu bamo bali na kumilinga mwamubi? (1 Petulu 3:12)

¹⁶ Nga kuli munu umo namilingi mwamubi nambe nga kuli byuma bimo bili na kumizibisa kubabala ku mbunge, anukeni ngweni Yehova ali muyehi na “baje banazeye mu bimbunge.” (Mya 34:18) Wamizema mwafwa muli na mbunge ya kubandamena, co lalo mukamuleke bukalu bweni bwoshe. (Myaso 55:22) Wapwa Lyaako wa kaye koshe. Co lalo, byuma byoshe bili na kulingiwa ali na kubimona. (Tandeni 1 Petulu 3:12.) Nga muli na kuliwana na bukalu buje kumwasa kumanesa, kuma mutwalelelaho  kubandamena kweta na ha simbu yakabumanesa ndi?

17. Yehova natukulahesa bika ku mukanda wa Isaya 30:18?

¹⁷ Ololo Bumwene bwa Tate yetu wa mwilu butunenela bibezikiso byabingi. Mukanda wa Isaya 30:18 ngwawo: “Shukulu Kalunga namibandamena ngeci amizibileko mema ku mbunge. Ikeye ali na kumizibila ngozi omwo simbu yoshe akalingi bya busunga. Banabezika baje [babandamena] kuli Shukulu Kalunga.” Baje batwalelelaho kubandamena kuli Yehova bawana bibezikiso ha simbu ino na mu kaye kakaha.

18. Bibezikiso muka bitukalikuwa kulutwe?

¹⁸ Banu ba Njambi mubakakobela mu kaye kakaha kubakaliwana lalo na bukalu bubali na kuliwana nabwo ha simbu ino. Naumo wahi akabalinga mwamubi, co kubakazibi kubabala. (Kujo 21:4) Kutukalishoshomwena ha byuma bya ku mubila mwafwa tukakala na byuma byabingi manene. (Myaso 72:16; Isaya 54:13) Tukabezika manene.

19. Yehova ali na kutukwasa tulibwahesele bika?

¹⁹ Yehova ali na kutukwasa tulibwahesele kukayoya mu kaye kakaha omwo ali na kutukwasa kwecela tulingolingo twatubi na kukala na bifwa byabibwa bije bimuzibisa kubwaha. Keti muzeye, co lalo keti mulikele kupangela Yehova. Tuli na kubandamena kukalikuwa bibezikiso byabingi kulutwe. Ngeci, tutwaleleleniho kukolesa na kukala na mbunge ya kubandamena mangana tukalimwene omwo Yehova akashulisilila biyongola byendi.