Yehova walekele Baisalele ngwendi bapwe ba kujela. Co wabalekele byuma bibapandele kulinga mangana bapwe ba kujela. Wendekele ngwendi: “Keti uye na kwitangana mu banu oku uya na kubangeya bakweni biñanda. Keti uyombe buyoye bwa mukweni. Yange Yehova.”—Levi 19:2, 16, NWT.

Majwi a kwendeka ngwawo “keti uyombe” alitombola mwamubwa na majwi a Cihebelu abapangesele aha ha vesi. Awa majwi alumbununa bika? Libulu limo lya Bayunda lije lyendeka ha mukanda wa Valevi ngwalyo: “Kwakukalu kuzibuka biulumbununa ou mukana mwafwa nga tukaba lijwi na lijwi lya Cihebelu, awa majwi abapangesele aha ha vesi alumbununa ngwawo ‘keti wimane kumukulo.’”

Baka-kulilongesa bamo bakendeka ngwabo awa majwi analitombola na vesi 15 ije yendeka ngwayo: “Kesi mukasompele bulemu omwo mubatula milonga. Kesi mukatetele kahutu omwo buhutu bwendi, nambe kutewa muka-kufuka omwo kufuka kwendi embwe. Oloni mukasompe bakweni mu busunga.” (Levi 19:15) Nga mukemwo, co lishiko lili mu vesi 16 lya kujeneka ‘kuyomba buyoye bwa bakwetu’ lilumbununa ngwalyo Baisalele kubapandele kuhengesa ñanda, kunyanyamena bakwabo mu mingoso nambe kulinga baka-naanga yabo mwamubi. Co lalo, kubapandele kulinga cuma ca kuhenga mangana bawaneneho nganyo. Cili bene kutwapandele kulinga ebi byuma. Oloni kuli ngila ikwabo yaibwa itwasa kulumbunwinamo awa majwi ali mu vesi 16.

Tusimutwiyeni ha majwi a maputukilo ha vesi 16. Njambi washikile banu bendi ngwendi keti baye na kubangeya bakwabo biñanda. Anukeni ngweni kubangeya bakwetu biñanda kunaliseze na kufweya mwafwa kuli bukalu bwakama bukatundu mu kubangeya bakwetu biñanda kutubakana buje bukatundu mu kubafweya lika. (Visi 10:19; Kwambu 10:12-14; 1 Tima 5:11-15; Yako 3:6) Munu muka-kubangeya bakwabo akendekela shakelo biñanda bya makuli hali bakebo mangana abiise lizina lyabo. Nasa kwana bukaleho bwa makuli buje bukundwiya ñanda yendi mangana ake buyoye bwa mukwabo mu bushonde. Anukeni ngweni banu bamo babangeyeye Nabote biñanda bya makuli, co Nabote bamutsiile. (1 Vimye 21:8-13) Cili bene, ngwe muunamwesela mukanda wa Valevi 19:16, muka-kubangeya napu ngwe munu uje ali na kuyomba buyoye bwa mukwabo na kulingisa bamutsiye.

Co lalo, munu nasa kubangeya mukwabo ñanda mwafwa wamuzinda. Mukanda wa 1 Yowano 3:15 ngwawo: “Baje bazinda bakwabo banapu baka-kutsiya, co yeni munazibuka ngweni baka-kutsiya kubesi na mwonyo wa myaka yoshe.” Omwo Njambi wamanesele kwendeka ngwendi keti uyombe buyoye bwa mukweni wendekele lalo ngwendi: “Kesi ukazinde ndolome yobe mu mbunge yobe.”—Levi 19:17.

Ngeci, cinangulo cili ku mukanda wa Valevi 19:16 cinapu ca seho manene kuli baka-Kilistu. Kutwapandele kusinganyekela bakwetu bubi na kubabangeya biñanda. Ngeci, nga tubangeya mukwetu ñanda nambe kumuzibila cipululu, co tuli na kuyomba buyoye bwendi. Co lalo, tumwesa ngwetu twamuzinda. Baka-Kilistu kubapandele kuzinda bakwabo.—Mateo 12:36, 37.