Mwanuka Ndi?
Munatanda mwamubwa mangazini a ololo a Kaposhi ka Kukengela ndi? Nga munatanda, co tumoneni indi mwasa kukumbulula ebi bihula:
Bukaleho muka bwa mu Bisoneka bumwesa ngwabwo Njambi akatuzibila mema ku mbunge?
Baisalele mubakele mu bundungo ku Ingito, Njambi wamwene bukalu bwabo, co wabazibilile mema ku mbunge. (Kutu 3:7; Isaya 63:9) Netu tukazibila bakwetu ngozi mwafwa batutangele mu cifwa ca Njambi. Akatuzibila mema ku mbunge nameme tuliziba ngwe keti tu ba seo kuli ikeye.—wp18.3, lipu. 8-9.
Bilongesa bya Yesu byakwasele bati banu babyane kaangu?
Bayunda babangi baje bakeleko mu simbu yayoyele Yesu bakele na kaangu. Yesu washongangeyeye banu bapwe ba kulikehesa na kubyana kaangu ka muyati. Washongangeyeye baka-kumukabangeya ngwendi balimone kupwa bandolome.—w18.06, lipu 9-10.
Njambi katabesele Mosesa akobele mu Lifuti lyakulaesele Baisalele. Eyi ñanda itulongesa bika?
Mosesa wapwile kabusamba ka Yehova wakama. (Kwitu 34:10) Ku mamaneselelo a myaka 40 ibakele mu mambo, banu bayayabalele lalo ha kujeneka kukala na mema. Ngeci, Njambi walekele Mosesa ngwendi endeke ku limanya. Oloni Mosesa wapupile ha limanya. Hamo Yehova walubalele mwafwa Mosesa kalingile byamulekele Njambi, co lalo walishangalele ikeye babenya ha cikomokeso calingile. (Kula 20:6-12) Twalilongesa ngwetu kwononoka Yehova na kumushangazala kwapwa kwa seo manene.— w18.07, lipu. 13-14.
Bika twendekela ngwetu twasa kusebuka nga tusompa banu mu cifwa cabo ca hanja?
Kuli byuma bikalingisa banu basompe bakwabo mu cifwa cabo ca hanja: Muyati, cisemwa, buhutu nambe bufuko na myaka yali nayo munu. Kwapwa kwakubwa kumona bakwetu ngwe mwakabamwena Njambi, uje kakele na kaangu. (Vili 10:34, 35)—w18.08, lipu. 8-12.
Baka-Kilisitu ba tukukazi basa kukwasa bati bakwabo?
Muka-Kilisitu wa kakulukazi uje necela cipangi cendi mwafwa ya bukulukazi napu wa seo manene ku mesho a Njambi, co asa kukwasa manene bakwabo. Asa kukwasa baka-kujeneka kukulaela baje banalyambata na Bakaleho ba Yehova, kutakamesa baje banelukila munima, kutwamenena bilongesa bya Mbimbiliya na kulinga byabingi mu cipangi ca kwambulula.—w18.09, lipu. 8-11.
Bikwata muka bili mu cikasha cetu ca bikwata bya kupangesa mu kulongesa?
Muli makadi amwesa bya ha jw.org na mapapelo a kulanyesa banu. Muli lalo matilakiti 8 na Kaposhi ka Kukengela na Toneni! Omu mu cikasha muli lalo mambuloshuwa, mabulu abali a kulilongesa, na mavidiyo awana. Imo yawa mavidiyo ili na mutwe wa kwendeka ngwawo Ki Kabakalañi ha lu Swanela ku Ituta Bibele?—w18.10, lipu. 16.
Muka-Kilisitu asa ‘kulanda bati busunga’ ngwe mubanendeka ku Visimo 23:23?
Kutwesi kulanda busunga na bimbongo. Oloni tunapande kupangesa simbu na nzili yetu mangana tukale nabwo.—w18.11, lipu. 4.
Bika tulilongesa kuli Hoziya mwayoyelelemo na Ngomele?
Ngomele walingile bupangala lwalwingi, oloni Hoziya wamukonekelele na kutwalelelaho kukala nendi mu bulo. Nga munu umo mu bulo bwa baka-Kilisitu nalingi bupangala, mukwabo asa kumusambesa. Nga muka-Kilisitu uje kalingile bupangala alilala na munu yanalyambata nendi uje nalingi bupangala, co namusambesa kasa kutsiya lalo bulo ha mulonga uje wa bupangala.—w18.12, lipu. 13.