CILONGESA 33
MWASO 130 Konekeleni Bakweni
Mutunapande Kumwena Munu Uje Nalingi Bubi Bwakama mu Cikungululukilo
“Nga kuli umo alinga bubi, tuli na mukwasi.” —1 IWANO 2:1.
BILI MUNO MU CILONGESA
Muno mu cilongesa tusimutwiya bitulilongesa ku byuma byalingiwile mu cikungulukilo ca baka-Kristu bakulibanga ca Korinte, ndolome umo mwalingile bubi.
1. Yehova atonda ngwendi banu boshe balinge bika?
YEHOVA watutangele na nzili ya kulyangwila byakulinga. Co ha litangwa na litangwa tukangula byakulinga. Oloni cuma ca seho manene citukangula mu kuyoya kwetu cinapu kulikundika kuli Yehova na kumulemesela hamo na bandolome na bandokazi betu. Ebi bikebyo byatonda Yehova ngwendi tubaboshe tulinge. Mwafwa bika? Mwafwa Yehova wazema banu boshe, co atonda ngwendi bayoye mwamubwa. Yehova atonda ngwendi banu balikute nendi busamba bwa kukanyama na kukalikuwa kuyoya myaka yoshe.—Kwitu 30:19, 20; Gala 6:7, 8.
2. Bika byatonda Yehova kuli baje kanda batenguluke na kwiluka kuli ikeye? (1 Iwano 2:1)
2 Nameme ngoco, Yehova kesi kusindiya banu bamulemese. Atonda ngwendi munu na munu alyangwile kumupangela. Ngeci, bika bibanapande kulinga bakulunu mu cikungulukilo nga muka-Kristu nalingi bubi bwakama? Nga shendi kutenguluka, co banapande kumutundisa mu cikungulukilo. (1 Kori 5:13) Nameme nga munu uje nalingi bubi bwakama banamutundisa mu cikungulukilo, Yehova atonda ngwendi uje munu atenguluke na kwiluka kuli ikeye. Ebi bikebyo byanabwahesela ndando ya kupatula, mangana ase kukonekela baje banalingi bubi bwakama. (Tandeni 1 Iwano 2:1.) Yehova Njambi yetu wa cizemo, ali na kulanya boshe baje banalingi bubi batenguluke na kwiluka kuli ikeye.—Zaka 1:3; Loma 2:4; Jems 4:8.
3. Bika tusimutwiya muno mu cilongesa?
3 Yehova atonda ngwendi tumone bubi ngwe mwakabumwena ikeye na kumona baje banalingi bubi bwakama ngwe mwakabamwena. Muno mu cilongesa, tusimutwiya mutwasa kulingila ngoco. Cakulibanga, tusimutwiya byuma byalekele Paulu baka-Kristu ba mu cikungulukilo ca Korinte ngwendi balinge, ndolome umo mwalingile bubi bwakama. Camucibali, tusimutwiya ha byuma byabalekele ngwendi balinge nga munu uje nalingi bubi natenguluka. Camucitatu, tusimutwiya mwakalizibila Yehova hali baka-Kristu baje banalingi bubi bwakama.
CIKUNGULUKILO CAKELE NA KUMONA BATI MUNU UJE NALINGI BUBI BWAKAMA?
4. Bika byalingiwile mu cikungulukilo ca baka-Kristu bakulibanga mu Korinte? (1 Korinte 5:1, 2)
4 Tandeni 1 Korinte 5:1, 2. Paulu mwaile bungenzi bwendi bwa bumishinali bwamucitatu, watambwile muzimbu wa byuma byabibi bije byalingiwile mu cikungulukilo caciha ca Korinte. Ndolome umo muje mu cikungulukilo wakele na kulinga bupangala na munakazi wa ishe. Bubi bwalingile bwapwile bwakama, nameme ‘mukati ka baka-mafuti kubwakelemo.’ Oloni baka-Kristu muje mu cikungulukilo bamwene ngwe byuma byalingile kubyapwile byabibi. Hamo bamo balizibile ngwabo kwecelela uje ndolome kwapwile kumwesa cizemo ngwe Yehova mwakamwesela cizemo banu ba kujeneka kulumbunuka. Oloni Yehova kashaka ngwendi banu bendi balinge bubi. Byuma byalingile uje ndolome byashawisile cikungulukilo. Co lalo ngwe kubamutundisile mu cikungulukilo ngwe wongumwine baje bakele na kulikwatasana nendi. Ngeci, Paulu walekele bandolome mu cikungulukilo balinge bika?
5. Kapositolo Paulu walekele cikungulukilo cilinge bika, co bika byalumbunwine? (1 Korinte 5:13) (Taleni na cikupulo.)
5 Tandeni 1 Korinte 5:13. Yehova wahwimininine Paulu asoneke ngwendi munu uje nalingi bubi bwakama banapande kumutundisa mu cikungulukilo. Ngeci baka-Kristu bapandele kumona bati ou munu? Paulu wabalekele ngwendi ‘becele kulikwatasana’ nendi. Bika byalumbunwine? Paulu walumbunwine ngwendi eli lishiko lyambateselele na kujeneka “kulya nendi.” (1 Kori 5:11) Kulya na munu kwasa kumilingisa mushangumuke kulikwatasana manene nendi. Ngeci kapositolo Paulu walumbunwine ngwendi baka-Kristu kubapandele kulikwatasana na munu uje walingile bubi. Kulinga ngoco kwanyungililile cikungulukilo ku bilinga byendi byabibi. (1 Kori 5:5-7) Co lalo kujeneka kulikwatasana nendi, kwakwasele uje munalume ananguke ngwendi nalingi bubi bwakama, co napande kutenguluka na kwiluka kuli Yehova.
Yehova wahwimininine kapositolo Paulu asonekele baka-Kristu ba mu korinte mukanda na kubaleka batundise munu uje kashakele kutenguluka mu cikungulukilo (Taleni paragirafu 5)
6. Baka-Kristu ba mu cikungulukilo ca Korinte balingile bika mubatambwile mukanda wa Paulu, co uje munalume walingile bubi, walingile bati?
6 Munima ya kutuma uje mukanda kuli baka-Kristu ba mu cikungulukilo ca Korinte, Paulu wabandamenene mangana amone bibalinga kwesekesa na mukanda wabasonekelele. Mu kwita kwa simbu, Paulu watambwile muzimbu waubwa kuli Tito. Baka-Kristu basonekelele Paulu balingile byuma byabalekele. Batundisile uje munalume walingile bubi bwakama mu cikungulukilo. (2 Kori 7:6, 7) Kukwetile simbu yailaha kutunda hatuminine Paulu ou mukanda, uje munalume watengulukile na kuseza futisi yendi yaibi. Watengulwile biyongola byendi na kushangumuka kukabangeya mashiko a Yehova. (2 Kori 7:8-11) Co Paulu walekele aba baka-Kristu balinge bika?
CIKUNGULUKILO CAKELE NA KUMONA BATI MUKA-BUBI UJE NATENGULUKA?
7. Kutundisa uje munalume mu cikungulukilo kwamukwasele bati? (2 Korinte 2:5-8)
7 Tandeni 2 Korinte 2:5-8. Paulu wendekele ngwendi: “Kutenuka cibanatenuka banu babangi, kutenukila munu wa cifweci cinapumo.” Kulumbununa ngwabo kutundisa uje munalume mu cikungulukilo kwamukwasele mangana atenguluke na kwiluka kuli Yehova.—Hebe 12:11.
8. Paulu walekele baka-Kristu ba mu Korinte ngwendi balinge bika?
8 Paulu washikile baka-Kristu ba mu cikungulukilo ca Korinte ngwendi ‘bakonekele na kuzembeleka’ uje ndolome walingile bubi na ‘kumumwesa cizemo.’ Nangukeni ngweni kutubakana kwilwisa lika uje munalume mu cikungulukilo, Paulu washongangeyeye baka-Kristu balingeko bimo. Paulu watondele ngwendi aba baka-Kristu bamwese ngwabo bazema uje ndolome mu byuma bibalinga na kwendeka. Ngeci, bapandele kumwesa ngwabo banamutambula na mbunge yabo yoshe.
9. Mwafwa bika bamo kwabakaluwilile kukonekela uje ndolome walingile bubi?
9 Bamo hamo kwabakaluwilile kutambula uje ndolome welukile mu cikungulukilo na bimbunge byabo byoshe. Bika twendekela ngoco? Banu babangi balubalele manene mwafwa washawisile cikungulukilo. Ngeci bamo bazibile manene bubabala ku mbunge. Baje baka-Kristu balifwitile kukabangeya mashiko a Yehova, ngeci bamo hamo kwabakaluwilile kutambula uje ndolome nalingi bubi bwakama mu cikungulukilo. (Esekeseni Luka 15:28-30.) Mwafwa bika kwapwile kwa seho kuli baka-Kristu kumwesa cizemo uje ndolome watengulukile?
10-11. Bika byesi kulingiwile ngwe bakulunu kubakonekelele uje munalume?
10 Acisinganyekeni mwasele kulizibila uje ndolome ngwe kubamwilwisile mu cikungulukilo, nambe ngwe bandolome na bandokazi kubamumwesele cizemo munima ya kumwilwisa. Paulu wendekele ngwendi uje munalume wasele kuliziba “busiwa bwa kutubakanesa.” Wasele kuliziba ngwendi kasa lalo kupangela Yehova. Co lalo ngwe wazeyele na kusinganyeka ngwendi na seho ya kupangela Njambi bene yahi.
11 Bika lalo byesi kulingiwile ngwe bandolome na bandokazi kubakonekelele uje munalume? Busamba bwabo na Yehova ngwe bwatsile. Mwafwa bika? Mwafwa kulinga ngoco ngwe kwamwesele ngwabo bali na kutembwenina Satana uje kakele na ngozi kutubakana kutembwinina Yehova uje wapwa muka-kukonekela. Ngwe Liyabolo wabapangesele mu kuzeyesa likulahelo lya uje munalume. 2 Kori 2:10, 11; Efeso 4:27.
12. Bika bibapandele kulinga baka-Kristu mu cikungulukilo ca Korinte mangana batembwinine Yehova?
12 Ngeci, bika bibapandele kulinga baka-Kristu mu cikungulukilo ca Korinte mangana batembwinine Yehova kutubakana kutembwinina Satana? Bapandele kukonekela baka-bubi baje batengulukile ngwe mwakakonekela Yehova. Nangukeni bibendekele baka-kusoneka Mbimbiliya bamo hali Yehova. Devidi wendekele ngwendi: ‘Yehova wapwa wamubwa, co nalibwahesela kukonekela.’ (Samu 86:5) Mika wasonekele ngwendi: ‘Njambi muka nalifu nobe, uje asa kukonekela bubi na mulonga wa banu bendi?’ (Mika 7:18) Co Isaya wasonekele ngwendi: “Munu wamubi aseze ngila yendi, co munu uje akalingi byuma byabibi aseze biyongola byendi, eluke kuli Yehova uje amutetela, eluke kuli Njambi yetu, mwafwa amukonekela mwakama.”—Isa. 55:7.
13. Mwafwa bika kwapwile kwa seho kwilwisa uje munalume watengulukile mu cikungulukilo? (Taleni cipalo ca “ Kwetile Simbu ya Kupwa Hali Mangana Uje Munalume wa mu Korinte Bamwilwise mu Cikungulukilo?”)
13 Baka-Kristu ba mu cikungulukilo ca Korinte bapandele kutambula na kumwesa cizemo uje ndolome welukile mu cikungulukilo mangana bamwese ngwabo bali na kutembwinina Yehova. Paulu wabalekele ngwendi nga bakonekela munalume uje watengulukile, co bamwesa ngwabo ‘bapwa baka-kwononoka mu byuma byoshe.’ (2 Kori 2:9) Uje munalume watengulukile nameme bamutundisile mu cikungulukilo ha bingonde byakupwamo lika. Ngeci bakulunu kubapandele kwishwala kumwilwisa mu cikungulukilo.
TWASA KUTEMBWININA BATI YEHOVA UJE WAPWA MUKA-NGOZI NA MUKA-KWAKULA MWAMUBWA?
14-15. Twalilongesa bika ku ngila ibatalelelemo ñanda ya mu cikungulukilo ca Korinte? (2 Pita 3:9) (Taleni na cikupulo.)
14 Byuma byalingiwile mu cikungulukilo ca Korinte babisonekele mu Mbimbiliya mangana ‘bitulongese.’ (Loma 15:4) Tulilongesako ngwetu Yehova kesi kutabesa munu uje nalingi bubi bwakama, co shendi kutenguluka atwaleleleho kukala mu cikungulukilo. Bamo banasa kusinganyeka ngwabo Yehova wapwa muka-ngozi, ngeci asa kutabesa munu uje atwalelelaho kulinga bubi akale mu cikungulukilo. Oloni omwo keti mukemwo mwakamwesela Yehova ngozi. Nameme Yehova wakala na ngozi, kesi kwecelela banu baje bakala na futisi yaibi. Co lalo kesi kutengulula mashiko endi. (Juda 4) Nga Yehova atabesa baje banalingi bubi bwakama, oloni shabo kutenguluka batwaleleleho kukala mu cikungulukilo, basa kunena bukalu mu cikungulukilo.—Prov 13:20; 1 Kori 15:33.
15 Twalilongesa ngwetu, Yehova kashaka ngwendi umo na umo wetu akanyonge. Oloni ashaka kwobola banu boshe. Akamwesa ngozi ku banu baje banatenguluka mu busunga, co bashaka kumupangela. (Ezekie 33:11; tandeni 2 Pita 3:9.) Ngeci uje munalume wa mu Korinte mwatengulukile na kuseza futisi yendi yaibi, Yehova walekele baka-Kristu mu cikungulukilo ca Korinte bamukonekele na kumutambula mu cikungulukilo.
Tutembwinina cizemo na ngozi ya Yehova nga tumwesa cizemo na ngozi ku banu baje baneluka mu cikungulukilo (Taleni paragirafu 14-15)
16. Muliziba bati hali Yehova munima ya kulilongesa byuma byalingiwile mu cikungulukilo ca Korinte?
16 Mubatalelelemo ñanda ya mu cikungulukilo ca Korinte kutulongesa ngwabo Yehova wakala na cizemo, wapwa wa kusungama, co lalo akakula mwamubwa. (Samu 33:5) Kuma kuzibuka ebi byuma kukumilingisa mushangazale manene Njambi ndi? Tubaboshe twapwa tu baka-bubi, co tukatondo ngwetu Yehova atukonekele. Tukakandelela manene Yehova mwafwa ya ndando ya kupatula ije ilingisa mangana atukonekele. Kutuzembeleka manene kuzibuka ngwetu Yehova wazema banu bendi, co ashaka kubalingila byuma byabibwa.
17. Bika bitusimutwiya mu cilongesa cinatako?
17 Nga muka-Kristu nalingi bubi bwakama, bika bibanapande kulinga bakulunu mu cikungulukilo mangana batembwinine Yehova ha kumwesa cizemo na kukwasa owo munu atenguluke? Bakulunu basa kumwesa bati ngwabo batonda ngwabo munu uje nalingi bubi atenguluke na kwiluka kuli Yehova? Bika bibanapande kulinga bandolome na bandokazi nga bakulunu batundisa nambe kwilwisa munu mu cikungulukilo? Tukumbulula ebi bihula mu cilongesa cinatako.
MWASO 109 Zemeni Bakweni na Mbunge Yeni Yoshe
