CILONGESA 49
MWASO 147 Njambi Natukulahesa Kuyoya kwa Myaka Yoshe
Bika Bimunapande Kulinga Mangana Mukayoye Myaka Yoshe?
“Woshe atambula Mwana na kumukulahela [awana] kuyoya kwa myaka yoshe.”—IWANO 6:40.
BILI MUNO MU CILONGESA
Bibezikiso muka bibakatambula bakubwabesa na bimanga beka mwafwa ya mulambu wa Yesu Kristu.
1. Banu bamo bamona bati ñanda ya kuyoya myaka yoshe?
BANU babangi bakali byakulya byabibwa na kweha bweho buje bukanyamesa mubila mangana bapwe ba kulikangula. Nameme ngoco, bazibuka ngwabo kulinga ebi byuma kukwasa kubakwasa bayoye mwaka yoshe. Co bakashinganyeka ngwabo banu kubasa kuyoya myaka yoshe. Oloni Yesu wendekele ngwendi banu basa ‘kuyoya myaka yoshe.’ Ngwe mumwesela mukanda wa Iwano 3:16 na 5:24.
2. Mukanda wa Iwano capita 6, wendeka bika ha ku kuyoya myaka yoshe? (Iwano 6:39, 40)
2 Litangwa limo, Yesu walingile cikomokeso ca kwana banu babangi makende na bisi. a Cikomokeso calingile cakomokesele banu babangi. Oloni byuma byendekele lyamukwabo ku banu baje bamukabele ku Kapenauma bikebyo byabakomokesele manene. Yesu wendekele ngwendi akasangula boshe baje banatsi, co bakayoya myaka yoshe. (Tandeni Iwano 6:39, 40.) Acisinganyekeni majwi a Yesu mwanakundamena babusamba na babushoko bweni baje banatsi. Mwajwi a Yesu amwesa ngwawo banu babangi baje banatsi bakasanguka, co yetu na baje batwazema twasa kukayoya myaka yoshe. Oloni kushwa lika kunima banu babangi kunabakaluwila kuzibisisa majwi a Yesu aje ali ku mukanda wa Iwano capita 6. Tumoneni byendekele Yesu oku ku mukanda.
3. Kwesekesa na mukanda wa Iwano 6:51, Bika byendekele Yesu?
3 Yesu mwamanesele kulinga cikomokeso ca kwana banu byakulya, banu basinganyekele ha manna yanene Yehova baIsalele mubakele mu mambo. Bisoneka binatumbula ije manna ngwabyo, “makende a kutunda mwilu.” (Samu 105:40; Iwano 6:31) Yesu wapangesele manna mu kulongesa mbunga yakama cilongesa ca seho manene. Nameme manna capwile cakulya cacibwa cije catundile kuli Yehova, banu baje bakele na kulya eci cakulya hanga betele ha kutsa. (Iwano 6:49) Oloni Yesu nalisezela kulako na manna mwafwa ikeye nalitumbula ngwendi ikeye “likende lya busunga lya kutunda mwilu” na “likende lya Njambi” na “likende lya kuyoya.” (Iwano 6:32, 33, 35) Yesu wendekele kuliseza kuli mukati kendi na manna ya mu simbu ya baIsalele. Wendekele ngwendi: “Yange likende lya kuyoya lije linatundu mwilu. Nga munu alya oku ku likende ayoya myaka yoshe.” (Tandeni Iwano 6:51.) Majwi endekele Yesu atanganesele baJuda. Ngeci balihwile ngwabo, Yesu asa kupwa bati “likende” lya kutunda mwilu na kupwa wa seho kutubakana manna yanene Yehova bakukulwila babo? Kutundaho, Yesu wendekele ngwendi: “Likende linjana kaye mangana kayoye linapu situ yange.” Bika byalumbunwine? Kunapu kwa seho kuzibuka byalumbunwine Yesu mwafwa kulinga ngoco kutukwasa tuzibuke bikatulingisa tukayoye myaka yoshe. Tucisimutwiyeni byalumbunwine Yesu.
BIKA BYALUMBUNWINE YESU MWENDEKELE BYA “LIKENDE LYA KUYOYA” NA ‘MUBILA WENDI’?
4. Mwafwa bika banu bamo bakomokele manene byuma byendekele Yesu?
4 Banu bamo bakomokele manene mubazibile Yesu endeka ngwendi: “Likende linjana kaye mangana kayoye linapu situ yange.” Hamo basinganyekele ngwabo Yesu wakele na kulumbununa ngwendi balye situ yendi mpundu. (Iwano 6:52) Oloni Yesu wabalekele byuma bije byabakomokesele manene. Wendekele ngwendi: “Kubanga mulye situ ya Muna munu na kunwa maninga endi, keti ngoconi kuyoya cahimo muli yeni.”—Iwano 6:53.
5. Mwafwa bika twendekela ngwetu Yesu kalumbunwine ngwendi banu banapande kunwa maninga endi mpundu?
5 Mu simbu ya Nowa, Njambi wabindikile banu kulya maninga. (Gene 9:3, 4) Co mukwita kwa simbu, Yehova washikile lalo baIsalele ngwendi keti balye maninga. Wendekele ngwendi, woshe alya maninga “kubakamulaba lalo kupwa umo wa banu ba Njambi.” (Levi 7:27) Yesu walongesele baJuda kwononoka mashiko oshe abanene Njambi. (Mate 5:17-19) Ngeci, Yesu kalumbunwine ngwendi baJuda balye situ yendi nambe kunwa maninga endi mpundu. Oloni Yesu wapangesele awa majwi mu kulongesa banu byuma bibapandele kulinga mangana bakawane “kuyoya kwa myaka yoshe.”—Iwano 6:54.
6. Bika bitulingisa twendeke ngwetu majwi endekele Yesu ku mukanda Iwano 6:53 apwile lika a cifwisa?
6 Bika byalumbunwine Yesu? Yesu wapangesele bifwisa mwasimutwiiye na mbunga, ngwe mwalingilile kuli munakazi wa Kasamaliya uje yalekele ngwendi: “Oloni uje anwa mema anjimwana katsi lalo lihwila. Mema anjimwana atenguluka kupwa kabwelu-bwelu ka mema muli ikeye aje abweluka na kwana kuyoya kwa myaka yoshe.” (Iwano 4:7, 14) b Yesu kalumbunwine ngwendi uje munakazi wa Kasamaliya akawana mwonyo wa myaka yoshe nga anwa mema a mu lisima. Mu ngila imolika, Yesu kalumbunwine ngwendi banu baje bakele na kusimutwiya nabo mu Kapenauma bakawana mwonyo wa myaka yoshe nga balya situ na kunwa maninga endi mpundu.
SIMBU IKWABO YENDEKELE MAJWI A KULIFWA YESU
7. Byuma muka bibakendeka banu bamo kutalesa ku majwi endekele Yesu ku mukanda wa Iwano 6:53?
7 Bamo bakendeka ngwabo majwi endekele Yesu aje ali ku mukanda wa Iwano 6:53 alumbunwine bibanapande kulinga banu ha cilika ca Kulya kwa Mwene kwa Mangwezi. Bakendeka ngoco, mwafwa ha cilika ca Kulya kwa Mwene kwa Mangwezi, Yesu wapangesele majwi a kulifwa. (Mate 26:26-28) Bakendeka lalo ngwabo woshe aija ku cilika ca Kulya kwa Mwene kwa Mangwezi napande kulya na kunwa binyu bibaketisa mukati ka mbunga. Kuma obu bunapu busunga ndi? Kunapu kwa seho kutondesesa busunga bwei ñanda mwafwa mwaka na mwaka banu babangi mu kaye koshe bakakunguluka netu ha cilika ca Kulya kwa Mwene kwa Mangwezi. Tusimutwiya byalumbunwine Yesu mwendekele majwi ali ku mukanda wa Iwano 6:53 na majwi endekele ha cilika ca Kulya kwa Mwene kwa Mangwezi.
8. Kuliseza muka kuli mukati ka majwi endekele Yesu? (Taleni na bikupulo.)
8 Tumoneni kuliseza kuli mukati ka majwi endekele Yesu. Cakulibanga, Yesu wakele kuli mwendekele majwi ali ku mukanda wa Iwano 6:53-56, co wendekele awa majwi simbu muka? Yesu wendekele awa majwi ku mbunga ya baJuda mu mwaka wa 32 C.E., mu Galileya. Kwetile mwaka kutunda hendekelele awa majwi kweta ha litangwa lyalingile cilika ca Kulya kwa Mwene kwa Mangwezi mu Jelusalema. Camucibali, walekele beya awa majwi? Wendekele awa majwi ku banu baje bakele manene mbunge ku kutambula byakulya kuli Yesu kutubakana kulilongesa bya Yehova nambe bya Bumwene bwendi. (Iwano 6:26) Mukemwo Yesu mwendekele byuma bije kubazibisisile, banu babangi hamolika na bandongesi bendi bamo bwasi-bwasi balikelele kumukabangeya. (Iwano 6:14, 36, 42, 60, 64, 66) Aba banu balisezelele kulako na tupositolo ba kulongwa ba kupwa 11 baje bakele na Yesu ha cilika ca Kulya kwa Mwene kwa Mangwezi mu 33 C.E. Ha simbu ei tupositolo bendi ba kulongwa ba kupwa 11 bakele hamo nendi, co kubamusezele nameme kubazibisisile byabalongesele. Aba tupositolo ba kulongwa balisezelele kulako na banu ba mu Galileya, mwafwa bakebo bakulahelele ngwabo Yesu wapwa muna Njambi uje watundile mwilu na kwija hano hasi. (Mate 16:16) Ngeci Yesu wabashangalele na kubaleka ngwendi: “Yeni munakala nange mu byeseko byange.” (Luka 22:28) Oku kuliseza kubali, kwa simbu na mwela na banu bakeleko omwo Yesu wendekele majwi ali ku mukanda wa Iwano 6:53, kumwesa ngwabo Yesu kakele na kulumbununa byuma byapandele kulingiwa ha cilika ca Kulya kwa Mwene kwa Mangwezi. Oloni kuli kuliseza kukwabo.
Mukanda wa Iwano capita 6 umwesa majwi endekele Yesu ku baJuda mu Galileya (kucimoshwe). Mukwetile mwaka, Yesu wendekele lalo majwi a kulifwa ku cibunga cacindondo ca tupositolo bendi ba kulongwa mu Jelusalema (kucilyo) (Taleni paragirafu 8)
MAJWI A YESU ANAMIKUNDA BATI?
9. Majwi endekele Yesu ha cilika ca Kulya kwa Mwene kwa Mangwezi atalesele ku cibunga muka ca banu?
9 Ha simbu ya cilika ca Kulya kwa Mwene kwa Mangwezi, Yesu wanene bandongesi bendi likende lya kujeneka musima na kubaleka ngwendi lije likende limanena mubila wendi. Wabanene lalo nganja ya binyu na kwendeka ngwendi ebi binyu bimanena “maninga ange a cikumiiyo.” (Maki 14:22-25; Luka 22:20; 1 Kori 11:24) Yesu walingile byuma bya seho manene. Walingile cikumiiyo caciha na ba ku “njibo ya Isalele [ya ku sipilitu]” baje bakakala mu “Bumwene bwa Njambi.” Oloni eci cikumiiyo kucakundamene banu boshe. (Hebe 8:6, 10; 9:15) Tupositolo kubazibisisile byalumbwinine Yesu ha simbu ije, oloni mu kwita kwa simbu bababwabesele na sipilitu ya kujela, co bakobelele mu cikumiiyo caciha ca kukayula na Yesu mwilu.—Iwano 14:2, 3.
10. Majwi endekele Yesu mu Galileya analiseze bati na majwi endekele ha cilika ca Kulya kwa Mwene kwa Mangwezi? (Taleni na cikupulo.)
10 Nangukeni ngweni byuma byendekele Yesu ha cilika ca Kulya kwa Mwene kwa Mangwezi, byakundamene ku “butanga bwabundondo.” Eci cibunga cacindondo cashangumukile na tupositolo ba Yesu ba kulongwa bakele nabo ha cilika ca Kulya kwa Mwene kwa Mangwezi. (Luka 12:32) Eci cibunga na baje boshe bababwabesele munima, bakebo lika balekele Yesu ngwendi balye likende na kunwa binyu ha cilika ca Kulya kwa Mwene kwa Mangwezi. Aba bakebo bakayula na Yesu mwilu. Byendekele Yesu ha simbu ei ku tupositolo bendi byalisezele na byuma byendekele ku mbunga mu Galileya, mwafwa byendekele ha cilika ca Kulya kwa Mwene kwa Mangwezi byatalesele ku cibunga cacindondo ca banu. Majwi endekele atalesele ku banu babangi.
Baje balya likende na kunwa binyu ha cilika ca Kulya kwa Mwene kwa Mangwezi banapu babandondo lika, oloni banu boshe baje bamwesa likulahelo mu ndando ya kupatula bakawana mwonyo wa myaka yoshe (Taleni paragirafu 10)
11. Bika byendekele Yesu mu Galileya bije bimwesa ngwabyo kalumbunwine cibunga cacindondo ca banu?
11 Bwingi bwa banu bendekele nabo Yesu mu Galileya, mu 32 C.E., batondele lika byakulya kuli ikeye. Oloni Yesu watondele kubakwasa bazibuke ngwabo kuli byuma bya seho manene bije byasele kubakwasa bakawane mwonyo wa myaka yoshe. Co lalo wendekele ngwendi baje banatsi bakasanguka ha litangwa lya mamaneselelo na kukayoya myaka yoshe. Yesu ha simbu ei kakele na kwendeka bibezikiso bibakalikuwa baje bali mu cibunga cacindondo ngwe mwalingilile ha cilika ca Kulya kwa Mwene kwa Mangwezi. Oloni wakele na kwendeka ha bibezikiso bibakalikuwa banu boshe. Mukemwo wendekele ngwendi: “Likende linjana kaye mangana kayoye linapu situ yange.”—Iwano 6:51.
12. Bika bitunapande kulinga mangana tukawane mwonyo wa myaka yoshe?
12 Kuma Yesu walumbunwine ngwendi banu boshe bakatambula kuyoya kwa myaka yoshe ndi? Embwe. Yesu walumbunwine lika baje ‘balya situ yendi’ kulumbununa baje bamwesa likulahelo kuli ikeye. Banu babangi ano matangwa bakendeka ngwabo banakulahela Yesu, co bakamutumbula ngwabo wapwa mwobole wabo. (Iwano 6:29) Oloni kuli byuma byabingi byalibungila mu kukulahela Yesu. Cakumwenako, banu babangi mu Galileya bakulahelele Yesu hakulibanga, oloni mu kwita kwa simbu balikelele kumukulahela. Bika byabalingisile balikele kumukulahela?
13. Bika byalibungila mu kupwa ndongesi wa Yesu wa busunga?
13 Banu babangi bakabangeyeye Yesu mwafwa wabanene byuma bibatondele. Bashakele ngwabo Yesu abakangwise ku mishongo yabo na kubana byakulya na kubalongesa byuma bibashakele bakebo. Yesu wabakwasele bananguke ngwabo kezile hano hasi na kubana byuma bibashakele. Oloni wezile na kubalongesa byuma bibatondele mangana bapwe bandongesi bendi ba busunga. Bapandele kutambula cilanyo ca Yesu ca ‘kuya kuli ikeye’ na kukabangeya byoshe byabalongesele.—Iwano 5:40; 6:44.
14. Bika bitunapande kulinga mangana ndando ya kupatula ya Yesu itukwase?
14 Yesu walongesele ngwendi, mubila na maninga endi byanene kupwa mulambu bikwasa banu base kukayoya myaka yoshe. Co bapandele kukulahela byabalongesele. Kukala na likulahelo mu byuma bya cifweci kwapwile kwa seho manene kuli baJuda, co kunapu kwa seho na kuli yetu ano matangwa. (Iwano 6:40) Ngeci majwi endekele Yesu aje ali ku mukanda wa Iwano 6:53, alumbununa ngwawo tunapande kukulahela mu ndando ya kupatula mangana tukayoye myaka yoshe. Ngeci, banu boshe baje bakulahela mu ndando ya kupatula bakayoya myaka yoshe.—Efeso 1:7.
15-16. Byuma muka bya seho bitunalilongesa ku mukanda wa Iwano capita 6?
15 Ku mukanda wa Iwano capita 6 kuli biñanda bije bitukwasa tubaboshe. Biñanda biliko bimwesa ngwabyo Yesu waka banu mbunge. Yesu mwakele mu Galileya, wakangwisile babezi na kubalongesa bya Bumwene na kubana byakulya. (Luka 9:11; Iwano 6:2, 11, 12) Kutundaho, Yesu wendekele ngwendi: “Yange likende lya kuyoya.”—Iwano 6:35, 48.
16 Banu bendekele Yesu ngwendi “bimanga beka,” kubapandele kulya likende na kunwa binyu ha cilika ca Kulya kwa Mwene kwa Mangwezi. (Iwano 10:16) Nameme ngoco, nabo bawana bukwasi ku situ na maninga a Yesu Kristu. Bawana bukwasi nga bakulahela manene ndando ya kupatula ya Yesu. (Iwano 6:53) Oloni boshe baje balya likende na kunwa binyu bya cifwisa, bamwesa ngwabo bali mu cikumiiyo ca caciha, co bakayula na Yesu mwilu. Ngeci ipwe tubakubwabesa nambe tu bimanga beka, biñanda bili ku mukanda wa Iwano capita 6 bitukwasa tubaboshe. Tulilongesa ngwetu tunapande kukulahela manene ndando ya kupatula mangana tukayoye myaka yoshe.
MWASO 150 Shakezekeni Njambi Mangana Mukoboke
a Mukanda wa Iwano 6:5-35 banausimutwiya mu cilongesa cinatako.
b Mema endekele Yesu emanena byuma byoshe byanalingi Yehova mu kukwasa banu bakayoye myaka yoshe.
