CILONGESA 35
MWASO 123 Tulyakeni Kwisi ya Ciyulo ca Njambi
Bakulunu Basa Kukwasa Bati Munu Uje Natundu mu Cikungulukilo?
“Mwilu mukakala kubwahelela kwakama hali muka-bubi umo uje atenguluka, kutubakana kubwahelela kukakalamo hali baka-kusungama 99 baje kubatondo kutenguluka.”—LUKA 15:7.
Bili Muno mu Cilongesa
Muno mu cilongesa, tusimutwiya bibanapande kutundisila banu bamo mu cikungulukilo, nomwo bakulunu basa kukwasela banu baje banatundu mu cikungulukilo batenguluke na kwiluka kuli Yehova.
1-2. (a) Yehova wamona bati banu baje bakatwalelelaho kulinga bubi? (b) Yehova atonda ngwendi baje banalingi bubi balinge bika?
YEHOVA kesi kutabesa bilinga byoshe byabibi. Wazinda bubi. (Samu 5:4-6) Yehova atonda ngwendi tukabangeye mashiko endi aje ali mu Mbimbiliya. Nameme ngoco, Yehova azibuka ngwendi kutwasa kwononoka mashiko endi mu kulumbunuka. (Samu 130:3, 4) Oloni wazinda “banu [baje] kubesi na kuzibila Njambi lyoba, co bali na kupangesa ngozi ya Njambi mu kulinga byuma byabibi kwa kujeneka shwamwa.” (Juda 4) Mbimbiliya yendeka ngwayo Njambi ‘akanyongesa banu ba kujeneka kuzibila Njambi lyoba’ ha nzita ya Amagidoni.—2 Pita 3:7; Kujo 16:16.
2 Oloni Yehova atonda ngwendi banu boshe boboke. Ngwe mutunasimutwiya mu bilongesa byakulibanga bili muno mu Kaposhi, Yehova “ashaka ngwendi boshe batenguluke.” (2 Pita 3:9) Bakulunu bakatembwinina mbunge ya kubandamena ya Yehova mubakakwasa baje banalingi bubi batenguluke na kwiluka kuli Yehova. Oloni simbu imo banu bamo baje banalingi bubi bakabyana kutenguluka. (Isaya 6:9) Nameme bakululunu bakeseka kukwasa aba banu batenguluke, bamo bakatwalelelaho na futisi yabo yaibi. Ngeci, bika bibanapande kulinga bakulunu nga byuma bya cifweci bilingiwa?
“TUNDISENI MUNU WAMUBI”
3. (a) Mbimbiliya imwesa ngwayo banapande kulinga bati munu uje shendi kutenguluka? (b) Mwafwa bika twendeka ngwetu nga munu shendi kutenguluka, co nalyangwila kutunda mu cikungulukilo?
3 Nga munu uje nalingi bubi shendi kutenguluka, co bakulunu banapande kukabangeya cinangulo cili ku mukanda wa 1 Korinte 5:13, cije cendeka ngwaco: “Tundiseni munu wamubi mukati keni.” Munu nalingi bubi azibuka ngwendi nga katenguluka bamutundisa mu cikungulukilo. (Gala 6:7) Bika twendekela ngoco? Mwafwa nabyana kutenguluka nameme bakulunu banelukila-ilukila kumukwasa mangana atenguluke na kwiluka kuli Yehova. (2 Vimye 17:12-15) Bilinga byendi bimwesa ngwabyo kashaka kuyoya mu kulitombola na mashiko a Yehova.—Kwitu 30:19, 20.
4. Mwafwa bika banapande kwana mutambi wa kutundisa munu mu cikungulukilo?
4 Nga munu banamutundisa mu cikungulukilo, banapande kwana mutambi wa kumwesa ngwabo keti umo wa Bakaleho ba Yehova. Cilengo ca kwana ou mutambi kucapwile kuzibisa shwamwa uje nalingi bubi. Oloni bakana ou mutambi mangana bandolome na bandokazi bakabangeye cinangulo ca ‘kwecela kulikwatasana’ na munu uje nalingi bubi ‘nambe kulya nendi’ byakulya. (1 Kori 5:9-11) Yehova azibuka byanatwanena eli lishiko. Kapositolo Paulu wasonekele ngwendi: “Tumusima twatundondo tufutunwisa mukasha woshe.” (1 Kori 5:6) Kwecelela munu uje nalingi bubi oloni shendi kutenguluka mu cikungulukilo, kwasa kuzeyesa likulahelo lya bandolome na bandokazi baje bashaka kuyoya mu kulitombola na mashiko a Yehova.—Prov 13:20; 1 Kori 15:33.
5. Tunapande kumona bati munu uje natundu mu cikungulukilo, co mwafwa bika?
5 Tunapande kumona bati muka-Kristu uje natundu mu cikungulukilo? Kutwapandele kusinganyeka ngwetu kasa kutenguluka, oloni tunapande kumumona ngwe manga uje nazimbala. Manga wa kuzimbala nasa kwiluka lalo ha butanga. Anukeni ngweni ou munu walikundikile kuli Yehova. Calubinda, kesi na kuyoya mu kulitombola na mashiko a Yehova, co kulinga ngoco kunamwaka mu bukalu. (Ezekie 18:31) Munu uje nalingi bubi asa kutenguluka na kwiluka mu cikungulukilo, mwafwa Yehova wakala na ngozi. Ngeci, bakulunu basa kukwasa bati munu wa cifweci eluke mu cikungulukilo?
BAKULUNU BAKAKWASA BATI MUNU UJE NATUNDU MU CIKUNGULUKILO?
6. Bika bibanapande kulinga bakulunu mangana bakwase munu uje natundu mu cikungulukilo eluke kuli Yehova?
6 Nga munu natundu mu cikungulukilo, kuma bakulunu bakecela kumukwasa eluke kuli Yehova ndi? Embwe. Bakulunu mubakaleke munu uje nalingi bubi ngwabo atunda mu cikungulukilo, bakamuleke na byuma byanapande kulinga mangana eluke. Oloni obyo keti bikebyo lika bibakalingi bakulunu. Kakangi bakaleke owo munu natundu mu cikungulukilo ngwabo bamwendela munima ya bingonde byabindondo mangana bamone indi natengulula biyongola byendi. Nga munima ya bingonde byabindondo owo munu ataba kuliwana na bakulunu, co bakulunu bamushongangeya atenguluke na kwiluka kuli Yehova. Nga owo munu kanda atenguluke, co bakulunu babwahesa ngwabo baliwane nendi lalo simbu yeka kulutwe mangana bamukwase atenguluke.
7. Bakulunu bakatembwinina bati ngozi ya Yehova mubakakwasa munu uje natundu mu cikungulukilo? (Jelemiya 3:12)
7 Bakulunu bakatembwinina ngozi ya Yehova mubakakwasa munu uje natundu mu cikungulukilo. Cakumwenako, Yehova kabandamenene ngwendi baIsalele batenguluke asinoni abakwasa. Oloni wabakwasele nameme kubamwesele ngwabo bashaka kutenguluka. Ngwe mutunamwena mu cilongesa camucibali muno mu Kaposhi, Yehova wamwesele ngwendi wakala na ngozi mwapangesele mwanja wa Hosiya uje welwisile munakazi wendi uje wakele na kulinga bupangala. (Hosi 3:1; Mala 3:7) Ngwe mwa Yehova, bakulunu batonda ngwabo munu uje nalingi bubi atenguluke na kwiluka kuli Yehova, co kubesi kulinga byuma bije bilingisa kumukaluwile kwiluka mu cikungulukilo.—Tandeni Jelemiya 3:12.
8. Cisimo ca Yesu ca mwana wa kuzimbala cimwesa bati ngwaco Yehova wakala na ngozi? (Luka 15:7)
8 Anukeni byalingile cisemi wa mu cisimo ca Yesu ca mwana wa kuzimbala. Uje cisemi mwamwene munendi uje wazimbalele neluka kwimbo “washatukile na kukamubumbateya na kumutsemba.” (Luka 15:20) Nangukeni ngweni ou cisemi kabandamenene ngwendi munendi alombe likonekelo. Oloni ou cisemi washatukilile munendi mwafwa wamuzemene. Bakulunu bakalingi byuma bya kulifwa kuli baje banatundu mu cikungulukilo. Bashaka baje banatundu mu cikungulukilo beluke kuli Yehova. (Luka 15:22-24, 32) Nga munu uje natundile mu cikungulukilo eluka, Yehova, Yesu, tungelo hamolika na cikungulukilo bakabwahelela manene.—Tandeni Luka 15:7.
9. Yehova atonda ngwendi baje banalingi bubi balinge bika?
9 Twalilongesa ngwetu Yehova kashaka ngwendi banu baje kubatondo kutenguluka batwaleleleho kukala mu cikungulukilo. Nameme ngoco, akatwalelelaho kubakwasa batenguluke. Atonda ngwendi beluke kuli ikeye. Nangukeni mwakalizibila nga banu batenguluka. Ku mukanda wa Hosiya 14:4 Yehova nendeka ngwendi: “Njikangwisa kujeneka kulongwa kwabo. Njilyangwila kubazema, mwafwa njinecela kubalubalela.” Kuzibuka mwakalizibila Yehova hali baje banatundu mu cikungulukilo, kukalingisa bakulunu beseke mwoshe mubasela kunanguka byuma bije bimwesa ngwabyo munu uje natundu mu cikungulukilo ali na kutenguluka. Awa majwi ashongangeya boshe baje banatundu mu cikungulukilo banuke ngwabo Yehova wabazema, co atonda ngwendi beluke kuli ikeye.
10-11. Bakulunu basa kukwasa bati baje batundile laja mu cikungulukilo beluke?
10 Bakulunu basa kukwasa bati banu baje batundile laja mu cikungulukilo, beluke kuli Yehova? Bamo hamo balikelele laja kulinga bubi buje bwabalingisile batunde mu cikungulukilo. Bisimbu bimo bamo bakebala na byuma byabalingisile batunde mu cikungulukilo. Nameme kuneti simbu ya kupwa hali, bakulunu banapande kulinga mwoshe mubasela kwendela obo banu. Ha simbu ibaliwana nabo, bakulunu banasa kulombela nabo na kubashongangeya beluke kuli Yehova. Munu uje watundile laja mu cikungulukilo nasa kuzeya manene ku sipilitu. Ngeci, nga amwesa ngwendi ashaka kwiluka mu cikungulukilo, co bakulunu basa kubwahesa ngwabo munu umo alilongese nendi Mbimbiliya nameme nga kanda eluke mu cikungulukilo. Bakulunu bakebo banapande kwangula munu uje alilongesa nendi.
11 Bakulunu bamwesa ngwabo bali na kutembwinina ngozi ya Yehova, nga baya na kushakezeka boshe baje banatundu mu cikungulukilo na kubashongangeya beluke kuli Yehova. Munu uje nalingi bubi acimwesa lika ngwendi natengulula biyongola byendi na futisi yendi basa kumwilwisa mu cikungulukilo.—2 Kori 2:6-8.
12. (a) Bakulunu banapande kunyanyama na banu ba cifwa muka? (b) Mwafwa bika kutwapandele kusinganyeka ngwetu Yehova kasa kutetela banu banalingi cifwa cimo ca bubi? (Taleni lalo futunoti.)
12 Bisimbu bimo bakulunu banapande kunyanyama simbu kanda belwise munu mu cikungulukilo. Cakumwenako, nga munu uje natundu mu cikungulukilo wapikile mwanike nambe wapwile muka-kutengulukila indi hamo walingilile byuma bimo shakelo mangana atsiye bulo, co bakulunu banapande kumona ngwabo owo munu natenguluka mu busunga. (Mala 2:14; 2 Timo 3:6) Banapande kunyungilia butanga. Nameme ngoco, tunapande kwanuka ngwetu Yehova atambula boshe baje batenguluka mu busunga na kwiluka kuli ikeye. Bakulunu banapande kunyanyama na kumona ngwabo munu uje nalingi bakwabo mwamubi atenguluka mu busunga, oloni kubapandele kusinganyeka ngwabo Yehova kasa kutetela munu uje nalingi bubi bwa cifweci. a—1 Pita 2:10.
BIKA BICINAPANDE KULINGA CIKUNGULUKILO?
13. Bika bitunapande kulinga ku munu ibanendekela na munu ibanatundisa mu cikungulukilo?
13 Ngwe mutunalilongesela mu cilongesa cinahu, simbu imo banasa kwetesa mutambi mu cikungulukilo wa kumwesa ngwabo ndolome nambe ndokazi banamwendekela. Nga tuziba mutambi wa cifwa eci twasa kutwalelelaho kulikwatasana nendi mwafwa twazibuka ngwetu natenguluka na kuseza futisi yendi yaibi. (1 Timo 5:20) Nendi napu muka-Kristu mu cikungulukilo, co atonda kumushongangeya mangana atwalaleleho kulinga byuma byabibwa. (Hebe 10:24, 25) Oloni kunaliseze na munu uje ibanatundisa mu cikungulukilo. Tunapande ‘kwecela kulikwatasana’ nendi, ‘nambe kulya bene keti tulye nendi.’—1 Kori 5:11.
14. Baka-Kristu basa kupangesa bati bitakutaku byabo bibanalongesa mwamubwa na Mbimbiliya ha kwangula bibalinga kuli uje natundu mu cikungulukilo? (Taleni na cikupulo.)
14 Kuma byuma bitunasimutwiya bimwesa ngwabyo tunapande kuyengula munu uje natundu mu cikungulukilo ndi? Embwe. Cili bene kutwapandele kulikwatasana nendi. Oloni nga wapwa kabushoko nambe nga wapwile kabusamba ketu simbu kanda atunde mu cikungulukilo, twasa kukabangeya citakutaku cetu citunalongesa mwamubwa kupangesa Mbimbiliya ha kwangula indi tumulanya ku biwano bya cikungulukilo. Bika bitunapande kulinga nga naija ku biwano? Kunima kutwakele na kumeneka munu wa cifweci. Oloni ha simbu ino muka-Kristu napande kupangesa citakutaku cendi canalongesa mwamubwa na Mbimbiliya mu kwangula byakulinga. Bamo banasa kwangula kumumeneka nambe kumutambula ku biwano. Oloni kutwapandele kusimutwiya nendi simbu yailaha nambe kulikwatasana nendi.
Baka-Kristu banapande kupangesa citakutaku cabo cibanalongesa na Mbimbiliya kwangula kulanya munu uje natundu mu cikungulukilo ku biwano nambe kumumeneka nga naija ku biwano (Taleni paragirafu 14)
15. Banu ba cifwa muka babanendeka ku mukanda wa 2 Iwano 9-11? (Taleni na cipalo ca “ Kuma Iwano na Paulu Bakele na Kulumbununa Bubi bwa Kulifwa Ndi?”)
15 Mbimbiliya inendeka ngwayo kutwapandele kumeneka banu bamo baje banalingi bubi mwafwa nga tulinga ngoco, co ‘tulikwatasana nabo mu bipangi byabo byabibi.’ (Tandeni 2 Iwano 9-11.) Oloni mukanda wa 2 Iwano 9-11, unalumbununa baka-kutengulukila nambe banu baje bakundwiya futisi yaibi. (Kujo 2:20) Ngeci, nga munu ali na kukundwiya biñanda bya baka-kutengulukila nambe kukundwiya futisi yaibi, co bakulunu kubapandele kumwendela. Nameme ngoco, owo munu nasa kutenguluka. Kutwapandele kumeneka nambe kulanya munu wa cifweci ku biwano kubanga noho hakatengulukila.
TEMBWININENI KUTETELA NA NGOZI YA YEHOVA
16-17. (a) Yehova atonda ngwendi baje banalingi bubi balinge bika? (Ezekiele 18:32) (b) Bakulunu basa kumwesa bati ngwabo bali na kupangela hamo na Yehova omwo bakwasa banu baje banalingi bubi?
16 Bika bitunalilongesa mu bilongesa bitanu bili muno mu Kaposhi? Yehova atonda ngwendi banu boshe bakoboke. (Tandeni Ezekiele 18:32.) Atonda ngwendi baje banalingi bubi batenguluke na kwiluka kuli ikeye. (2 Kori 5:20) Co kushwa lika kunima, Yehova natwalelelaho kukwasa banu bendi baje balingile bubi batenguluke na kwiluka kuli ikeye. Bakulunu ba cikungulukilo banabezika kupangela hamo na Yehova mubali na kukwasa banu baje banalingi bubi batenguluke.—Loma 2:4; 1 Kori 3:9.
17 Acisinganyekeni kubwahelela kubakakala nakwo tungelo na Yesu na Yehova mubakamono munu uje nalingi bubi atenguluka. Tate yetu Yehova akabwahelela manene mwakamono banu bendi baje bazimbalele beluka kuli ikeye. Cizemo cetu kuli Yehova cikakolo mutukasinganyekesesa ha mema ku mbunge na kutetela na ngozi yakama ya Yehova.—Luka 1:78.
MWASO 111 Byuma Bitulingisa Tubwahelele
a Mbimbiliya imwesa ngwayo banu bamo kubasa kubakonekela. Aba banapu banu baje banangula kutengulukila Yehova. Ngeci, Yehova na Yesu bakebo lika basa kubasompa.—Maki 3:29; Hebe 10:26, 27.
