1-2. Bitunendeka hali Angelito bitushongangeya tulinge bika?

BISEMI beni bapwa Bakaleho ba Yehova ndi? Nga mukemwo, co zibukeni ngweni kumwasa kupwa kabusamba ka Yehova mwafwa lika bisemi beni banapu babusamba bendi. Munapande kukanyamesa busamba bweni na Yehova nameme bisemi beni bali na kupangela Njambi nambe embwe.

² Tusimutwiyeni hali ndolome Angelito. Baka-naanga yendi bapwa Bakaleho ba Yehova. Oloni mwapwile mwanike, kalizibile ngwendi wapwile kabusamba ka Njambi. Wendekele ngwendi: “Njakele na kutembwinina lika bibakele na kulinga baka-naanga yange, keti kupangela Yehova embwe.” Mukwita kwa simbu, Angelito washangumukile kutanda Lijwi lya Njambi na kusinganyekesesaho, co wakele na kulombela kuli Yehova kushwa kumo. Bika byatundilemo? Angelito ngwendi: “Njalilongesele ngwange kuzibuka mwamubwa Yehova kukekwo kunjikwasa njikanyamese busamba bwange nendi.” Bitunendeka hali Angelito binalingisa tulihule ebi bihula: Kuliseza muka kuli mu kuzibuka byuma byabindondo hali Yehova na kumuzibuka mwamubwa? Bika bitunapande kulinga mangana tuzibuke mwamubwa Yehova?

3. Kuliseza muka kuli mu kuzibuka byuma byabindondo hali Yehova na kumuzibuka mwamubwa?

 ³ Nga tutanekeya lizina lya Njambi nambe kuzibuka byuma bimo byanendeka Njambi nambe byanalingi, co twasa kusinganyeka ngwetu tuzibuka Yehova. Oloni kuli byuma byabingi byalibungila mu kuzibuka Yehova mwamubwa. Tunapande kuwana simbu ya kulilongesa bya Yehova na bifwa byendi. Oku kutukwasa tuzibisise byuma bikamulingisa endeke byuma bimo nambe kulinga byuma bimo. Kutukwasa lalo tuzibuke indi Yehova ali na kuziba kubwaha ha byuma bitusinganyeka nebi bitulinga. Nga tunazibuka byuma bizibisa Yehova kubwaha, co tunapande kubilinga.

4. Kusimutwiya ha banu ba mu Mbimbiliya kutukwasa bati?

⁴ Banu basa kutushendumuna omwo tupangela Yehova, co lalo basa kutulwisa manene nga tushangumuka kukunguluka. Oloni nga tukulahela Yehova, co katuseze. Co lalo busamba bwetu na Njambi butwalelelaho kukanyama. Twasa kuzibuka mwamubwa Yehova ndi? Eyo. Byalingile Mosesa na Mwene Ndabiti bimwesa ngwabyo twasa kuzibuka mwamubwa Yehova. Tusimutwiyeni ha byuma bibalingile mangana tuwane bikumbululo ku bihula ebi bibali: Bazibukile bati Yehova? Bika bitulilongesa ku myanja yabo?

5. Mosesa walyangwilile kulinga bika?

⁵ Mosesa walyangwilile kupangela Njambi. Mwakele na myaka 40, walyangwilile kulikwatasana na banu ba Njambi, co wabyanene kumutumbula “mutekulu wa Falo.” (Heve 11:24) Mosesa katondele lutsimo. Walikwatasanene na Baisalele baje bapwile bindungo mu Ingito nameme wazibukile ngwendi alubalesa Falo, mwene wa nzili uje ibamwene banu ngwe njambi. Oku kumwesa ngwabo Mosesa wakele na likulahelo lya kukanyama. Wakulahelele Yehova, mukemwo busamba bwendi na Yehova bwatwaleleleho kukanyama.​—Visi 3:5.

6. Bika bitulilongesa kuli Mosesa?

⁶ Bika bitulilongesako? Tubaboshe tunapande kulyangwila kupangela Njambi na kulikwatasana na banu bendi ngwe mwalingile Mosesa. Tunapande kukala na sipilitu ya kulyana mangana tupangele Yehova nameme banu batulwisa. Co lalo tunapande kukulahela ngwetu Tate yetu wa mwilu atukwasa.

7-8. Mosesa watwaleleleho kulilongesa bika?

⁷ Mosesa watwaleleleho kulilongesa bifwa bya Yehova na kulinga cizango cendi. Cakumwenako, Mosesa wazibile lyoba mubamulekele ngwabo akatundise Baisalele mu bundungo, co welukilile kuleka Yehova ngwendi kasa kupanga cije cipangi. Njambi wazibilile Mosesa mema ku mbunge, co wamukwasele. (Kutu 4:10-16) Ngeci, Mosesa wasele kuya kuli Falo na kukamuleka muzimbu wa Yehova wa kutewesa. Mosesa walimwenenene Yehova mwapangeselele nzili yendi omwo wobwele Baisalele na kunyongesa Falo na banu bendi mu Kalunga-ndonga ya Kubenga.​—Kutu 14:26-31; Myaso 136:15.

⁸ Baisalele mubabatwamenene kuli Mosesa kutunda mu Ingito, batwaleleleho kuyayabala. Nameme ngoco, Mosesa wamwene Yehova mwamweselelemo mbunge ya kubandamena hali banu bendi baje baapatwile  mu bundungo. (Myaso 78:40-43) Wamwene lalo Yehova mwalikeheselele omwo watengulwile biyongola byendi na kulinga byuma byalombele Mosesa.​—Kutu 32:9-14.

9. Kwesekesa na Vahevelu 11:27, busamba bwa Yehova na Mosesa bwakanyamene bati?

⁹ Hanima ya kupatula Baisalele, Mosesa wakanyamesele busamba bwendi na Yehova, ngeci kwafwile lika ngwe wamwene Ishe wa mwilu. (Tandeni Vahevelu 11:27.) Mbimbiliya inamwesa mubwakanyamenene busamba bwabo. Ngwayo: “Shukulu Kalunga wakele na kwendeka na Mosesa mesho na mesho, ngwe munu ali na kwendeka na musamba wendi.”​—Kutu 33:11.

10. Bika bitunapande kulinga mangana tuzibuke mwamubwa Yehova?

¹⁰ Bika bitulilongesako? Nga tushaka kuzibuka mwamubwa Yehova, co tunapande kulilongesa bifwa byendi na kulinga cizango cendi. Yehova ashaka ngwendi “banu boshe boboke na kweta kukuzibuka busunga.” (1 Tima 2:3, 4) Ngila imo itwasa kulinga cizango ca Njambi, inapu kulongesa banu bya Yehova.

11. Kulongesa bakwetu bya Yehova kutukwasa bati tumuzibuke mwamubwa?

¹¹ Kakangi nga tulongesa bakwetu bya Yehova, co netu tumuzibuka mwamubwa. Cakumwenako, tuli na kumona Yehova mwali na kuzibila banu mema ku mbunge omwo ali na kututwamenena tuwane banu ba bimbunge byabibwa. (Yowa 6:44; Vili 13:48) Tuli na kumona nzili ya Lijwi lya Njambi muili na kukwasela banu batulilongesa nabo Mbimbiliya becele bilinga byabibi. Ngeci bali na kushulula bunu bwa laja na kuzala bunu bwabuha. (Kolo 3:9, 10) Co lalo tuli na kumona Njambi mwalinakumweselamo mbunge ya kubandamena, mwafwa nana banu simbu ya kubalongesa mangana bakoboke.​—Loma 10:13-15.

12. Kwesekesa na mukanda wa Kutuuka 33:13, bika byalombele Mosesa, co mwafwa bika?

¹² Mosesa wamwene busamba bwendi na Yehova kupwa cuma ca seho. Yehova wapangesele Mosesa mu kulinga byuma bya kukomokesa, ngeci wazibukile mwamubwa Yehova. Nameme ngoco Mosesa walombele Yehova ngwendi amukwase kumuzibuka mwamubwa. (Tandeni Kutuuka 33:13.) Mosesa wakele na myaka 80 mwalombele ngoco, oloni wamwene ngwendi kwakele byabingi byapandele kulilongesa kuli Ishe wa mwilu.

13. Ngila muka imo itwasa kumweselamo ngwetu twamona busamba bwetu na Njambi kupwa cuma ca seho?

¹³ Bika bitulilongesako? Nameme tunapangela Yehova simbu yailaha, tunapande kumona busamba bwetu na Njambi kupwa cuma ca seho. Ngila imo itwasa kumweselamo ngoco inapu kulombela kuli Njambi.

14. Lilombelo litukwasa bati tukanyamese busamba bwetu na Yehova?

¹⁴ Nga mushaka ngweni mukanyamese busamba bweni na mukweni, munapande kusimutwiya nendi simbu yoshe. Ngeci, simbu yoshe simutwiyeni na Njambi mu lilombelo, mulekeni byoshe bili ku mbunge yeni. (Efeso 6:18) Krista uje wakala ku Turkey wendekele ngwendi: “Munjikaleke Yehova bili ku mbunge yange na kumona mwali na kunjikwaselamo, cizemo cange kuli ikeye cikapu cakama, co njikamukulahela manene. Kumona Yehova mwali na kukumbulwila malombelo ange, kunanjikwasa njimone Yehova kupwa Tate na kabusamba kange.”

15. Yehova watumbwile bati Mwene Ndabiti?

¹⁵ Mwene Ndabiti wasemukilile mu naanga ije yalemesele Yehova Njambi. Ndabiti kalemesele Njambi mu kutembwinina lika baka-naanga yendi embwe. Oloni wakanyamesele busamba bwendi na Njambi, ngeci Yehova wamuzemene manene. Yehova watumbwile Ndabiti ngwendi “munalume injazema.” (Vili 13:22) Ndabiti wakanyamesele bati busamba bwendi na Yehova?

16. Bika byalilongesele Ndabiti hali Yehova mwakele na kutala byuma byakutanga?

¹⁶ Ndabiti walilongesele bya Yehova ku byuma byakutanga. Te acili mwanike wakele na kunyunga bimanga ba ishe. Hamo hakeho hashangumukilile kusinganyekesesa ha byuma byanatanga Yehova. Cakumwenako, Ndabiti mwakele na kutala mwilu butsiki, wakele na kumona bingongonosi byabingi. Co wasinganyekesesele ha bifwa bya uje watangele bingongonosi. Ngeci wasonekele ngwendi: ‘Melu ambulula bumpau bwa Njambi. Bukambwila busholola bipangi bya maboko endi.’ (Myaso 19:1, 2) Mwasinganyekesesele mubanatangelamo banu, wanangukile ngwendi Yehova wapwa muka-mana. (Myaso 139:14) Co lalo mwasinganyekesesele ha bipangi bya Yehova, walimwene kupwa wamundondo.

17. Bika bitulilongesa nga tusinganyekesesa ha byuma byakutanga?

¹⁷ Bika bitulilongesako? Tulilongeseni ku byuma byakutanga. Singanyekeseseni ha byuma byabibwa byanatanga Yehova. Ha litangwa na litangwa, singanyekeseseni ha byuma byakutanga bya kufwa ngwe miti, tusitu na banu mangana mumone mubyasa kumilongesela bya Yehova. Nga mulinga ngoco, co litangwa na litangwa mulilongesa byabingi hali Ishweni wa cizemo. (Loma 1:20) Co lalo mumuzema manene.

18. Kwesekesa na Myaso 18, bika byanangukile Ndabiti?

¹⁸ Ndabiti wanangukile ngwendi Yehova wakele na kumukwasa. Cakumwenako, mwanyungililile bimanga ba ishe ku ndumba na mbeya, wanangukile ngwendi Yehova ikeye wamukwasele atsiye baje bikashama. Mwahyanene Ngolyata, Ndabiti wamwene ngwendi Yehova ikeye wamutwamenenene. (1 Samwe 17:37) Co lalo Ndabiti mwatewele Mwene Saulu, wazibukile ngwendi Yehova ikeye wamwobwele. (Myaso 18, majwi a helu ya capita) Ngwe wapwile wa kulyalesa, ngwe wasinganyekele ngwendi wasele kulinga byoshe bije mu nzili yendi. Oloni wapwile wa kulikehesa, ngeci wazibukile ngwendi Yehova ikeye wamukwasele.​—Myaso 138:6.

19. Bika bitulilongesa kuli Ndabiti?

¹⁹ Bika bitulilongesako? Kuli byuma bikwabo bitunapande kulinga keti kulomba lika bukwasi kuli Yehova. Tunapande kunanguka simbu yatukwasa, nomu mwatukwaselamo. Nga tulikehesa, co tunanguka ngwetu kutwasa kulinga byuma byoshe mu nzili yetu kubanga Yehova atukwase. Nga tunanguka mwalinatukwasela Yehova, co busamba bwetu nendi bukanyama. Ndolome Isaac wa ku Fiji walimwenenene busunga bwa awa majwi. Wendekele ngwendi: “Kutunda lika hanjashangumukilile kulilongesa Mbimbiliya kweta na lelo, njalimwena mwananjikwasela Yehova. Ngeci, busamba bwange nendi bunakanyama.”

20. Bika bitulilongesa ku busamba bwa Ndabiti na Njambi?

²⁰ Ndabiti watembwininine bifwa bya  Yehova. Yehova watutangele na cashu ca kutembwinina bifwa byendi. (Kusha 1:26) Nga tulilongesa manene bifwa bya Yehova, co tumutembwinina. Ndabiti wazibukile mwamubwa Ishe wa mwilu, ngeci wamutembwininine. Cakumwenako, Ndabiti walingile bubi kuli Yehova mwalingile bukoi na Mbateshemba na kutsiisisa munalume wendi. (2 Samwe 11:1-4, 15) Oloni Yehova wamutetelele, mwafwa nendi wakele na kutetela bakwabo. Ndabiti wazemene manene Yehova, ngeci Baisalele bazemene manene Ndabiti. Yehova walekele lalo bimyene ngwendi batembwinine bifwa byabibwa bya Ndabiti.​—1 Vimye 15:11; 2 Vimye 14:1-3.

21. Kwesekesa na Efeso 4:24 na 5:1, bika bitundamo nga tutembwinina Njambi?

²¹ Bika bitulilongesako? Tunapande kutembwinina Njambi. Kulinga ngoco, kutukwasa tubezike na kumuzibuka mwamubwa. Nga tumutembwinina, co tumwesa ngwetu tubana bendi.​—Tandeni Efeso 4:24; 5:1.

22-23. Bika bitundamo nga tupangesa bitulilongesa hali Yehova?

²² Ngwe mutunamwena, twasa kulilongesa bya Yehova ku byuma byakutanga na mu Lijwi lyendi, Mbimbiliya. Mu Mbimbiliya muli bangamba ba Njambi babangi ba kulongwa ba kufwa ngwe Ndabiti na Mosesa, baje batwasa kutembwinina. Yehova natuleke bitunapande kulinga. Yetuoni tunapande kulilongesa byendi mangana tumuzibuke mwamubwa.

²³ Tulilongesa bya Yehova ku myaka yoshe. (Kwambu 3:11) Cuma ca seho keti kuzibuka byuma byabingi hali Njambi, oloni seho ili ha kulinga byuma bituzibuka. Tate yetu wa cizemo ashwenya kuli yetu nga tupangesa bitulilongesa na kumutembwinina. (Yako 4:8) Yehova natukulahesa mu Lijwi lyendi ngwendi katuseze.