Oloni imwesa byuma bilingisa mumbanda ajeneke mulonga. Tuyeni tuzibisise mwamubwa eyi ñanda.

Ku Kwituluka mu Mashiko 22:23, 24, banendeka hali munalume uje alala mumbanda ibanendekeya, yanawana “mu nganda.” Uje munalume wakele na mulonga wa bukoi, mwafwa uje munakazi bamumwene ngwe nashomboka. Batico uje munakazi? Wonowele kutambeka mu nganda. Ngwe watambekele, banu ngwe bezile nakumwamena. Oloni katambekele. Nendi wakele na mulonga wa bukoi, ngeci boshe babatsiile.

Lishiko lyendekele ha cifwa cikwabo lalo. Ngwalyo: “Nga munalume ali mu shwata, co aliwana na mumbanda uje banendekeya laja kuli munalume weka, co uje munalume amuwisa na kulinga nendi bubi, co ha ñanda eyi bakatsiye lika munalume. Keti bakalinge cuma cimo kuli uje mumbanda embwe, omwo ikeye kalingile bubi buje bwanapande kutsila. Co ñanda eyi inalifu ngwe omwo munalume akatukila kulwisa mukwabo na kumutsiya. Omwo uje munalume wawanene uje mumbanda wakwendekeya mu shwata, co nameme uje mumbanda watambekele ngeci bamukwase, oloni naumo wahi wakeleko na kumukwasa.”​—Kwitu 22:25-27.

Ebi bikebyo byalingisile maako basinganyeke ngwabo mumbanda “watambekele ngeci bamukwase, oloni naumo wahi wakeleko na kumukwasa.” Ngeci, ikeye kalingile bukoi. Oloni munalume wakele na mulonga wa kupika munakazi nou wa bukoi, mwafwa uje mumbanda ibendekeyeye ‘wamuwisile na kulinga nendi bubi.’

Lishiko lyendekele byuma byalingisile mumbanda ajeneke mulonga, co lyendekele lalo hali munalume uje wakele na mulonga wa kupika munakazi na kulinga bukoi. Twazibuka ngwetu maako ‘behwisisile mwamubwa’ na kwakula ñanda kwesekesa na mashiko a Njambi.​—Kwitu 13:14; 17:4; Kutu 20:14.