Njasemukile mu 1927 mu mbongi yaindondo kuyehi na Chicago, Illinois mu U.S.A. Twasemukile tu batanu, Jetha, Don, yange, Karl, na Joy. Tubaboshe twalyangwilile kupangela Yehova mu kuyoya kwetu. Ndokazi yange Jetha bamulanyele kukakobela kilasi yamucibali ya sikola ya Giliyadi mu 1943. Don bamulanyele kukapangela ha Betheu ku Brooklyn mu New York, mu 1944. Karl ikeye bamulanyele mu 1947. Co Joy ikeye bamulanyele mu 1951. Myanja yabo na ya bisemi bange wanjishongangeyeye njilinge byabingi mu cipangi ca Yehova.

Batate na banana bapwile baka-kutanda manene Mbimbiliya, co bazemene manene Njambi. Ngeci netu batulongesele tumuzeme. Oloni batate mubapwile liswalale mu Europe ha simbu ya Nzita ya Kaye Yakulibanga, balikelele kukulahela ma ceci oshe. Banana bakandelele manene kuli Njambi mubamwene batate baneluka kutunda ku nzita kwakujeneka bushonde. Ngeci balekele batate ngwabo: “Ba Karl tuyeni ku ceci ngwe mutwakele na kulingila kunima.” Batate bakumbulwile ngwabo: “Njimisindikiya lika oloni kunjikakobele mukati.” Co banana behwile batate ngwabo: “Mwafwa bika kumukakobela mukati?” Batate bakumbulwile ngwabo: “Ha simbu ya nzita bakulunu ba bulombelo ba mu bulombelo bwakulifwa baje bakele mu mitambela yakuliseza, balombelelele maswalale babo na bitwa byabo mangana bakahyane bakwabo. Kuma Njambi wakele na kukundwiya aba maswalale boshe ndi?”

Mu kwita kwa simbu banana mubakele ku ceci, Bakaleho ba Yehova babali bezile ku njibo yetu. Basezelele batate mabulu abali aje abatumbwile ngwabo Light, awa mabulu akele na kulumbununa mukanda wa Kujombolola. Batate babwahelelele manene, co batambwile aje mabulu. Banana mubamwene aje mabulu bashangumukile kuatanda. Co litangwa limo mubakele na kutanda mapapelo a mizimbu, bawanene lipapelo lije lyakele na kulanya banu balilongese Mbimbiliya kupangesa mabulu a Light. Ngeci banana batambwile cije cilanyo, co baileko. Mubetele, munakazi wa kakulukazi wabashokolwelele ku cikolo. Banana bakwatele limo lyawa mabulu na kwihula uje kakulukazi ngwabo: “Muli na kulongesa mabulu a cifweci kuno ndi?” Uje munakazi wakumbulwile ngwendi: “Eyo munange, kobela.” Calumingo cateleko, banana bashangumukile kuya hamo netu calumingo na calumingo na kukalilongesa.

 Litangwa limo mutwaile na kulilongesa, uje wakele na kutulongese wanjilombele njitande mukanda wa Samu 144:15. Ou mukanda wendeka ngwawo, baje balemesa Yehova bapwa ba kubwahelela. Ou mukanda wa njishongangeyeye manene hamolika na mukanda wa 1 Timothi 1:11 uje wendeka ngwawo Yehova wapwa “Njambi wa kubwahelela” na Efeso 5:1 uje utushongangeya tupwe ‘baka-kutembwinina Njambi.’ Ngeci njalyangwilile kupangela Yehova mu kubwahelela na kukandelela kuli ikeye ha kunjikwasa njililongese busunga.

Cikungulukilo cije cakele muyehi cakele makilomita 32 kutunda ha njibo yetu mu Chicago. Nameme ngoco twakele na kuya ku biwano, co njashangumukile kuzibuka byuma byabingi bya mu Mbimbiliya. Litangwa limo Jetha wemikile liboko, co muka-kutwamenena wa mwinikile mangana akumbulule. Munjazibile Jetha akumbulula, njalyendekesele mu mbunge yange ngwange: ‘Cikeco bene cikumbululo cinjinashakele kwendeka. Ngwe njinemikile liboko ngwe njakumbulula.’ Njashangumukile kulibwahesela bikumbululo. Ngeci yange na bandolome bange babali na bandokazi bange babali twashangumukile kushwena kuyehi na Yehova. Co mu 1941 banjimbwitikile.

Njicili na kwanuka byalingiwile ha ciwano cakama mu 1942 ku Cleveland, Ohio. Naanga yetu na binaanga bikwabo bya bandolome na bandokazi twakele mu matenti kuyehi na mwela hatwakele na kulingila ciwano. Co lalo kwakele bandolome na bandokazi mu bimbongi bya kutubakana 50 mu United States, baje bakele na kutolilila ku ciwano kupangesa mafoni. Ha simbu ei kwakele Nzita ya Kaye Yamucibali, co Bakaleho ba Yehova bakele na kubapakesa manene. Butsiki njakele na kumona cibunga ca bandolome bakundika bimota byabo kuyehi na matenti oku banashukumisa malaiti a bimota. Balizibasanene ngwabo mu mota na mota mukale munu uje anyunga butsiki bwoshe. Nga bitozi baija ku matenti bandolome bapandele kushukumisa malaiti a bimota byabo na kohyesa cilumo ca bimota mangana babatanganese. Co bandolome bakwabo bapandele kushatukilako mangana bakakwase. Njanangukile ngwange banu ba Yehova bapwa bakulibwahesela mu byuma byoshe. Njalizibile ngwange bananjinyungilila co njalalele mwamubwa.

Munjikanuka cije ciwano njikananguka ngwange banana kubakele na kuziba lyoba nambe kutewa cuma cimo. Bakulahelele manene Yehova na munga yendi. Kunjikebala mwanja wabo waubwa.

Kukwetile simbu yailaha kutunda ha cije ciwano banana bashangumukile bupainiya bwa simbu yoshe. Ngeci batolililile na kwaka manene mbunge ku biñanda bije byendekele manene ha cipangi ca simbu yoshe. Mutwakele na kwiluka kwimbo banana bendekele ngwabo: “Njishaka kutwalelelaho kulinga bupainiya, oloni kunjasa mwafwa njili na bipangi byabingi bya kulinga bya ha njibo.” Batulombele ngwabo tubakwase, co twatabele kubakwasa. Ngeci, batulekele ngwabo umo na umo wetu ajelese mulili umo nambe ibali mutondo simbu kanda tulye. Mutwakele na kuya ku sikola banana bakele na kumona ngwabo njibo inajele mwamubwa asinoni baye mu lihya. Kubatuyengwile nameme bapwile bakuzezama simbu yoshe. Bakele na kutwana bukwasi butwatondele simbu yoshe. Bisimbu bimo mutwakele na kulembuka ku sikola, twakele na kuya na banana mu lihya. Oku kwatukwasele tuzibisise byalibungila mu cipangi ca bupainiya.

Njashangumukile bupainiya munjakele na myaka 16. Batate te keti bakaleho ha simbu ei, oloni bakele mbunge ku ngila injakele na kwambulwilamo. Litangwa limo butsiki, njalekele batate ngwange njineseka kutonda bilongesa bya Mbimbiliya oloni kunjawanene munu wa kulilongesa nendi. Njabehwile ngwange: “Kuma kumushaka njililongese neni Mbimbiliya ndi?” Munima ya kusinganyekesesaho kamandondo, batabele kulilongesa nange. Ngeci, cilongesa cange ca Mbimbiliya ca kulibanga capwile batate. Njalizibile manene kubezika.

Njalilongesele nabo libulu lya “The Truth Shall Make You Free.” Kutwalelelaho kulilongesa na batate, kwanjikwasele njipwe muka-kulilongesa Mbimbiliya wamubwa na mulongesi wamubwa. Cakumwenako, litangwa limo butsiki mutwakele na kulilongesa, munima ya kutanda paragirafu imo batate bendekele ngwabo: “Njazibi bilinakwendeka eli libulu, oloni uzibuka bati ngwobe lili na kwendeka busunga?” Kunjalibwaheselele kukumbulula eci cihula, ngeci njabalekele ngwange: “Kunjasa kukumbulula eci cihula simbu ino , oloni simbu ikwabo mutukalilongesa njakumikumbulula.” Co njalingile ngoco. Njatondesesele bukaleho buje bumwesa ngwabwo byuma bitwakele na kulilongesa byapwile bya busunga. Kutundaho, njalilongesele kutondesesa na kulibwahesela mwamubwa simbu kanda tulilongese. Kulinga ngoco, kwanjikwasele njipwe muka-kulilongesa Mbimbiliya wamubwa na kukwasa batate bakole ku sipilitu. Batate bapangesele byuma bibakele na kulilongesa, ngeci mu 1952 babambwitikile.

Munjakele na myaka 17 njatundile ha njibo. Ha simbu ei Jetha a wapwile kamishinali, co Don bamulanyele kukapangela ha Betheu. Boshe bazemene bipangi byabo, co oku kwanjishongangeyeye manene. Ngeci, njashulisilile mapapelo a kulomba kukapangela ha Betheu na kuya ku sikola ya Giliyadi, co njabandamenene Yehova anjitume kunjikapangela. Bika byatundilemo? Mu 1946, banjilanyele kukapangela ha Betheu.

Ha myaka yaingi injinakala ha Betheu, njinapanga bipangi byabingi bya kuliseza-seza. Oku kwanjilingisa njililongese byuma byabingi. Njinakwasa mu cipangi ca kupanga mabulu na cipangi ca kukwata bimbongo ha myaka 75. Njalilongesele mwakulandela byuma bibatondele ha munango na kubituma ku mitambela ya kuliseza-seza. Co lalo njili na kulikuwa byakulya bya ku sipilitu bitukatambula ha Betheu kwitila mu kulemesa kwa mutondo na biñanda bikwabo.

Njalilongesele lalo bimo kuli shongo yange Karl uje wezile na kupangela ha Betheu mu 1947. Wapwile muka-kulilongesa Mbimbiliya na mulongesi wamubwa. Simbu imo wanjikwasele manene mu banjilombele kwendeka ñanda ha Betheu. Njalekele Karl ngwange njinakungulula  biñanda byabingi bya kupangesa mu ñanda yange, oloni kunjizibuka mwamubwa mwakubipangesela. Karl wanjihwile ngwendi: “Joel mutwe wa ñanda yobe uka?” Bwasi-bwasi njanangukile byakele na kulumbununa. Njapandele kupangesa lika byuma byabindondo mangana njase kwendeka mwamubwa ñanda yange. Kunjikebala byuma byanjilongesele.

Tunapande kulifwita kwambulula. Nga tulinga ngoco, co tupwa bakubwahelela. Litangwa limo mangwezi ku Bronx mu New York kwalingiwile byuma bimo bije kunjikebala. Nange na ndolome umo twendelele munakazi uje watambwile Kaposhi ka Kukengela na Toneni. Twalizimbwile yetu babenya na kwendeka ngwetu: “Ano mangwezi tuli na kukwasa banu balilongese biñanda bya mu Mbimbiliya bije bibakwasa bakale na lilabelelo.” Co uje munakazi wakumbulwile ngwendi: “Nga mushaka kwendeka bya mu Mbimbiliya, co kobeleni.” Twatandele na kusimutwiya ha bisoneka byabingi bije byendeka bya Bumwene bwa Njambi na bya kaye kakaha. Byuma bitwasimutwiiye byamushongangeyeye manene, co calumingo cateleko walanyele na babusamba bendi babangi mangana twakulilongesele hamo nabo. Mu kwita kwa simbu uje munakazi na munalume wendi bapwile Bakaleho ba Yehova.

Ha Myaka 10, njatondele munakazi wa kulyambata nendi, co njamuwanene. Bika byanjikwasele njiwane munakazi wamubwa? Njalombelele na kusinganyekesesa ha cihula eci, ‘Bika bitukalinga munima ya kulyambata?’

Munima ya ciwano cakeleko mu 1953 ku Yankee Stadium, njaliwanene na ndokazi wa lizina lya Mary Aniol. Mary na Jetha bakobelele hamo kilasi yamucibali ya sikola ya Giliyadi, co bakele na kupangela hamo cipangi ca bumishinali. Mary wabwahelelele manene kunjileka bya cipangi ca bumishinali calingile mu Caribbean na bilongesa bya Mbimbiliya byabingi byatwamenenene ha myaka yaingi. Mutwashangumukile kulizibuka twanangukile ngwetu twakele na bilengo bya kulifwa. Cizemo cetu cakolele, co twalyambatele mu April 1955. Mary wapwile bwana bwakutunda kuli Yehova, co wanjimwesele mwanja waubwa. Wapangele cipangi coshe-coshe cibamwanene mu kubwahelela. Wakele na kupanga na nzili na kwaka bakwabo mbunge. Co simbu yoshe wakele bya Bumwene mu mutamba wakulibanga. (Mate 6:33) Twapangelele hamo mu cipangi ca kuzenguluka ha myaka itatu, co mu 1958 batulanyele kukapangela ha Betheu.

Njalilongesele byabingi kuli Mary. Cakumwenako, mutwalyambatele twayongwele kutandela hamo Mbimbiliya. Ngeci, twakele na kutanda mabesi 15 ha litangwa na litangwa. Mutwakele na kumanesa kutanda twakele na kusimutwiya ha bisoneka na kumona mutwasa kubipangesela mu kuyoya kwetu. Kakangi Mary wakele na kunjileka byalilongesele ku Giliyadi nambe mu cipangi cendi ca bumishinali. Byuma binjalilongesele kuli ikeye byanjikwasele njibwezelele ku butongwe bwange bwa kwendeka biñanda na kushongangeya bandokazi.—Prov 25:11.

Munakazi wange Mary watsile mu 2013. Njabandamena kukamumona mu kaye kakaha. Oloni ha simbu ino, njalyangwila kutwalelelaho kulilongesa bya Yehova na kumukulahela na mbunge yange yoshe. (Prov 3:5, 6) Kusinganyeka ha byuma bibakalikuwa banu ba Njambi mu kaye kakaha kukanjizembeleka na kunjilingisa njipwe wa kubwahelela. Mu kaye kakaha tukalilongesa byuma byabingi kuli Mulongesi wetu wakama Yehova. Njakandelelako manene ku byuma byoshe bya nanjilongesa Yehova na Ngozi yendi yananjimwesa ije kuyesi kutenguluka.