1-2. (a) Cilika muka cibakalingi banu bamo? (Taleni cipalo ca “Cilika ca Mwaka wa Kulitila Capwile Cika?”) (b) Bika byendekele Yesu ku Luka 4:16-18?

MU MAFUTI amo, bakalingi cilika nga mwene wa munalume nambe wa munakazi nayulu myaka 50. Kakangi ou mwaka wa bu 50, bakautumbula ngwabo Mwaka wa Kulitila wa mwene. Banu bakalingi eci cilika ha litangwa limo, nambe calumingo cimo, nambe kutubakana. Oloni eci cilika nga cinahu, bakebala bwasi ngwabo banakele na cilika.

² Tusimutwiya ha Cilika ca Mwaka wa Kulitila cibakele na kulinga Baisalele ha mwaka wa bu 50. Eci Cilika calingisile Baisalele bapatuke. Bika bitunapande kulilongesela byeci cilika? Mwafwa citwanukisa byakatulingila Yehova kulutwe. Akatupatula ku myaka yoshe. Oloni na simbu ino Yehova ali na kutupatula. Oku kupatuka kukekwo kwekendele Yesu.​—Tandeni Luka 4:16-18.

3. Kwesekesa na Valevi 25:8-12, bukwasi muka bubawanene Baisalele ha Cilika ca Mwaka wa Kulitila?

³ Tuzibisisa bwino byalumbunwine Yesu mwendekele bya kupatuka nga tusimutwiya tahi bya Cilika ca Mwaka wa Kulitila cabwahesele Njambi ku banu bendi ba kusañulu. Yehova walekele Baisalele ngwendi: “Mu ngila eyi mukemwo mukajelesa mwaka wa [bu 50] na kwambulula kupatuka kwa banu boshe bali mu lifuti. Co ha simbu ya mwaka ou, bufuko bwoshe buje balandesele bakabwilwisile kuli babenyabwo, nambe kuli batekulwila bendi. Co woshe uje walandesele ndungo, co uje ndungo akeluke ku naanga yendi.” (Tandeni Valevi 25:8-12.) Mu cilongesa cinahu, tunasimutwiiye bukwasi bubawanene Baisalele ha litangwa lya Sabata. Co bukwasi muka  bubawanene Baisalele ha Cilika ca Mwaka wa Kulitila? Cakumwenako, Kaisalele uje wonowele kufweta mukuli, bamunyekele libu lyendi mangana afwete uje mukuli. Oloni ha Cilika ca Mwaka wa Kulitila, lije libu lyapandele kwiluka kuli ikeye. Ngeci welukile lalo ha libu lyendi, co lije libu lyapwile buswana bwa bana bendi. Bisimbu bimo, munu uje wakele na mikuli yaingi, walandesele munendi, nambe kulilandesa ikeye babenya mu bundungo mangana afwete mikuli. Ha Cilika ca Mwaka wa Kulitila uje ndungo ‘welukile ku naanga yendi.’ Ngeci, kukwakele munu uje wapwile ndungo ku myaka yoshe. Oku kumwesa ngwabo Yehova wakele manene banu mbunge.

4-5. Bika bikunapwila kwa seho kulilongesa bya Cilika ca Mwaka wa Kulitila matangwa ano?

⁴ Bukwasi muka bukwabo bubawanene Baisalele ha Cilika ca Mwaka wa Kulitila? Yehova wendekele ngwendi: “Kumukakala umo wa hali banu beni akapwe kahutu embwe, omwo Shukulu Kalunga Njambi yeni akamibezikisa mu lifuti lije lyakamyana.” (Kwitu 15:4) Oku kunaliseze nebi bili na kulingiwa mu kaye ano matangwa, mwafwa baka-kufuka bali na kufukilako, tuhutu bali na kuhutuwilako.

⁵ Ha kupwa baka-Kilistu kutwesi mwisi ya mashiko a Mosesa. Kulumbununa ngwabo kutwesi na kukabangeya mashiko a ha Cilika ca Mwaka wa Kulitila a kutundisa banu mu bundungo, kubakonekela mikuli yabo na kubelwisila libu lyabo. (Loma 7:4; 10:4; Efeso 2:15) Oloni kunapu kwa seho kulilongesa bya Cilika ca Mwaka wa Kulitila. Mwafwa bika? Mwafwa tupwa ba kupatuka, co lalo eci cilika citwanukisa omwo Yehova wapatwilile Baisalele.

6. Banu batonda kubapatula ku bika?

⁶ Tubaboshe tutonda kutupatula, mwafwa tuli mu bundungo bwa bubi. Twapwa baka-bubi, ngeci tuli na kukulubala, kubinja na kutsa. Nga tulimona mu ciponi nambe nga tunai ku cipatela mukutusaka, tukamono ngwetu awa majwi anapu a busunga. Co lalo, tukalizibi kuzeya nga tunalingi bubi.  Kapositolo Paulu wendekele ngwendi wakele mu ‘bundungo bwa lishiko lya bubi lije lyakele mu mubila wendi.’ Wendekele lalo ngwendi: “Yange munu wa kubindama. Iyajo akanjamena ku mubila ou wa kutsa?”​—Loma 7:23, 24.

7. Bika byapolofwetele Isaya ha kupatuka?

⁷ Twabezika, mwafwa Njambi wabwahesele ngila ya kutupatula ku bubi. Yesu ikeye nasiwisa eyi ngila ya kutupatula. Ha myaka ya kutubakana 700 kunima, Yesu te kanda aije hano hasi, kapolofweto Isaya wapolofwetele bya kupatuka kwakama kuje kutubakana kupatuka kubawanene Baisalele ha Cilika ca Mwaka wa Kulitila. Isaya wasonekele ngwendi: “Shukulu Kalunga wa Hakamwa ya Byoshe nanjishulisa na [sipilitu yendi.] Nanjangula na kunjituma mu kutwala muzimbu waubwa kuli tuhutu. Mu kukolesa baka-bimbunge bya kupokoka. Mu kwambulwila binzinda kupatuka.” (Isaya 61:1) Obu bupolofweto bupanga kuli beya?

8. Bupolofweto bwa Isaya buje bwendeka bya kupatuka bwenikile kuli iya?

⁸ Obu bupolofweto bwashangumukile kulishulisilila omwo Yesu washangumukile cipangi cendi ca kwambulula. Yesu mwaile ku sinangonge ya mu mbongi ya Nazaleta, wakatandele majwi aje bene asonekele Isaya. Watandele majwi aje enikile kuli ikeye. Aje majwi ngwawo: ‘Sipilitu ya Shukulu Kalunga ili muli yange, omwo nanjangula kwambulula biñanda byabibwa kuli tuhutu. Nanjitumu kwambulula kupatuka kuli binzinda, na kutonesa tupuputwa ngeci bamone, na kupatula baje babali na kuyandesa, na kwambulula ngeci simbu inete omwo Shukulu Kalunga akapatula banu bendi.’ (Luka 4:16-19) Yesu washulisilile bati obu bupolofweto?

9. Banu babangi ba mu simbu ya Yesu batondele kubapatula kuka?

⁹ Mu cita ca myaka ca kulibanga, banu bashangumukile kupatuka ngwe mwapolofwetele Isaya na muje mwatandelele Yesu. Tutaba ngoco, mwafwa Yesu wendekele ngwendi: ‘Eci Cisoneka, lelo cinapwisamo ku mesho eni.’ (Luka 4:21) Banu babangi baje bazibile majwi a Yesu, hamo bakulahelele ngwabo bapatuka ku ciyulo ca Baloma. Hamo balizibile ngwe mubalizibilile banalume babali baje bendekele ngwabo: “Co twakele na [lilabelelo] ngeci ikeye akapatula Isalele.” (Luka 24:13, 21) Tuzibuka ngwetu Yesu kashongangeyeye baka-kumukabangeya batengulukile ciyulo ca Baloma cije ca bayandesele manene.  Oloni wabalekele ngwendi bane “Sezale bije binakundama kuli Sezale.” (Mateo 22:21) Co Yesu wapatwile bati banu ha simbu ije?

10. Yesu wapatwile banu ku bika?

¹⁰ Muna Njambi wezile na kupatula banu ku byuma bibali. Ca kulibanga, Yesu wapatwile banu ku bilongesa bya makuli bibalongesele bantwama ba bulombelo. Ha simbu ije, Bayunda babangi bakele mu bundungo bwa bisemwa, co lalo bakulahelele byuma bya makuli. (Mateo 5:31-37; 15:1-11) Baje balishashele ngwabo balongesele bya Njambi, na bakebo lalo bapwile tupuputwa. Babyanene Mesiya, co lalo babyanene busunga bwabalongesele, ngeci batwaleleleho kukala mu lisusulungu, co bubi bwabo kubabusambesele. (Yowa 9:1, 14-16, 35-41) Yesu wamwesele banu ba kulikehesa mwakutundila ku bilongesa bya makuli, kwitila mu bilongesa byendi bya busunga na bilinga byendi byabibwa.​—Mako 1:22; 2:23–3:5.

11. Yesu napatula banu ku cuma muka ca mu cibali?

¹¹ Ca mu cibali, Yesu wapatwile banu ku bundungo bwa bubi. Njambi asa kusambesa bubi bwa baje bali na likulahelo mu ñombelo yanene Yesu na kumwesa lije likulahelo mu bilinga byabo. (Heve 10:12-18) Yesu wendekele ngwendi: “Nga Mwana amipatula, mwa busunga mukapwa baka-kupatuka.” (Yowa 8:36) Kuje kupatuka kwatubakanene kuje kubawanene Baisalele ha Cilika ca Mwaka wa Kulitila. Cakumwenako, munu uje wapatukile ha Cilika ca Mwaka wa Kulitila wasele kupwa ndungo lalo, co mu kwita kwa simbu, watsile. Oloni kupatuka kubawana banu muli Yesu kunapu kwa myaka yoshe.

12. Beya ba kulibanga kuwana kupatuka kuje kwendekele Yesu?

¹² Ha litangwa lya Pentekosita ya 33 C.E., Yehova wapangesele sipilitu ya kujela mu kubwabesa tupositolo na banalume na banakazi ba kulongwa. Wabangwile kupwa bana bendi, co omwo batsa basanguka na kuya mwilu mangana bakayule hamo na Yesu. (Loma 8:2, 15-17) Aba bakebo ba kulibanga kuwana kupatuka kuje kwendekele Yesu ku sinangonge ya mu Nazaleta. Baje banalume na banakazi kubakele lalo mu bundungo bwa bilongesa bya makuli na bilika bibalongesele bantwama ba bulombelo bije kubyesi mu lijwi lya Njambi. Co lalo Njambi wabapatwile ku bubi buje butwala ku kutsa. Yehova washangumukile kupatula banu mu 33 C.E., omwo wabwabesele baka-kukabangeya Kilistu. Oku kupatula kukahwa kumamaneselelo a Ciyulo ca Yesu ca Myaka 1000. Byuma muka byabibwa  bilingiwa kutunda hano, kweta na kumamaneselelo a myaka 1000?

13-14. Kutundisako baka-Kilistu ba kubwabesa, beya lalo banawana kupatuka kwambulwile Yesu?

¹³ Banu babangi baje bali na kupangela Njambi ba kutunda ku miyati yoshe, banapu “bimanga beka.” (Yowa 10:16) Njambi kabangwile ngwendi bakayule na Yesu mwilu. Oloni Mbimbiliya ngwayo bakayoya hano hasi myaka yoshe. Neni likelyo likulahelo lyeni ndi?

¹⁴ Neni muli na kulikuwa byuma byabibwa bibali na kulikuwa bakubwabesa. Mwasa kulomba Njambi amikonekele ku bubi bweni, mwafwa muli na likulahelo mu ñombelo ya Yesu. Oku kumilingisa mukale na citakutaku cacibwa ku mesho a Njambi na kupwa babusamba bendi. (Efeso 1:7; Kujo 7:14, 15) Kuli bubwa bukwabo bumunawana, munapatuka ku bilongesa bya makuli. Yesu wendekele ngwendi: “mukazibuka busunga, co busunga bukamipatula.” (Yowa 8:32) Twabezika manene kuwana oku kupatuka.

15. Kusokoka muka na bibezikiso muka bitunabandamena kulutwe?

¹⁵ Twabandamena kusokoka kwakama. Yesu ololo anyongesa bulombelo bwa makuli na bifulumende bya banu. Njambi akanyungilila banu ba mu “mbunga yakama” baje bali na kumupangela, co bakalikuwa bibezikiso  hano hasi mu Paladaisi. (Kujo 7:9, 14) Banu babangi bakasanguka, co bakapatuka ku byuma byabibi byoshe bije binatundu mu bubi bwa Adama.​—Vili 24:15.

16. Kupatuka muka kwakama kutunabandamena kulutwe?

¹⁶ Kilistu na baje bakayula nabo ha myaka 1,000, bakakwasa banu kupwa ba kulumbunuka ku mubila na ku sipilitu. Simbu ya kwilwisa banu bapwe ba kulumbunuka na kubapatula, ikapwa ngwe Cilika ca Mwaka wa Kulitila ca mu simbu ya Baisalele. Ngeci, banu boshe baje bakapangela Yehova hano hasi bakapwa ba kulumbunuka, co kubakapu baka-bubi lalo.

17. Bika biunamwesa mukanda wa Isaya 65:21-23, bije bikalingiwa ku banu ba Njambi? (Taleni cikupulo ca ha liputa lya kulibanga.)

¹⁷ Tandeni Isaya 65:21-23. Bupolofweto buli oku ku mukanda bunamwesa mubukafwila buyoye hano hasi. Oku kumwesa ngwabo kutukatumama lika ngoco, oloni tukapanga. Mbimbiliya imwesa ngwayo banu ba Njambi ha simbu oyo bakalikuwa kupanga bipangi byabibwa. Twakulahela ngwetu kulutwe ‘bya kutanga byoshe bikapatuka ku bundungo bwa kutsa, co bikakala mu bumpau bwa kupatuka kwa bana ba Njambi.’​—Loma 8:21.

18. Mwafwa bika twakulahela ngwetu tukabwahelela manene kulutwe?

¹⁸ Yehova walekele Baisalele ngwendi bawane simbu ya kupanga neyi ya kuhwima. Co na mu Ciyulo ca Yesu ca Myaka 1000, banu ba Njambi bakawana simbu ya kupanga neyi ya kuhwima. Co lalo bakawana simbu ya kulemesa Njambi. Kulemesa Njambi kwapwa kwa seho, mwafwa kulingisa banu babwahelele. Mu kaye kakaha banu bakawana simbu yaingi ya kulemesa Njambi. Mu Ciyulo ca Yesu ca Myaka 1000, tubaboshe tukajolela, mwafwa tukakala na bipangi byabibwa, co lalo tukapangela Njambi.