Kapositolo Paulu wasonekelele Timothi uje wapwile mukulunu ngwendi: “Njikushika manene ku mesho a Njambi na Kristu Yesu na tungelo babanangula ngwange wononoke awa mashiko kwa kujeneka kutala munu ku mesho nambe kukala na kangu.”—1 Timo 5:21.

Tungelo muka babanendeka ku mukanda wa 1 Timothi 5:21? Aba tungelo kubesi ha cibunga ca baje bakupwa 144,000. Mwafwa Paulu mwasonekelele Timothi ou mukanda, bakubwabesa boshe te kanda bashangumuke kusanguka na kuya mwilu. Tupositolo na bakubwabesa bakwabo ha simbu ei te kanda bakale na mibila ya sipilitu. Ngeci, aba “tungelo babanangula” kubalumbununa bakebo.—1 Kori 15:50-54; 1 Tesa 4:13-17; 1 Iwano 3:2.

Co lalo, aba “tungelo babanangula” kubatalesa ku tungelo baje bapokwele mashiko a Njambi ha simbu ya Libazi lya Nowa. Mwafwa aba tungelo ba mu simbu ya Libazi lya Nowa balikwatasanene na Satana, co banapu badimona na bitozi ba Yesu. (Gene 6:2; Luka 8:30, 31; 2 Pita 2:4) Kulutwe Yesu akombila aba badimona mu mbulu ha myaka 1,000, kutundaho akabanyongesela hamo na Satana.—Juda 6; Kujo 20:1-3, 10.

Cisholoka aba “tungelo babanangula” banendeka Paulu, bapwile tungelo baje bononokele “Njambi na Yesu Kristu.”

Mwilu mwakala makulukazi amangi a tungelo ba kulongwa. (Hebe 12:22, 23) Ngeci, kutwapandele kusinganyeka ngwetu tungelo boshe bakapanga bipangi bya kulifwa ha simbu imo. (Kujo 14:17, 18) Cakumwenako, Yehova watumine kangelo umo mangana akatsiye maswalale ba baAsilya bakupwa 185,000. (2 Vimye 19:35) Oloni tungelo babangi hamo banabana cipangi ca ‘kutundisa byuma byoshe bije bitanwisa banu na kutundisa baka-kupokola mashiko mu Bumwene bwendi.’ (Mate 13:39-41) Tungelo bakwaboco, hamo “bakakungulwila hamolika banu bendi baje babanangula” na kubatwala mwilu. (Mate 24:31) Co lalo bamo banabashiki mangana ‘batunyungilile mu bingila byetu byoshe.’—Samu 91:11; Mate 18:10; Esekeseni Mateu 4:11; Luka 22:43.

Cisholoka,“tungelo babanangula” baje babanendeka ku mukanda wa 1 Timothi 5:21 bakebo banabana cipangi ca kunyungilila cikungulukilo. Oku ku mukanda, Paulu wanangwile bakulunu ngwendi bake manene mbunge ku cipangi cabo. Co lalo wanangwile cikungulukilo citwaleleleho kusingimika bakulunu mu cikungulukilo. Paulu wendekele ngwendi bakulunu banapande kupanga mwamubwa cipangi cabo na “kujeneka kutala munu ku mesho nambe kukala na kangu,” co kubapandele kwangula byakulinga kwakujeneka kusinganyekesesaho. Paulu wabanene cinangulo ca seho, mwendekele ngwendi bakulunu banapande kupangela mwamubwa bandolome na bandokazi babo mwafwa “mesho a Njambi na Kristu Yesu na tungelo babanangula” ali na kumona mubali na kunyungilamo cikungulukilo. Ngeci, tungelo bamo bali na cipangi ca kukwasa cikungulukilo. Co lalo bakanyungilila banu ba Njambi na kubakwasa mu cipangi ca kwambulula na kutwala muzimbu kuli Yehova kwesekesa nomwo mucili na kwendelela cipangi.—Mate 18:10; Kujo 14:6.