Kapositolo Paulu wasonekelele baka-Kristu ba mu Tesalonika ngwendi: “Nga kuli umo kononoka lijwi lyetu litunasoneka omu mu mukanda, munangukeni.” (2 Tesa 3:14) Hakulibanga, twendekele ngwetu eci cinangulo catalesa lika ku bakulunu. Kunima, nga munu atwalelelaho kwombwanesa mashiko a mu Mbimbiliya, bakulunu bapandele kwendeka ñanda ya kunangula cikungulukilo, mangana bamunanguke. Kutundaho, baka-kwambulula bangwile kujeneka kulikwatasana na munu ibanananguka mu byuma bya kulizima nabyo buli.

Oloni tunapande kutengululako mutuli na kuzibisisila ei ñanda. Hanoni twazibisisa ngwetu cinangululo ca Paulu catalesa ku byuma byanapande kwangula kulinga munu na munu mu cikungulukilo. Ngeci bakulunu kubapandele kwendeka ñanda ya kunangula cikungulukilo mangana bananguke munu uje atwalelelaho kwombwanesa mashiko a mu Mbimbiliya. Mwafwa bika twatengulula mutwakele na kuzibisisila mukanda wa 2 Tesalonika 3:14? Tusimutwiyeni byakele na kwendeka Paulu mwanene eci cinangulo.

Paulu wanangukile ngwendi banu bamo mu cikungukilo bakele na ‘kulinga liwayanga.’ Wabanene cinangulo cije cemanene ha Lijwi lya Njambi, oloni kubakabangeyeye eci cinangulo. Mu bungenzi bwaile ku Tesalonika, Paulu wanene cinangulo ngwendi: “Nga kuli umo kashaka kupanga, na kulya bene keti alye.” Nameme ngoco, bamo kubakele na kupanga nameme bakele na nzili ya kulinga ngoco. Co lalo bakele na kulikobelesa mu biñanda bya bakwabo bije kubyabakundamene. Bika bibapandele kulinga baka-Kristu ku banu ba cifweci?—2 Tesa 3:6, 10-12.

Paulu wendekele ngwendi munu wa cifweci “munangukeni.” Lijwi lya Cigriki libananungulula ngwabo ‘kumunanguka’ lilumbununa kuzibuka munu na kupwa bakunyanyama kutewa atungumuna na bilinga byendi byabibi. Paulu wanene eci cinangulo ku cikungulukilo coshe keti ku bakulunu lika. (2 Tesa 1:1; 3:6). Ngeci, nga muka-Kristu ananguka ndolome nambe ndokazi uje kesi na kukabangeya binangulo bya mu Lijwi lya Njambi, co asa kwangula ‘kulikela kulikwatasana’ nendi.

Kuma oku kwalumbunwine ngwabo bakele na kumona owo munu ngwe uje natundu mu cikungulukilo ndi? Embwe. Mwafwa Paulu wendekele ngwendi: “Twaleleleniho kumunangula ha kupwa ndolome.” Ngeci muka-Kristu woshe wakele na kulilwatasana nowo munu ku biwano na mu cipangi ca kwambulula, oloni wasele kwangula kujeneka kulikwatasana nendi mu byuma byakulizima nabyo buli. Mwafwa bika? Paulu wendekele ngwendi: “Mangana shwamwa imukole.” Kunanguka munu uje kakele na kukabangeya binangulo bya mu Mbimbiliya, kwasele kumulingisa alizibe shwamwa na kutengulula futisi yendi.—2 Tesa 3:14, 15.

Baka-Kristu ano matangwa basa kupangesa bati eci cinangulo? Ngwe mwendekele Paulu, tunapande tahi kutondesesa bukaleho buje bumwesa ngwabwo owo munu kesi na kukabangeya binangulo bya mu Mbimbiliya. Paulu kendekele banu baje bakalingi byuma bije kubilitombola na citakutaku cetu nameme kubilwisa mashiko nambe binangulo bya Njambi. Co kalumbunwine banu baje bakangula byuma bije binaliseze nebi bitwangula nambe baje banatuzibisa kubabala ku mbunge. Oloni Paulu walumbunwine banu baje bangwile kujeneka kukabangeya binangulo bya Njambi.

Nga tunanguka ngwetu ndolome nambe ndokazi ali na kutwalelelaho kupokola binangulo bya mu Lijwi lya Njambi, a co twasa kulyangwila kujeneka kulikwatasana nendi mu byuma byakulizima nabyo buli. Nga twalyangwila kulinga ngoco, co kutwapandele kuleka bakwetu bitunangula nga kubapwile baka-naanga yetu. Co lalo tutwalelelaho kulikwatasana nendi ku biwano na mu cipangi ca kwambulula. Nga atengulula futisi yendi, co tutwalelelaho kulikwatasana nendi mu byuma byoshe.