‘Baka-Busunga Bakajolela Muli Yehova’
DIANA ali na myaka ya kutubakana 80. Munalume wendi wabinjile mushongo ubatumbula ngwabo Alzheimer, co wamubinjisilile mu njubo ya kunyungila babezi ha myaka yaingi kweta na ha kutsa. Co watsisile lalo bana bendi babali na kuyanda na mushongo wa kansa ya ku mabele. Oloni mubakamumono bandolome na bandokazi ba mu cikungulukilo cendi ku Njubo ya Bumwene na mu lihya, akasholoka kupwa wa kubwaelela.
John wapwile ntwama wa kuzenguluka ha myaka ya kutubakana 43. Wazemene manene cipangi chendi. Oloni wecelele eci cipangi na kukanyunga kabushoko kendi uje wakele na kubinja. Co ha simbu ino ali na kupangela lika mu cikungulukilo. Baje bamuzibuka mubakaliwana nendi ha biwano byakama nebi byabindondo bakananguka ngwabo katengulukile. Anga bene nabwaelela.
Bika binakwasa Diana na John bapwe ba kubwaelela? Munu uje ali na kuyanda mu bisinganyeka asa kupwa bati wa kubwaelela? Munu asa kupwa bati wa kubwaelela nga byuma bimo bimwonowesa kupanga cipangi cazema manene? Mbimbiliya yakumbulula ngwayo: “Baka-busunga bakajolela omwo bije byanalingi Shukulu Kalunga.” (Myaso 64:10) Tuzibisisa mwamubwa busunga bwa majwi awa nga tuzibuka bikanene kubwaelela kwa busunga na bije kubyasa kulinga ngoco.
KUBWAELELA KWA KASIMBU KAKANDONDO
Neni muzibuka ngweni kuli byuma bimo bikanene kubwaelela. Cakumwenako, munakazi na munalume bakabwaelela manene mubakalyambata. Co banu bakabwaelela nga bali na bana, nambe nga banatambula cipangi cimo mu munga ya Njambi. Ebi byuma bitunendeka bikanene kubwaelela mwafwa Yehova ikeye wabwaesele ngwendi bikaleko. Ikeye watungile bulo na kubwaesa ngwendi banu bakite bana, co ikeye lalo muka-kwana bipangi mu cikungulukilo ca baka-Kilisitu.—Kusha 2:18, 22; Myaso 127:3; 1 Tima 3:1.
Oloni simbu imo, kubwaelela kwetu kwasa kuhwa. Muka-lyetu nasa kulinga bupangala nambe kutsa. (Ezeki 24:18; Hozi 3:1) Banike bamo, kubesi kwononoka Njambi na bisemi babo, ngeci simbu imo bakabatundisa mu cikungulukilo. Bana ba Samwele kubapangelele Yehova na bimbunge byabo boshe. Co bilinga byabibi byalingile Ndabiti byanenele bukalu ku naanga yendi. (1 Samwe 8:1-3; 2 Samwe 12:11) Byuma cifwa eci bikanene busiwa na tuyando. Co kubikwasa munu apwe wa kubwaelela.
Mu ngila imo, munu asa kwonowa kutwalelelaho kupanga bipangi bimo mu munga ya Njambi mwafwa ya kujeneka kulikangula ku mibila, kunyunga naanga nambe kutenguluka kwa byuma mu munga. Bwingi bwa baje banaliwana nobu bukalu bakalizibi ngwabo kubwaelela kubakele nakwo kunahu mwafwa ya kujeneka kupanga bipangi bibakele na kupanga.
Twamono ngwetu byuma bije bikatulingisa tupwe ba kubwaelela bikahu nambe bikapu bya simbu yaindondo lika. Kuma kuli bimo byasa kutulingisa tutwaleleleho kupwa ba kubwaelela nameme byuma bitenguluka ndi? Eyo kubili. Cakumwenako, Samwele, Ndabiti na bakwabo batwaleleleho kupwa ba kubwaelela nameme baliwanene na byeseko.
KWABWAELELA KWA SIMBU YOSHE
Yesu wazibukile byuma bilingisa munu apwe wa kubwaelela. Yesu te kanda aije hano hasi wakele na kuyoya bwino, ‘wabwaelele ku mesho a [Yehova] ha litangwa na litangwa.’ (Visi 8:30) Oloni mwezile hano hasi waliwanene na tuyando twatwingi. Nameme ngoco, wapwile wa kubwaelela mwafwa wakele na kulinga cizango ca Ishe. (Yowa 4:34) Nameme ha litangwa libamutsiile, ‘kajukile ha citi ca kuyandesela omwo kujolela cije camubandamenene’ (Heve 12:2) Ngeci tunapande kusinyekesesa ha majwi endekele Yesu ha bisimbu bibali aje atukwasa tupwe ba kubwaelela.
Simbu ya kulibanga, yapwile omwo bandongesi ba Yesu ba kupwa 70 mubelukile kutunda mu cipangi ca kwambulula. Babwaelelele mwafwa bakalingile bikomokeso na kutundisa bandemone. Yesu wabalekele ngwendi: “Kesi mujolele omwo minzinzime ya kujwala imyononoka embwe, oloni joleleni omwo mazina eni banawasoneka mwilu.” (Luka 10:1-9, 17, 20) Cuma cakama cabalingisile bapwe ba kubwaelela capwile kulinga cizango ca Yehova. Kujolela kwabo kwapwile kwakama, mwafwa bazibukile ngwabo Njambi wanukile bipangi bibalingile.
Simbu ya mu cibali yapwile omwo Yesu walongesele banu. Munakazi umo wa Kayunda Luka 11:27, 28) Kwakubwa kupwa cisemi wa kubwaelela, oloni kulikuta busamba na Yehova na kumwononoka kulingisa munu apwe wa kubwaelela manene.
wabwaelele na kwendeka ngwendi baina ya Yesu banapu ba kubwaelela. Oloni Yesu wamunangwile ngwendi: “[Banabwaelela] baje baziba lijwi lya Njambi na kulyononoka.” (Kulinga cizango ca Yehova kukekwo kulingisa munu apwe wa kubwaelela. Naumo wai abwaelela nga ali mu byeseko, oloni byeseko kubyasa kwonowesa munu apwe wa kubwaelela. Kukolesa mu byeseko oku munu napu wa kulongwa kulingisa mbunge ikale mwamubwa. (Loma 5:3-5) Yehova akana sipilitu yendi kuli baje banamukulaela, co ikakwasa munu apwe wa kubwaelela. (Ngala 5:22) Oku kutwasa tuzibisise mukanda wa Myaso 64:10, uje wendeka ngwawo: “Banu boshe baka-busunga bakajolela omwo bije byanalingi Shukulu Kalunga.”
Bika binakwasa John atwaleleleho kupwa wa kubwaelela?
Ebi bikebyo byakwasele Diana na John batunendeka kumaputukilo batwaleleleho kupwa ba kubwaelela mubakele mu byeseko. Diana ngwendi: “Yehova nanjinyungilila ngwe cisemi mwakanyungilila munendi.” Diana akazibuka bati ngwendi Njambi ali na kumukwasa? Wendekele ngwendi: “Njambi nanjikwasa njitwaleleleho kwambulula na mbunge ya kubwaelela simbu yoshe.” John watwaleleleho kwambulula nameme wecelele cipangi cendi ca kuzenguluka. Bika byamukwasele? Wendekele ngwendi: “Kushwa mu 1998 mubanjanene cipangi ca kulongesa sikola ya MTS, njalingile manene cilongesa ca ha kapandi.” Wendekele lalo ngwendi: “Kukala na biyongola bya kupangela Yehova ha myaka yoshe eyi kunatukwasa tutambule bipangi byoshe byoshe bibatwana nameme byuma binatenguluka. Tunabwaelela manene.”
Banu babangi banalimwena busunga bwa majwi ali ku Myaso 64:10. Cakumwenako, kuli baka-kulyambata bamo bapangelele myaka ya kutubakana 30 ha Mbetele ya ku America. Mu kwita kwa simbu babatumine kukapwa bapainiya ba kulitila. Bendekele ngwabo: “Kulikela kulinga cuma ciwazema kukanene busiwa, oloni mu kwita kwa simbu busiwa bukahu.” Bashangumukile kuya hamo na cikungulukilo mu lihya. Bendekele lalo ngwabo: “Twalombelele ha bukalu bwoshe butwakele nabwo. Kumona Yehova mwakumbulwililemo malombelo etu kwatukanyamesele na kupwa ba kubwaelela. Kutunda hatwezilile muno mu cikungulukilo, bamo bashangumukile kulinga bupainiya, co lalo Njambi watubezikisile kulilongesa Mbimbiliya na banu babali baje bakele na kukola ku sipilitu.”
“KUBWAELELA SIMBU YOSHE”
Kubwaelela simbu yoshe kwapwa kwakukalu, mwafwa simbu imo byuma kubyesi kwenda mwamubwa. Nameme ngoco, majwi a Yehova ali ku Myaso 64:10 atutakamesa. Nameme ha simbu itukazeye, twasa kukulaela ngwetu nga tutwalelelaho kupwa “baka-busunga,” na kutwalelelaho kupwa ba kulongwa nameme byuma bitenguluka, Yehova atukwasa tupwe ba kubwaelela. Co lalo tunabandamena kukamona cikulaeso ca Yehova ca kutanga “kaye kakaha na melu amaha.” Banu boshe bakapwa ba kulumbunuka. Banu ba Njambi boshe ‘bakabwaelela na kujolela’ ha byuma byoshe byakatanga nebi byakabana.—Isaya 65:17, 18.
Tukakala na mibila ya kulikangula simbu yoshe. Kutukanuka lalo tuyando twetu, busiwa bwetu bwoshe tukabwibala. Mbimbiliya yatukulaesa ngwayo: ‘Byuma bya laja bikahwa, co tukabibala.’ Batsi bakasanguka, co tukalimona lalo na banu batwazema baje batsa. Banu babangi bakaliziba ngwe mubalizibilile bisemi ba uje mwanike wa myaka 12 yasangwile Yesu baje babwaelelele na ‘kulikomokela manene.’ (Mako 5:42) Banu boshe hano hasi bakapwa “baka-busunga,” co banu bakajolela ku myaka yoshe mwafwa ya byuma byanalingi Yehova.