Uje munalume wapwile iya? Paulu wendekele ngwendi Njambi wamupangesele manene ha kupwa kapositolo. (2 Koli 11:5, 23) Wendekele lalo ha ‘bimona na bya kujombolola byamumwesele Mwene.’ Paulu mwendekele awa majwi, kalumbunwine bandolome bakwabo. Ngeci, twendeka ngwetu bije bimona na bije bibajombolwele byamwene byenikele kuli Paulu.—2 Koli 12:1, 5.

Ngeci, Paulu ikeye bene ‘ibatwalele mu lilu lya mu citatu na mu Palandaisi.’ (2 Koli 12:2-4, NWT) Wapangesele lijwi lya “kujombolola” lije lilumbununa byuma bikakalako kulutwe.

Byuma muka byamwene Paulu kupwa “lilu lya mu citatu”?

Mu Mbimbiliya “lilu” linasa kulumbununa lilu litukamono. (Kusha 11:4; 27:28; Mateo 6:26) Oloni “lilu” likalumbununa lalo byuma byeka. Simbu imo, likalumbununa ciyulo ca banu. (Ndanye 4:20-22) Co lalo lilu likalumbununa ciyulo ca Njambi.—Kujo 21:1.

Paulu wamwene “lilu lya mu citatu.” Walumbunwine bika? Simbu imo, Mbimbiliya ikelukila kutumbula cuma lutatu kumwesa seo na nzili na bulemu bwoco cuma. (Isaya 6:3; Ezeki 21:27; Kujo 4:8) Hamo Paulu mwendekele bya ‘lilu lya mu citatu’ walumbunwine bya ciyulo ca Bumwene bwa Mesiya buje bwakayula Yesu na ba kubwabesa ba kupwa 144,000. (Kengeni Insight on the Scriptures, Vol. 1, lipu. 1059, 1062.) Tunabandamena “lilu lyaliha” lije lyanakulaesa Njambi ngwe mwasonekelele kapositolo Petulu.—2 Petu 3:13.

Paulu walumbunwine bika mwendekele bya Palandaisi?

Lijwi lya “palandaisi’ lyasa kulumbununa byuma byabingi: (1) Lyasa kulumbununa Palandaisi ya hasi, ije itunabandamena ya kulifwa na “palandaisi” muje mubakele banu ba kulibanga. (2) Lyasa lalo kulumbununa katumamesi ka kwoloka kubakalikuwa banu ba Njambi mu lifuti lyaliha. (3) Lilumbununa lalo bibezikiso byabibwa bya mwilu, ‘palandaisi ya njambi’ ibanatumbula ku mukanda wa Kujombolola 2:7.—Kengeni Kaposhi ka Silozi ka, July 15, 2015, lipu. 8. pal. 8.

Paulu walumbununwine byuma byoshe bitatu bije bili ku 2 Kolinte 12:4 mwendekele ha byuma bije byaliwanene nabyo.

Mu bwihi:

“Lilu lya mu citatu” lije libanendeka ku mukanda wa 2 Kolinte 12:2, NWT lilumbununa Bumwene bwa Mesiya buje bwakayula Yesu na bakubwabesa ba kupwa 144,000 mu “lilu lyaliha.”—2 Petu 3:13.

Obu Bumwene banabutumbula ngwabo “lilu lya mu citatu” mwafwa bwapwa bumwene bwakama na kulitila.

Palandaisi ije ibatwalelemo Paulu mu cimona ilumbununa (1) Palandaisi ije ikakala hano hasi, (2) Palandaisi ya ku sipilitu ije ikakalako ha simbu ya kulutwe, ije lalo ikapwa yakama manene kutubakana Palandaisi ya ku sipilitu iliko ha simbu ino, co (3) “Palandaisi ya Njambi” ya mwilu, ije ikakala na hano ha kaye koshe.

Ngeci, kaye kakaha kanambateselela lilu lyaliha na lifuti lyaliha. Ebi bikapawa byuma byabiha bibakabwaesa, bije bikambateselela Bumwene bwa mwilu na banu baje bakapangela Yehova mu Palandaisi ya hasi.