Embwe, Mbimbiliya na mabulu aje endeka biñanda bya kusañulu kubimwesa ngoco.

Mubananungulwila eyi vesi mu Bimbimbiliya byabingi kunalingisa banu bamo basinganyeke ngwabo mu simbu ya tupositolo, banu bamo bakele na kubambwitika kwimanenako batsi. Cakumwenako, Mbimbiliya ya Libulu lya Shukulu Kalunga ngwayo: “Ngeci bene, bikajo banu bali na kubambwitika hali babushoko bwabo baje batsa laja?”

Tumoneni bibendekele baka-kulilongesa bya Mbimbiliya babali. Dr. Gregory Lockwood wendekele ngwendi kukwesi bukaleho bwa mu Mbimbiliya nambe mu mabulu aje endeka biñanda bya kusañulu buje bumwesa ngwabwo banu bakele na kubambwitika kwimanenako batsi. Co Pulofesa Gordon D. Fee, wasonekele ngwendi Mbimbiliya nambe mabulu a kusañulu kubyamwesele ngwabyo kwakele cimbwitiko ca cifwa eci. Wendekele lalo ngwendi mikanda ya Lizibasano Lyaliha kuyendekele byei ñanda, co kukwesi bukaleho bumwesa ngwabwo baka-Kilistu ba kulibanga nambe baka-maceci aje akeleko munima lika ya kutsa kwa tupositolo bakele na kumbwitika banu mu ngila eyi.

Mbimbiliya inamwesa ngwayo baka-kukabangeya Yesu bapandele ‘kuya ku miyati yoshe ya banu na kubapwisa bandongesi bendi na kubambwitika na kubalongesa kwononoka byuma byoshe bije byabashikile.’ (Mateo 28:19, 20) Simbu kanda munu bamumbwitike, wapandele kulilongesa bya Njambi na kubikulahela na kwononoka Yehova na Munendi. Munu uje natsi, kasa kulinga ngoco oku ali mu cihilo. Co lalo, muka-Kilistu uje aciyoya kasa kulingila uje natsi ebi byuma.—Kwambu 9:5, 10; Yowa 4:1; 1 Koli 1:14-16.

Co Paulu walumbunwine bika?

Banu bamo ba mu nganda ya Kolinte kubakulahelele ngwabo batsi bakasanguka. (1 Koli 15:12) Oloni Paulu wabakwasele bamone ngwabo biyongola byabo byapwile bya kuhenga. Wabalekele ngwendi wakele na “kukengelela kutsa ha litangwa na litangwa.” Oloni ha simbu eyi te acili na kuyoya. Nameme waliwanene na bukalu, Paulu wakulahelele ngwendi nga atsa, co akasanguka na kukayoya mwilu ngwe mwalingile Yesu.—1 Koli 15:30-32, 42-44.

Baka-Kolinte bapandele kuzibuka ngwabo ha kupwa baka-Kilistu bakubwabesa, bapandele kuyanda na kutsa asina bakasanguke. Mubabambwitikile “muli Kilistu Yesu,” babambwitikile lalo na “mu kutsa kwendi.” (Loma 6:3) Oku kulumbununa ngwabo bapandele kuyanda na kutsa ngwe Yesu asina bakasanguke.

Mukwetile myaka ibali kutunda habamumbwitikilile, Yesu walekele tupositolo bendi babali ngwendi: “Bakamimbwitika na kumbwitika kuje bakanjimbwitika nakwo yange.” (Mako 10:38, 39) Yesu kubamumbwitikile mu mema ha simbu ije. Walumbunwine ngwendi kupwa wa kulongwa kuli Njambi kumutwala ku kutsa. Paulu wasonekele ngwendi bakubwabesa banapande ‘kuyanda hamo na kukakala hamo mu bumpau.’ (Loma 8:16, 17; 2 Koli 4:17) Nabo banapande kutsa asina basa kusanguka na kukayoya mwilu.

Ngeci, majwi a Paulu tunapande kuanungulula ngwetu: “Oloni nga batsi kubakasanguka, co baje babali na kumbwitika mangana bapwe batsi bakalinga bika? Bika bibali na kubambwitikila mangana bapwe batsi?” NWT.