CILONGESA 48
MWASO 97 Kuyoya Kwetu Kunemana ha Lijwi lya Njambi
Bitulilongesa ku Cikomokeso ca Yesu ca Makende
“Yange likende lya kuyoya. Woshe aija kuli yange kakatsi lalo njala.”—IWANO 6:35.
BILI MUNO MU CILONGESA
Muno mu cilongesa tusimutwiya bya cikomokeso calingile Yesu cije cili ku mukanda wa Iwano capita 6 ca kulisa banu babangi kupangesa makende atanu na tubisi twatundondo tubali.
1. Likende lyapwile bati lya seho mu simbu ibasonekele Mbimbiliya?
LIKENDE capwile cakulya ca seho manene mu simbu ibasonekele Mbimbiliya. (Gene 14:18; Luka 4:4) Co kakangi Mbimbiliya muikatumbula “likende” ikalumbununa byakulya. (Mate 6:11) Yesu wapangesele makende mu bikomokeso byendi bibali. (Mate 16:9, 10) Cimo cebi bikomokeso cili ku mukanda wa Iwano capita 6. Tulilongesako bimo ku cikomokeso calingile Yesu.
2. Simbu muka ibatondele byakulya banu babangi?
2 Munima ya kwambulula ha simbu yailaha tupositolo ba Yesu bajukile manene. Ngeci Yesu na bandongesi bendi bakobelele mu bwato na kujabuka kalunga-ndonga wa Galileya mangana bakahwimeko musambwa. (Maki 6:7, 30-32; Luka 9:10) Baile kwalikalyabo kuje kukwakele banu mu mbongi ya Betisaida. Oloni banu babangi mubazibile ngwabo Yesu ali kuje, bashatukilileko mangana bakamumone. Yesu kabayengwile oloni wapangesele simbu yendi mu kubalongesa bya Bumwene na kukangwisa babezi. Litangwa mulyakele na kulauka, bandongesi bashangumukile kulishoshomwena kubawana byakulya byakwana mbunga ya banu. Bamo hamo bakele na byakulya, oloni bwingi bwabo kubakele nabyo. Ngeci bapandele kuya ku membo na kukatonda byakulya. (Mate 14:15; Iwano 6:4, 5) Bika byalingile Yesu?
CIKOMOKESO CA MAKENDE
3. Yesu walekele bika tupositolo bendi banu mubatondele byakulya? (Taleni na cikupulo ca ha)
3 Yesu walekele tupositolo bendi ngwendi: “[Banu] kubapandele kuya. Baneni byakulya.” (Mate 14:16) Oloni kwasholokele ngwe byendekele Yesu kubyasa kulingiwa, mwafwa kwakele banalume 5,000. Co kubwezelako banakazi na banike hamo totala ya banu boshe yetele ku 15,000 baje babapandele kwana byakulya. (Mate 14:21) Andru wendekele ngwendi: “Kuli mwanike wa munalume kuno ali na makende a mbali atanu na tubisi tubali twatundondo, oloni bikani ebi kuli aba banu babangi ngacije?” (Iwano 6:9) Makende a mbali capwile cakulya ca tuhutu na banu nkala. Co lalo tubisi twakeleko hamo twapwile twakuma twa kwaka mongwa. Nameme ngoco, banu kubasele kukuta makende a mbali atanu na tubisi tubali.
Yesu wakwasele banu kusipilitu na kubana byuma bya ku mubila bibatondele (Taleni paragirafu 3)
4. Bika bitulilongesa ku mukanda wa Iwano 6:11-13? (Taleni na bikupulo.)
4 Yesu washakele kumwesa banu ngozi, ngeci wabalekele batumbame mu bibunga ha mwila. (Maki 6:39, 40; tandeni Iwano 6:11-13.) Kutundaho, Yesu walombelele kuli Ishe na kukandelela kuli ikeye ha makende na bisi. Mwalingile ngoco, wamwesele ngwendi Njambi ikeye wabanene bije byakulya, ngeci wakandelele manene kuli ikeye. Tulilongesa cuma ca seho manene kuli Yesu. Tulilongesa ngwetu tunapande kulombela simbu kanda tulye byakulya nga tuli likalyetu nambe tuli na bakwetu. Yesu wanene banu byakulya, co balile na kukuta. Byakulya byapwile byabingi, co kwasalele na bimbazubwila bya makende byabingi. Ngeci Yesu walekele tupositolo bendi bakungulule bije bimbazubwila mangana bakabipangese lalo simbu yeka. Yesu natwakela mwanja waubwa wa mwakupangesela mwamubwa byuma bituli nabyo. Nga mwapwa mu bisemi mwasa kupangesa ou muzimbu mu kulongesa bana beni bamone seho ya kulombela simbu kanda balye na kutambula bangenzi na kupwa baka-kwana ngwe mwa Yesu.
Lihuleni ngweni, ‘Kuma njikakabangeya mwanja wa Yesu wa kulombela simbu kanda njilye ndi?’ (Taleni paragirafu 4)
5. Banu balingile bika mubamwene bikomokeso bya Yesu, co Yesu walingile bati?
5 Banu bakomokele manene mubamwene mwakele na kulongesela Yesu na bikomokeso byalingile. Bazibukile ngwabo Njambi wakulahesele kwitila muli Mosesa ngwendi akabatumina kapolofweto wakulitila. Ngeci, hamo bakele na kulihula ngwabo, ‘Kuma ou ikeye kapolofweto ibakulahesele ndi?’ (Kwitu 18:15-18) Nga mukemwo, co hamo basinganyekele ngwabo Yesu apwa muka-kuyula wakulitila uje asa kwana banu boshe mu Isalele byakulya. Ngeci, mbunga ya banu bashakele ‘kukwata Yesu mangana bamupwise mwene.’ (Iwano 6:14, 15) Ngwe Yesu watabesele byuma bya cifweci bilingiwe ngwe walikobelesele mu biñanda bya bupolitiki bya baJuda mwisi ya ciyula ca Loma. Kuma Yesu watabele kumupwisa mwene ndi? Embwe. Mbimbiliya imwesa ngwayo, Yesu watundile kuje ku mwela na kuya ku mukinda likalyendi. Ngeci Yesu katabele kulikobelesa mu biñanda bya bupolitiki nameme bakwabo bamusindiiye alinge ngoco. Bika bitulilongesako?
6. Twasa kutembwinina bati mwanja wa Yesu? (Taleni na cikupulo.)
6 Tuzibuka ngwetu banu kubasa kutulomba tulinge cikomokeso ca kubana byakulya, kukangwisa babezi nambe kutupwisa mwene. Oloni basa kutushongangeya tulikobelese mu biñanda bya bupolitiki na kukundwiya nambe kwimanena munu uje ibasinganyeka ngwabo asa kwendesa mwamubwa byuma. Ngeci mwanja wa Yesu utukwasa manene. Yesu wabyanene kulikobelesa mu biñanda bya bupolitiki, co mukwita kwa simbu wendekele ngwendi: “Bumwene bwange keti bwa muno mu kaye.” (Iwano 17:14; 18:36) Baka-Kristu ano matangwa banapande kusinganyeka ngwe mwakele na kusinganyekela Yesu na kutembwinina mwanja wendi. Ngwe mwa Yesu, tukakundwiya Bumwene bwa Njambi. Tukaleke bakwetu byobu Bumwene na kubulomba ngwetu bwije. (Mate 6:10) Kuli byuma bikwabo bitulilongesa ku cikomokeso ca Yesu ca makende.
Yesu wakelele baka-kumukabangeya mwanja waubwa ha kujeneka kulikobelesa mu biñanda bya bupolitiki bya baJuda nambe bya baLoma (Taleni paragirafu 6)
‘BICILUMBUNUNA CIKOMOKESO CA MAKENDE’
7. Bika byalingile Yesu, co bandongesi bendi balingile bati? (Iwano 6:16-20)
7 Yesu mwamanesele kwana banu byakulya walekele tupositolo bendi beluke ku Kapenauma, co ikeye waile ku minkinda mwafwa watewele banu baje bashakele kumupwisa mwene. (Tandeni Iwano 6:16-20.) Tupositolo bendi mubakele mu bwato, kwakatukile lihunzi lyakama lije lyanenele mankimba. Kutundaho, bamwene Yesu aija kuli bakebo oku ali na kwenda helu lya mema. Co walanyele kapositolo Pita mangana nendi ende helu lya mema. (Mate 14:22-31) Yesu mwalondele mu bwato, oho bene lihunzi lyolokele. Ngeci bandongesi bendi bakomokele manene na kwendeka ngwabo: “Cili bene u Muna Njambi.” a (Mate 14:33) Kukomokesa kuzibuka ngwetu tupositolo ba Yesu bendekele awa majwi mubamwene Yesu enda ha mema kutubakana mwalingile cikomokeso ca kulisa banu babangi. Maki wendekele kutalesa ku bikomokeso bya Yesu ngwendi: “[Tupositolo], bakasamene manene, mwafwa kubalilongeseleko bimo ku cikomokeso ca makende calingile, co lalo bimbunge byabo anga kubyakele na kuzibisisa.” (Maki 6:50-52) Tupositolo kubanangukile ngwabo Yehova nana Yesu nzili ya kulinga bikomokeso byabingi keti lika cikomokeso ca byakulya. Munima yebi Yesu wendekele lalo ha cikomokeso ca makende mangana atulongeseko bimo.
8-9. Banu batondelele bika Yesu? (Iwano 6:26, 27)
8 Banu banene byakulya Yesu, bakele lika mbunge ku byuma bya kumubila nebi bibatondele bakebo. Bika twendekela ngoco? Twendeka ngoco mwafwa lyamukwabo baje banu banene Yesu byakulya baile kuje kwabanenene Yesu makende, oloni kubakamuwaneneko hamolika na bandongesi bendi. Ngeci balondele mu mato na kuya ku Kapenauma mangana bakatonde Yesu. (Iwano 6:22-24) Kuma baile na kutonda Yesu mwafwa bashakele kulilongesa bya Bumwene bwa Njambi ndi? Embwe. Batondele lika ngwabo Yesu abane byakulya. Tuzibuka bati ngoco?
9 Nangukeni byalingiwile baje banu mubawanene Yesu kuyehi na Kapenauma. Yesu wendekele ngwendi bezile na kumutonda mangana abane byakulya. Nameme ‘banalile makende na kukuta’ Yesu wabalekele ngwendi bije byakulya byapwile “byakulya bije byasa kubihya.” Ngeci wabalekele bapangele byakulya bije kubyasa kubihya kutubakana bije byasa kubihya.(Tandeni Iwano 6:26, 27.) Co Yesu wabalekele lalo ngwendi Ishe ikeye asa kubana byakulya bije kubyasa kubihya. Cisholoka banu bakomokele manene mubazibile Yesu endeka ngwendi kuli byakulya bije byasa kubana mwonyo wa myaka yoshe. Byakulya muka byalumbwinine Yesu, co banu basele kuwana bati ebi byakulya?
10. Bika bibapandele kulinga banu mangana bakawane “kuyoya kwa myaka yoshe”?
10 Baje baJuda bashakele kuzibuka bibapandele kulinga mangana bawane byakulya byendekele Yesu. Hamo basinganyekele ha byuma bimo bilyendekele Lishiko lya Mosesa bije bibapandele kulinga. Nameme ngoco, Yesu wabalekele ngwendi: “Cipangi ca Njambi cinapu eci, ngwendi mukulahele uje yatumine.” (Iwano 6:28, 29) Ngwe mwendekelele Yesu hakulibanga, banu bapandele kukala na likulahelo kuli ikeye mangana bakawane “kuyoya kwa myaka yoshe.” (Iwano 3:16-18, 36) Ha bisimbu byabingi Yesu walekele banu bibapandele kulinga mangana bakawane mwonyo wa myaka yoshe.—Iwano 17:3.
11. BaJuda bamwesele bati ngwabo batondele lika byakulya kuli Yesu? (Samu 78:24, 25)
11 BaJuda kubatabele kukulahela Yesu. Ngeci bamwihwile ngwabo: “Cizibukiso muka ciulinga mangana tucimone, co tukutabe?” (Iwano 6:30) Bendekele ngwabo, bakukulwila babo mu simbu ya Mosesa batambwile mana ije yapwile cakulya cabo ca ha litangwa na litangwa. (Nehe 9:15; tandeni Samu 78:24, 25.) Oku kwamwesele mwamubwa ngwabo baJuda bakele lika mbunge ku kutambula byakulya bya ku mubila. Ngeci Yesu mwendekele bya “likende lya busunga lya kutunda mwilu” lije litubakana mana, baJuda kubwamwihwile mangana bazibisise byakele na kulumbununa. (Iwano 6:32) Bakele manene mbunge ku byuma bya ku mubila, co kubatolililile ku busunga bwashakele kubalongesa Yesu. Bika bitulilongesako?
BYUMA MUKA BINAPANDE KUPWA BYA SEHO MANENE KULI YETU?
12. Yesu wamwesele bati byuma bya seho manene?
12 Tulilongesa byuma bya seho manene ku mukanda wa Iwano capita 6. Tulilongesa ngwetu, tunapande kumona byuma bya ku sipilitu kupwa bya seho manene mu kuyoya kwetu. Satana mwesekele Yesu, Yesu wamwesele ngwendi kwononoka Yehova kwapwa kwa seho manene kutubakana cakulya coshe-coshe ca kumubila. (Mate 4:3, 4) Co lalo mu ñanda yendi ya ha mukinda, Yesu wamwesele seho ya kukala na busamba bwa kukanyama na Njambi. (Mate 5:3) Ngeci twasa kulihula ngwetu, ‘Kuma yoyesi yange ikamwesa ngwayo njaka mbunge ku byuma bya kusipilitu kutubakana bya ku mubila ndi?’
13. (a) Mwafwa bika kukwabihile kulikuwa byakulya? (b) Kapositolo Paulu watunangwile byuma muka? (1 Korinte 10:6, 7, 11)
13 Kukwabihile kulomba Yehova byuma bitutonda nambe kulikuwa byuma bituli nabyo. (Luka 11:3) Kupanga na nzili kukatulingisa ‘tulye na kunwa’ co lalo kunapu bwana ‘bwakutunda mu liboko lya Njambi wa busunga.’ (Ekele 2:24; 8:15; Jems 1:17) Oloni tunapande kunyanyama mangana keti tumone byuma bya ku mubila kupwa bya seho manene mu kuyoya kwetu. Tulilongesako bimo ku byuma byasonekelele Paulu baka-Kristu ba kunima. Wendekele ha byuma byabibi bibalingile baIsalele mubakele mu mambo na kuyehi na Mukinda wa Sinai. Wanangwile baka-Kristu ngwendi: ‘keti bashungwiye byuma byabibi ngwe mubabishungwiiye [baIsalele].’ (Tandeni 1 Korinte 10:6, 7, 11.) Yehova walingile cikomokeso ca kwana baIsalele byakulya. Oloni mwafwa ya kuzema manene byakulya, bije byakulya byabananene byapwile ngwe “byuma byabibi” kuli bakebo. (Nume 11:4-6, 31-34) BaIsalele mubalemesele kaponya wa muna ngombe, bamwesele ngwabo bakele manene mbunge ku kulya, kunwa na senga kutubakana kwononoka Yehova. (Ekizo 32:4-6) Kapositolo Paulu wendekele eci cakumwenako mu kunangulo baka-Kristu baje bayoyele muyehi na simbu ibanyongesele Jelusalema na tempele mu mwaka wa 70 C.E. Netu tuli muyehi na mamaneselelo a katumameno ka myaka ino. Ngeci tunapande kumona cinangulo ca kapositolo Paulu kupwa ca seho manene.
14. Bika bitunabandamena kukalikuwa mu kaye kakaha kutalesa ku byakulya?
14 Yesu mwatulongesele ngwendi tulombe “byakulya byetu bya litangwa lya lelo” watulekele lalo ngwendi tulombe cizango ca Njambi cilingiwe hano hasi. (Mate 6:9-11) Musinganyeka ngweni buyoye bukafwa bati Njambi mwakashulisilila cizango cendi? Mbimbiliya imwesa ngwayo cizango ca Njambi cinambateselela kukwasa banu bakale na byakulya byabibwa. Kwesekesa na mukanda wa Isaya 25:6-8, Bumwene bwa Njambi mubukayula kano kaye kukala byakulya byabibingi. Mukanda wa Samu 72:16 wendeka ngwawo: “Bimbuto bikatuma ha lifuti-libu. Bikashula na ha malundu hoshe.” Kuma mwashungwiya kukapangesa ebi bimbuto mu kuteleka byakulya byabibwa manene bije kanda mutelekeho ndi? Acisinganyekeni kubwahelela kumukakala nakwo mu mukakuna lihya lyeni lya bushuka bwa binyu na kulikuwabyo. (Isaya 65:21, 22) Banu boshe baje bakakalako ha simbu oyo bakalikuwa ebi byuma byabibwa.
15. Bika bibakalilongesa boshe baje bakasanguka? (Iwano 6:35)
15 Tandeni Iwano 6:35. Byuma muka bibanabandamena baje balile ku makende na bisi byanene Yesu? Mwasa kukalimona na bamo mubakasanguka. Nameme kubamwesele likulahelo muli Yesu kunima, basa kukasanguka. (Iwano 5:28, 29) Banu ba cifweci banapande tahi kukalilongesa biwalumbununa majwi a Yesu a kwendeka ngwawo: “Yange likende lya kuyoya. Woshe aija kuli yange kakatsi lalo njala.” Banapande kukakulahela ndando ya kupatula. Oloni kukakala cipangi cakama ca kulongesa baje bakasanguka na baje bakasemuka bya Yehova na cizango cendi. Tukabwahelela manene kulongesa baje bakasanguka. Kukwasa bakwetu balikute busamba bwakukanyama na Yehova kukatulingisa tubwahelele manene kutubakana byakulya byoshe bitukalikuwa mu kaye kakaha.
16. Bika bitusimutwiya mu cilongesa cinatako?
16 Twasimutwiyako biñanda bimo bije bili ku mukanda wa Iwano capita 6, oloni kuli byuma bikwabo byabingi byendekele Yesu kutalesa ku “kuyoya kwa myaka yoshe.” BaJuda bakele na kusimutwiya nabo Yesu bapandele kumutolilila mwamubwa, co netu bikebyo bitunapande kulinga. Mu cilongesa cinatako tutwalelelaho kusimutwiya ha mukanda wa Iwano capita 6.
MWASO 20 Watwanene Munobe Iwazema Manene
a Nga mushaka kuzibuka byabingi hali ou muzimbu, co taleni libulu lya Silozi lya Jesu ki Yena Nzila, Niti, ni Bupilo lipu 131, na Mulikanyise Tumelo Yabona lipu 185.
