NJI muka-kukandelela ndi? Tubaboshe tunapande kulihula eci cihula. Mbimbiliya yapolofwetele ngwayo banu ba matangwa ano bakapwa “baka-kujeneka kukandelela.” (2 Tima 3:2) Hamo mwawanaho laja banu baje bashaka lika kubana nambe kubapangela. Bakalizibi ngwabo kubapandele kukandelela ku byuma bibanabalingila. Kuma mubwahelela kukala na banu ba cifwa eci ndi?

Bangamba ba Yehova bali na kubashongangeya ngwabo, bapwe baka-kukandelela. Tunapande ‘kukandelela ku byuma byoshe.’ (Kolo 3:15; 1 Tesa 5:18) Kupwa baka-kukandelela kwapwa kwakubwa manene. Muli bubwa bwabwingi mu kupwa baka-kukandelela.

Bubwa bumo buli mu kukandelela bunapu kukwasa munu apwe wa kubwahelela. Munu uje akandelela aliziba kubwaha, co lalo uje ibakandelela nendi aliziba kubwaha. Cakumwenako, nga munu amyana cuma, nabwahelela, co namono ngwendi cinamipande. Co lalo wamyaka mbunge. Neni mubwahelela, mwafwa munamono ngweni wamyaka mbunge. Lute nendi wabwahelelele omwo wamwene ngwendi Mbowasi wamwakele mbunge.​—Lute 2:10-13.

Tunapande kukandelela manene kuli Njambi. Njambi natwana byuma byabingi bya ku sipilitu nebi bya ku mubila, co anga acili na kutwanabyo. (Kwitu 8:17, 18; Vili 14:17) Ngeci tunapande kusinganyekesesa ha byuma byabingi byali na kutulingila Njambi. Oku kutukwasa tumone ngwetu Ishamatanga yetu watwaka manene mbunge na kutuzema.​—1 Yowa 4:9.

Tunapande kusinganyekesesa ha byuma byali na kutwana Yehova na kumukandelela mwafwa ya bubwa bwendi. (Myaso 100:4, 5) Libulu limo ngwalyo: “Kumwesa kukandelela kulingisa banu bapwe ba kubwahelela.”

Bubwa bukwabo buli mu kukandelela bunapu kukwasa banu bakanyamese busamba bwabo. Tubaboshe twashaka kutushangazala. Nga mushangazala mukweni ha byuma byabibwa byanalingi, co busamba bweni bukanyama. (Loma 16:3, 4) Kutundaho lalo, nga mupwa baka-kukandelela kumipwila kwakwasi kukwasa bakweni. Nga bakweni bamimwesa cizemo neni muliziba ngweni munapande kubamwesaco. Kukwasa bakwetu kutulingisa tupwe ba kubwahelela. Yesu wendekele ngwendi: “Muli kujolela kwakama manene mu kwana kutubakana mu kutambula.”​—Vili 20:35.

Robert Emmons, mukulunu umo ha Yuniveziti ya ku California, uje walilongesa bya kukandelela, wendekele ngwendi: “Munu apwa muka-kukandelela nga azibuka ngwendi yetu banu twatonda bukwasi ku bakwetu. Simbu imo yetu tubana, simbu ikwabo bakebo batwana.” Tubaboshe twakulahela bakwetu batukwase mu byuma bimo mangana tubwahelele na kutwalelelaho kuyoya. Cakumwenako, banasa kutwana byakulya nambe kutukwasa nga tubinja. (1 Koli 12:21) Munu uje ashangazala bakwabo akandelela ku byuma bibanamulingila. Neni muli na kukandelela bakweni ha byuma bibali na kumilingila ndi?

Bubwa bukwabo buli mu kukandelela bunapu kumikwasa musinganyeke lika ha byuma byabibwa keti byabibi. Twasa kwendeka ngwetu bwongo bweni bupanga ngwe  musalo. Kulumbununa ngwabo mutundisa mbunge ku byuma bimo na kwaka mbunge ku byuma byeka. Oku kumilingisa mwake manene mbunge ku byuma byabibwa na kujeneka kwaka manene mbunge ku bukalu. Kupwa baka-kukandelela kumikwasa mulimwene bubwa bwabwingi manene. Nga mukandelela ha cuma cimo, co mulinga byatushongangeyeye kapositolo Paulu. Wendekele ngwendi: “Joleleni muli Mwene simbu yoshe.”​—Fili 4:4.

Kupwa baka-kukandelela kumikwasa mujeneke kwaka mbunge ku byuma bije bimizeyesa. Munu kasa kumwesa kukandelela nga nalubala, nazeye nambe nga ali na cipululu. Baka-kukandelela kubesi kwaka manene mbunge ku bufuko. Bakajauka na byuma bibalinabyo, co kubesi kushakezeka byuma byabingi.​—Fili 4:12.

Ha kupwa muka-Kilistu, Satana ashaka ngwendi mupokoke mbunge na kuzeya mwafwa ya bukalu bumuliwana nabwo muno mu kaye. Ashaka ngwendi simbu yoshe mupwe baka-kuyayabala. Nga cikeco cifwa ceni, co kumikaluwila kwambulula muzimbu waubwa. Kukandelela kwendelela na bushuka bwa ku sipilitu. Cakumwenako, tuli na kubwahelela ha byuma byabibwa byanatwana Njambi, co lalo tuli na likulahelo mu byuma byoshe byanatukulahesa.​—Ngala 5:22, 23.

Ha kupwa ngamba ya Yehova, hamo neni mwataba byuma bitunendeka muno mu cilongesa ha ñanda ya kukandelela. Nameme ngoco, kukandelela na kwaka lika mbunge ku byuma byabibwa kukwesi kulizila ngoco. Oloni keti muzeye. Mwasa kukala na mbunge ya kukandelela. Ha litangwa na litangwa, singanyekeseseni ha byuma bimo mu buyoye bweni bije bimwasa kukandelela. Nga simbu yoshe musinganyekesesa ha byuma bimo, co kumipwila kwakwasi kukandelela. Oku kumilingisa mupwe ba kubwahelela kutubakana baje bakaka lika mana ku bukalu. Akeni mbunge ku byuma byanalingi Njambi nambe bibanalingi bakweni bije byasa kumitakamesa na kumizibisa kubwaha. Mwasa kubisoneka. Sonekeni byuma bibali nambe bitatu bije binamizibisa kubwaha ha litangwa olyo.

Baka-kutondesesa banawana ngwabo, “kukandelela simbu yoshe kwasa kutengulula bwongo mangana businganyeke lika byuma byabibwa.” Muka-kukandelela wapwa wa kubwahelela. Ngeci singanyekeni ha byuma byeni byabibwa, akeni mbunge ku byuma bije bitakamesa, co lilongeseni kupwa baka-kukandelela. “Kandeleleni kuli Shukulu Kalunga, omwo ikeye wapwa wamubwa.” Co ‘kandeleleni ku byuma byoshe.’​—1 Mizi 16:34; 1 Tesa 5:18.